|
25.9.2018 |
GA |
Iris Oifigiúil an Aontais Eorpaigh |
19 |
Rún ó Thionól Parlaiminteach Euronest maidir le dul i ngleic le saothar neamhfhoirmiúil agus neamhdhearbhaithe agus an tslándáil shóisialta d'fhostaithe san Aontas Eorpach agus i dtíortha Chomhpháirtíocht an Oirthir a fheabhsú
(2018/C 343/04)
TÁ TIONÓL PARLAIMINTEACH EURONEST,
|
— |
ag féachaint don na Comhaontuithe Comhlachais (CCanna) idir an tAontas Eorpach agus an Mholdóiv, an tSeoirsia agus an Úcráin, faoi seach, don Chomhaontú Comhpháirtíochta Cuimsitheach Feabhsaithe (CEPA) leis an Airméin, agus go háirithe do na caibidlí de na comhaontuithe sin maidir le trádáil agus forbairt inbhuanaithe agus maidir le fostaíocht, beartas sóisialta agus comhdheiseanna, |
|
— |
ag féachaint don Chonradh ar an Aontas Eorpach, go háirithe ina bhrollach agus Airteagal 3 agus Airteagal 6 de, |
|
— |
ag féachaint don Chonradh ar Fheidhmiú an Aontais Eorpaigh (CFAE), agus go háirithe Airteagail 6, 9, 145, 151, 152, 153, 154, 156, 159 agus 168 de, |
|
— |
ag féachaint don Chairt um Chearta Bunúsacha an Aontais Eorpaigh, |
|
— |
ag féachaint don Choinbhinsiún Eorpach um Chearta an Duine, |
|
— |
ag féachaint do Chairt Shóisialta na hEorpa an 3 Bealtaine 1996, go háirithe do Chuid I agus do Chuid II, Airteagal 3 de, |
|
— |
ag féachaint do Chód Eorpach Slándála Sóisialta 1964 agus do Chód leasaithe 1990, |
|
— |
ag féachaint do Rialachán (CE) Uimh. 883/2004 ó Pharlaimint na hEorpa agus ón gComhairle an 29 Aibreán 2004 maidir le comhordú na gcóras slándála sóisialta (1) agus don Choinbhinsiún Eorpach um Shlándáil Shóisialta (ETS Uimh. 078), |
|
— |
ag féachaint d'fhógairt Cholún Eorpach na gCeart Sóisialta i mí na Samhna 2017 agus do rún ó Pharlaimint na hEorpa an 19 Eanáir 2017 maidir le Colún Eorpach na gCeart Sóisialta (2),. |
|
— |
ag féachaint do Choinbhinsiúin agus do Mholtaí Uimh. 81, 102, 129, 155, 187, 197, 202 agus 204 ón Eagraíocht Idirnáisiúnta Saothair (EIS), chomh maith lena Chlár Oibre um Obair Chuibhiúil, |
|
— |
ag féachaint don Dearbhú Comhpháirteach ó Chruinniú Mullaigh Chomhpháirtíocht an Oirthir, 24 Samhain 2017 sa Bhruiséil agus don 20 Sprioc Insoláthartha don bhliain 2020 agus don ollstruchtúr athbhreithnithe a glacadh agus atá i gceangal leis, |
|
A. |
de bhrí, i gcomhréir le Airteagal 3 de CAE, gur mian leis an Aontas Eorpach oibriú ar son fhorbairt inbhuanaithe na hEorpa, dírithe ar lánfhostaíocht agus dul chun cinn sóisialta, agus leibhéal ard cosanta agus feabhsú ar cháilíocht an chomhshaoil; de bhrí gur fhógair AE Colún Eorpach na gCeart Sóisialta mar fhreagra ar na dúshláin atá ag dul i méid i réimsí na slándála sóisialta agus chosaint shaoránaigh AE; de bhrí gurb ann do acquis sóisialta de chuid AE atá bunaithe ar ionstraimí dlí náisiúnta, idirnáisiúnta, agus ionstraimí dlí de chuid AE, go háirithe coinbhinsiúin EIS agus Chomhairle na hEorpa, a chumhdaíonn de ghnáth cearta a bhaineann go bunúsach le conarthaí fostaíochta, dálaí oibre nó le rochtain ar leas; |
