AN COIMISIÚN EORPACH
An Bhruiséil,19.5.2021
COM(2021) 248 final
2021/0128(NLE)
Togra le haghaidh
RIALACHÁN ÓN gCOMHAIRLE
maidir le leithdháileadh na ndeiseanna iascaireachta dá bhforáiltear sa Phrótacal ar chur chun feidhme (2021-2026) an Chomhaontaithe Comhpháirtíochta Iascaigh idir Poblacht na Gabúine agus an Comhphobal Eorpach
MEABHRÁN MÍNIÚCHÁIN
1.COMHTHÉACS AN TOGRA
•Forais agus cuspóirí an togra
Síníodh an Comhaontú Comhpháirtíochta Iascaigh (SFPA) idir Poblacht na Gabúine agus an Comhphobal Eorpach an 4 Meitheamh 2007 agus tháinig sé i bhfeidhm an 11 Meitheamh 2007 ar feadh tréimhse sé bliana. Tá an comhaontú in-athnuaite go hintuigthe, agus dá bhrí sin tá sé fós i bhfeidhm. Bhí Prótacal Chur Chun Feidhme sé bliana de chuid SFPA ann roimhe sin, tháinig sé i bhfeidhm an 24 Iúil 2013 agus chuaigh sé in éag an 23 Iúil 2016.
Ar bhonn na dtreoracha caibidlíochta ábhartha 1 , rinne an Coimisiún caibidlíocht le Rialtas na Gabúine (dá ngairtear ‘an Ghabúin’ anseo feasta) d’fhonn Prótacal nua Cur Chun Feidhme de chuid SFPA (2021-2026) a thabhairt i gcrích thar ceann an Aontais Eorpaigh. Tar éis an chaibidlíocht a bheith tugtha i gcrích, chuir na hidirbheartaithe inisealacha le prótacal an 10 Feabhra 2021. Leis an bPrótacal nua, cumhdaítear tréimhse cúig bliana ó dháta an iarratais shealadaigh atá leagtha síos in Airteagal 24 de, is é sin an dáta a shíníonn an dá Pháirtí é.
Is é is cuspóir don togra seo síniú an Phrótacail Cur Chun Feidhme a údarú.
•Comhsheasmhacht le forálacha beartais atá sa réimse beartais cheana
Is é príomhaidhm an Phrótacail nua creat nuashonraithe a sholáthar agus tosaíochtaí an Chomhbheartais Iascaigh athchóirithe agus a ghné sheachtrach á gcur san áireamh, d’fhonn leanúint leis an gcomhpháirtíocht straitéiseach idir an tAontas Eorpach agus Poblacht na Gabúine i réimse na n‑iascach agus í a threisiú.
Is é is aidhm don Phrótacal deiseanna iascaireachta a thabhairt do shoithí an Aontais Eorpaigh i limistéar iascaireachta na Gabúine i gcomhréir leis an gcomhairle eolaíoch is fearr atá ar fáil agus le rúin agus moltaí an Choimisiúin Idirnáisiúnta um Thuinníní Atlantacha a Chaomhnú (ICCAT), laistigh de theorainneacha an bharrachais atá ar fáil. Bhí seasamh an Choimisiúin bunaithe i bpáirt ar thorthaí meastóireachta a rinneadh ar an bPrótacal roimhe seo (2013-2016), agus ar mheasúnú réamhbhreathnaitheach ar cheart Prótacal nua a thabhairt chun críche. Is saineolaithe seachtracha a thug faoin na measúnuithe seo. Ina theannta sin, is é an aidhm atá leis, feabhas a chur ar an gcomhar idir an tAontas Eorpach agus Poblacht na Gabúine chun beartas iascaigh inbhuanaithe a chur chun cinn agus chun acmhainní iascaigh a shaothrú i limistéar iascaireachta na Gabúine agus san Aigéan Atlantach, ar mhaithe leis an dá Pháirtí. Ina theannta sin, leis an gcomhar seo, cuideofar le dálaí oibre sásúla a chur chun cinn i ngníomhaíochtaí iascaigh.
Leis an bPrótacal nua, déanfar foráil maidir le deiseanna iascaireachta sna catagóirí seo a leanas:
- 27 soitheach peas‐saighne tuinnín;
- 6 shoitheach tuinníní
- soithí tacaíochta i gcomhréir le rúin ábhartha ICCAT agus leis na teorainneacha a leagtar amach i reachtaíocht na Gabúine;
- 4 thrálaer mar chuid d’iascach crústach domhainmhara, iad le húdarú go fóill ag brath ar thoradh na bhfeachtas taiscéalaíocha.
•Comhsheasmhacht le beartais eile de chuid an Aontais
Is cuid de ghníomhaíocht sheachtrach an Aontais maidir le tíortha na hAfraice, sa Mhuir Chairib agus tíortha an Aigéin Chiúin (ACC) é caibidliú prótacal nua Cur Chun Feidhme a ghabhfaidh leis an gComhaontú Comhpháirtíochta Iascaigh Inbhuanaithe leis an nGabúin agus cuirtear san áireamh, go háirithe, cuspóirí an Aontais maidir le prionsabail dhaonlathacha agus cearta an duine a urramú.
