2.6.2021   

MT

Il-Ġurnal Uffiċjali tal-Unjoni Ewropea

L 194/16


REGOLAMENT TA’ IMPLIMENTAZZJONI TAL-KUMMISSJONI (UE) 2021/882

tal-1 ta’ Ġunju 2021

li jawtorizza t-tqegħid fis-suq ta’ larva mnixxfa ta’ Tenebrio molitor bħala ikel ġdid skont ir-Regolament (UE) 2015/2283 tal-Parlament Ewropew u tal-Kunsill, u li jemenda r-Regolament ta’ Implimentazzjoni tal-Kummissjoni (UE) 2017/2470

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta’ Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 tal-Parlament Ewropew u tal-Kunsill u r-Regolament tal-Kummissjoni (KE) Nru 1852/2001 (1), u b’mod partikolari, l-Artikolu 12 tiegħu,

Billi:

(1)

Ir-Regolament (UE) 2015/2283 jipprevedi li huwa biss l-ikel ġdid awtorizzat u inkluż fil-lista tal-Unjoni li jista’ jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ġie adottat ir-Regolament ta’ Implimentazzjoni tal-Kummissjoni (UE) 2017/2470 (2) li jistabbilixxi lista tal-Unjoni ta’ ikel ġdid awtorizzat.

(3)

Fit-13 ta’ Frar 2018, il-kumpanija SAS EAP Group (“l-applikant”) ippreżentat applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tqiegħed il-larva mnixxfa ta’ Tenebrio molitor (dudu tad-dqiq) fis-suq tal-Unjoni bħala ikel ġdid. L-applikazzjoni talbet li l-larva mnixxfa ta’ Tenebrio molitor tintuża bħala l-insett imnixxef sħiħ fil-forma ta’ snack, u bħala ingredjent tal-ikel f’għadd ta’ prodotti tal-ikel, bil-popolazzjoni ġenerali bħala l-popolazzjoni fil-mira. L-applikant għamel ukoll talba lill-Kummissjoni għall-protezzjoni tad-data proprjetarja ppreżentata fl-applikazzjoni.

(4)

F’konformità mal-Artikolu 10(3) tar-Regolament (UE) 2015/2283, fit-3 ta’ Lulju 2018 il-Kummissjoni kkonsultat lill-Awtorità Ewropea dwar is-Sigurtà fl-Ikel (“l-Awtorità”), u talbitha tagħti opinjoni xjentifika billi twettaq valutazzjoni tal-larva mnixxfa ta’ Tenebrio molitor bħala ikel ġdid.

(5)

Fl-24 ta’ Novembru 2020, l-Awtorità adottat opinjoni xjentifika dwar is-sikurezza tal-larva ta’ Tenebrio molitor bħala ikel ġdid (3), f’konformità mal-Artikolu 11 tar-Regolament (UE) 2015/2283.

(6)

F’dik l-opinjoni, l-Awtorità kkonkludiet li l-larva mnixxfa ta’ Tenebrio molitor hija sikura fl-użi u fil-livelli tal-użu proposti. Għaldaqstant, l-opinjoni tal-Awtorità tagħti biżżejjed raġunijiet biex jiġi stabbilit li l-larva mnixxfa ta’ Tenebrio molitor fil-kundizzjonijiet tal-użu speċifiċi, tikkonforma mal-Artikolu 12(1) tar-Regolament (UE) 2015/2283.

(7)

F’dik l-opinjoni, l-Awtorità kkonkludiet ukoll abbażi ta’ evidenza ppubblikata limitata dwar l-allerġiji tal-ikel relatati mal-insetti u b’mod partikolari minn żewġ studji fuq il-bnedmin fejn total ta’ erba’ reazzjonijiet allerġiċi suspettużi ġew attribwiti għal-larva mnixxfa ta’ Tenebrio molitor u studju wieħed fuq l-annimali, li l-konsum ta’ dan l-ikel ġdid jista’ jikkawża sensitizzazzjoni għall-proteini tad-dudu tad-dqiq kif ukoll għat-tropomijosina minn sorsi oħra bħall-krustaċji u l-akari. L-Awtorità rrakkomandat li ssir aktar riċerka dwar l-allerġeniċità tal-larva mnixxfa ta’ Tenebrio molitor. Biex tindirizza r-rakkomandazzjoni tal-Awtorità, il-Kummissjoni bħalissa qed tesplora l-modi biex twettaq ir-riċerka meħtieġa dwar l-allerġeniċità tal-larva ta’ Tenebrio molitor.