|
B. |
de bhrí go leagtar amach i gCairt um Chearta Bunúsacha an Aontais Eorpaigh cearta atá ábhartha go sonrach d'oibrithe a bhíonn á bogadh laistigh de AE nó isteach ann, go háirithe dínit an duine (Airteagal 1), toirmeasc ar sclábhaíocht agus ar shaothar éignithe (Airteagal 5), an tsaoirse chun slí bheatha a roghnú agus an ceart chun obair a dhéanamh (Airteagal 15), neamh-idirdhealú (Airteagal 21), an ceart chun faisnéise agus comhairliúcháin (Airteagal 27), an ceart chun comhargántaíochta agus chun gníomhaíocht chomhchoiteann (Airteagal 28), an ceart chun rochtain a fháil ar sheirbhís socrúcháin (Airteagal 29), cosaint i gcás ina dtarlaíonn dífhostú neamh-inleithscéil (Airteagal 30), dálaí oibre cothroma agus córa (Airteagal 31), toirmeasc ar leanaí a bheith ag obair agus cosaint daoine óga ag an obair (Airteagal 32), slándáil shóisialta agus cúnamh sóisialta (Airteagal 34), an ceart chun cúram sláinte (Airteagal 35), an ceart chun leigheas éifeachtach agus triail chóir a fháil (Airteagal 47); |
|
C. |
de bhrí nach bhfuil aon sásra ceangailteach ann maidir le comhar trasteorann idir na húdaráis ábhartha i mBallstáit AE chun aghaidh a thabhairt ar shaincheisteanna a bhaineann le hobair neamhdhearbhaithe; de bhrí gur bunaíodh an tArdán Eorpach chun dul i ngleic le hobair neamhdhearbhaithe (ardán UDW) i mBealtaine 2016 agus é d'aidhm aige dea-chleachtais agus faisnéis a mhalartú maidir leis an tsaincheist sin agus comhar idir na Ballstáit a spreagadh; |
|
D. |
de bhrí go bhfuil treoir nua maidir le dálaí oibre trédhearcacha agus intuartha molta ag an gCoimisiún; |
|
E. |
de bhrí gur thíolaic an Coimisiún togra le haghaidh moladh ón gComhairle maidir le rochtain ar chosaint shóisialta d'oibrithe agus do dhaoine féinfhostaithe; |
|
F. |
de bhrí gur fhógair an Coimisiún go mbunófaí Údarás Eorpach Saothair chun a chinntiú go gcuirfear rialacha AE maidir le soghluaisteacht oibrithe i bhfeidhm; de bhrí gur fhógair sé freisin go bhfuil sé beartaithe aige Uimhir Shlándála Sóisialaí Eorpach a thabhairt isteach; |
|
G. |
de bhrí go bhfuil impleachtaí forleathana ag beartas comharsanachta na hEorpa, go háirithe na Limistéir Dhoimhne Chuimsitheacha Shaorthrádála (LDCSanna) leis an tSeoirsia, le Poblacht na Moldóive agus leis an Úcráin, agus ag socruithe taistil gan víosa do mhargadh an tsaothair agus do dhálaí sóisialta fostaithe i mBallstáit AE agus i dtíortha Chomhpháirtíocht an Oirthir (EaP); de bhrí go bhfuil comhar idir comhlachtaí náisiúnta faireacháin agus forfheidhmithe saothair de dhíth ar ghnó trasteorann chun cur chun feidhme na reachtaíochta atá ann faoi láthair a áirithiú; |
|
H. |
de bhrí go gcuireann dífhostaíocht, an t-éilliú agus drochrialachas, agus coinbhleachtaí foréigneacha i gcomharsanacht AE iallach ar dhaoine a mbailte a fhágáil agus obair a fháil pé áit is féidir leo, lena n-áirítear ar an gcoigríoch; de bhrí gur mó seans go mbeidh dídeanaithe agus inimircigh ina n-oibrithe neamhdhearbhaithe gan cosaint shóisialta agus gurb iondúil go bhfostaítear iad chun obair nach bhfuil gá le scileanna di a dhéanamh; de bhrí gurb iad dídeanaithe agus imircigh, go háirithe mná, na dreamanna is leochailí i margadh an tsaothair agus sa tsochaí ina hiomláine; |
