|
Il-Ġurnal Uffiċjali |
MT Is-serje L |
|
2024/2174 |
3.9.2024 |
REGOLAMENT TA’ IMPLIMENTAZZJONI TAL-KUMMISSJONI (UE) 2024/2174
tat-2 ta’ Settembru 2024
li jistabbilixxi r-regoli għall-applikazzjoni tar-Regolament (UE) 2024/573 tal-Parlament Ewropew u tal-Kunsill fir-rigward tal-format tat-tikketti għal ċerti prodotti u tagħmir li fihom gassijiet fluworurati b’effett ta’ serra u li jħassar ir-Regolament ta’ Implimentazzjoni tal-Kummissjoni (UE) 2015/2068
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2024/573 tal-Parlament Ewropew u tal-Kunsill tas-7 ta’ Frar 2024 dwar gassijiet fluworurati b’effett ta’ serra, li jemenda d-Direttiva (UE) 2019/1937 u li jħassar ir-Regolament (UE) Nru 517/2014 (1), u b’mod partikolari l-Artikolu 12(17) tiegħi,
Billi:
|
(1) |
Ir-Regolament (UE) 2024/573 fih rekwiżiti tat-tikkettar għal ċerti prodotti u tagħmir li fihom gassijiet fluworurati b’effett ta’ serra, jew li l-funzjonament tagħhom jiddependi fuq dawn il-gassijiet. |
|
(2) |
Ir-Regolament (UE) 2024/573 ħa post ir-Regolament (UE) Nru 517/2014 tal-Parlament Ewropew u tal-Kunsill (2) u biddel uħud mir-regoli dwar it-tikkettar għall-prodotti u t-tagħmir li fihom il-gassijiet fluworurati b’effett ta’ serra. Billi r-Regolament ta’ Implimentazzjoni tal-Kummissjoni (UE) 2015/2068 (3) stabbilixxa l-format tat-tikketti tal-prodotti u tat-tagħmir li fihom il-gassijiet fluworurati b’effett ta’ serra skont ir-Regolament (UE) Nru 517/2014, dak ir-Regolament ta’ Implimentazzjoni jenħtieġ li jiġi sostitwit ukoll. |
|
(3) |
Għal raġunijiet ta’ ċarezza, jixraq jiġi stabbilit il-kliem tal-informazzjoni li trid tingħata fuq it-tikketti msemmija fl-Artikolu 12(1) u (5) tar-Regolament (UE) 2024/573 u li jiġu stabbiliti rekwiżiti li jiżguraw il-viżibbiltà u l-leġġibbiltà ta’ dawk it-tikketti fir-rigward tat-tqassim u t-tqegħid tagħhom, filwaqt li jitqiesu r-restrizzjonijiet tal-ispazju fuq ċerti tipi ta’ prodotti. |
|
(4) |
Biex jiżguraw li tintuża tikketta unika għall-prodotti li fihom il-gassijiet fluworurati b’effett ta’ serra li huma soġġetti wkoll għar-Regolament (KE) Nru 1272/2008 tal-Parlament Ewropew u tal-Kunsill (4), b’mod partikolari għat-tikkettar tal-kontenituri bħaċ-ċilindri, it-tankijiet u l-bawżers tat-triq u ferrovjarji, l-informazzjoni tat-tikkettar stabbilita fir-Regolament (UE) 2024/573 jenħtieġ li tiġi indikata fit-taqsima għall-informazzjoni supplimentari fuq it-tikketta msemmija fir-Regolament (KE) Nru 1272/2008. |
|
(5) |