(8)

Sakemm id-data ġġenerata mir-riċerka tiġi vvalutata mill-Awtorità, u meta wieħed iqis li, sal-lum, ġew irrapportati biss il-ftit każijiet allerġiċi msemmija hawn fuq skont id-data disponibbli għall-industrija tal-insetti tal-larva mnixxfa ta’ Tenebrio molitor (4), il-Kummissjoni tqis li ma jenħtieġx li jiġi inkluż rekwiżit ta’ tikkettar speċifiku li jikkonċerna l-potenzjal tal-larva mnixxfa ta’ Tenebrio molitor li tikkawża sensitizzazzjoni primarja, fil-lista tal-Unjoni ta’ ikel ġdid awtorizzat.

(9)

Fl-opinjoni tagħha, l-Awtorità qieset ukoll li l-konsum tal-larva mnixxfa ta’ Tenebrio molitortista’ tikkawża reazzjonijiet allerġiċi lil persuni li huma allerġiċi għall-krustaċji u l-akaridi tat-trab. Barra minn hekk, l-Awtorità nnutat li jistgħu jispiċċaw allerġeni addizzjonali fl-ikel ġdid, jekk dawn l-allerġeni jkunu preżenti fis-substrat mitmugħ lill-insetti. Dan jista’ jinkludi allerġeni elenkati fl-Anness II tar-Regolament (UE) Nru 1169/2011 tal-Parlament Ewropew u tal-Kunsill (5). Għalhekk, huwa xieraq li l-larva mnixxfa ta’ Tenebrio molitor li ssir disponibbli għall-konsumatur bħala tali u ikel li jkun fih il-larva mnixxfa ta’ Tenebrio molitorjkunu ttikkettati kif xieraq skont ir-rekwiżiti tal-Artikolu 9 tar-Regolament (UE) 2015/2283 u r-Regolament (UE) Nru 1169/2011.

(10)

Fl-opinjoni tagħha, l-Awtorità nnutat li l-konklużjoni tagħha dwar is-sikurezza tal-ikel ġdid kienet ibbażata fuq analiżijiet ta’ kontaminanti fl-ikel ġdid (6), deskrizzjoni dettaljata tal-proċess tat-tnixxif (7), u data analitika dwar il-livelli ta’ ċitina (8), u data dwar l-istatus ossidattiv u mikrobijoloġiku tal-ikel ġdid matul il-ħżin (9). Hija nnutat ukoll li ma setgħetx tasal għal din il-konklużjoni mingħajr id-data mir-rapporti mhux ippubblikati tal-istudji li jinsabu fil-fajl tal-applikant.

(11)

Il-Kummissjoni talbet lill-applikant biex jiċċara aktar il-ġustifikazzjoni pprovduta fir-rigward tal-pretensjoni proprjetarja tiegħu fuq dawk l-istudji u biex jiċċara t-talba tiegħu għal dritt esklużiv ta’ referenza għal dawk l-istudji, kif imsemmi fl-Artikolu 26(2)(b) tar-Regolament (UE) 2015/2283.

(12)

L-applikant iddikjara li kellu d-dritt proprjetarju u esklużiv ta’ referenza għall-analiżijiet tal-kontaminanti fl-ikel ġdid, id-deskrizzjoni dettaljata tal-proċess tat-tnixxif, id-data analitika dwar il-livelli ta’ ċitina, u d-data dwar l-istatus ossidattiv u mikrobijoloġiku tal-ikel ġdid waqt il-ħżin, fil-waqt meta ppreżenta l-applikazzjoni u li, għalhekk, partijiet terzi ma jistgħux jaċċessaw, jużaw jew jirreferu b’mod legali għal dawk l-istudji.