2.BUNÚS DLÍ, COIMHDEACHT AGUS COMHRÉIREACHT
•Bunús Dlí
Is é an bunús dlí Airteagal 43(3) den Chonradh ar Fheidhmiú an Aontais Eorpaigh (CFAE), lena mbunaítear go nglacfaidh an Chomhairle, ar thogra ón gCoimisiún, go nglacfaidh sí bearta maidir le leithdháileadh na ndeiseanna iascaireachta.
•Coimhdeacht (maidir le hinniúlacht neamheisiach)
Tá an togra faoi chuimsiú inniúlacht eisiach an Aontais Eorpaigh.
•Comhréireacht
Tá an togra comhréireach leis an gcuspóir maidir le creat rialachais dhlíthiúil, chomhshaoil, eacnamaíoch agus shóisialta a bhunú le haghaidh gníomhaíochtaí iascaireachta á ndéanamh ag soithí an Aontais in uiscí tríú tíortha, mar atá leagtha amach in Airteagal 31 den Rialachán lena mbunaítear an Comhbheartas Iascaigh. Comhlíontar na forálacha sin chomh maith leis na forálacha sin maidir le cúnamh airgeadais do thríú tíortha a leagtar síos in Airteagal 32 den Rialachán sin.
3.TORTHAÍ Ó MHEASTÓIREACHTAÍ EX POST, Ó CHOMHAIRLIÚCHÁIN LEIS NA PÁIRTITHE LEASMHARA AGUS Ó MHEASÚNUITHE TIONCHAIR
•Meastóireachtaí ex post/seiceálacha oiriúnachta ar an reachtaíocht atá ann cheana
Sa bhliain 2015, rinne an Coimisiún meastóireacht ex-post ar Phrótacal 2013-2016 de chuid FPA a tugadh i gcrích leis an nGabúin, chomh maith leis an bhféidearthacht atá ann go ndéanfaí meastóireacht ex-ante ar an bPrótacal sin.
Sa mheastóireacht thángthas ar an gconclúid go bhfuil suim mhór ag earnálacha iascaireachta AE in iascaireacht sa Ghabúin agus go bhfuil athnuachan an Phrótacail chun leasa an dá Pháirtí. Ina theannta sin, le hathnuachan an Phrótacail, chabhrófaí le faireachán, rialúchán agus faireachas a neartú agus chuideofaí le rialachas feabhsaithe na n‑iascach sa réigiún.
Maidir leis an Aontas Eorpach, tá sé tábhachtach go gcoinneofaí ionstraim ar bun lena gceadófaí comhar domhain earnála le himreoir mór a bhfuil tionchar mór aige i rialachas aigéan ar an leibhéal fo-réigiúnach mar gheall ar mhéid an limistéir iascaireachta atá faoina dhlínse. Tá feidhm freisin ag baint le neartú an chaidrimh leis an nGabúin chun comhghuaillíochtaí a thógáil faoi chuimsiú ICCAT. Ina theannta sin, i gcás chabhlach an Aontais Eorpaigh, ciallaíonn sé sin go n‑athbhunófar rochtain ar limistéar tábhachtach iascaireachta chun straitéisí saothraithe a chur i bhfeidhm faoi chreat dlí idirnáisiúnta ilbhliantúil. Thairis sin, de bharr go bhfuil Libreville suite i lár limistéar ard dúshaothraithe, féadfaidh sé a bheith ina chalafort chur tabhairt i dtír, calafort lena gcuirtear le hábharthacht an Phrótacail nua atá beartaithe, do thionscal iascaireachta an Aontais Eorpaigh agus don tír chomhpháirtíochta araon. I gcás údaráis na Gabúine, is é an aidhm atá ann leanúint den chaidreamh leis an Aontas Eorpach chun rialachas na n‑aigéan a neartú, ag baint tairbhe as tacaíocht earnála thiomnaithe lena gcuirtear deiseanna maoinithe ilbhliantúla ar fáil, agus tionsclú earnáil an athchóirithe a chur ar bun trí bhíthin ghníomhaíocht na soithí, mar chuid d’éagsúlú a geilleagair.
•Comhairliúcháin leis na páirtithe leasmhara
Chuathas i gcomhairle leis na Ballstáit, le hionadaithe tionscail, le heagraíochtaí idirnáisiúnta na sochaí sibhialta, chomh maith le riarachán iascaigh agus sochaí shibhialta na Gabúine, mar chuid den mheastóireacht. Eagraíodh comhairliúcháin freisin i gcomhthéacs na Comhairle Comhairlí Fadraoin.
•Bailiú agus úsáid saineolais
D’úsáid an Coimisiún comhairleoir neamhspleách le haghaidh na meastóireachtaí ex post agus ex ante, i gcomhréir le forálacha Airteagal 31 (10) den Rialachán lena mbunaítear an comhbheartas iascaigh.
