(1)

I Rialachán (AE) 2018/1806 ó Pharlaimint na hEorpa agus ón gComhairle (2) liostaítear na tríú tíortha a bhfuil ar a náisiúnaigh víosa a bheith ina seilbh acu agus iad ag trasnú theorainneacha seachtracha na mBallstát (‘an ceanglas víosa’) agus liostaítear na tríú tíortha a bhfuil a náisiúnaigh díolmhaithe ón gceanglas víosa le haghaidh fanachtaí nach faide ná 90 lá in aon tréimhse 180 lá (‘an díolúine víosa’).

(2)

Baineann an tAontas agus tríú tíortha araon tairbhí suntasacha as an taisteal gan víosa. Tríd an gcaidreamh eacnamaíoch, sóisialta agus cultúrtha le tríú tíortha, cruthaítear rathúnas agus cuirtear chun cinn go hidirnáisiúnta cineál oscailte agus saor an Aontais mar limistéar saoirse, slándála agus ceartais. Tá comhbheartas víosaí an Aontais, i ndáil leis sin, ina bhunchloch dá rannpháirtíocht le tríú tíortha. Ag an am céanna, mar gheall ar an gcomhthéacs geopholaitiúil atá ag teacht chun cinn, tá dúshláin nua ann a bhaineann le taisteal gan víosa. Chun aghaidh a thabhairt ar na dúshláin nua sin agus ar raon níos leithne rioscaí a bhaineann leis an imirce neamhrialta, an beartas poiblí agus an tslándáil a eascraíonn as na tríú tíortha a liostaítear in Iarscríbhinn II a ghabhann le Rialachán (AE) 2018/1806 (‘tríú tíortha atá díolmhaithe ó cheanglas víosa’), ba cheart an sásra chun an díolúine víosa a chur ar fionraí go sealadach do náisiúnaigh tríú tír atá díolmhaithe ó cheanglas víosa (an ‘sásra fionraíochta’) a neartú agus a dhéanamh níos éifeachtúla.

(3)

Ba cheart úsáid an tsásra fionraíochta a éascú, go háirithe, trí na forais fhéideartha a leathnú chun é a thionscnamh, trí na tairseacha agus na nósanna imeachta ábhartha a oiriúnú, agus trí oibleagáidí faireacháin agus tuairiscithe an Choimisiúin a neartú.

(4)

Tá roinnt comhaontuithe tugtha i gcrích ag an Aontas maidir leis an tarscaoileadh ar víosa gearrfhanachta le tríú tíortha atá díolmhaithe ó cheanglas víosa agus d’fhéadfadh sé níos mó comhaontuithe den sórt sin a thabhairt i gcrích sa todhchaí. I gcás ina ndéantar an sásra fionraíochta a thionscnamh maidir le tríú tír a bhfuil comhaontú den sórt sin tugtha i gcrích ag an Aontas léi, ba cheart é a chur i bhfeidhm gan dochar do na forálacha ábhartha i ndáil le forais le haghaidh fionraí agus do na nósanna imeachta a leagtar amach sa chomhaontú lena mbaineann. Dá réir sin, chun go ngabhfaidh éifeacht le fionraíocht na díolúine víosa faoi dhlí an Aontais i gcomhréir le hoibleagáidí idirnáisiúnta an Aontais, ní mor cur i bhfeidhm an chomhaontaithe ábhartha a chur ar fionraí go comhthreomhar trí bhíthin cinneadh ón gComhairle.

(5)

Mar gheall ar an ngá atá le freagairt láithreach agus iomchuí ar bhagairtí hibrideacha a áirithiú i gcomhréir le dlí an Aontais agus le hoibleagáidí idirnáisiúnta an Aontais, ba cheart é a bheith indéanta an sásra fionraíochta a thionscnamh i gcás ina bhfuil rioscaí nó bagairtí do bheartas poiblí nó do shlándáil inmheánach Ballstát a eascraíonn as bagairtí hibrideacha amhail cásanna ionstraimiú státurraithe na n-imirceach, dá dtagraítear i Rialachán (AE) 2024/1359 ó Pharlaimint na hEorpa agus ón gComhairle (3), arb é is aidhm dóibh an tsochaí agus na príomhinstitiúidí a dhíchobhsú nó an bonn a bhaint díobh.

