1.7.2019   

MT

Il-Ġurnal Uffiċjali tal-Unjoni Ewropea

L 176/61


DEĊIŻJONI TA' IMPLIMENTAZZJONI TAL-KUMMISSJONI (UE) 2019/1118

tas-27 ta' Ġunju 2019

dwar il-proġett transfruntier ta' bejn ix-xmara Seine u x-xmara Scheldt fil-Kurituri tan-Netwerk Ewlieni ta' bejn il-Baħar tat-Tramuntana u l-Mediterran u tal-Atlantiku

(notifikata bid-dokument C(2019) 4561)

(It-testi bl-Olandiż u bil-Franċiż biss huma awtentiċi)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1315/2013 tal-Parlament Ewropew u tal-Kunsill tal-11 ta' Diċembru 2013 dwar linji gwida tal-Unjoni għall-iżvilupp tan-netwerk trans-Ewropew tat-trasport u li jħassar id-Deċiżjoni Nru 661/2010/UE (1), u b'mod partikulari l-Artikolu 47(2) tiegħu,

Billi:

(1)

Id-dekarbonizzazzjoni tat-trasport, b'mod partikulari bil-ħolqien tal-kundizzjonijiet għal bidla modali ambizzjuża fit-traffiku tal-ġarr tal-merkanzija fuq distanzi twal lejn modi tat-trasport effiċjenti fl-enerġija, hija objettiv ewlieni tal-politika tal-Unjoni Ewropea. Il-Ftehim ta' Pariġi kkonferma u saħħaħ l-ambizzjonijiet tal-UE b'rabta mal-ġlieda kontra t-tibdil fil-klima.

(2)

F'dan il-kuntest, il-promozzjoni tat-trasport bil-passaġġi fuq l-ilma interni għall-ġarr tal-merkanzija hija prijorità ċara tal-politika tal-UE dwar it-trasport u prijorità fit-tul tal-politika tat-TEN-T.

(3)

Bit-tlestija tan-netwerk ta' bejn ix-xmara Seine u x-xmara Scheldt, il-baċir tax-xmara Seine se jkun konness b'mod dirett mal-baċir tax-xmara Scheldt fit-Tramuntana ta' Franza, fil-Belġju u fin-Netherlands permezz ta' passaġġ kontinwu fuq l-ilma intern b'gejġ għoli, u se jkun konness ukoll ma' baċiri Ewropej importanti oħrajn b'passaġġi fuq l-ilma interni bħal dawk tax-xmara Renu u tax-xmara Maas. Dan se joħloq netwerk kontinwu, effettiv u konsistenti ta' passaġġi fuq l-ilma interni b'kapaċità għolja li jgħaqqad flimkien id-diversi portijiet marittimi u interni ta' dan ir-reġjun usa' transfruntier Ewropew.

(4)

Billi jgħaqqad flimkien lil Franza, lill-Belġju, lin-Netherlands u, lil hinn minnhom, lill-Ġermanja, in-netwerk ta' bejn ix-xmara Seine u x-xmara Scheldt għandu lat transfruntier ċar.

(5)

Il-proġett ta' bejn ix-xmara Seine u x-xmara Scheldt ġie identifikat minn qabel bħala parti mill-Kuritur tan-Netwerk Ewlieni ta' bejn il-Baħar tat-Tramuntana u l-Mediterran u l-parti ta' bejn Le Havre u Pariġi ġiet identifikata minn qabel bħala parti mill-Kuritur tan-Netwerk Ewlieni tal-Atlantiku. Id-Dikjarazzjoni tas-17 ta' Ottubru 2013 dwar l-implimentazzjoni tal-Kuritur tan-Netwerk Ewlieni tat-TEN-T ta' bejn il-Baħar tat-Tramuntana u l-Mediterran (id-Dikjarazzjoni ta' Tallinn), li ffirmawha l-Ministri tat-Trasport tal-Belġju, tan-Netherlands u ta' Franza u l-Kummissarju għat-Trasport, kompliet tenfasizza l-impenn tal-partijiet ikkonċernati biex jimplimentaw dan il-kuritur. Barra minn hekk, il-Pjan ta' Ħidma għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran enfasizza l-ħtieġa li tiġi żgurata t-tlestija tal-proġett ta' bejn ix-xmara Seine u x-xmara Scheldt bħala l-pedament biex jiġi stabbilit kuritur tat-trasport multimodali li jaħdem għalkollox.