Għall-prodotti żgħar li jaqgħu fil-kamp ta’ applikazzjoni tal-punti (f) sa (h) tal-Artikolu 12(1) tar-Regolament (UE) 2024/573, jeħtieġ jiġu previsti modi prattikabbli biex l-informazzjoni meħtieġa titwassal lill-utenti, inkluż b’links leġibbli b’mod diġitali għall-informazzjoni msemmija fl-Artikolu 12(3), il-punti (b) u (c). Biex jitqiesu r-rekwiżiti speċifiċi tat-tikkettar tal-prodotti u tat-tagħmir għal użi mediċi fil-kamp ta’ applikazzjoni tad-Direttiva 2001/83/KE tal-Parlament Ewropew u tal-Kunsill (5) u tar-Regolamenti tal-Parlament Ewropew u tal-Kunsill (KE) Nru 726/2004 (6), (UE) 2019/6 (7) u (UE) 2017/745 (8) u stabbiliti f’dawk l-atti legali, jenħtieġ li jiġu previsti metodi addizzjonali kif l-informazzjoni meħtieġa tiġi ppreżentata lill-utenti fir-rigward ta’ dawk il-prodotti u t-tagħmir. |
|
(6) |
L-applikazzjoni ta’ dan ir-Regolament jenħtieġ li tiġi differita f’konformità mad-data tal-applikazzjoni tal-Artikolu 12 tar-Regolament (UE) 2024/573. |
|
(7) |
L-infurzar tad-dispożizzjonijiet stabbiliti f’dan ir-Regolament jenħtieġ li jqis il-proċessi regolatorji għat-tibdil tar-rekwiżiti eżistenti tat-tikkettar jew il-proċess tat-tikkettar mill-ġdid tat-tagħmir jew tal-prodotti li diġà tqiegħdu fis-suq tal-UE. |
|
(8) |
Il-miżuri previsti f’dan ir-Regolament huma f’konformità mal-opinjoni tal-Kumitat dwar il-gassijiet fluworurati b’effett ta’ serra, stabbilit bl-Artikolu 34 tar-Regolament (UE) 2024/573, |
ADOTTAT DAN IR-REGOLAMENT:
Artikolu 1
Format tat-tikketti
1. L-informazzjoni fuq it-tikketta għandha tidher b’mod ċar fuq l-isfond tat-tikketta u għandu jkollha daqs u spazju tali li tkun leġibbli b’mod ċar. Meta l-informazzjoni meħtieġa minn dan ir-Regolament tiżdied ma’ tikketta eżistenti, id-daqs tat-tipa ma għandux ikun iżgħar mid-daqs minimu tal-informazzjoni l-oħra fuq dik it-tikketta jew, kif rilevanti, fuq il-pjanċi tal-isem eżistenti, fuq tikketti jew fuljetti oħra b’informazzjoni dwar il-prodott.
2. It-tikketta kollha u l-kontenut tagħha għandhom jiġu ddisinjati b’mod li jiżgura li dawn jibqgħu f’posthom fuq il-prodott jew it-tagħmir u għandhom ikunu leġibbli faċilment f’kundizzjonijiet operattivi normali, fil-mument tat-tqegħid fis-suq u tul il-perjodu kollu meta l-prodott jew it-tagħmir ikun fih il-gassijiet fluworurati b’effett ta’ serra jew meta l-funzjonament tiegħu jkun jiddependi fuq dawn il-gassijiet.
3. It-tikketta għandha tinkludi l-kliem li ġej: “Fih gassijiet fluworurati b’effett ta’ serra”.
4. L-informazzjoni dwar il-piż tal-gassijiet fluworurati b’effett ta’ serra, meta meħtieġ, għandha tiġi espressa f’kilogrammi jew grammi u l-ekwivalenti tas-CO2 għandha tiġi espressa f’tunnellati, bil-valuri potenzjali tat-tisħin globali tal-gassijiet fluworurati b’effett ta’ serra kif elenkati fil-kolonna “GWP” fl-Annessi I, II u III tar-Regolament (UE) 2024/573.
