(1)

Le Rialachán (AE) 2018/1240 bunaítear an Córas Eorpach um Fhaisnéis agus Údarú Taistil (“ETIAS”) i gcomhair náisiúnaigh tríú tír atá díolmhaithe ón gceanglas víosa a bheith ina seilbh acu chun teacht isteach agus fanacht i gcríoch na mBallstát.

(2)

Is gá Córas Faisnéise ETIAS a fhorbairt agus a chur chun feidhme go teicniúil chun an Córas Eorpach um Fhaisnéis agus Údarú Taistil a oibriú. Beidh logaí sa chóras ina ndéanfar taifead ar na hoibríochtaí próiseála sonraí uile a dhéantar.

(3)

Is gá rialacha a leagan síos maidir le logaí a choinneáil agus a rochtain. Níor cheart logaí a úsáid ach amháin chun comhlíonadh na n-oibleagáidí próiseála sonraí a fhíorú agus chun sláine agus slándáil na sonraí pearsanta oibríochtúla a áirithiú.

(4)

Maidir le logaí a choinneáil, is gá sonrú a dhéanamh ar an suíomh ina bhfuil siad le stóráil, ar an tslí ina bhfuil siad le taifeadadh go teicniúil, lena n-áirítear i gcás ina dtiocfaidh siad as comhpháirteanna éagsúla den Chóras Eorpach um Fhaisnéis agus Údarú Taistil, chomh maith leis na rialacha is infheidhme maidir leis na logaí a scriosadh tar éis dheireadh a dtréimhse coinneála.

(5)

Maidir le logaí a rochtain, is gá na húdaráis inniúla a shonrú lena n-áirítear, i gcás inarb iomchuí, na daoine laistigh de na húdaráis sin ar cheart rochtain ar na logaí a dheonú dóibh agus na críocha ar chucu a fhéadfar rochtain a fháil orthu. D’fhonn a áirithiú go mbeidh na húdaráis inniúla in ann a ndualgais a chomhlíonadh, ar mhaithe le faireachán a dhéanamh ar inghlacthacht na próiseála sonraí agus le slándáil agus sláine sonraí a áirithiú, ba cheart sainaithint logaí a éascú trí bhíthin feidhm chuardaigh éifeachtach.

(6)

I dtaca le logaí ina dtaifeadtar rochtain ag foireann chuí-údaraithe na n-údarás náisiúnta i ngach Ballstát agus ag foireann chuí-údaraithe ghníomhaireachtaí an Aontais chun na gcríoch dá dtagraítear in Airteagal 13(4a) de Rialachán (AE) 2018/1240, ba cheart na logaí sin a choinneáil i gcomhréir leis na ceanglais a leagtar síos in Airteagal 24(2) agus (3) de Rialachán (AE) 2019/817.

(7)

Is í Gníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais (“eu-LISA”) atá freagrach as céim dheartha agus forbartha Chóras Faisnéise ETIAS. Ba cheart go gcuirfeadh na bearta a leagtar síos leis an gCinneadh seo ar chumas eu-LISA dearadh ailtireacht fhisiceach an Chórais Eorpaigh um Fhaisnéis agus Údarú Taistil a shainiú, lena n-áirítear bonneagar cumarsáide agus sonraíochtaí teicniúla an chórais, agus ba cheart go gcuirfeadh na bearta céanna ar chumas eu-LISA an córas sin a fhorbairt. Ba cheart do Ghníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais na bearta sin a chur i gcrích de réir na Sonraíochtaí Teicniúla agus an Doiciméid um Rialú Comhéadain a bhaineann leis an gCóras Eorpach um Fhaisnéis agus Údarú Taistil.

(8)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, ní raibh an Danmhairg rannpháirteach i nglacadh Rialachán (AE) 2018/1240 agus níl sí faoi cheangal aige ná faoi réir a chur i bhfeidhm. Ós rud é, áfach, go gcuireann Rialachán (AE) 2018/1240 le acquis Schengen, thug an Danmhairg fógra an 21 Nollaig 2018, i gcomhréir le hAirteagal 4 den Phrótacal sin, maidir lena cinneadh Rialachán (AE) 2018/1240 a chur chun feidhme ina dlí náisiúnta.

(9)

Is é atá sa Chinneadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (2); dá bhrí sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(10)

Maidir leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt (3), ar forálacha iad a thagann faoi réim an réimse dá dtagraítear in Airteagal 1, pointe A de Chinneadh 1999/437/CE ón gComhairle (4).

(11)

Maidir leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (5), ar forálacha iad a thagann faoi réim an réimse dá dtagraítear in Airteagal 1, pointe A de Chinneadh 1999/437/CE ón gComhairle, arna léamh i gcomhar le hAirteagal 3 de Chinneadh 2008/146/CE ón gComhairle (6).

(12)

Maidir le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (7), ar forálacha iad a thagann faoi réim an réimse dá dtagraítear in Airteagal 1, pointe A de Chinneadh 1999/437/CE ón gComhairle arna léamh i gcomhar le hAirteagal 3 de Chinneadh 2011/350/AE ón gComhairle (8).

(13)

Maidir leis an gCipir, an Bhulgáir, an Rómáin agus an Chróit, is é atá sa Chinneadh seo gníomh atá ag cur le acquis Schengen nó atá gaolmhar leis ar bhealach eile, de réir bhrí Airteagal 3(1) d’Ionstraim Aontachais 2003, Airteagal 4(1) d’Ionstraim Aontachais 2005 agus Airteagal 4(1) d’Ionstraim Aontachais 2011 faoi seach.

(14)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (9) agus thug sé tuairim uaidh an 4 Meán Fómhair 2020.

(15)

Tá na bearta dá bhforáiltear sa Chinneadh seo i gcomhréir leis an tuairim ón gCoiste um Theorainneacha Cliste,