4.IMPLEACHTAÍ BUISÉADACHA
Níl aon tionchar ag an dréacht-Rialachán ar bhuiséad an Aontais.
5.EILIMINTÍ EILE
•Pleananna cur chun feidhme agus socruithe faireacháin, meastóireachta agus tuairiscithe
Tá an nós imeachta seo á thionscnamh i gcomhthráth leis na nósanna imeachta a bhaineann leis an gCinneadh ón gComhairle maidir le síniú, thar ceann an Aontais, agus cur i bhfeidhm sealadach an Phrótacail Cur Chun Feidhme a ghabhfaidh leis an gComhaontú Comhpháirtíochta Iascaigh idir Poblacht na Gabúine agus an Comhphobal Eorpach, agus leis an gCinneadh ón gComhairle, ar a thabhairt i gcrích. Beidh feidhm ag an Rialachán seo a luaithe a bheidh gníomhaíochtaí iascaireachta á ndéanamh faoin bPrótacal, i.e. ar dháta a chur i bhfeidhm shealadaigh.
2021/0128 (NLE)
Togra le haghaidh
RIALACHÁN ÓN gCOMHAIRLE
maidir le leithdháileadh na ndeiseanna iascaireachta dá bhforáiltear sa Phrótacal ar chur chun feidhme (2021-2026) an Chomhaontaithe Comhpháirtíochta Iascaigh idir Poblacht na Gabúine agus an Comhphobal Eorpach
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43(3) de,
De bharr an mhéid seo a leanas:
De bharr an mhéid seo a leanas:
(1)Tháinig an Comhaontú Comhpháirtíochta Iascaigh idir Poblacht na Gabúine agus an Comhphobal Eorpach 2 (dá ngairtear 'an Comhaontú' anseo feasta), arna fhormheas le Rialachán (CE) Uimh. 450/2007 ón gComhairle 3 i bhfeidhm an 11 Meitheamh 2007. An Prótacal lena leagtar amach na deiseanna iascaireachta agus an ranníocaíocht airgeadais dá bhforáiltear sa chomhaontú, chuaigh sin in éag an 23 Iúil 2016.
(2)Rinne an Coimisiún, thar ceann an Aontais Eorpaigh, Prótacal nua cúig bliana (dá ngairtear ‘an Prótacal’) a chaibidliú.
(3)Tar éis an chaibidlíocht a bheith tugtha i gcrích, cuireadh inisealacha leis an bprótacal an 10 Feabhra 2021.
(4)An […], ghlac an Chomhairle Cinneadh (AE) 2021/.. 4 ., maidir le síniú agus cur i bhfeidhm sealadach an Phrótacail nua, faoi réir a thabhairt i gcrích ar dháta níos déanaí.
(5)Na deiseanna iascaireachta dá bhforáiltear sa Phrótacal, ba cheart iad a leithdháileadh ar na Ballstáit ar feadh na tréimhse iomláine a chuirfear an Prótacal i bhfeidhm.
(6)Ba cheart go dtiocfadh an Rialachán seo i bhfeidhm a luaithe is féidir i bhfianaise na tábhachta eacnamaíche a bhaineann le gníomhaíochtaí iascaireachta an Aontais i limistéar iascaireachta na Gabúine agus an ghá atá ann fad an chur isteach ar ghníomhaíochtaí den sórt sin a laghdú a oiread is féidir.
(7)Is ar bhonn sealadach a bheidh feidhm ag an bPrótacal ó dháta a shínithe chun go bhféadfaidh soithí an Aontais a ngníomhaíochtaí iascaireachta a dhéanamh. Dá bhrí sin, ba cheart feidhm a bheith ag an Rialachán seo ón dáta céanna amach,
TAR ÉIS AN RIALACHÁN SEO A GHLACADH:
Airteagal 1
Na deiseanna iascaireachta a bhunaítear faoin bPrótacal a bhaineann le cur chun feidhme (2021-2026) an Chomhaontaithe Comhpháirtíochta Iascaigh idir Poblacht na Gabúine agus an Comhphobal Eorpach (dá ngairtear ‘an Prótacal’ anseo feasta), déanfar na deiseanna iascaireachta sin a leithdháileadh ar na Ballstáit mar seo a leanas:
(a)Soithí saighneoireachta tuinníní:
An Spáinn: [15] soithí
An Fhrainc: [12] soithí
(b)Soithí tuinníní:
An Spáinn: [5] soithí
An Fhrainc: [1] soithí
(c)trálaer:
An Spáinn: [p.m.] soithí
xx: [p.m.] soithí
Airteagal 2
Tiocfaidh an Rialachán seo i bhfeidhm ar an lá tar éis lá a fhoilsithe in Iris Oifigiúil an Aontais Eorpaigh.
Beidh feidhm aige ón dáta a shíneofar an Prótacal.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil,
Thar ceann na Comhairle
An tUachtarán