(6)

Tá sé fíor-riachtanach a bheith in ann iontaoibh iomlán a bheith agat as na doiciméid taistil, aitheantais agus pórúcháin arna n-eisiúint ag tríú tíortha atá díolmhaithe ó cheanglas víosa. Tá sé fíor-riachtanach freisin nach féidir doiciméid den sórt sin a fhalsú ná a ghóchumadh go héasca. Ós rud é go bhféadfadh rioscaí do bheartas poiblí nó do shlándáil inmheánach na mBallstát nó bagairtí orthu a bheith mar thoradh ar easnaimh de chineál sistéamach i ndlí slándála doiciméad nó i nósanna imeachta slándála doiciméad tríú tíortha atá díolmhaithe ó cheanglas víosa, ba cheart é a bheith indéanta an sásra fionraíochta a thionscnamh ar an bhforas sin.

(7)

Le scéimeanna saoránachta d’infheisteoirí a oibríonn tríú tíortha atá díolmhaithe ó cheanglas víosa, is féidir le náisiúnaigh tríú tír taisteal taistil gan víosa chuig an Aontas, ar náisiúnaigh tríú tír iad a bheadh faoi réir an cheanglais víosa murach sin. Faoi scéim saoránachta d’infheisteoirí, deonaítear saoránacht do dhuine i gcomaoin íocaíochtaí nó infheistíochtaí réamhshocraithe gan aon fhíornasc a bheith ag an duine sin leis an tríú tír lena mbaineann. Cé go n-urramaíonn an tAontas ceart na dtíortha ceannasacha cinneadh a dhéanamh maidir lena nósanna imeachta eadóirseachta féin, ba cheart cosc a chur ar thríú tíortha atá díolmhaithe ó cheanglas víosa úsáid a bhaint as rochtain gan víosa ar an Aontas mar uirlis chun infheistíocht aonair a ghiaráil i gcomaoin na saoránachta. Ina theannta sin, tá roinnt rioscaí tromchúiseacha slándála do shaoránaigh an Aontais ag baint le heaspa seiceálacha cuimsitheacha slándála, nósanna imeachta grinnfhiosrúcháin agus díchill chuí ag na tríú tíortha sin maidir le scéimeanna saoránachta d’infheisteoirí, amhail na rioscaí sin a eascraíonn as sciúradh airgid agus éilliú. Chun cosc a chur ar rochtain gan víosa ar an Aontas a bheith á úsáid chuige sin, ba cheart é a bheith indéanta an díolúine víosa a chur ar fionraí do thríú tír a roghnaíonn scéimeanna saoránachta d’infheisteoirí a oibriú, faoina ndeonaítear saoránacht do dhuine gan aon fhíornasc a bheith ag an duine sin leis an tríú tír sin.

(8)

Beartas víosaí tríú tír atá díolmhaithe ó cheanglas víosa nach bhfuil ailínithe le beartas víosa an Aontais a mhéid a bhaineann le liosta na dtríú tíortha atá díolmhaithe ó cheanglas víosa, d’fhéadfadh imirce neamhrialta chuig an Aontas a bheith mar thoradh air, go háirithe i gcás ina bhfuil an tríú tír lena mbaineann i ngaireacht gheografach don Aontas. Dá bhrí sin, ba cheart é a bheith indéanta an sásra fionraíochta a thionscnamh i gcás ina dtagann an Coimisiún ar an gconclúid, tar éis dó measúnú a dhéanamh, go bhféadfadh méadú substaintiúil teacht ar líon na náisiúnach de thríú tír eile a thagann go dlíthiúil i gcríoch an tríú tír sin agus ansin a thagann isteach go neamhrialta i gcríoch na mBallstát mar thoradh ar neamhailíniú bheartas víosa tríú tír den sórt sin.