(13)

Il-Kummissjoni vvalutat l-informazzjoni kollha li pprovdielha l-applikant u kienet tal-fehma li l-applikant issostanzja biżżejjed it-twettiq tar-rekwiżiti stipulati fl-Artikolu 26(2) tar-Regolament (UE) 2015/2283. Għalhekk, l-istudji speċifiċi dwar l-analiżijiet tal-kontaminanti fl-ikel il-ġdid, id-deskrizzjoni dettaljata tal-proċess tat-tnixxif, id-data analitika dwar il-livelli tal-ċitina, u d-data dwar l-istatus ossidattiv u mikrobijoloġiku tal-ikel ġdid waqt il-ħżin, li jinsabu fil-fajl tal-applikant, li fuqhom l-Awtorità bbażat il-konklużjoni tagħha dwar is-sikurezza tal-ikel ġdid u li mingħajrhom ma setgħetx tivvaluta l-ikel ġdid, jenħtieġ li ma jintużawx għall-benefiċċju ta’ kwalunkwe applikant sussegwenti għal perjodu ta’ ħames snin mid-data tad-dħul fis-seħħ ta’ dan ir-Regolament. Għaldaqstant, l-applikant biss jenħtieġ li jkun awtorizzat iqiegħed fis-suq fl-Unjoni l-larva mnixxfa ta’ Tenebrio molitor matul dak il-perjodu.

(14)

Madankollu, ir-restrizzjoni tal-awtorizzazzjoni tal-larva mnixxfa ta’ Tenebrio molitor u tar-referenza għall-istudji li jinsabu fil-fajl tal-applikant għall-użu uniku tal-applikant, ma twaqqafx lil applikanti oħra milli japplikaw għal awtorizzazzjoni għat-tqegħid fis-suq tal-istess ikel ġdid, dment li l-applikazzjoni tagħhom tissejjes fuq informazzjoni miksuba legalment li tappoġġa t-tali awtorizzazzjoni.

(15)

Għaldaqstant jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan.

(16)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

1.   Il-larva mnixxfa ta’ Tenebrio molitor kif speċifikata fl-Anness ta’ dan ir-Regolament, għandha tiġi inkluża fil-lista ta’ ikel ġdid awtorizzat tal-Unjoni stabbilita fir-Regolament ta’ Implimentazzjoni (UE) 2017/2470.

2.   Għal perjodu ta’ ħames snin mid-data tad-dħul fis-seħħ ta’ dan ir-Regolament, l-applikant oriġinali biss:

 

Il-kumpanija: SAS EAP Group;

 

Indirizz: 35 Boulevard du Libre Échange, 31650, Saint-Orens-de-Gameville, Franza,

 

huwa awtorizzat li jqiegħed fis-suq tal-Unjoni l-ikel ġdid imsemmi fil-paragrafu 1, sakemm applikant sussegwenti ma jiksibx awtorizzazzjoni għall-ikel ġdid mingħajr referenza għad-data protetta skont l-Artikolu 2 ta’ dan ir-Regolament jew bi ftehim ma’ SAS EAP Group.

3.   L-entrata fil-lista tal-Unjoni msemmija fil-paragrafu 1 għandha tinkludi l-kundizzjonijiet tal-użu u r-rekwiżiti tat-tikkettar stabbiliti fl-Anness ta’ dan ir-Regolament.

Artikolu 2

L-istudji li hemm fil-fajl tal-applikazzjoni li fuq il-bażi tagħhom l-ikel ġdid imsemmi fl-Artikolu 1 ġie vvalutat min-naħa tal-Awtorità, u li skont kif ġie ddikjarat mill-applikant huma propretarji, u li mingħajrhom l-ikel ġdid ma setax jiġi awtorizzat, ma għandhomx jintużaw għall-benefiċċju ta’ applikant sussegwenti għal perjodu ta’ ħames snin mid-data tad-dħul fis-seħħ ta’ dan ir-Regolament mingħajr il-qbil ta’ SAS EAP Group.

