(1)

Le Rialachán (CE) Uimh. 1831/2003, foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

Le Rialachán (CE) Uimh. 109/2007 ón gCoimisiún (2), údaraíodh dhá fhoirm d’ullmhóid arb é atá inti sóidiam moinéinsine (Coxidin) (‘an ullmhóid’), ceann le bran cruithneachta ann nó ceann le carbónáit chailciam ann, ar feadh 10 mbliana mar bhreiseán beathaithe le haghaidh sicíní lena ramhrú le haghaidh turcaithe suas le 16 seachtaine d’aois. Le Rialachán Cur Chun Feidhme (AE) Uimh. 140/2012 ón gCoimisiún (3), údaraíodh foirm na hullmhóide le carbónáit chailciam le haghaidh sicíní a thógtar le bheith ina mbéaróga freisin.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh dhá iarratas isteach chun údarú na hullmhóide a athnuachan mar bhreiseán beathaithe le haghaidh sicíní lena ramhrú agus turcaithe lena ramhrú (an dá fhoirm) agus le haghaidh sicíní a thógtar le bheith ina mbéaróga (an fhoirm le carbónáit chailciam inti), iarratais inar iarradh go n-aicmeofaí an breiseán sa chatagóir breiseán coicideastait agus histeamonastait. Bhí na sonraí agus na doiciméid a cheanglaítear faoi Airteagal 14(2) de Rialachán (CE) Uimh. 1831/2003 ag gabháil leis na hiarratais sin.

(4)

I gcomhthráth leis sin, cuireadh isteach dhá iarratas i gcomhréir le hAirteagal 7 de Rialachán (CE) Uimh. 1831/2003 maidir le húdarú úsáidí nua na hullmhóide. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis na hiarratais sin.

(5)

Na hiarratais a cuireadh isteach i gcomhréir le hAirteagal 7 de Rialachán (CE) Uimh. 1831/2003, baineann siad le húdarú na hullmhóide mar bhreiseán beathaithe le haghaidh sicíní a thógtar le bheith ina mbéaróga (an fhoirm le bran cruithneachta inti) agus turcaithe a thógtar le haghaidh atáirgthe (an dá fhoirm), agus iarrtar iontu go n-aicmeofaí an breiseán sin sa chatagóir coicideastait agus histeamonastait.

(6)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 31 Eanáir 2024 (4) agus an 24 Meitheamh 2025 (5) gur sholáthair an t-iarratasóir fianaise go bhfuil an ullmhóid fós sábháilte do thurcaithe lena ramhrú (suas le 16 seachtaine) ar an uasleibhéal údaraithe atá ann faoi láthair, is é sin 100 mg de shóidiam moinéinsine/kg d’ábhar beatha iomlán, agus leathnaigh sé an chonclúid sin chun turcaithe a thógtar le haghaidh atáirgthe (suas le 16 seachtaine) a chumhdach. Tháinig sé ar an gconclúid thairis sin go bhfuil úsáid na hullmhóide sábháilte suas go dtí an t-uasleibhéal molta nua atá beartaithe, is é sin 120 mg de shóidiam moinéinsine/kg d’ábhar beatha iomlán le haghaidh sicíní lena ramhrú agus sicíní a thógtar le bheith ina mbéaróga. Ina theannta sin, tháinig an tÚdarás ar an gconclúid go bhfuil úsáid na hullmhóide fós sábháilte do thomhaltóirí – na huasleibhéil iarmhar (MRLanna) atá ann cheana le haghaidh fíocháin éanlaithe clóis lena n-áirithítear sábháilteacht tomhaltóirí gan aon ghá le ham aistarraingthe - agus don chomhshaol. Tháinig sé ar an gconclúid freisin go mbaineann riosca trí ionanálú leis an dá fhoirmliú den ullmhóid agus nach greannaitheoirí craicinn iad. Shonraigh an tÚdarás thairis sin nach íogróir craicinn é an foirmliú le bran cruithneachta ann ach gur greannaitheoir súl é, agus gur cheart a mheas gur íogróir craicinn agus riospráide é an foirmliú le carbónáit chailciam ann, cé nach féidir teacht ar aon chonclúid maidir lena acmhainneacht a bheith ina ghreannaitheoir súl. Tháinig an tÚdarás ar an gconclúid thairis sin go bhfuil an ullmhóid éifeachtúil chun coiciodóis a rialú ar leibhéal 100 mg de shóidiam moinéinsine/kg d’ábhar beatha iomlán le haghaidh sicíní lena ramhrú agus ar leibhéal 60 mg de shóidiam moinéinsine/kg d’ábhar beatha iomlán le haghaidh turcaithe lena ramhrú. Leathnaigh an tÚdarás na conclúidí sin chun sicíní a thógtar le bheith ina mbéaróga agus turcaithe a thógtar le haghaidh atáirgthe a chumhdach. Thug sé dá aire go bhfuil comharthaí ann go bhfuil Eimeria spp. ag forbairt frithsheasmhacht in aghaidh sóidiam moinéinsine agus mheas sé go bhfuil gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar na modhanna anailíse ar na breiseáin bheathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003, a eascraíonn as leasú/forlíonadh choinníollacha an údaraithe roimhe seo.

(7)

I bhfianaise an mhéid thuas, measann an Coimisiún go gcomhlíonann an ullmhóid na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, maidir le húdarú an dá fhoirm den ullmhóid sin lena n-úsáid i sicíní lena ramhrú agus turcaithe lena ramhrú, agus údarú na foirme le carbónáit chailciam lena húsáid i sicíní a thógtar le bheith ina mbéaróga, ba cheart na húdaruithe sin a athnuachan. Ina theannta sin, ba cheart an ullmhóid sin a údarú le haghaidh na n-úsáidí nua a ndearnadh iarratais ina leith, is iad sin le haghaidh sicíní a thógtar le bheith ina mbéaróga (an fhoirm le bran cruithneachta inti) agus turcaithe a thógtar le haghaidh atáirgthe (an dá fhoirm). Is iomchuí foráil a dhéanamh maidir le clár faireacháin iarmhargaidh, a thosóidh 5 bliana tar éis theacht i bhfeidhm an Rialacháin Cur Chun Feidhme seo, chun aon chomhartha frithsheasmhachta in aghaidh sóidiam moinéinsine a eascraíonn as úsáid na hullmhóide a rianú agus a dhoiciméadú. Faoi dheireadh, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(8)

Mar thoradh ar údarú an dá fhoirm den ullmhóid a athnuachan, lena n-úsáid i sicíní lena ramhrú agus turcaithe lena ramhrú, agus ar údarú na foirme le carbónáit chailciam inti lena húsáid i sicíní a thógtar le bheith ina mbéaróga, ba cheart Rialachán (CE) Uimh. 109/2007 agus Rialachán Cur Chun Feidhme (AE) Uimh. 140/2012 a aisghairm.

(9)

Maidir leis na modhnuithe ar na coinníollacha údaraithe maidir leis an dá fhoirm den ullmhóid lena n-úsáid i sicíní lena ramhrú agus turcaithe lena ramhrú, agus leis an bhfoirm le carbónáit chailciam inti lena húsáid i sicíní a thógtar le bheith ina mbéaróga, ós rud é nach gá na modhnuithe sin a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,