(9)

Le Rialachán (AE) 2018/1806 cinntear na tríú tíortha a bhfuil a náisiúnaigh faoi réir an cheanglais víosa nó díolmhaithe ón gceanglas sin. Léirítear cuid de na critéir a úsáidtear chun measúnú a dhéanamh ar oiriúnacht díolúine víosa a dheonú sna forais le haghaidh fionraí i bhforálacha eile den Rialachán sin, rud a áirithíonn nasc idir na critéir maidir le díolúine ó víosa a dheonú agus na forais le haghaidh fionraí. Dá bhrí sin, ba cheart foráil a dhéanamh freisin leis an sásra fionraíochta mar a athbhreithnítear leis an Rialachán seo maidir leis an bhféidearthacht an díolúine víosa a chur ar fionraí i gcás ina bhfuil meath ar chaidreamh seachtrach an Aontais le tríú tír atá díolmhaithe ó cheanglas víosa de dheasca sáruithe tromchúiseacha ar na prionsabail a leagtar amach i gCairt na Náisiún Aontaithe, sáruithe tromchúiseacha ar shaoirsí bunúsacha nó ar na hoibleagáidí a eascraíonn as an dlí idirnáisiúnta um chearta an duine nó as an dlí daonnúil idirnáisiúnta, sáruithe tromchúiseacha ar an dlí idirnáisiúnta agus ar chaighdeáin dlí idirnáisiúnta, neamhchomhlíonadh cinntí agus rialuithe cúirte idirnáisiúnta nó gníomhartha naimhdeacha arna ndéanamh i gcoinne an Aontais nó na mBallstát arb é is aidhm dóibh an tsochaí nó na hinstitiúidí atá ríthábhachtach do bheartas poiblí agus do shlándáil inmheánach an Aontais nó na mBallstát a dhíchobhsú nó an bonn a bhaint díobh. D’fhéadfadh gníomhartha naimhdeacha den sórt sin a bheith mar thoradh ar chur isteach eachtrach ar phróisis pholaitiúla, ar chomhéigean eacnamaíoch, ar chibearoibríochtaí, ar spiaireacht eacnamaíoch nó ar shabaitéireacht ar bhonneagar criticiúil. Thairis sin, ós rud é go ndéanfar difear do chaidreamh seachtrach an Aontais ina iomláine, ba cheart é a bheith de shaincheart eisiach ag an gCoimisiún an sásra fionraíochta a thionscnamh, tar éis dul i gcomhairle leis na Ballstáit, ar an bhforas go bhfuil meath tagtha ar chaidreamh seachtrach an Aontais le tríú tír atá díolmhaithe ó cheanglas víosa. Ina theannta sin, i gcás ina ndéanann an Coimisiún breithniú i dtaobh an díolúine víosa a chur ar fionraí ar an bhforas sin, ba cheart a chur san áireamh ina mheasúnú an tionchar a d’fhéadfadh a bheith ag an bhfionraí ar náisiúnaigh an tríú tír lena mbaineann.

(10)

Sna comhaontuithe maidir le tarscaoileadh ar víosaí gearrfhanachta arna dtabhairt i gcrích le tríú tíortha atá díolmhaithe ó cheanglas víosa d’fhéadfaí a áireamh forais le haghaidh fionraí atá éagsúil ó na cinn a leagtar amach sa sásra fionraíochta. Dá réir sin, ba cheart é a bheith indéanta freisin an sásra fionraíochta a thionscnamh ar bhonn na bhforas sin. Mar sin féin, ba cheart úsáid na bhforas le haghaidh fionraí a leagtar amach i gcomhaontuithe maidir le tarscaoileadh ar víosa ghearrfhanachta a theorannú do raon feidhme chur i bhfeidhm na gcomhaontaithe sin.

