|
Il-Ġurnal Uffiċjali |
MT Is-serje C |
|
C/2024/4505 |
11.7.2024 |
Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2), il-punt (a), tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel
(C/2024/4505)
Wara din il-pubblikazzjoni, l-awtoritajiet ta’ Stat Membru jew ta’ pajjiż terz, jew persuna fiżika jew ġuridika li jkollha interess leġittimu u tkun stabbilita jew residenti f’pajjiż terz, fi żmien 3 xhur mid-data ta’ din il-pubblikazzjoni, tista’ tippreżenta oppożizzjoni lill-Kummissjoni f’konformità mal-Artikolu 17 tar-Regolament (UE) 2024/1143 tal-Parlament Ewropew u tal-Kunsill (1).
DOKUMENT UNIKU
“Gaziantep Menengiç Kahvesi / Gaziantep Melengiç Kahvesi”
Nru tal-UE: PDO-TR-02661 — 25.2.2021
DOP (X) IĠP ( )
1. Isem/Ismijiet [tad-DOP jew tal-IĠP]
“Gaziantep Menengiç Kahvesi / Gaziantep Melengiç Kahvesi”
2. Stat Membru jew pajjiż terz
It-Turkija
3. Deskrizzjoni tal-prodott agrikolu jew tal-oġġett tal-ikel
3.1. Tip ta’ prodott [bħal fl-Anness XI]
Klassi 1.8. Prodotti oħrajn elenkati fl-Anness I għat-Trattat (ħwawar, eċċ.)
3.2. Deskrizzjoni tal-prodott li għalih japplika l-isem f’(1)
Il-“Gaziantep Menengiç Kahvesi / Gaziantep Melengiç Kahvesi” huwa sostitut tal-kafè prodott permezz tal-inkaljar u t-tħin taż-żerriegħa tas-siġar tal-iskornabekk jew tat-trementina (Pistacia terebinthus L.) li jikbru fir-reġjuni muntanjużi tal-provinċja ta’ Gaziantep. Is-siġra skornabekk hija indiġena għaż-żona ġeografika u tikber fis-selvaġġ f’reġjuni muntanjużi. Iż-żerriegħa tal-P. terebinthus tissejjaħ “menengiç” jew “melengiç” fit-Turkija. Il-frott tal-menengiç/melengiç imkabbar fil-provinċja ta’ Gaziantep għandu kontenut għoli ta’ żejt, b’valur ta’ aċidu xaħmi fil-medda ta’ 44-56 %. Il-valur tal-aċidu olejku huwa fil-medda ta’ 53-68 %. L-ebda prodott jew addittiv ma jiżdied mal-prodott qisu pejst miksub bit-tnixxif, ix-xiwi u t-tħin tal-frott miġbur mill-fergħa. Il-frott jitkabbar f’din iż-żona ġeografika, u xi wħud mill-proprjetajiet fiżikokimiċi tal-prodott finali miksub minn dan il-frott huma bejn wieħed u ieħor kif ġej.
|
Proprjetajiet fiżikokimiċi |
Valur |
|
Żejt |
44 -56 % |
|
Ilma |
5 -6 % |
|
Proteina |
18 -20 % |
|
Irmied |
3 -3,5 % |
|
Zokkor |
6 -6,5 % |
|
Fibra |
2 -2,5 % |
Il-viskożità tal-prodott estratt jenħtieġ li tkun mill-inqas 1 (cP); massimu ta’ 45 % tal-ammont totali tad-daqs tal-partikoli jenħtieġ li jkun ogħla minn 20-25 μm. Minħabba li huwa rikk ħafna fiż-żejt, jista’ jidher saff taż-żejt fuq il-wiċċ tal-prodott. Il-“Gaziantep Menengiç Kahvesi / Gaziantep Melengiç Kahvesi” huwa prodott qisu pejst b’kontenut għoli ta’ xaħam. Il-prodott isir omoġenju billi jitħallat qabel l-użu. Il-prodott għandu struttura ħarxa u u qisha pejst, kulur kannella skur u aroma simili għall-pistaċċi.
3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)
Il-“Gaziantep Menengiç Kahvesi / Gaziantep Melengiç Kahvesi” jiġi prodott biss miż-żerriegħa tal-menengiç li jinġabru mis-siġar tal-menengiç/melengiç li jikbru b’mod naturali f’Gaziantep.
3.4. Passi speċifiċi tal-produzzjoni li jridu jsiru fiż-żona ġeografika ddefinita
L-istadji kollha tal-produzzjoni, inklużi t-tkabbir, il-ħsad tal-materja prima u t-tindif, ix-xiwi u t-tħin tal-prodott iridu jsiru fiż-żona ġeografika ddefinita.
3.5. Regoli speċifiċi dwar it-tqattigħ, it-taħkik, l-imballaġġ, eċċ.
—
3.6. Regoli speċifiċi dwar it-tikkettar
—
4. Definizzjoni fil-qosor taż-żona ġeografika
Iż-żona ġeografika tinkludi l-irħula u l-bliet kollha tal-provinċja ta’ Gaziantep li jinsabu fix-Xlokk tat-Turkija.