5. Meta t-tagħmir ikun iċċarġjat minn qabel bil-gassijiet fluworurati b’effett ta’ serra jew meta l-funzjonament tiegħu jkun jiddependi fuq dawn il-gassijiet, u dawn il-gassijiet ikunu jistgħu jiġu miżjuda barra s-sit tal-manifattura u l-kwantità totali riżultanti ma tkunx definita mill-manifattur, it-tikketta għandha tinkludi l-kwantità ċċarġjata fis-sit tal-manifattura, jew il-kwantità li għaliha jkun iddisinjat it-tagħmir, u għandu jitħalla spazju fuq it-tikketta għall-kwantità miżjuda barra mis-sit tal-manifattura kif ukoll għall-kwantità totali riżultanti tal-gassijiet fluworurati b’effett ta’ serra li jrid idaħħal il-fornitur jew, meta applikabbli, l-installatur tat-tagħmir qabel ma t-tagħmir jibda jitħaddem.
6. Anki prodott, inkluż kontenitur, li jkun fih il-gassijiet fluworurati b’effett ta’ serra jew xi poliol mħallat minn qabel, għandu jiġi ttikettat skont ir-Regolament (KE) Nru 1272/2008, l-informazzjoni msemmija fl-Artikolu 12(3), (5) u (7) sa (15) tar-Regolament (UE) 2024/573, kif applikabbli, għandha tingħata fil-parti maħsuba għall-informazzjoni supplimentari fuq it-tikketta msemmija fl-Artikolu 25 tar-Regolament (KE) Nru 1272/2008.
7. Meta l-gassijiet fluworurati b’effett ta’ serra jkunu reklamati jew riċiklati jew maħsuba biex iservu għal ċerti użi f’konformità mal-Artikolu 12(7) sa (13) tar-Regolament (UE) 2024/573, it-tikketta fuq il-kontenitur għandu jkollha t-test li ġej, kif rilevanti:
|
(a) |
“Irriċikati 100%”: għall-gassijiet fluworurati b’effett ta’ serra rriċiklati li huma elenkati fl-Annessi I u II tar-Regolament (UE) 2024/573 li ma fihom l-ebda sustanza verġni; |
|
(b) |
“Reklamati 100%”: għall-gassijiet fluworurati b’effett ta’ serra reklamati li huma elenkati fl-Annessi I u II tar-Regolament (UE) 2024/573 li ma fihom l-ebda sustanza verġni jew, fil-każ tat-taħlitiet, li ż-żieda ta’ sustanzi verġni biex tiġi aġġustata l-kompożizzjoni tat-taħlita ma taqbiżx l-10% tal-massa tat-taħlita; |
|
(c) |
“Għall-qerda biss”: għall-gassijiet fluworurati b’effett ta’ serra li huma elenkati fl-Anness I tar-Regolament (UE) 2024/573 u mqiegħda fis-suq, magħmula disponibbli jew fornuti għall-qerda; |
|
(d) |
“Għall-esportazzjoni diretta barra mill-UE biss”: għall-gassijiet fluworurati b’effett ta’ serra li huma elenkati fl-Anness I tar-Regolament (UE) 2024/573 u fornuti minn produttur jew importatur lil impriża għal esportazzjoni diretta bil-massa barra mill-Unjoni; |
|
(e) |
“Għall-użu biss f’tagħmir militari”: għall-gassijiet fluworurati b’effett ta’ serra li huma elenkati fl-Anness I tar-Regolament (UE) 2024/573 u mqiegħda fis-suq, magħmula disponibbli jew fornuti għall-użu f’tagħmir militari; |
|
(f) |
“Għall-inċiżjoni/għat-tindif fl-industrija tas-semikondutturi biss”: għall-gassijiet fluworurati b’effett ta’ serra li huma elenkati fl-Annessi I u II tar-Regolament (UE) 2024/573 u mqiegħda fis-suq, magħmula disponibbli jew fornuti għall-inċiżjoni/għat-tindif fl-industrija tas-semikondutturi; |