|
I. |
de bhrí go raibh tionchar forleathan ag iarmhairtí sóisialta na géarchéime airgeadais agus eacnamaíche domhanda agus ag na próisis chlaochlaithe i mBallstáit AE agus tíortha EaP, ó dhífhostaíocht i measc na n-óg agus dífhostaíocht fhadtéarmach go neamhionannas agus bochtaineacht atá ag dul i méid; de bhrí gurb iad na hiomlaoidí sin, ar fothoradh ar bhearta déine iad go minic, is siocair le hathruithe i gcórais slándála sóisialaí Bhallstáit AE agus na dtíortha comharsanachta as ar tháinig caighdeáin laghdaithe, lena n-áirítear i réimsí an chúraim sláinte agus na bpinsean; de bhrí gur tháinig dírialáil agus léirscaoileadh as leasuithe ar an gcód saothair, ach nár laghdaíodh an geilleagar neamhfhoirmiúil dá mbarr; |
|
J. |
de bhrí go mbíonn gné thrasteorann ag obair neamhdhearbhaithe go minic; de bhrí go bhféadfadh cineál na hoibre neamhdhearbhaithe a bheith éagsúil ó thír go chéile, ag brath ar an gcomhthéacs eacnamaíoch, riaracháin agus sóisialta; de bhrí go bhfuil an reachtaíocht náisiúnta maidir le hobair neamhdhearbhaithe agus na sainmhínithe a úsáidtear ar an leibhéal náisiúnta éagsúil ó thír go tír; de bhrí gur cheart bearta chun dul i ngleic le hobair neamhdhearbhaithe a chur in oiriúint chun na héagsúlachtaí sin a chur san áireamh; |
|
K. |
de bhrí gurb í an deis ar obair neamhdhearbhaithe a fháil ceann de na tosca tarraingthe a spreagann inimirce neamhdhlithiúil; de bhrí gur minic a thairgtear obair neamhdhearbhaithe faoi choinníollacha nach bhfuil inghlactha go sóisialta agus a sháraíonn rialacháin sláinte agus sábháilteachta nó comhaontuithe náisiúnta comhchoiteanna do chónaitheoirí a bhfuil stádas neamhrialta nó neamhrialáilte acu, ar daoine iad atá lasmuigh den chóras slándála sóisialta de ghnáth; |
|
L. |
de bhrí go bhfuil margaí an tsaothair agus sochaithe ag athrú i mBallstáit AE agus i dtíortha EaP araon, agus go bhfuil dúshláin shuntasacha a eascraíonn as an réabhlóid dhigiteach, patrúin oibre atá ag athrú agus forbairtí déimeagrafacha ag cruthú dúshláin agus deiseanna nua do mhargadh an tsaothair; |
|
M. |
de bhrí, in ainneoin gur coir é trom-dhúshaothrú saothair faoi dhlí AE agus faoi dhlí Bhallstáit AE, gur ann do chásanna ina nglactar le dúshaothrú in earnáil na hoibre baile, mar shampla i róil a bhaineann le glantachán agus aire a thabhairt do leanaí nó do dhaoine aosta; |
Barúlacha Ginearálta
|
1. |
Ag cur i bhfios go láidir gur dúshlán comhpháirteach do Bhallstáit AE agus tíortha EaP iad an comhrac i gcoinne obair neamhdhearbhaithe agus bearta chun slándáil shóisialta a ráthú agus, dá bharr sin, gur cheart iarrachtaí comhpháirteacha agus comhar comhpháirteach a dhéanamh ina leith; |
|
2. |