5. Rabta maż-żona ġeografika
Speċifiċità taż-żona ġeografika
Il-provinċja ta’ Gaziantep tinsab bejn il-Mediterran u r-Reġjun tax-Xlokk tal-Anatolia. Tinsab bejn 36° 28′ u 38° 01′ lonġitudnijiet tal-Lvant u 36° 38′ u 37° 32′ latitudnijiet tat-Tramuntana. It-tul medju ta’ dawl tax-xemx fiż-żona kollha huwa ta’ aktar minn 200 jum fis-sena. Is-sigħat twal ta’ dawl binhar matul l-istaġun tas-sajf iwasslu biex l-għelieqi jirċievu aktar radjazzjoni solari, u b’hekk jiżdiedu t-temperaturi. Art imħarbta hija komuni fiż-żona. Is-siġar tal-iskornabekk jippreferu l-blat, żoni degradati 600-1 500 m’il fuq mil-livell tal-baħar u jevitaw ambjenti kesħin u tat-Tramuntana. Is-siġra hija indiġena għall-Asja u l-Mediterran, partikolarment komuni fin-Nofsinhar tat-Turkija u hija wieħed mill-aktar prodotti importanti mhux tal-injam fir-reġjun. L-ammont għoli ta’ xemx fir-reġjun jaffettwa l-kompożizzjoni taż-żejt xaħmi taż-żerriegħa, iżid il-kontenut taż-żejt u l-valur tal-aċidu xaħmi. Iż-żieda fil-kontenut taż-żejt u l-komposti tal-aċidu xaħmi żżid it-togħma tal-prodott.
Fatturi Umani
Iż-żerriegħa tas-siġar tal-iskornabekk ilhom jintużaw għall-produzzjoni tas-sostitut tal-kafè tal-menengiç/melengiç fir-reġjun mis-snin 1600. Ta’ spiss jingħad li matul il-Kampanja ta’ Baghdad tal-Imperu Ottoman, Murad IV kien jistrieħ f’Gaziantep u ġie offrut il-“Gaziantep Menengiç Kahvesi / Gaziantep Melengiç Kahvesi”, u li ħa pjaċir bih.
L-istadju tal-inkaljar fil-produzzjoni jeħtieġ ħakma tajba. L-inkaljar taż-żerriegħa sal-punt ideali huwa ħila essenzjali għall-produtturi li tipprevjeni kwalunkwe aroma mhux mixtieqa. Iż-żerriegħa tal-Menengiç jiġu inkaljati bir-reqqa billi jitħalltu sakemm isiru kannella. L-inkaljar eċċessiv ma huwiex mixtieq peress li jħalli togħma morra fuq il-komponenti tal-aċidu xaħmi. Il-produtturi lokali għandhom ħakma speċifika fl-inkaljar taż-żerriegħa biex jiksbu l-aroma korretta.
Speċifiċità tal-prodott
Il-kontenut għoli ta’ żejt taż-żerriegħa tal-iskornabekk imkabbra f’Gaziantep huwa s-sors tal-aroma u t-togħma tal-prodott. Il-prodott għandu togħma ħafifa ta’ pistaċċi.
Rabta kawżali
Il-“Gaziantep Menengiç Kahvesi / Gaziantep Melengiç Kahvesi” jinkiseb miż-żerriegħa tas-siġar tal-iskornabekk imkabbra f’Gaziantep, li huma nattivi għar-reġjun. Iż-żerriegħa tal-menengiç/melengiç imkabbra f’Gaziantep fihom livelli ogħla ta’ aċidu olejku meta mqabbla ma’ reġjuni oħra minħabba l-pożizzjoni ġeografika tal-provinċja b’ammont kbir ta’ xemx.
Il-klima tal-provinċja tipprovdi l-aħjar kundizzjonijiet ta’ tkabbir għas-siġar tal-menengiç/melengiç u tipproduċi rendimenti għoljin. Il-konsum taż-żerriegħa tas-siġra tal-iskornabekk bħala s-sostitut tal-kafè tal-menengiç/melengiç għandu storja twila fir-reġjun ta’ Gaziantep.
Referenza għall-pubblikazzjoni tal-Ispeċifikazzjoni tal-Prodott
Il-“Gaziantep Menengiç Kahvesi / Gaziantep Melengiç Kahvesi” ġie rreġistrat mill-Uffiċċju Tork tal-Privattivi u tat-Trademarks fil-Bullettin Nru 93 datat il-15.1.2021, paġna 51 u 52.
(1) Ir-Regolament (UE) 2024/1143 tal-Parlament Ewropew u tal-Kunsill tal-11 ta’ April 2024 dwar indikazzjonijiet ġeografiċi għall-inbid, ix-xorb spirituż u l-prodotti agrikoli, kif ukoll l-ispeċjalitajiet tradizzjonali garantiti u t-termini tal-kwalità mhux obbligatorji għall-prodotti agrikoli, li jemenda r-Regolamenti (UE) Nru 1308/2013, (UE) 2019/787 u (UE) 2019/1753 u li jħassar ir-Regolament (UE) Nru 1151/2012 (ĠU L, 2024/1143, 23.4.2024, ELI: http://data.europa.eu/eli/reg/2024/1143/oj).
ELI: http://data.europa.eu/eli/C/2024/4505/oj
ISSN 1977-0987 (electronic edition)