|
(g) |
“Għall-użu biss bħala materjal tal-għalf”: għall-gassijiet fluworurati b’effett ta’ serra li huma elenkati fl-Anness I tar-Regolament (UE) 2024/573 u mqiegħda fis-suq, magħmula disponibbli jew fornuti għall-użu bħala materjal tal-għalf; |
|
(h) |
“Għall-produzzjoni tal-MDI biss”: għall-gassijiet fluworurati b’effett ta’ serra li huma elenkati fit-Taqsima 1 tal-Anness I tar-Regolament (UE) 2024/573 u mqiegħda fis-suq, magħmula disponibbli jew fornuti għall-manifattura tal-MDI. Meta l-kontenituri jkun fihom il-gassijiet fluworurati b’effett ta’ serra msemmija fl-ewwel subparagrafu, il-punti minn (c) sa (g), u jkunu elenkati fit-Taqsima 1 tal-Anness I tar-Regolament (UE) 2024/573, mat-test li jrid jingħata fuq it-tikketti kif previst f’dawk il-punti għandha ssir id-dikjarazzjoni li ġejja: “Eżentati mill-kwota skont ir-Regolament (UE) 2024/573 tal-Parlament Ewropew u tal-Kunsill”. |
8. It-tagħmir imsemmi fl-Artikolu 12(1), il-punti (a), (b) u (c), tar-Regolament (UE) 2024/573, li jkun insulat bil-fowm minfuħ bil-gassijiet fluworurati b’effett ta’ serra, għandu jiġi mmarkat b’tikketta li jkun fiha t-test li ġej: “Il-fowm fih gassijiet fluworurati b’effett ta’ serra”.
9. It-tikketti għandhom jitqiegħdu f’konformità mal-Artikolu 12(4) tar-Regolament (UE) 2024/573 u, meta possibbli, ħdejn il-pjanċi tal-isem eżistenti jew it-tikketti tal-informazzjoni dwar il-prodott li jkun hemm fuq il-prodott jew it-tagħmir li jkun fihom il-gass fluworurat b’effett ta’ serra.
10. Meta d-daqs ta’ prodott imsemmi fil-punti minn (f) sa (h) tal-Artikolu 12(1) tar-Regolament (UE) 2024/573 ma jippermettix il-leġibbiltà tal-informazzjoni sħiħa msemmija fl-Artikolu 12(3) f’konformità mal-Artikolu 12(4), it-tieni subparagrafu, ta’ dak ir-Regolament, mat-test “Fih gassijiet fluworurati b’effett ta’ serra” bil-lingwi diġà użati fuq il-prodott jista’ jingħata link leġibbli b’mod diġitali għall-informazzjoni msemmija fl-Artikolu 12(3), il-punti (b) u (c), tar-Regolament (UE) 2024/573.
11. Minbarra jew minflok il-metodu tal-għoti l-informazzjoni stabbilit fil-paragrafu 10, għall-inalaturi b’doża mkejla msemmija fl-Artikolu 12(1), il-punt (f), tar-Regolament (UE) 2024/573, l-indikazzjoni “Fih gassijiet fluworurati b’effett ta’ serra” tista’ titqiegħed fuq l-imballaġġ ta’ barra kif definit fl-Artikolu 1, il-punt (24), tad-Direttiva 2001/83/KE jew fl-Artikolu 4, il-punt (26), tar-Regolament (UE) 2019/6, jew fuq l-imballaġġ tal-bejgħ tal-apparat mediku msemmi fl-Artikolu 1(9) tar-Regolament 2017/745, kif applikabbli, u tinkiteb imqar bil-lingwi użati għat-tikkettar ta’ informazzjoni oħra fuq l-imballaġġ ta’ barra jew, kif applikabbli, fuq l-imballaġġ tal-bejgħ, diment li l-fuljett tal-informazzjoni jew l-istruzzjonijiet tal-użu jkun fihom l-informazzjoni kollha msemmija fl-Artikolu 12(3) tar-Regolament (UE) 2024/573.