Ag aithint gur dúshlán casta agus deacair í an obair neamhdhearbhaithe, go háirithe do thíortha atá buailte ag dálaí socheacnamaíocha deacra ina bhfuil leibhéal ard dífhostaíochta, bochtaineacht fhorleathan agus eisiamh sóisialta, drochthimpeallacht don ghnó agus easpa spás fioscach; ag cur i bhfios go láidir, mar sin féin, go bhfuil iarmhairtí tromchúiseacha ag an obair neamhdhearbhaithe do shochaithe i gcoitinne, lena n-áirítear ioncam a chailleann na húdaráis chánach náisiúnta, go mbaintear an bonn de chistiú agus dáileadh leasa shóisialta, dálaí oibre contúirteacha agus rioscaí córasacha a bhaineann le sáruithe ar chearta bunúsacha oibrithe, easpa ionadaíocht chomhchoiteann agus iomaíocht éagórach idir gnólachtaí; ag cur i dtreis, dá bharr sin, go bhfuil gá le straitéisí náisiúnta atá stuama agus comhtháite agus le comhar idirnáisiúnta chun an t-athrú ón ngeilleagar neamhfhoirmiúil chuig an ngeilleagar foirmiúil a éascú; |
|
3. |
Ag cur in iúl gur dona leis, dá bharr sin, nár dhírigh beartas Chomhpháirtíocht an Oirthir go nuige seo ar an líon mór fadhbanna a bhaineann le hobair neamhdhearbhaithe, ar an athrú ó gheilleagar agus obair neamhfhoirmiúil go foirmiúil, agus ar shlándáil shóisialta na n-oibrithe; |
|
4. |
Ag cur in iúl gur díspreagadh i leith obair neamhdhearbhaithe é córas riaracháin phoiblí agus córas breithiúnach ina bhfuil iontaoibh ag na saoránaigh; ag cur i dtreis, dá bharr sin, go bhfuil an smacht reachta, dea-rialachas agus scriosadh iomlán an éillithe ríthábhachtach don athrú ó gheilleagar neamhfhoirmiúil go geilleagar foirmiúil; |
|
5. |
Ag cur a imní in iúl faoi leibhéal na dífhostaíochta i measc an aosa óig agus líon na ndaoine óga nach bhfuil i mbun oideachais, fostaíochta nó oiliúna (NEETanna) in AE agus i dtíortha EaP, agus leibhéal na ndaoine óga atá bainteach leis an ngeilleagar dubh; ag cur i bhfios go láidir gurb iad na daoine óga a thabharfaidh oidhreacht chultúrtha, eacnamaíoch agus shóisialta tíre ar aghaidh amach anseo agus gur cheart tosaíocht a dhéanamh anois de chruthú post do dhaoine óga agus de bhearta a spreagann iad siúd atá ag obair go neamhdhearbhaithe chun bogadh isteach sa gheilleagar dearbhaithe; ag áitiú gur cheart do Chreat Airgeadais Ilbhliantúil AE (CAI) agus do chomharba na hIonstraime Eorpaí um Chomharsanacht (ENI) tacaíocht bhreise a thabhairt don fhostaíocht don aos óg sa gheilleagar oifigiúil trí úsáid a bhaint as dea-chleachtais arna bhforbairt faoin Tionscnamh um Fhostaíocht don Aos Óg; |
|
6. |
Ag spreagadh forbairt córais trína ndéanfaí cáilíochtaí a fhaightear i dtíortha EaP a aithint in AE; |
|
7. |
Ag athdhearbhú na tábhachta atá le beartais neamhfhulaingthe i soláthar poiblí agus in iasachtú ag institiúidí idirnáisiúnta airgeadais (an Banc Domhanda, an Chorparáid Airgeadais Idirnáisiúnta, an Banc Eorpach Athfhoirgníochta agus Forbartha agus an Banc Eorpach Infheistíochta) maidir le hobair neamhdhearbhaithe, lena n-áirítear slabhraí fochonraitheoirí agus soláthair; |
Bearta gearrthéarmacha
|