(6)

Wieħed mill-objettivi ewlieni tal-proġett huwa li jiżgura li l-itinerarji ewlenin ta' bejn ix-xmara Seine u x-xmara Scheldt ikunu mill-inqas tal-klassi Va tal-ECMT u li jiżgura kundizzjonijiet tajbin tan-navigazzjoni.

(7)

Il-komponenti kollha tal-proġett ta' bejn ix-xmara Seine u x-xmara Scheldt huma essenzjali għat-tlestija tiegħu. Fosthom, il-kanal ta' bejn ix-xmara Seine u t-Tramuntana tal-Ewropa huwa l-konnessjoni ewlenija nieqsa, u mingħajru n-netwerk ta' bejn ix-xmara Seine u x-xmara Scheldt ma jistax jitwettaq.

(8)

Il-proġett ta' bejn ix-xmara Seine u x-xmara Scheldt huwa proġett transfruntier kumpless, li fih huma involuti l-Belġju (b'mod partikulari r-reġjun Fjamming u r-reġjun ta' Walloon) u Franza, u jinvolvi xogħlijiet li għandhom l-għan li joħolqu infrastruttura ġdida kif ukoll li jtejbu l-infrastruttura eżistenti b'impatt minimu fuq in-navigazzjoni. Għalhekk, sfida ewlenija hija li jkun hemm biżżejjed koordinazzjoni. Sabiex tiġi appoġġata l-implimentazzjoni kkoordinata u f'waqtha tal-proġett, jeħtieġ li jiġu adottati dispożizzjonijiet li jiddeskrivu l-azzjonijiet meħtieġa u li jistabbilixxu l-iskeda taż-żmien għall-implimentazzjoni tagħhom. Dan jgħin biex jintlaħqu l-objettivi transfruntiera tal-Pjan ta' Ħidma għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran, kif ukoll biex jitlesta proġett ta' bejn ix-xmara Seine u x-xmara Scheldt malajr kemm jista' jkun, u fi kwalunkwe każ, sa mhux aktar tard mill-2030.

(9)

L-identifikazzjoni ċara tal-azzjonijiet meħtieġa biex jitlesta l-proġett ta' bejn ix-xmara Seine u x-xmara Scheldt u l-iskeda taż-żmien għall-implimentazzjoni tagħhom hija importanti wkoll sabiex tiġi maħsuba u mtejba bis-sħiħ id-disponibbiltà tal-finanzjament Ewropew, nazzjonali u reġjonali kif ukoll tal-finanzjament privat. Il-kofinanzjament tal-UE jagħti spinta lit-teħid tad-deċiżjonijiet fil-livell nazzjonali u reġjonali biex jiġu implimentati l-azzjonijiet.

(10)

Il-Belġju (b'mod partikulari r-reġjun Fjamming u r-reġjun ta' Walloon) u Franza diġà wettqu xogħlijiet sinifikanti (studji u xogħlijiet ta' infrastruttura) li jikkontribwixxu għat-twettiq tal-proġett ta' bejn ix-xmara Seine u x-xmara Scheldt. Fil-biċċa l-kbira tagħhom, dawn ix-xogħlijiet ikkofinanzjathom l-Unjoni Ewropea fil-kuntest ta' programmi differenti. Bħalissa l-attivitajiet qed jitwettqu fil-kuntest ta' Ftehim tal-Għotja tal-Faċilità Nikkollegaw l-Ewropa (bin-numru ta' referenza 2014-EU-TM-0373-M, imsejjaħ “Seine-Escaut 2020”), li permezz tiegħu l-Unjoni qed tiffinanzja sa 50 % tal-kostijiet eliġibbli.