Artikolu 3

L-Anness tar-Regolament ta’ Implimentazzjoni (UE) 2017/2470 huwa emendat skont l-Anness ta’ dan ir-Regolament.

Artikolu 4

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-1 ta’ Ġunju 2021.

Għall-Kummissjoni

Il-President

Ursula VON DER LEYEN


(1)   ĠU L 327, 11.12.2015, p. 1.

(2)  Ir-Regolament ta’ Implimentazzjoni tal-Kummissjoni (UE) 2017/2470 tal-20 ta’ Diċembru 2017 li jistabbilixxi l-lista tal-Unjoni tal-ikel ġdid skont ir-Regolament (UE) 2015/2283 tal-Parlament Ewropew u tal-Kunsill dwar ikel ġdid (ĠU L 351, 30.12.2017, p. 72).

(3)  Is-sikurezza tad-dudu tad-dqiq imnixxef (il-larva ta’ Tenebrio molitor) bħala ikel ġdid skont ir-Regolament (UE) 2015/2283; EFSA Journal 2021:19(1):6343.

(4)  Il-larva ta’ Tenebrio molitor titqiegħed fis-suq f’għadd ta’ Stati Membri skont il-miżuri tranżizzjonali stipulati fl-Artikolu 35(2) tar-Regolament (UE) 2015/2283.

(5)  Ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004 (ĠU L 304, 22.11.2011, p. 18).

(6)  SAS EAP Group 2016 (mhux ippubblikat).

(7)  SAS EAP Group 2013 (mhux ippubblikat).

(8)  SAS EAP Group 2018 (mhux ippubblikat).

(9)  SAS EAP Group 2020 (mhux ippubblikat).


ANNESS

L-Anness tar-Regolament ta’ Implimentazzjoni (UE) 2017/2470 huwa emendat kif ġej:

(1)

fit-Tabella 1 (Ikel ġdid awtorizzat), tiddaħħal l-entrata li ġejja, f’ordni alfabetika:

Ikel ġdid awtorizzat

Kundizzjonijiet li fihom jista’ jintuża l-ikel ġdid

Rekwiżiti tat-tikkettar speċifiċi oħrajn

Rekwiżiti oħra

Protezzjoni tad-data

“Larva mnixxfa ta’ Tenebrio molito (dudu tad-dqiq)

Il-Kategorija tal-ikel speċifikat

Livelli massimi

1.

Id-denominazzjoni tal-ikel ġdid fuq it-tikkettar tal-oġġetti tal-ikel li jkun fihom dan l-ikel għandha tkun “Larva mnixxfa ta’ Tenebrio molitor (dudu tad-dqiq)”.

2.

It-tikkettar tal-oġġetti tal-ikel li fihom il-larva mnixxfa ta’ Tenebrio molitor (dudu tad-dqiq) għandu jkollu dikjarazzjoni li dan l-ingredjent jista’ jikkawża reazzjonijiet allerġiċi għall-konsumaturi b’allerġiji magħrufa għall-krustaċji u l-prodotti tagħhom, u għall-akari tat-trab. Din id-dikjarazzjoni għandha tkun qrib il-lista tal-ingredjenti.

 

Awtorizzat fit-22 ta’ Ġunju 2021. Din l-inklużjoni hija bbażata fuq evidenza xjentifika u data xjentifika proprjetarji protetti skont l-Artikolu 26 tar-Regolament (UE) 2015/2283.

Applikant: SAS EAP Group, 35 Boulevard du Libre Échange, 31650, Saint-Orens-de-Gameville, Franza.