8. |
Á iarraidh ar Bhallstáit AE agus ar thíortha EaP feasacht phoiblí maidir leis an ngá práinneach atá le bearta a dhéanamh a mhéadú agus níos mó a dhéanamh ina n-iarrachtaí maidir le dul i ngleic le hobair neamhdhearbhaithe, lena n-áirítear feachtais feasachta poiblí i gcomhar leis na comhpháirtithe sóisialta; á iarraidh ar an gCoimisiún tacú le Ballstáit AE agus le tíortha EaP chun soláthar éifeachtach faisnéise a áirithiú maidir le himpleachtaí na hoibre neamhdhearbhaithe d'oibrithe, do ghnólachtaí agus don tsochaí, agus maidir le cearta oibrithe a eascraíonn as na noirm idirnáisiúnta saothair atá cumhdaithe i gcoinbhinsiúin EIS, lena n-áirítear nósanna imeachta gearáin agus achomhairc; ag cur i bhfios go láidir gur gá feasacht a mhéadú i measc an phobail i gcoitinne gur féidir teacht i dtír go trom ar dhaoine atá ag obair go neamhdhearbhaithe agus neamhfhulaingt ar dhúshaothrú oibrithe den sórt sin, lena n-áirítear dúshaothrú orthu i dteaghlaigh phríobháideacha, a chur chun cinn; |
|
9. |
Ag moladh do AE agus do thíortha EaP nach bhfuil sé déanta go fóill acu coinbhinsiúin agus moltaí ILO ábhartha a dhaingniú agus a chur chun cinn i gcleachtas, lena n-áirítear Uimh. 94 (Coinbhinsiún maidir le Clásail Saothair i gConarthaí Poiblí), Uimh. 102 (an Coinbhinsiún maidir le Caighdeáin Íosta na Slándála Sóisialta), Uimh. 144 (an Comhairliúchán Trípháirteach), Uimh. 155 (Sláinte agus Sábháilteacht ag an Obair) agus a Phrótacal 2002, Uimh. 167 (an Coinbhinsiún maidir le Sábháilteacht agus Sláinte san Fhoirgníocht), Uimh. 177 (an Coinbhinsiún maidir le hObair sa Bhaile), Uimh. 184 (an Coinbhinsiún maidir le Sábháilteacht agus Sláinte sa Talmhaíocht), Uimh. 187 (an Coinbhinsiún maidir le cur chun cinn an chreata um shábhailteacht agus sláinte cheirde), Uimh. 189 (Oibrithe Tí), Uimh. 202 (an Tionscnamh um Bunchosaint Shóisialta), Uimh. 204 (Aistriú ón ngeilleagar neamhfhoirmiúil chuig geilleagar foirmiúil) agus Uimh. 205 (Fostaíocht Thairbhiúil agus Obair Chuibhiúil le haghaidh na Síochána agus Solúbthachta); |
|
10. |
Den tuairim gur cheart i bhfad níos mó béime a chur ar chur chun feidhme forálacha a bhaineann leis na caibidlí a bhaineann le “trádáil agus le forbairt inbhuanaithe” agus le “fostaíocht, beartas sóisialta agus comhdheiseanna” de na comhaontuithe déthaobhacha idir AE agus EaP; á iarraidh ar an gCoimisiún faisnéis chuimsitheach a chur ar fáil maidir le cur chun feidhme na bhforálacha ábhartha sna comhaontuithe comhlachais/LDCSanna leis an Moldóiv, an tSeoirsia, agus an Úcráin i gcomhthéacs na dtuarascálacha bliantúla ar chur chun feidhme, chomh maith le dul chun cinn cur chun feidhme na bhforálacha ábhartha de CEPA idir AE agus an Airméin i ndiaidh a dhaingnithe; |
|
11. |
Á iarraidh go mbunófaí faoi ollstruchtúr iltaobhach EaP sásra comhair institiúideach chun dul i ngleic le hobair neamhdhearbhaithe; ag moladh go mbunófaí (fo)ardán iltaobhach faoin Ard-Stiúrthóireacht um Fhostaíocht, Gnóthaí Sóisialta agus Uilechuimsitheacht a d'fhéadfadh ionchur maidir le gnéithe sóisialta agus oibre a bhaineann le trádáil agus comhar eacnamaíoch a chur ar fáil do chomhlachtaí EaP, lena n-áirítear Ardán 2; |