(11)

Ba cheart don Choimisiún measúnú a dhéanamh, ar bhonn cás ar chás, ar na tairseacha chun an sásra fionraíochta a thionscnamh i gcás méadú substaintiúil ar an líon náisiúnach de thríú tír atá díolmhaithe ó cheanglas víosa ar diúltaíodh dul isteach dóibh i gcríoch an Bhallstáit nó a fuarthas amach go bhfuil siad ag fanacht ar chríoch an Bhallstáit gan ceart chuige sin a bheith acu, i líon na n-iarratas ar thearmann ó náisiúnaigh den tríú tír atá díolmhaithe ó cheanglas víosa sin a bhfuil an ráta aitheantais íseal ina leith nó i líon na gcionta coiriúla tromchúiseacha a bhaineann le náisiúnaigh den tríú tír atá díolmhaithe ó cheanglas víosa sin. Go háirithe, ba cheart an Coimisiún a bheith in ann a mheasúnú, sna cásanna ar thug na Ballstáit fógra ina leith nó ar bhonn a anailíse féin, cé acu atá nó nach bhfuil imthosca sonracha ann a thabharfadh údar le tairseacha níos ísle nó níos airde a chur i bhfeidhm ná na cinn a shonraítear sna forálacha ábhartha de Rialachán (AE) 2018/1806. Ina mheasúnú, ba cheart don Choimisiún a chur san áireamh, inter alia, líon na dtrasnuithe neamhúdaraithe ar theorainneacha seachtracha na mBallstát, líon na n-iarratas gan bhunús ar thearmann nó líon na gcionta coiriúla a bhaineann le náisiúnaigh tríú tír atá díolmhaithe ó cheanglas víosa i gcomhréir le líon agus méid na mBallstát a ndéantar difear dóibh agus tionchar na n-uimhreacha sin ar staid fhoriomlán na himirce, feidhmiú na gcóras tearmainn nó slándáil inmheánach na mBallstát a ndéantar difear dóibh. Ba cheart don Choimisiún gníomhaíochtaí arna ndéanamh ag an tríú tír lena mbaineann chun an cás a leigheas a chur san áireamh freisin. Ba cheart don Choimisiún measúnú críochnúil a dhéanamh ar an ngá atá le fionraí na díolúine víosa, a chomhréirí a bheadh sé agus na hiarmhairtí a bheadh aige sula nglacfaidh sé an gníomh dlí ábhartha.

(12)

Chun fógra a thabhairt don Choimisiún maidir le himthosca a d’fhéadfadh a bheith ina bhforas le haghaidh fionraí, ba cheart na Ballstáit a bheith in ann tréimhsí tagartha níos faide ná 2 mhí a chur san áireamh chun athruithe tobanna ar an staid ábhartha a shainaithint ach, ní hamháin sin, treochtaí níos fadtéarmaí, suas le 12 mhí, a shainaithint, a d’fhéadfadh údar a thabhairt le tionscnamh an tsásra fionraíochta.

(13)

Aon uair a mheasann sé go bhfuil gá leis, nó arna iarraidh sin do Pharlaimint na hEorpa nó don Chomhairle, ba cheart don Choimisiún tuairisciú don Pharlaimint na hEorpa agus don Chomhairle ar thoradh an fhaireacháin chórasaigh a rinne sé ar an díolúine víosa i ndáil leis na tríú tíortha uile atá díolmhaithe ón gceanglas víosa, ar bhonn, inter alia, sonraí ó chórais faisnéise an Aontais, amhail an Córas Dul Isteach/Imeachta, a bunaíodh le Rialachán (AE) 2017/2226 ó Pharlaimint na hEorpa agus ón gComhairle (4), agus an Córas Eorpach um Fhaisnéis agus Údarú Taistil, a bunaíodh le Rialachán (AE) 2018/1240 ó Pharlaimint na hEorpa agus ón gComhairle (5), agus ó chomhlachtaí, oifigí agus gníomhaireachtaí an Aontais. Le tuarascálacha den sórt sin, ba cheart díriú ar na tríú tíortha sin atá díolmhaithe ó cheanglas víosa nach gcomhlíonann a thuilleadh, de réir anailís an Choimisiúin, na critéir maidir le díolúine víosa a dheonú faoi Rialachán (AE) 2018/1806 atá ábhartha maidir leis na forais le haghaidh fionraí, nó ar na tríú tíortha sin atá díolmhaithe ó cheanglas víosa a bhfuil fadhbanna sonracha ag baint leo a bhféadfadh tionscnamh an tsásra fionraíochta a bheith mar thoradh orthu mura dtabharfaí aghaidh orthu. Go háirithe, is iomchuí go mbreithneodh an Coimisiún ar thuairisciú a dhéanamh ar thríú thíortha a liostaítear as an nua in Iarscríbhinn II a ghabhann le Rialachán (AE) 2018/1806 gan bheith ag gabháil d’idirphlé maidir le léirscaoileadh víosaí leis an Aontas, i gcás ina measann sé go bhfuil gá leis agus, go háirithe, sna chéad bhlianta tar éis theacht i bhfeidhm an ghnímh dlí lena bhforáiltear don díolúine víosa do thríú tír den sórt sin.