(11)

Il-lat transfruntier tal-proġett jitlob li jitwaqqfu strutturi ta' governanza apposta. Il-Belġju (b'mod partikulari r-reġjun Fjamming u r-reġjun ta' Walloon) u Franza ilhom snin twal jikkooperaw mill-qrib bejniethom, b'mod partikulari fil-qafas tal-Kummissjoni Intergovernattiva għat-tħejjija tat-tlestija tal-proġett ta' bejn ix-xmara Seine u x-xmara Scheldt, li ġiet stabbilita f'Settembru tal-2009. Din il-Kummissjoni Intergovernattiva għandha l-appoġġ operazzjonali tal-Grupp Ewropew b'Interess Ekonomiku fix-xmajjar Seine u Scheldt (il-GEIE tax-xmajjar Seine u Scheldt), li jiġbor flimkien l-awtorità Franċiża msejħa “Voies Navigables de France” (VNF), il-kumpanija pubblika msejħa “Société du Canal Seine-Nord Europe” (SCSNE), is-Servizz Pubbliku tar-reġjun ta' Walloon (SPW) u l-entita pubblika tar-reġjun Fjamming imsejħa “De Vlaamse Waterweg NV”. Il-kumpanija pubblika msejħa “Société du Canal Seine-Nord Europe”, li hija responsabbli għall-kostruzzjoni tal-kanal ta' bejn ix-xmara Seine u t-Tramuntana tal-Ewropa, ġiet stabbilita f'Mejju tal-2017. Dawn l-entitajiet li twaqqfu apposta jikkostitwixxu struttura ta' ġestjoni integrata li tissorvelja u tikkoordina t-tlestija tal-proġett ta' bejn ix-xmara Seine u x-xmara Scheldt. Jenħtieġ li l-Koordinatur Ewropew għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran u rappreżentant tal-Kummissjoni jieħdu sehem b'mod regolari fil-laqgħat tal-Kummissjoni Intergovernattiva u tal-GEIE tax-xmajjar Seine u Scheldt bħala osservaturi. Barra minn hekk, jenħtieġ li l-Koordinatur Ewropew u rappreżentant tal-Kummissjoni jieħdu sehem fil-laqgħat tal-bord superviżorju (imsejjaħ il-“conseil de surveillance”) tal-SCSNE bħala osservaturi. Franza tista' tipprevedi aktar arranġamenti xierqa sabiex iżżomm lill-Kummissjoni involuta kif xieraq f'dan il-bord superviżorju.

(12)

Sabiex jiġi mmonitorjat il-progress li jkun qed isir fl-implimentazzjoni, jenħtieġ li l-Istati Membri jipprovdu lill-Kummissjoni rapporti regolari dwar il-kwistjoni li jkollhom x'jaqsmu mal-partijiet li jkunu jinsabu fit-territorji rispettivi tagħhom, u li dawn javżawha b'kull dewmien li kien hemm.

(13)

Jenħtieġ li l-iskeda taż-żmien li din id-Deċiżjoni tistabbilixxi għall-implimentazzjoni tkun mingħajr preġudizzju għall-ilħiq tar-rekwiżiti ddefiniti mil-liġi internazzjonali u mid-dritt tal-Unjoni, inklużi d-dispożizzjonijiet dwar il-ħarsien ambjentali u l-ħarsien ta' saħħet il-bniedem. Jenħtieġ li din l-iskeda taż-żmien tippermetti li tiġi maħsuba u mtejba bis-sħiħ id-disponibbiltà tal-finanzjament mingħajr ma tippreġudika l-impenn finanzjarju ta' Stat Membru jew tal-Unjoni. Jenħtieġ li din fl-ebda ċirkustanza ma tikkomprometti l-istandards għoljin tal-Unjoni marbutin mal-ħarsien ambjentali u mal-parteċipazzjoni tal-pubbliku.

(14)

Mingħajr preġudizzju għat-tieni subparagrafu tal-Artikolu 47(2) tar-Regolament (UE) Nru 1315/2013, huwa xieraq li f'din id-Deċiżjoni tiġi prevista klawżola ta' rieżami.

(15)

Il-Belġju u Franza approvaw il-miżuri previsti f'din id-Deċiżjoni.

(16)

Il-miżuri previsti f'din id-Deċiżjoni huma skont l-opinjoni tal-Kumitat imsemmi fl-Artikolu 52 tar-Regolament (UE) Nru 1315/2013,

ADOTTAT DIN ID-DEĊIŻJONI:

Artikolu 1

Suġġett

Din id-Deċiżjoni tiddeskrivi l-azzjonijiet tal-proġett transfruntier ta' bejn ix-xmara Seine u x-xmara Scheldt u tistabbilixxi l-iskeda taż-żmien għall-implimentazzjoni tagħhom, kif ukoll id-dispożizzjonijiet ta' governanza marbutin ma' dan il-proġett.

Artikolu 2

Azzjonijiet u skeda taż-żmien

Il-Belġju u Franza għandhom jiżguraw l-implimentazzjoni f'waqtha tal-azzjonijiet li ġejjin:

(a)

f'Seine-Amont, minn Nogent-sur-Seine sa Pariġi: it-titjib tal-kundizzjonijiet tan-navigazzjoni sa Diċembru tal-2030:

—

it-titjib tal-kundizzjonijiet tan-navigazzjoni, inklużi r-rikostruzzjoni tad-digi sommerġibbli (f'Beaulieu, Livon u Vives-Eaux), sa Diċembru tal-2027, u r-riabilitazzjoni tax-xtabi sekondarji (f'Coudray, Vives-Eaux, La Cave u Champagne), sa Diċembru tal-2023;

—

l-istabbiliment tal-kontroll mill-bogħod tax-xtabi u tad-digi sommerġibbli sa Diċembru tal-2024;

—

it-titjib tal-faċilitajiet għan-navigazzjoni u tas-servizzi mogħtija lill-utenti, sa Diċembru tal-2027;

(b)

f'Seine-Aval, minn Suresnes sa Le Havre: l-aġġornamenti u t-titjib tal-kundizzjonijiet tan-navigazzjoni sa Diċembru tal-2027:

—

it-titwil u r-riabilitazzjoni tax-xtabi (bħal f'Méricourt u Bougival), sa Diċembru tal-2026;

—

l-immodernizzar tad-digi sommerġibbli (f'Port-Mort, Poses, Méricourt, Bougival, Suresnes u Andrésy) sa Diċembru tal-2027, inkluż it-tisħiħ tal-imbankment ta' Croissy-sur-Seine sa Diċembru tal-2022;

—

l-istabbiliment tal-kontroll mill-bogħod tax-xtabi u tad-digi sommerġibbli sa Diċembru tal-2024;

—

it-titjib tal-faċilitajiet għan-navigazzjoni u tas-servizzi mogħtija lill-utenti, sa Diċembru tal-2027;

—

il-kostruzzjoni tal-pont pedonali ta' Poses-Amfreville sa Diċembru tal-2022 u l-kostruzzjoni ta' passaġġi għall-ħut sa Diċembru tal-2030;

(c)

f'Oise, minn Conflans-Sainte-Honorine sa Compiègne: l-aġġornament għall-klassi Vb tal-ECMT u t-titjib tal-kundizzjonijiet tan-navigazzjoni sa Diċembru tal-2028:

—

l-aġġornament tax-xmara Oise għall-klassi Vb tal-ECMT (il-proġett imsejjaħ “MAGEO”: is-salvataġġ tax-xtut u l-mollijiet li jservu ta' pont bejn Creil u Compiègne, it-tħammil u l-ħolqien tal-post għall-iżbark f'Venette), sa Ġunju tal-2027;

—

ir-rikostruzzjoni tal-pont ta' Mours sa Diċembru tal-2025;

—

l-istabbiliment tal-kontroll mill-bogħod tax-xtabi u tad-digi sommerġibbli sa Diċembru tal-2028;

(d)

fil-kanal ta' bejn ix-xmara Seine u t-Tramuntana tal-Ewropa, minn Compiègne sa Aubencheul-au-Bac: sa Diċembru tal-2028, il-kostruzzjoni u d-dħul fit-tħaddim, bil-klassi Vb tal-ECMT, tas-setturi li ġejjin, li jippermettu l-użu ta' tliet saffi ta' kontejners:

(1)

tas-settur 1 minn Compiègne sa Passel, inkluża l-kostruzzjoni tax-xatba ta' Montmacq:

—

l-ippjanar territorjali spazjali sa Settembru tal-2020;

—

awtorizzazzjoni ambjentali unika sa Settembru tal-2020;

—

il-bidu tax-xogħlijiet ewlenin sa Ottubru tal-2020;

—

it-tlestija tax-xogħlijiet sa Diċembru tal-2026;

—

id-dħul fit-tħaddim sa Ġunju tal-2027;

(2)

tas-settur 2 minn Passel sa Allaines (49 km), li jaqsam 33 muniċipalità, tas-settur 3 minn Allaines sa Etricourt-Manancourt (11-il km), li jaqsam tliet muniċipalitajiet, u tas-settur 4 minn Etricourt-Manancourt sa Aubencheul-au-Bac (30 km), li jaqsam 11-il muniċpalità, inkluża l-kostruzzjoni tax-xtabi ta' Noyon, Campagne, Allaines, Marquion-Bourlon, Oisy-Le-Verger u Moislains (ix-xatba ta' kollegament mal-Kanal tat-Tramuntana), tal-baċir tal-ħżin tax-xmara Louette u tal-pont fil-kanal ta' 1,33 km li jaqsam il-Wied tax-xmara Somme:

—

l-ippjanar territorjali spazjali sa Diċembru tal-2022;

—

awtorizzazzjoni ambjentali unika sa Ottubru tal-2022;

—

il-bidu tax-xogħlijiet ewlenin sa Diċembru tal-2023;

—

it-tlestija tax-xogħlijiet sa Ġunju tal-2028;

—

id-dħul fit-tħaddim sa Diċembru tal-2028;

(e)

fl-assi ta' bejn Dunkerque u x-xmara Scheldt, inkluż il-kanal ta' Dunkerque minn Valenciennes sax-xmara Scheldt u saċ-ċentru tar-reġjun ta' Walloon, kif ukoll sax-xmara Deûle fid-direzzjoni ta' Gent: l-aġġornament għall-klassi Va (bidirezzjonali) u għall-klassi Vb (unidirezzjonali) tal-ECMT, u t-titjib tal-kundizzjonijiet tan-navigazzjoni sa Diċembru tal-2027:

(1)

b'rabta mal-partijiet kollha:

—

studji biex tiżdied il-kapaċità tax-xtabi (permezz tal-irduppjar u/jew tat-titwil tagħhom), sa Diċembru tal-2023;

—

l-istabbiliment tal-kontroll mill-bogħod tax-xtabi sa Diċembru tal-2025;

—

l-iżgurar tal-kundizzjonijiet tan-navigazzjoni għall-bastimenti tal-klassi V tal-ECMT sa Diċembru tal-2027;

(2)

fil-parti minn Arleux sa Anzin: l-immodernizzar u r-riabilitazzjoni tax-xatba ta' Denain sa Diċembru tal-2022;

(3)

fil-parti minn Arleux sa Halluin:

—

l-aġġornament tax-xmara Deûle għall-klassi Va (bidirezzjonali) u għall-klassi Vb (unidirezzjonali) tal-ECMT sa Diċembru tal-2022;

—

l-immodernizzar u r-riabilitazzjoni tax-xtabi (inklużi x-xatba ta' Don u dik ta' Grand-Carré) sa Diċembru tal-2020, u t-titwil tax-xatba ta' Quesnoy-sur-Deûle sa Diċembru tal-2026;

(4)

fil-parti minn Bauvin sa Dunkerque:

—

id-difiżi tax-xtut tax-xmajjar tal-kanal ta' Aire Neufossé (il-fażijiet 1 u 2) sa Diċembru tal-2026, u d-difiżi tax-xtut tax-xmajjar u r-riabilitazzjoni tal-linja tal-ilma fis-sezzjonijiet tal-kanal ta' Fontinettes sa Diċembru tal-2023;

—

l-immodernizzar u r-riabilitazzjoni tax-xatba ta' Fontinettes sa Diċembru tal-2019;

(f)

fil-kanal ta' Condé-Pommerœul: il-ftuħ mill-ġdid, bil-klassi Va tal-ECMT, sa Diċembru tal-2022;

(g)

fiċ-ċentru tar-reġjun ta' Walloon, minn Pommerœul sa Namur: l-aġġornament għall-klassi Va tal-ECMT sa Diċembru tal-2028:

(1)

minn Pommerœul sa Seneffe: l-aġġornament għall-klassi Va tal-ECMT, inkluż l-adattament tal-kanal ta' Nimy-Blaton-Péronnes u l-irduppjar tax-xatba ta' Obourg, bit-tlestija tal-istudji sa Diċembru tal-2022 u t-tlestija tax-xogħlijiet sa Diċembru tal-2027;

(2)

minn Seneffe sa Charleroi: l-aġġornament għall-klassi Va tal-ECMT u l-irduppjar tax-xtabi (ta' Marchienne, Gosselies u Viesville), bix-xogħlijiet ta' tħejjija sa Diċembru tal-2022 u t-tlestija sa Diċembru tal-2027;

(3)

minn Charleroi sa Namur:

—

l-adattament tax-xatba ta' Auvelais sa Diċembru tal-2022;

—

it-titjib tal-possibbiltajiet tal-qsim, bit-tlestija tal-istudji sa Diċembru tal-2022 u t-tlestija tax-xogħlijiet sal-2028;

(h)

fil-parti ta' fuq tax-xmara Scheldt:

(1)

fir-reġjun ta' Walloon (fil-Belġju):

—

l-aġġornament għall-klassi Va tal-ECMT, inkluż l-adattament tal-punt tal-qsim ta' Tournai għall-klassi Va unidirezzjonali u l-aġġustament tal-pontijiet imsejħin “Pont des Trous” u “Pont-à-Pont” sa Diċembru tal-2022;

—

iż-żieda fil-kapaċità u l-iżgurar tas-siti tax-xtabi permezz tal-adattament tax-xtabi ta' Hérinnes u Kain, bit-tlestija tal-istudji sa Diċembru tal-2023 u t-tlestija tax-xogħlijiet sa Diċembru tal-2030;

(2)

fir-reġjun Fjamming (fil-Belġju): it-tlestija tal-istudji biex ix-xtabi jiġu aġġornati għall-klassi Vb tal-ECMT sa Diċembru tal-2022, u t-tfassil ta' pjan ta' implimentazzjoni teknika u finanzjarja sa Diċembru tal-2023;

(i)

f'Lys: l-aġġornament għall-klassi Vb (unidirezzjonali) u għall-klassi Va (bidirezzjonali) tal-ECMT, li jippermetti l-użu ta' tliet saffi ta' kontejners, sa Diċembru tal-2027, inkluż:

(1)

fir-reġjun Fjamming (fil-Belġju), bejn Ghent u Wervik:

—

l-adattament tax-xtabi kollha għall-klassi Vb tal-ECMT, inklużi x-xtabi f'St-Baafs-Vijve u f'Harelbeke, sa Diċembru tal-2021;

—

il-kalibrazzjoni tal-klassi Vb tal-ECMT, inkluż l-irfigħ tal-pontijiet li jippermetti l-użu ta' tliet saffi ta' kontejners, sa Diċembru tal-2022 fil-kanal ta' devjazzjoni ta' Lys u sa Diċembru tal-2027 fil-partijiet li jkun għad fadal;

(2)

fir-reġjun ta' Walloon (fil-Belġju), fil-muniċipalità ta' Comines: l-aġġornament għall-klassi Vb tal-ECMT, inkluż il-punt tal-qsim ta' Comines, sa Diċembru tal-2027, u l-iżgurar tan-navigazzjoni, b'mod speċjali bis-sostituzzjoni tad-diga sommerġibbli f'Comines, sa Diċembru tal-2030;

(3)

fi Franza, bejn Deûlémont u Comines: l-aġġornament għall-klassi Vb tal-ECMT sa Diċembru tal-2024;

(j)

fin-netwerk ta' kollegament fir-reġjun Fjamming:

(1)

studji għall-aġġornament tal-partijiet Fjammingi tal-passaġġi fuq l-ilma interni li jagħtu b'mod dirett għall-kollegament ewlieni ta' bejn ix-xmara Seine u x-xmara Scheldt, sa Diċembru tal-2022:

—

l-aġġornament tal-kollegamenti mal-portijiet marittimi ta' Zeebrugge u ta' Antwerp (il-kanal ta' bejn Ghent u Bruges u l-parti marittima ta' fuq tax-xmara Scheldt rispettivament) għall-klassi Va tal-ECMT, li jippermetti l-użu ta' tliet saffi ta' kontejners;

—

l-aġġornament tal-kanali ta' Roeselare-Lys u Bossuit-Kortrijk għall-klassi Va tal-ECMT;

(2)

it-tfassil ta' pjan ta' implimentazzjoni teknika u finanzjarja, inkluża valutazzjoni tal-prijorità ddettaljata, għall-aġġornamenti meħtieġa fil-partijiet imsemmijin hawn fuq, sa Diċembru tal-2023;

(k)

bejn Seneffe u Antwerp, fil-parti Fjamminga u tar-reġjun ta' Walloon: it-twettiq ta' studji, b'mod partikulari biex ikun hemm aġġornament komplut għall-klassi IV tal-ECMT, sa Diċembru tal-2022, u t-tfassil ta' pjan ta' implimentazzjoni teknika u finanzjarja tal-aġġornamenti meħtieġa, sa Diċembru tal-2023;

(l)

azzjonijiet ġenerali:

(1)

it-tfassil, sa Diċembru tal-2022, ta' qafas tal-politika kkoordinat bejn il-partijiet differenti sabiex jiġi promoss l-użu sħiħ tal-infrastruttura tal-karburanti alternattivi tul in-netwerk kollu ta' bejn ix-xmara Seine u x-xmara Scheldt, f'konformità mal-oqfsa ta' politika nazzjonali li l-Belġju u Franza bagħtu fil-kuntest tad-Direttiva 2014/94/UE tal-Parlament Ewropew u tal-Kunsill (2), bil-ħsieb li dan jiġi implimentat b'mod gradwali sa Diċembru tal-2030;

(2)

l-implimentazzjoni, sa Diċembru tal-2028, ta' servizzi integrati u effiċjenti transfruntiera għall-ġestjoni tat-traffiku u tat-trasport tul in-netwerk kollu ta' bejn ix-xmara Seine u x-xmara Scheldt, inkluża l-implimentazzjoni tal-RIS fuq skala sħiħa skont id-Direttiva 2005/44/KE tal-Parlament Ewropew u tal-Kunsill (3);

(3)

l-iżvilupp ta' pjattaformi multimodali tal-loġistika għan-netwerk ta' bejn ix-xmara Seine u x-xmara Scheldt sa Diċembru tal-2028.