|
12. |
Den tuairim go bhféadfaí sásra atá bunaithe ar mhalartú dea-chleachtas agus feabhsú bailiú sonraí de réir shampla ardán UDW a bhunú; ag cur i bhfios gur cheart sásra den sórt sin an creat a chur ar fáil chun na tosca, saintréithe, cúiseanna agus dálaí a mheasúnú a bhaineann le hobair neamhfhoirmiúil agus neamhdhearbhaithe agus drochdhálaí oibre i gcomhthéacs náisiúnta agus trasteorann, agus chun dea-chleachtais a mhalartú ar conas slándáil shóisialta na n-oibrithe a fheabhsú agus conas obair chuibhiúil agus cosaint shóisialta do chách a chur chun cinn; |
|
13. |
Á iarraidh ar na Ballstáit agus ar thíortha EaP comhaontuithe déthaobhacha maidir le malartú sonraí agus comhar riaracháin i dtaca le hobair trasteorann neamhdhearbhaithe a thabhairt i gcrích; ag cur in iúl go láidir gur gá uirlisí praiticiúla a fhorbairt chun foirmeacha agus líonraí eagraithe oibre neamhdhearbhaithe trasteorainn a chomhrac; |
|
14. |
Ag cur fáilte roimh ghlacadh Cholún Eorpach na gCeart Sóisialta; á iarraidh ar Bhallstáit AE agus ar thíortha EaP cainteanna a bheith acu ar a gcéad chruinniú ardleibhéil eile maidir leis an mbeartas i dtaobh Chomhpháirtíocht an Oirthir a oiriúnú i bhfianaise Cholún Eorpach agus comhchreat a fhorbairt chun anailís a dhéanamh ar an gcaoi a bhfuil ag éirí le cur chun feidhme na gceart sóisialta bunúsach, ag baint feidhm as na 20 prionsabal de Cholún Eorpach na gCeart Sóisialta agus an táscaire sóisialta mar thagairt, agus an sprioc fhadtéarmach ann go gcomhlíonfadh tíortha EaP na 20 prionsabal sin; |
|
15. |
Den tuairim go bhféadfadh ardán UDW a bunaíodh rannchuidiú le comhar méadaithe, ag tabhairt saineolaithe as AE agus as tíortha EaP le chéile; á iarraidh ar AE machnamh a dhéanamh ar shásra a d'fhéadfadh a chur ar cumas tíortha nach Ballstáit iad páirt a ghlacadh i ngníomhaíochtaí Ardán UDW agus tairbhe a bhaint astu; |
|
16. |
Á iarraidh go mbeadh na cláir fostaíochta agus na cláir um chur chun cinn oibre cuibhiúla; |
|
17. |
Ag cur i dtreis go láidir go n-imríonn cigireacht saothair ról tábhachtach i gcosaint chearta na n-oibrithe, lena n-áirithítear sláinte agus sábháilteacht san ionad oibre, lena gcomhraictear timpeallachtaí oibre neamhshábháilte, lena gcuirtear cosc ar sháruithe ar rialacha cosanta fostaíochta agus lena gcuirtear fás eacnamaíoch atá cóir agus freagrach go sóisialta, a mhéid a chabhraíonn sé chun a áirithiú go n-íoctar tuarastail i ndáiríre agus go n-íoctar ranníocaíochtaí slándála sóisialta, agus dá bharr sin déantar ioncam cánach agus sreabhadh isteach airgid do chórais slándála sóisialta a mhéadú agus áirithítear go gcumhdaítear fostaithe i gcás breoiteachta, timpistí san ionad oibre agus pinsean; ag cur in iúl gur údar imní dó é gur lagaíodh na húdaráis cigireachta saothair nó gur cuireadh deireadh leo mar thoradh ar bhearta déine agus ar phróisis aistrithe; á iarraidh, go háirithe, ar thíortha EaP an iomlaoid sin a chur ina ceart agus cistiú, foirne agus oiliúint leordhóthanach a chur ar fáil do na húdaráis náisiúnta cigireachta saothair; á iarraidh ar an gCoimisiún tacú le hoiliúint trasteorann agus cineálacha eile comhair idir na húdaráis náisiúnta cigireachta saothair; |