Matul il-perjodu tal-protezzjoni tad-data, l-ikel ġdid huwa awtorizzat għat-tqegħid fis-suq fl-Unjoni minn SAS EAP Group biss, sakemm applikant sussegwenti ma jiksibx l-awtorizzazzjoni għal dak l-ikel ġdid mingħajr referenza għall-evidenza xjentifika jew għad-data xjentifika proprjetarji protetti f’konformità mal-Artikolu 26 tar-Regolament (UE) 2015/2283 jew bil-qbil ta’ SAS EAP Group.

Id-data ta’ tmiem il-protezzjoni tad-data: it-22 ta’ Ġunju 2026.”

Larva mnixxfa ta’Tenebrio molitor, sħiħa jew mitħuna

 

Prodotti tal-proteina

10 g/100 g

Gallettini

10 g/100 g

Platti bbażati fuq il-legumi

10 g/100 g

Prodotti bbażati fuq l-għaġin

10 g/100 g

(2)

fit-Tabella 2 (Speċifikazzjonijiet), l-entrata li jmiss tiddaħħal f’ordni alfabetika:

Ikel Ġdid Awtorizzat

Speċifikazzjoni

“Larva mnixxfa ta’ Tenebrio molito (dudu tad-dqiq)

Deskrizzjoni/Definizzjoni:

L-ikel ġdid huwa d-dudu tad-dqiq imnixxef bis-sħana, sħiħ (larva mismuta, imnixxfa fil-forn) jew mitħuna (larva mismuta, imnixxfa fil-forn u mitħuna). It-terminu “dudu tad-dqiq” jirreferi għall-forma ta’ larva ta’ Tenebrio molitor, speċi ta’ insetti fil-familja tal-ħanfus Tenebrionidae (darkling beetles).

Id-dudu sħiħ huwa maħsub għall-konsum mill-bniedem u l-ebda parti ma titneħħa.

Huwa meħtieġ perjodu minimu ta’ 24 siegħa ta’ sawm qabel l-istadju tat-tnixxif termali, sabiex il-larva tkun tista’ tbattal il-kontenut tal-imsaren.

Karatteristiċi/Kompożizzjoni:

 

Irmied (% w/w): 3,5 sa 4,5

 

Indewwa (% w/w): 1-8

 

Proteina kruda (N x 6,25) (% w/w): 56-61

 

Karboidrati diġeribbli  (*1) (% w/w): 1-6

 

Xaħam (% w/w): 25-30

 

li minnhom saturati (% w/w): 4-9

 

Valur tal-perossidu (Meq O2/kg xaħam): ≤ 5

 

Fibra (% w/w): 4-7

 

Ċitina (% tal-piż skont il-piż): 4-7

Metalli tqal:

 

Ċomb: ≤ 0,075 mg/kg

 

Kadmju: ≤ 0,1 mg/kg

Mikotossini:

 

Aflatossini (Is-somma ta’ B1, B2, G1, G2): ≤ 4 μg/kg

 

Aflatossina B1: ≤ 2 μg/kg

 

Deossinivalenol: ≤ 200 μg/kg

 

Okratossina A: ≤ 1 μg/kg

Kriterji mikrobijoloġiċi:

 

Għadd totali ta’ kolonji aerobiċi: ≤ 105 CFU  (*2)/g

 

Ħmira u moffa: ≤ 100 CFU/g

 

Escherichia coli: ≤ 50 CFU/g

 

Salmonella spp.: Mhux individwata f’25 g

 

Listeria monocytogenes: Mhux individwata f’25 g

 

Anaerobi li jirriduċu s-sulfit: ≤ 30 CFU/g

 

Bacillus cereus (test preżuntiv): ≤ 100 CFU/g

 

Enterobacteriaceae (test preżuntiv): < 10 CFU/g

 

Staphylococci koagulażi-pożittivi: ≤ 100 UJK/g


(*1)  Karboidrati diġestibbli = 100 — (proteina mhux raffinata + xaħam + fibra + irmied + umdità).

(*2)  CFU: colony forming units (unitajiet li jifformaw kolonja)”