Artikolu 3

Governanza

1.   Il-Koordinatur Ewropew għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran u rappreżentant tal-Kummissjoni Ewropea għandhom jiġu mistiedna jieħdu sehem bħala osservaturi fil-laqgħat tal-bord superviżorju (imsejjaħ il-“conseil de surveillance”) tal-kumpanija pubblika msejħa “Société du Canal Seine-Nord Europe”.

2.   Il-progress li jkun qed isir b'rabta mal-azzjonijiet imsemmijin fl-Artikolu 2 għandu jiġi diskuss b'mod regolari fil-qafas tal-Kummissjoni Intergovernattiva għat-tħejjija tat-tlestija tal-proġett ta' bejn ix-xmara Seine u x-xmara Scheldt, kif ukoll fil-qafas tal-GEIE tax-xmajjar Seine u Scheldt. Il-Koordinatur Ewropew għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran u rappreżentant tal-Kummissjoni għandhom jiġu mistiedna jieħdu sehem bħala osservaturi mill-inqas darbtejn fis-sena fil-laqgħat tal-Kummissjoni Intergovernattiva u mill-inqas tliet darbiet fis-sena fil-laqgħat tal-GEIE tax-xmajjar Seine u Scheldt.

Artikolu 4

Rappurtar

Mill-inqas darba fis-sena, il-Belġju u Franza għandhom jibagħtu rapport lill-Kummissjoni u lill-Koordinatur Ewropew għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran dwar il-progress li jkun qed isir fl-implimentazzjoni tal-azzjonijiet imsemmijin fl-Artikolu 2, u għandhom javżawhom b'kull dewmien li kien hemm, filwaqt li jispeċifikaw ir-raġunijiet għal dan id-dewmien u l-miżuri korrettivi li jkunu ħadu b'rabta ma' dan. Għal dan il-għan, meta jkun xieraq dawk l-Istati Membri jistgħu jużaw il-kontenut tar-rapporti annwali dwar l-istatus li għandhom jintbagħtu fil-kuntest tal-Ftehimiet tal-Għotja tal-Faċilità Nikkollegaw l-Ewropa.

Artikolu 5

Rieżami

Sa mhux aktar tard mill-31 ta' Diċembru 2023, fuq talba tal-Belġju u ta' Franza jew fuq inizjattiva tagħha stess, il-Kummissjoni għandha twettaq rieżami tal-azzjonijiet u tal-iskeda taż-żmien imsemmijin fl-Artikolu 2 bl-għajnuna tal-Koordinatur Ewropew għall-Kuritur tan-Netwerk Ewlieni ta' bejn il-Baħar tat-Tramuntana u l-Mediterran.

Artikolu 6

Din id-Deċiżjoni hija indirizzata lir-Renju tal-Belġju u lir-Repubblika Franċiża.

Magħmul fi Brussell, is-27 ta' Ġunju 2019.

Għall-Kummissjoni

Violeta BULC

Membru tal-Kummissjoni


(1)   ĠU L 348, 20.12.2013, p. 1.

(2)  Id-Direttiva 2014/94/UE tal-Parlament Ewropew u tal-Kunsill tat-22 ta' Ottubru 2014 dwar l-infrastruttura tal-karburanti alternattivi (ĠU L 307, 28.10.2014, p. 1).

(3)  Id-Direttiva 2005/44/KE tal-Parlament Ewropew u tal-Kunsill tas-7 ta' Settembru 2005 dwar is-Servizzi Armonizzati ta' Informazzjoni tax-Xmajjar (RIS) f'passaġġi fuq l-ilma interni fil-Komunità (ĠU L 255, 30.9.2005, p.152).