12. It-tikketta tal-prodotti u tat-tagħmir imsemmija fl-Artikolu 12(15) tar-Regolament (UE) 2024/573 għandha, mid-dati tal-projbizzjoni speċifikati fl-Anness IV ta’ dak ir-Regolament, tkun tinkludi t-test li ġej:
|
(a) |
għat-tagħmir imsemmi fil-punti 2(b), 4, 5(c), 7(b), (c) u (d), 8(b) sa (e), 9(b) sa (f), u 11(c) tal-Anness IV tar-Regolament (UE) 2024/573: “Ipprojbit li jitħaddem, sakemm ma jkunx meħtieġ minn xi rekwiżiti tas-sikurezza li jridu jiġu applikati fis-sit tal-operazzjoni”, u tingħata referenza għar-rekwiżit tas-sikurezza applikabbli li jagħmel l-użu tiegħu meħtieġ, jew, meta ma jkunx fattibbli li jiġi speċifikat qabel it-tqegħid fis-suq ir-rekwiżit tas-sikurezza għas-sit speċifiku tal-operazzjoni, u jingħata spazju fuq it-tikketta biex tiddaħħal din l-ispeċifikazzjoni mill-fornitur jew, meta applikabbli, mill-installatur jew l-operatur tat-tagħmir qabel ma t-tagħmir jibda jitħaddem; |
|
(b) |
għall-fowms imsemmija fil-punti 16 u 17(a) u (b) tal-Anness IV tar-Regolament (UE) 2024/573: “Ipprojbit li jintuża sakemm ma jkunx meħtieġ minn xi standard nazzjonali tas-sikurezza”, u jiġu speċifikati l-istandards nazzjonali tas-sikurezza, b’deskrizzjoni qasira tal-kundizzjonijiet li l-użu tiegħu jagħmluh meħtieġ; |
|
(c) |
għall-fowms imsemmija fil-punt 17(c) tal-Anness IV tar-Regolament (UE) 2024/573: “Ipprojbit li jintuża sakemm ma jkunx meħtieġ minn xi rekwiżit tas-sikurezza”, u jiġu speċifikati r-rekwiżiti tas-sikurezza, b’deskrizzjoni qasira tal-kundizzjonijiet li l-użu tiegħu jagħmluh meħtieġ; |
|
(d) |
għall-ajrusoli tekniċi imsemmija fil-punt 19(a) tal-Anness IV tar-Regolament (UE) 2024/573: “Ipprojbit li jintuża sakemm ma jkunx meħtieġ minn xi standard(s) nazzjonali tas-sikurezza”, u jiġu speċifikati l-istandard(s) nazzjonali tas-sikurezza, b’deskrizzjoni qasira tal-kundizzjonijiet li l-użu tiegħu jagħmluh meħtieġ; jew, meta jintuża għall-applikazzjonijiet mediċi: “Għall-użu mediku biss”; |
|
(e) |
għall-ajrusoli tekniċi imsemmija fil-punt 19(b) tal-Anness IV tar-Regolament (UE) 2024/573: “Ipprojbit li jintuża sakemm ma jkunx meħtieġ minn xi rekwiżit(i) tas-sikurezza”, u jiġu speċifikati r-rekwiżit(i) tas-sikurezza, b’deskrizzjoni qasira tal-kundizzjonijiet li l-użu tiegħu jagħmluh meħtieġ; jew, meta jintuża għall-applikazzjonijiet mediċi: “Għall-użu mediku biss”; |
|
(f) |
għat-tagħmir li jintuża għat-tkessiħ tal-ġilda msemmi fil-punt 21 tal-Anness IV tar-Regolament (UE) 2024/573: “Għall-użu mediku biss”. |
Artikolu 2
Tħassir
Ir-Regolament ta’ Implimentazzjoni (UE) 2015/2068 jitħassar.
Ir-referenzi għar-Regolament ta’ Implimentazzjoni (UE) 2015/2068 għandhom jitqiesu bħala referenzi għal dan ir-Regolament u għandhom jinqraw f’konformità mat-tabella ta’ korrelazzjoni fl-Anness.
Artikolu 3
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu jibda japplika mill-1 ta’ Jannar 2025.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-2 ta’ Settembru 2024.
Għall-Kummissjoni
Il-President
Ursula VON DER LEYEN
(1) ĠU L, 2024/573, 20.2.2024, ELI: http://data.europa.eu/eli/reg/2024/573/oj.
(2) Ir-Regolament (UE) Nru 517/2014 tal-Parlament Ewropew u tal-Kunsill tas-16 ta’ April 2014 dwar gassijiet fluworurati b’effett ta’ serra u li jħassar ir-Regolament (KE) Nru 842/2006 (ĠU L 150, 20.5.2014, p. 195, ELI: http://data.europa.eu/eli/reg/2014/517/oj).
(3) Ir-Regolament ta’ Implimentazzjoni tal-Kummissjoni (UE) 2015/2068 tas-17 ta’ Novembru 2015 li jistabbilixxi, skont ir-Regolament (UE) Nru 517/2014 tal-Parlament Ewropew u tal-Kunsill, il-format tat-tikketti għal prodotti u tagħmir li fihom gassijiet fluworurati b’effett ta’ serra (ĠU L 301, 18.11.2015, p. 39, ELI: http://data.europa.eu/eli/reg_impl/2015/2068/oj).
(4) Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, it-tikkettar u l-imballaġġ tas-sustanzi u t-taħlitiet (ĠU L 353, 31.12.2008, p. 1, ELI: http://data.europa.eu/eli/reg/2008/1272/oj).
(5) Id-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU L 311, 28.11.2001, p. 67).
(6) Ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri Komunitarji għall-awtorizzazzjoni u s-sorveljanza ta’ prodotti mediċinali għall-użu mill-bniedem u veterinarju u li jistabbilixxi l-Aġenzija Ewropea għall-Mediċini (ĠU L 136, 30.4.2004, p. 1).
(7) Ir-Regolament (UE) 2019/6 tal-Parlament Ewropew u tal-Kunsill tal-11 ta’ Diċembru 2018 dwar prodotti mediċinali veterinarji u li jħassar id-Direttiva 2001/82/KE (ĠU L 4, 7.1.2019, p. 43).
(8) Ir-Regolament (UE) 2017/745 tal-Parlament Ewropew u tal-Kunsill tal-5 ta' April 2017 dwar apparati mediċi, li jemenda d-Direttiva 2001/83/KE, ir-Regolament (KE) Nru 178/2002 u r-Regolament (KE) Nru 1223/2009 u li jħassar id-Direttivi tal-Kunsill 90/385/KEE u 93/42/KEE (ĠU L 117, 5.5.2017, p. 1).
ANNESS
Tabella ta’ korrelazzjoni
|
Ir-Regolament ta’ Implimentazzjoni (UE) 2015/2068 |
Dan ir-Regolament |
|
Artikolu 1 |
— |
|
Artikolu 2(1) |
Artikolu 1(1) |
|
Artikolu 2(2) |
Artikolu 1(2) |
|
Artikolu 2(3) |
Artikolu 1(3) |
|
Artikolu 2(4) |
Artikolu 1(4) |
|
Artikolu 2(5) |
Artikolu 1(5) |
|
Artikolu 2(6) |
Artikolu 1(6) |
|
Artikolu 2(7) |
Artikolu 1(7) |
|
Artikolu 2(8) |
Artikolu 1(8) |
|
Artikolu 2(9) |
Artikolu 1(9) |
|
Artikolu 3 |
Artikolu 2 |
|
Artikolu 4 |
Artikolu 3 |
ELI: http://data.europa.eu/eli/reg_impl/2024/2174/oj
ISSN 1977-074X (electronic edition)