(1)

Ir-Regolament (KE) Nru 1924/2006 jipprevedi li l-indikazzjonijiet dwar is-saħħa li jsiru fuq l-ikel huma pprojbiti sakemm ma jkunux awtorizzati mill-Kummissjoni f’konformità ma’ dak ir-Regolament u ma jkunux inklużi fil-lista ta’ indikazzjonijiet permessi dwar is-saħħa.

(2)

Skont l-Artikolu 13(3) tar-Regolament (KE) Nru 1924/2006, ir-Regolament tal-Kummissjoni (UE) Nru 432/2012 (2) stabbilixxa lista ta’ indikazzjonijiet permessi dwar is-saħħa li jsiru fuq l-ikel, barra dawk li jirreferu għat-tnaqqis fir-riskju tal-mard u għall-iżvilupp u s-saħħa tat-tfal

(3)

Ir-Regolament (KE) Nru 1924/2006 jipprevedi wkoll li l-applikazzjonijiet għall-awtorizzazzjonijiet tal-indikazzjonijiet dwar is-saħħa jistgħu jitressqu mill-operaturi tan-negozji tal-ikel lill-awtorità kompetenti nazzjonali ta’ Stat Membru. L-awtorità nazzjonali kompetenti trid tgħaddi l-applikazzjonijiet validi lill-Awtorità Ewropea dwar is-Sigurtà fl-Ikel (“l-Awtorità”) għal valutazzjoni xjentifika, kif ukoll lill-Kummissjoni u lill-Istati Membri għall-informazzjoni.

(4)

Il-Kummissjoni trid tiddeċiedi dwar l-awtorizzazzjoni tal-indikazzjonijiet dwar is-saħħa filwaqt li tqis l-opinjoni mogħtija mill-Awtorità, kwalunkwe dispożizzjoni rilevanti tad-dritt tal-Unjoni u xi fatturi leġittimi oħra rilevanti għall-kwistjoni li tkun qed tiġi kkunsidrata.

(5)

Biex tiġi stimulata l-innovazzjoni, l-indikazzjonijiet dwar is-saħħa li jkunu bbażati fuq evidenza xjentifika ġdida li ġiet żviluppata dan l-aħħar u/jew li jkunu jinkludu talba għall-protezzjoni tad-data proprjetarja għandhom jgħaddu minn tip ta’ awtorizzazzjoni mgħaġġla.

(6)

Wara applikazzjoni mingħand Zespri International Limited (“l-applikant”), imressqa skont l-Artikolu 13(5) tar-Regolament (KE) Nru 1924/2006, l-Awtorità kienet meħtieġa tagħti opinjoni dwar is-sostanzjar xjentifiku ta’ indikazzjoni dwar is-saħħa marbuta mal-kiwi ħadra (Actinidia deliciosa“Hayward”) u ż-żamma tal-ippurgar normali (il-Mistoqsija Nru EFSA- Q-2020-000562).

(7)

L-indikazzjoni inizjali li ppropona l-applikant kienet tgħid hekk: “Il-konsum regolari tal-kiwi ħadra jikkontribwixxi għall-kumdità gastrointestinali” jew “il-konsum regolari tal-kiwi ħadra jnaqqas l-iskumdità gastrointestinali”. Filwaqt li qieset ir-rabta proposta mal-effetti fuq is-saħħa, u bi qbil mal-applikant, l-Awtorità biddlet il-kliem tal-indikazzjoni vvalutata għal: “Il-konsum regolari tal-kiwi ħadra jżomm l-ippurgar normali”.

(8)

Fil-11 ta’ Ġunju 2021, l-Awtorità ppubblikat l-opinjoni xjentifika tagħha dwar dik l-indikazzjoni (3), li kkonkludiet li abbażi tad-data ppreżentata, kienet ġiet stabbilita rabta ta’ kawża u effett bejn il-konsum tal-kiwi ħadra (Actinidia deliciosa“Hayward”) u ż-żamma tal-ippurgar normali. Il-popolazzjoni fil-mira hija l-popolazzjoni ġenerali. Għaldaqstant, jenħtieġ li indikazzjoni dwar is-saħħa li tirrifletti din il-konklużjoni titqies li hi konformi mar-rekwiżiti tar-Regolament (KE) Nru 1924/2006 u jenħtieġ li tiddaħħal fil-lista tal-Unjoni ta’ indikazzjonijiet permessi dwar is-saħħa, stabbilita bir-Regolament (UE) Nru 432/2012.

(9)

Wara talba mill-applikant lill-Kummissjoni għal formulazzjoni aktar faċli għall-konsumatur, l-Awtorità kkonfermat li l-kliem “Il-konsum tal-kiwi ħadra jikkontribwixxi għall-funzjoni normali tal-musrana billi jżid il-frekwenza tal-ippurgar” jirrifletti l-evidenza xjentifika.

(10)

Fl-opinjoni xjentifika tiegħu, il-Bord innota li ma setgħet tinsilet l-ebda konklużjoni għas-sostanzjar xjentifiku tal-indikazzjoni mill-istudji mwettqa fuq l-ikel għajr il-kiwi ħadra friska.

(11)

L-Artikolu 13(3) tar-Regolament (KE) Nru 1924/2006 jipprevedi li l-indikazzjonijiet permessi dwar is-saħħa jridu jkunu akkumpanjati mill-kundizzjonijiet meħtieġa kollha (inklużi r-restrizzjonijiet) għall-użu tagħhom. Għaldaqstant, jenħtieġ li l-lista ta’ indikazzjonijiet permessi dwar is-saħħa tkun tinkludi l-kliem tal-indikazzjonijiet u l-kundizzjonijiet tal-użu speċifiċi, u fejn japplika, il-kundizzjonijiet jew ir-restrizzjonijiet tal-użu u/jew dikjarazzjoni jew twissija addizzjonali, f’konformità mar-Regolament (KE) Nru 1924/2006 u mal-opinjonijiet tal-Awtorità.

(12)

F’konformità mal-Artikolu 20 tar-Regolament (KE) Nru 1924/2006, jenħtieġ li jiġi aġġornat ir-Reġistru tal-indikazzjonijiet dwar in-nutrizzjoni u s-saħħa li jkun fih l-indikazzjonijiet awtorizzati kollha dwar is-saħħa.

(13)

Għaldaqstant, jenħtieġ li r-Regolament (UE) Nru 432/2012 jiġi emendat kif xieraq.

(14)

L-Istati Membri ġew ikkonsultati,