(14)

I gcás ina dtionscnaítear an sásra fionraíochta ar na forais nár chomhlíon tríú tír atá díolmhaithe ón gceanglas víosa, ar tríú tír í a bhfuil idirphlé maidir le léirscaoileadh víosaí tugtha i gcrích go rathúil léi, na ceanglais shonracha maidir le caidreamh seachtrach nó na cearta bunúsacha a úsáideadh chun measúnú a dhéanamh ar oiriúnacht díolúine víosa a dheonú dá náisiúnaigh nó ar na forais go bhfuil meath tagtha ar chaidreamh seachtrach an Aontais leis an tríú tír sin atá díolmhaithe ó cheanglas víosa, ba cheart don Choimisiún tús áite a thabhairt do chur chuige spriocdhírithe. Faoi chur chuige spriocdhírithe den sórt sin, ba cheart don Choimisiún, thar aon ní eile, an fhionraí a chur i bhfeidhm maidir le daoine a bhfuil poist freagrachta acu, amhail comhaltaí thoscaireachtaí oifigiúla an tríú tír sin, comhaltaí de rialtais áitiúla, réigiúnacha agus náisiúnta an tríú tír sin, comhaltaí parlaimintí an tríú tír sin nó oifigigh ardchéime phoiblí nó mhíleata an tríú tír sin, ar an gcaoi sin íoslaghdaítear na hiarmhairtí díobhálacha don phobal i gcoitinne sa tríú tír sin. Ba cheart don Choimisiún faireachán leanúnach a dhéanamh ar thionscnamh na sásra fionraíochta agus féachaint an bhfuil an toradh a bhí beartaithe leis bainte amach agus ba cheart dó tuairisciú go tráthrialta ina leith sin do Pharlaimint na hEorpa agus don Chomhairle.

(15)

I gcás ina ndearnadh cinneadh an díolúine víosa a chur ar fionraí go sealadach ar na forais nár chomhlíon tríú tír atá díolmhaithe ó cheanglas víosa, ar tríú tír í a bhfuil idirphlé maidir le léirscaoileadh víosaí tugtha i gcrích go rathúil léi, na ceanglais shonracha maidir le caidreamh seachtrach nó cearta bunúsacha a úsáideadh chun measúnú a dhéanamh ar oiriúnacht díolúine víosa a dheonú di nó ar na forais go bhfuil meath tagtha ar chaidreamh seachtrach an Aontais le tríú tír atá díolmhaithe ó cheanglas víosa, agus go ndírítear leis an gcinneadh sin ar chatagóirí náisiúnach den tríú tír sin i bpoist freagrachta, ba cheart do na Ballstáit gach beart is gá a dhéanamh gan foráil a dhéanamh maidir le heisceachtaí ón gceanglas víosa sealadach ar feadh fad iomlán na fionraí sealadaí.

(16)

I gcás ina ndéanann an Coimisiún breithniú i dtaobh díolúine víosa a chur ar fionraí ar bhonn a anailíse féin nó tar éis dó fógra a fháil ó Bhallstát, ba cheart dó tionchar na fionraí ar an tsochaí shibhialta sa tríú tír lena mbaineann a chur san áireamh sa mheasúnú a dhéanfaidh sé, go háirithe i gcás ina bhfuil meath tagtha ar staid chearta an duine sa tríú tír sin.

