23.3.2022   

GA

Iris Oifigiúil an Aontais Eorpaigh

L 94/1


RIALACHÁN CUR CHUN FEIDHME (AE) 2022/462 ÓN gCOIMISIÚN

an 16 Márta 2022

lena ndeonaítear idirthréimhse le haghaidh úsáid an táisc gheografaigh faoi chosaint “Λουκάνικο Πιτσιλιάς” (Loukaniko Pitsilias) (TGFC)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1151/2012 ó Pharlaimint na hEorpa agus ón gComhairle an 21 Samhain 2012 maidir le scéimeanna cáilíochta do tháirgí talmhaíochta agus do bhia-earraí (1), agus go háirithe Airteagal 15(1) de,

De bharr an mhéid seo a leanas:

(1)

Le litir dar dáta an 15 Meán Fómhair 2017, mhol údaráis na Cipire don Choimisiún idirthréimhse a dheonú le haghaidh úsáid an ainm “Λουκάνικο Πιτσιλιάς” (Loukaniko Pitsilias) don chuideachta “Γρηγορίου Β.Ε. Λτδ” (Grigoriou B.E. Ltd), cuideachta a chruthaigh faoin nós imeachta agóide náisiúnta gur chuir sé an táirge ar an margadh go dleathach faoi ainm comhionann leis an ainm cláraithe ar feadh níos mó ná 5 bliana. Chuir údaráis na Cipire in iúl go bhfuil an chuideachta seo ina comhalta den Cyprus Meat Products Association (Comhlachas Táirgí Feola na Cipire), comhlachas a thaisc agóid inghlactha ar an leibhéal náisiúnta in aghaidh an iarratais ar chlárú an ainm “Λουκάνικο Πιτσιλιάς” (Loukaniko Pitsilias), iarratas ar dhiúltaigh an t-údarás inniúil dó. I bhfianaise gur chomhlíon an chuideachta sin na coinníollacha a leagtar síos in Airteagal 15(1) de Rialachán (AE) Uimh. 1151/2012, mhol údaráis na Cipire don Choimisiún Eorpach idirthréimhse a dheonú di.

(2)

Trí bhíthin Rialachán Cur Chun Feidhme (AE) 2021/154 ón gCoimisiún (2), chláraigh an Coimisiún an t-ainm “Λουκάνικο Πιτσιλιάς” (Loukaniko Pitsilias) (TGFC) sa chlár um shonrúcháin tionscnaimh faoi chosaint agus um thásca geografacha faoi chosaint, gan an idirthréimhse dá bhforáiltear in Airteagal 15(1) a dheonú do “Γρηγορίου Β.Ε. Λτδ” (Grigoriou B.E. Ltd) mar a mhol údaráis na Cipire. Tháinig Rialachán Cur Chun Feidhme (AE) 2021/154 i bhfeidhm an 2 Márta 2021.

(3)

Le litir dar dáta an 1 Márta 2021, mheabhraigh údaráis na Cipire don Choimisiún faoin moladh le haghaidh idirthréimhse a bhí san áireamh sa litir dar dáta an 15 Meán Fómhair 2017.

(4)

Le litir dar dáta an 4 Bealtaine 2021, d’fhreagair an Coimisiún, ag iarraidh ar údaráis na Cipire fad na hidirthréimhse a iarradh a shonrú agus bonn cirt a thabhairt léi.

(5)

Le litir dar dáta an 28 Meán Fómhair 2021, thug údaráis na Cipire le fios gur mheas siad idirthréimhse 5 bliana a bheith iomchuí. Bhí táirge a bhfuil an t-ainm céanna aige leis an ainm a cláraíodh faoi Rialachán Cur Chun Feidhme (AE) 2021/154 á chur ar an margadh go dleathach ag an gcuideachta “Γρηγορίου Β.Ε. Λτδ” (Grigoriou B.E. Ltd) ar feadh tréimhse leanúnach os cionn 10 mbliana sular cláraíodh an tásc geografach faoi chosaint. Ach an idirthréimhse atá beartaithe a dheonú, bheadh an chuideachta in ann a timthriall oibriúcháin a oiriúnú agus a athstruchtúrú i bhfianaise na staide nua.

(6)

De réir na faisnéise a chuir údaráis na Cipire ar fáil, ní leanann an chuideachta atá i gceist an tsonraíocht agus dá bhrí sin, shárófaí Airteagal 13(1) de Rialachán (AE) Uimh. 1151/2012 dá n-úsáidfeadh sí an t-ainmniú lena mbaineann.

(7)

Dá bhrí sin, chomhlíon an chuideachta “Γρηγορίου Β.Ε. Λτδ” (Grigoriou B.E. Ltd) na coinníollacha a leagtar síos in Airteagal 15(1) de Rialachán (AE) Uimh. 1151/2012 le go ndeonófaí idirthréimhse le leanúint ar aghaidh de bheith ag úsáid ainmniú an táirge faoinar cuireadh ar an margadh é. Ba cheart idirthréimhse 5 bliana a dheonú dá bhrí sin, agus le linn na tréimhse sin féadfaidh “Γρηγορίου Β.Ε. Λτδ” (Grigoriou B.E. Ltd) úsáid a bhaint as an ainm faoi chosaint “Λουκάνικο Πιτσιλιάς” (Loukaniko Pitsilias).

(8)

Ós rud é go bhfuil an t-ainm faoi chosaint ón 2 Márta 2021, an tráth a ndeachaigh Rialachán Cur Chun Feidhme (AE) 2021/154 lenar cláraíodh an t-ainm “Λουκάνικο Πιτσιλιάς” (Loukaniko Pitsilias) (PGI) i bhfeidhm, ba cheart feidhm chúlghabhálach a bheith ag an údarú chun an t-ainm faoi chosaint a úsáid ón dáta sin.

(9)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Beartas Cáilíochta Táirgí Talmhaíochta,

TAR ÉIS AN RIALACHÁN SEO A GHLACADH:

Airteagal 1

Údaraítear leis seo don chuideachta “Γρηγορίου Β.Ε. Λτδ” (Grigoriou B.E. Ltd) an t-ainm cláraithe “Λουκάνικο Πιτσιλιάς” (Loukaniko Pitsilias) a úsáid ar feadh idirthréimhse a mhairfidh go dtí an 1 Márta 2026. Beidh feidhm chúlghabhálach ag an idirthréimhse sin ón 2 Márta 2021.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach sna Ballstáit i gcomhréir leis na Conarthaí.

Arna dhéanamh sa Bhruiséil, 16 Márta 2022.

Thar ceann an Choimisiúin

An tUachtarán

Ursula VON DER LEYEN


(1)   IO L 343, 14.12.2012, lch. 1.

(2)  Rialachán Cur Chun Feidhme (AE) 2021/154 ón gCoimisiún an 3 Feabhra 2021 lena gcláraítear ainm sa chlár um shonrúcháin tionscnaimh faoi chosaint agus um thásca geografacha faoi chosaint “Λουκάνικο Πιτσιλιάς” (Loukaniko Pitsilias) (TGFC) (IO L 46, 10.2.2021, lch. 4).