(1)

Síníodh Meabhrán Comhthuisceana Pháras um Rialú arna dhéanamh ag Stát an Chalafoirt (‘Meabhrán Comhthuisceana Pháras’) i bPáras an 26 Eanáir 1982 agus tháinig sé i bhfeidhm an 1 Iúil 1982. Is iomchuí an seasamh atá le glacadh thar ceann an Aontais sa Choiste um Rialú arna dhéanamh ag Stát an Chalafoirt (‘PSCC’) a bunaíodh de bhun Mheabhrán Comhthuisceana Pháras a leagan síos, óir féadann a chinntí tionchar cinntitheach a imirt ar ábhar reachtaíochta an Aontais, mar atá Treoir 2009/16/CE ó Pharlaimint na hEorpa agus ón gComhairle (1) mar shampla tríd an ngealltanas cigireachta a bhunú agus, chomh maith leis sin, tríd na meánrátaí easnaimh agus coinneála a bhunú, rátaí a úsáidtear sa phróifíl riosca loinge chun soithí a roghnú le haghaidh cigireachta, agus trí nuashonrú a dhéanamh ar threoracha agus ar threoirlínte le haghaidh na gcigirí a dhéanann na cigireachtaí.

(2)

Le Treoir 2009/16/CE leagtar amach córas dlí an Aontais maidir le rialú arna dhéanamh ag stát an chalafoirt agus déantar athfhoirmliú agus atreisiú ar an reachtaíocht a bhí roimhe seo ag an Aontas sa réimse sin, reachtaíocht atá i bhfeidhm ó 1995 i leith. Tá córas dlí an Aontais maidir le rialú arna dhéanamh ag stát an chalafoirt bunaithe ar Mheabhrán Comhthuisceana Pháras. I dtaca le Ballstáit an Aontais, le Treoir 2009/16/CE tugtar nósanna imeachta, uirlisí agus gníomhaíochtaí Mheabhrán Comhthuisceana Pháras, go héifeachtach, faoi raon feidhme dhlí an Aontais.

(3)

Tagann an Coiste um Rialú arna dhéanamh ag Stát an Chalafoirt a bunaíodh de bhun Mheabhrán Comhthuisceana Pháras le chéile go bliantúil. I rith na gcruinnithe a bhíonn aige, déanann sé cinntí i leith saincheisteanna áirithe a mbíonn éifeacht dlí acu.

(4)

Toisc go bhfágann rialacha inmheánacha Mheabhrán Comhthuisceana Pháras gur deacair seasamh a bhunú go tráthúil le haghaidh gach cruinniú bliantúil PSCC, ar seasamh é atá le glacadh thar ceann an Aontais i gcomhréir le hAirteagal 218(9) den Chonradh ar Fheidhmiú an Aontais Eorpaigh. Mar sin, is éifeachtúil sa chás seo an seasamh sin a bhunú ar bhonn ilbhliantúil, arb é a bheidh ann treoirphrionsabail agus treoshuíomhanna, mar aon le creat dá shonraíocht ó bhliain go bliain. Thairis sin, baineann formhór na n-ábhar a phléitear ag cruinnithe bliantúla PSCC le hábhair a bhaineann le rialú Stáit ar chalafoirt agus cumhdaítear iad go ginearálta le gníomh dlíthiúil aonair de chuid an Aontais, eadhon Treoir 2009/16/CE. Sna himthosca ar leith a bhfuil feidhm acu maidir le Meabhrán Comhthuisceana Pháras, is féidir, dá bhrí sin, seasamh ginearálta atá le glacadh a bhunú thar ceann an Aontais le haghaidh roinnt de chruinnithe PSCC.

(5)

Ní comhalta é an tAontas Eorpach de Mheabhrán Comhthuisceana Pháras. Ní mór don Chomhairle, dá bhrí sin, a údarú do na Ballstáit ar comhaltaí iad de Mheabhrán Tuisceana Pháras gníomhú i gcomhréir leis an seasamh atá le glacadh thar ceann an Aontais agus a chur in iúl go dtoilíonn siad a bheith faoi cheangal na gcinntí a ghlacfaidh PSCC.

(6)

Tá an-tábhacht ag roinnt le pléití teicniúla agus le comhar teicniúil le comhaltaí tríú tíortha de Mheabhrán Comhthuisceana Pháras i dtionól PSCC chun éifeachtacht agus dea-fheidhmiú Mheabhrán Comhthuisceana Pháras a áirithiú.

(7)

Ba cheart an Cinneadh seo an tréimhse 2025-2029 a chumhdach.

(8)

Ba cheart do na Ballstáit ar comhaltaí iad de Mheabhrán Comhthuisceana Pháras seasamh an Aontais a chur in iúl, ag gníomhú dóibh go comhpháirteach chun leasa an Aontais,