(17)

I gcás ina ndearnadh cinneadh an díolúine víosa do thríú tír a chur ar fionraí go sealadach, ba cheart tréimhse ama leordhóthanach a bheith ann d’idirphlé feabhsaithe idir an Coimisiún agus an tríú tír lena mbaineann, arb é is aidhm dó na himthosca ba chúis leis an bhfionraí a leigheas. Chun na críche sin, ba cheart 12 mhí a bheith i gceist le fad na fionraí sealadaí arna glacadh trí bhíthin gníomh cur chun feidhme, agus ba cheart an deis a bheith ann síneadh 24 mhí eile a chur leis an bhfionraí sin trí bhíthin gníomh tarmligthe. Agus gníomh tarmligthe den sórt sin á ghlacadh aige, tá sé tábhachtach go dtabharfadh an Coimisiún míniú mionsonraithe ar thoradh an idirphlé fheabhsaithe leis an tríú tír lena mbaineann, na bearta arna nglacadh ag an tríú tír sin agus ag na Ballstáit lena mbaineann agus na cúiseanna lena mheas nár leigheasadh na himthosca ba chúis leis an bhfionraí shealadach. I gcás nach dtiocfar ar réiteach roimh dheireadh thréimhse chur i bhfeidhm an ghnímh tarmligthe agus go dtíolacann an Coimisiún togra reachtach chun an tagairt don tríú tír lena mbaineann a aistriú ó Iarscríbhinn II go dtí Iarscríbhinn I a ghabhann le Rialachán (AE) 2018/1806, ba cheart don Choimisiún gníomh tarmligthe a ghlacadh lena gcuirtear síneadh leis an bhfionraí shealadach go dtí go dtiocfaidh an togra reachtach a glacadh i bhfeidhm. Níor cheart, áfach, an síneadh sin a bheith níos faide ná 24 mhí.

(18)

I gcás ina nglactar gníomh cur chun feidhme lena gcuirtear an díolúine víosa ar fionraí go sealadach do náisiúnaigh tríú tír, ar náisiúnaigh iad a díolmhaíodh ón gceanglas víosa mar thoradh ar thabhairt i gcrích rathúil an idirphlé maidir le léirscaoileadh víosaí, ar na forais nár chomhlíon an tríú tír sin na ceanglais shonracha maidir le caidreamh seachtrach nó cearta bunúsacha a úsáideadh chun measúnú a dhéanamh ar oiriúnacht díoluine víosa a dheonú dá náisiúnaigh nó ar na forais go bhfuil meath tagtha ar chaidreamh seachtrach an Aontais le tríú tír, agus go bhfuil na himthosca sin fós ann, ba cheart an Coimisiún a bheith in ann a chinneadh nach bhfuil feidhm ag an ngníomh tarmligthe lena leathnaítear an fhionraí ach amháin maidir le catagóirí áirithe de náisiúnaigh tríú tír, agus imthosca sonracha an cháis agus prionsabal na comhréireachta á gcur san áireamh. I gcás nach dtiocfar ar réiteach roimh dheireadh thréimhse chur i bhfeidhm an ghnímh tharmligthe sin, ba cheart don Choimisiún athmheasúnú a dhéanamh ar an gcás agus ba cheart dó a bheith in ann cinneadh a dhéanamh síneadh breise a chur leis an bhfionraí trí bhíthin gníomh tarmligthe eile a bhfuil feidhm aige maidir le catagóirí ainmnithe de náisiúnaigh tríú tír.