|
18. |
Ag tabhairt dá aird an ról tábhachtach a imríonn comhpháirtithe sóisialta ina lán Ballstát de chuid AE maidir le hobair neamhdhearbhaithe a chomhrac; ag cur i dtreis go láidir gur gá idirphlé sóisialta agus comhairliúchán le comhpháirtithe sóisialta i dtíortha EaP a chur ar bun chun ról a thabhairt dóibh i bhfeabhas a chur ar dhálaí oibre, caighdeáin saothair agus cosaint shóisialta; |
|
19. |
Ag comhairliú d'údaráis náisiúnta i mBallstáit AE comhghuaillíochtaí náisiúnta intíre i gcoinne obair neamhdhearbhaithe sna réimsí is mó atá buailte, amhail tógáil, iompar, turasóireacht agus talmhaíocht, a spreagadh; |
|
20. |
Ag cur i dtreis go bhfuil ról tábhachtach ag na ceardchumainn maidir le hobair neamhdhearbhaithe a chomhrac agus oibrithe neamhdhearbhaithe a chosaint, mar is iad na ceardchumainn na chéad chomhlachtaí de ghnáth a fhaigheann eolas maidir le dálaí achrannacha, calaoiseacha, éagóracha nó neamhdhleathacha; ag tabhairt dá aire na ndeacrachtaí a bhíonn le sárú ag ceardchumainn i dtíortha EaP, ó shrianta ar an tsaoirse comhlachais agus tionóil go bacainní a bhaineann le comhphlé sóisialta a chur chun cinn; á iarraidh ar Bhallstáit AE agus ar thíortha EaP na dálaí a bhfuil gá leo a chur ar fáil le gur féidir le ceardchumann gníomhú, agus á iarraidh ar an gCoimisiún Eorpach leanúint de thacaíocht a thabhairt dóibh; |
|
21. |
Ag moladh don lucht gnó in AE agus i dtíortha EaP a fhreagracht shóisialta chorparáideach a ghlacadh chuige féin chun obair neamhdhearbhaithe a chomhrac, lena n-áirítear i slabhraí soláthair; ag cur i gcuimhne dó go gcruthaíonn obair neamhdhearbhaithe iomaíocht éagórach sa mhargadh; |
|
22. |
Ag cur fáilte roimh bhunú Mheitheal Oibre 5 ar bheartais shóisialta agus saothair agus idirphlé sóisialta laistigh d'Fhóram na Sochaí Sibhialta san Oirthear; ag moladh sé gur cheart don mheitheal oibre sin rannchuidiú leis an bplé leanúnach faoi obair neamhdhearbhaithe a chomhrac trína rannchuidithe féin maidir le ról na sochaí sibhialta; |
|
23. |
Á iarraidh ar AE cuid den chúnamh a sholáthraítear do thíortha EaP, a chuirfear i bhfeidhm faoi ionstraimí airgeadais CAI iar-2020, a dhíriú ar an tacar casta saincheisteanna sin, lena n-áirítear tacaíocht d'fhorbairt institiúideach na gcóras iniúchta saothair, agus an t-idirphlé sóisialta agus acmhainneacht na gcomhpháirtithe sóisialta a neartú, lena n-áirítear ar leibhéal na hearnála, chomh maith le hidirphlé sibhialta agus an obair a dhéanann eagraíocht na sochaí sibhialta i gcoitinne; |
Bearta fadtéarmacha
|
24. |
Ag cur i dtreis go láidir gur cheart an t-aistriú ón ngeilleagar neamhfhoirmiúil chuig geilleagar foirmiúil a bheith mar chuid de straitéis fhadtéarmach níos leithne chun cruthú post struchtúrtha a mhéadú, cáilíocht post a fheabhsú agus rochtain ar thacaíocht fostaíochta a fheabhsú, comhrac i gcoinne dheighilt an lucht saothair, an t-éilliú a chomhrac, ranníocaíochtaí fioscacha agus sóisialta a dhaingniú, clúdach árachais shóisialta atá cuimsitheach a fhorbairt nó a mhéadú agus urláir cosanta sóisialta uilíocha a áirithiú i gcomhréir le Moladh Uimh. 202 ó EIS; |
|
25. |
Ag cur i dtreis go láidir go léiríonn an taithí a fuarthas, má thugtar cumhacht d'údaráis an reachtaíocht atá ann cheana a fhorfheidhmiú agus má chuirtear dreasachtaí ar fáil, amhail faoiseamh ó cháin ioncaim agus scéimeanna fóirdheontais atá dírithe ar phoist a thabhairt chun rialtachta, go mbeifear in ann obair neamhdhearbhaithe a iompú ina hobair dhearbhaithe; á iarraidh ar Bhallstáit AE agus ar thíortha EaP treochlár fadtéarmach le tagarmharcanna infhíoraithe a fhorbairt; |
|
26. |
Ag moladh do thíortha EaP cumais náisiúnta a fhorbairt chun obair neamhdhearbhaithe a chosc agus chun dul i ngleic le hobair neamhdhearbhaithe i gcomhar le rannpháirteachas leathan geallsealbhóirí, lena n-áirítear comhpháirtithe sóisialta agus eagraíochtaí neamhrialtasacha; |
|
27. |
Ag cur i dtreis go láidir gur féidir sochair na hoibre neamhdhearbhaithe a laghdú go héifeachtach trí chórais chánacha trédhearcacha agus córais chosanta sóisialta phoiblí atá inrochtana agus mealltach a fhorbairt; á iarraidh ar Ballstáit AE agus ar thíortha EaP straitéisí náisiúnta a fhorbairt a bheadh dírithe ar chórais chuimsitheacha slándála sóisialta a bhaint amach i gcomhréir le Moladh Uimh. 202 maidir le hurláir cosanta sóisialta ó EIS agus i gcomhréir le Coinbhinsiún Uimh. 102 maidir le slándáil shóisialta, d'fhonn cumhdach a leathnú chuig an daonra neamhurraithe sa gheilleagar neamhfhoirmiúil agus chun aghaidh a thabhairt go leordhóthanach ar shaincheist na hoibre neamhdhearbhaithe; |
|
28. |
Ag moladh do Bhallstáit AE agus do thíortha EaP comhaontuithe déthaobhacha a thabhairt i gcrích, go háirithe i gcás na dtíortha sin a bhfuil treocht maidir le sreafaí eisimirce agus inimirce ag tarlú iontu ar rud é a chruthaíonn obair neamhdhearbhaithe i ndeireadh na dála; |
|
29. |
Á iarraidh ar na Ballstáit agus tíortha EaP creat coiteann i gcomhair comhordú slándála sóisialta a fhorbairt, chun teidlíochtaí slándála sóisialta na n-oibrithe taistil a chosaint; |
|
30. |
Á threorú dá Chomh-Uachtaráin an rún seo a chur ar aghaidh chuig Uachtarán Pharlaimint na hEorpa, chuig an gComhairle, chuig an gCoimisiún, chuig an Leas-Uachtarán de chuid an Choimisiúin/Ardionadaí an Aontais do Ghnóthaí Eachtracha agus don Bheartas Slándála, chuig an tSeirbhís Eorpach Gníomhaíochta Seachtraí, agus chuig rialtais agus parlaimintí na mBallstát agus thíortha Chomhpháirtíocht an Oirthir. |
(1) IO L 166, 30.4.2004, lch. 1.
(2) Téacsanna a glacadh, P8_TA(2017)0010.