(19)

I gcás ina bhfuil bonn cirt leis mar gheall ar phráinn an ábhair, mar shampla chun cosc a chur ar mhórphlódú isteach náisiúnach tríú tír a thagann isteach go neamhrialta ar chríoch na mBallstát nó ar dhamáiste tromchúiseach do bheartas poiblí nó do shlándáil inmheánach na mBallstát, ba cheart do chathaoireach an choiste arna bhunú de bhun Rialachán (AE) 2018/1806 chun cúnamh a thabhairt don Choimisiún, breithniú a dhéanamh ar an tréimhse ama a ghiorrú chun cruinniú den choiste a chomóradh agus ar úsáid a bhaint as an nós imeachta i scríbhinn dá bhforáiltear le Rialachán (AE) Uimh. 182/2011 ó Pharlaimint na hEorpa agus ón gComhairle (6), ós rud é, leis sin, go mbeadh sé indéanta don choiste sin a thuairim a thabhairt níos tapúla ná mar a bheadh murach sin.

(20)

Ba cheart deireadh a chur le fionraí shealadach na díolúine víosa i gcás ina ndéantar na himthosca ba chúis leis a leigheas roimh dheireadh na tréimhse fionraíochta. Chuige sin, ba cheart don Choimisiún gníomh cur chun feidhme a ghlacadh roimh dheireadh na tréimhse fionraíochta i gcás ina bhfuil an tréimhse sin leagtha amach i ngníomh cur chun feidhme nó i ngníomh tarmligthe a ghlacadh roimh dheireadh na tréimhse fionraíochta i gcás ina bhfuil an tréimshe sin leagtha amach i ngníomh tarmligthe.

(21)

Is é atá sa Rialachán seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (7); dá bhrí sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(22)

Maidir leis an Íoslainn agus leis an Iorua, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus ag Poblacht na hÍoslainne agus ag Ríocht na hIorua maidir le comhlachas Ríocht na hIorua le acquis Schengen a chur chun feidhme, a chur i bhfeidhm agus a fhorbairt (8), ar forálacha iad a thagann faoi réim an réimse dá dtagraítear in Airteagal 1, pointí B agus C, de Chinneadh 1999/437/CE ón gComhairle (9).

(23)

Maidir leis an Eilvéis, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (10), ar forálacha iad a thagann faoi réim an réimse dá dtagraítear in Airteagal 1, pointí B agus C, de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (11).

(24)

Maidir le Lichtinstéin, is é atá sa Rialachán seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme (12), a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointí B agus C, de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (13).

(25)

Maidir leis an gCipir, is é atá sa Rialachán seo gníomh atá ag cur le acquis Schengen nó atá gaolmhar leis ar dhóigh eile, de réir bhrí Airteagal 3(1) d’Ionstraim Aontachais 2003,

(1)

cuirtear an méid seo a leanas in ionad Airteagal 8:

(2)

cuirtear na hairteagail seo a leanas isteach:

(*1)  Rialachán (AE) 2019/1896 ó Pharlaimint na hEorpa agus ón gComhairle an 13 Samhain 2019 maidir leis an nGarda Teorann agus Cósta Eorpach agus lena n-aisghairtear Rialacháin (AE) Uimh. 1052/2013 agus (AE) 2016/1624 (IO L 295, 14.11.2019, lch. 1, ELI: http://data.europa.eu/eli/reg/2019/1896/oj)."

(*2)  Rialachán (AE) 2021/2303 ó Pharlaimint na hEorpa agus ón gComhairle an 15 Nollaig 2021 maidir le Gníomhaireacht an Aontais Eorpaigh um Thearmann agus lena n-aisghairtear Rialachán (AE) Uimh. 439/2010 (IO L 468, 30.12.2021, lch. 1, ELI: http://data.europa.eu/eli/reg/2021/2303/oj)."

(*3)  Rialachán (AE) 2016/794 ó Pharlaimint na hEorpa agus ón gComhairle an 11 Bealtaine 2016 maidir le Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus lena n-aisghairtear Cinntí 2009/371/CGB, 2009/934/CGB, 2009/935/CGB, 2009/936/CGB agus 2009/968/CGB ón gComhairle agus a ghabhann ionad na gCinntí sin (IO L 135, 24.5.2016, lch. 53, ELI: http://data.europa.eu/eli/reg/2016/794/oj).’;"

(3)

leasaítear Airteagal 10 mar a leanas: