European flag

Iris Oifigiúil
an Aontais Eorpaigh

GA

Sraith L


2026/1334

15.6.2026

CINNEADH (CBES) 2026/1334 ÓN gCOMHAIRLE

an 12 Meitheamh 2026

lena leasaítear Cinneadh (CBES) 2015/1333 a bhaineann le bearta sriantacha i bhfianaise na staide sa Libia

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 29 de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 31 Iúil 2015, ghlac an Chomhairle Cinneadh (CBES) 2015/1333 (1).

(2)

An 14 Aibreán 2026, ghlac Comhairle Slándála na Náisiún Aontaithe Rún 2819 (2026), lena n-athdhearbhaítear a tiomantas láidir do cheannasacht, neamhspleáchas, iomláine chríochach agus aontacht náisiúnta na Libia.

(3)

Le Rún 2819 (2026) ó Chomhairle Slándála na Náisiún Aontaithe, tugtar isteach leasú ar chritéar liostaithe dóibh siúd atá faoi réir bearta sriantacha.

(4)

Ina theannta sin, le Rún 2819 (2026) ó Chomhairle Slándála na Náisiún Aontaithe, modhnaítear raon feidhme na mbeart a forchuireadh ar Údarás Infheistíochta na Libia.

(5)

Ní mór don Aontas tuilleadh gníomhaíochta a dhéanamh chun bearta áirithe a chur chun feidhme.

(6)

Ba cheart, dá bhrí sin, Cinneadh (CBES) 2015/1333 a leasú dá réir sin,

TAR ÉIS AN CINNEADH SEO A GHLACADH:

Airteagal 1

Leasaítear Cinneadh (CBES) 2015/1333 mar a leanas:

(1)

in Airteagal 8, cuirtear an méid seo a leanas in ionad mhír 1:

‘1.   Déanfaidh na Ballstáit na bearta is gá chun teacht isteach ina gcríocha, nó idirthuras trína gcríocha, a chosc i gcás daoine arna n-ainmniú agus arna gcur faoi shrianta taistil ag an gComhairle Slándála nó ag an gCoiste i gcomhréir le mír 22 de Rún 1970 (2011) ó Chomhairle Slándála na Náisiún Aontaithe, mír 23 de Rún 1973 (2011) ó Chomhairle Slándála na Náisiún Aontaithe, mír 4 de Rún 2174 (2014) ó Chomhairle Slándála na Náisiún Aontaithe, mír 11 de Rún 2213 (2015) ó Chomhairle Slándála na Náisiún Aontaithe, mír 11 de Rún 2362 (2017) ó Chomhairle Slándála na Náisiún Aontaithe, mír 11 de Rún 2441 (2018) ó Chomhairle Slándála na Náisiún Aontaithe, mír 18 de Rún 2769 (2025) ó Chomhairle Slándála na Náisiún Aontaithe nó mír 19 de Rún 2819 (2026) ó Chomhairle Slándála na Náisiún Aontaithe, mar a liostaítear in Iarscríbhinn I.’

;

(2)

Leasaítear Airteagal 9 mar a leanas:

(a)

cuirtear an méid seo a leanas in ionad mhír 1:

‘1.   Na cistí, na sócmhainní airgeadais agus na hacmhainní eacnamaíocha eile go léir atá faoi úinéireacht nó faoi rialú, go díreach nó go hindíreach, ag daoine agus eintitis atá ainmnithe agus faoi réir reo sócmhainní ag an gComhairle Slándála nó ag an gCoiste i gcomhréir le mír 22 de Rún 1970 (2011) ó Chomhairle Slándála na Náisiún Aontaithe, míreanna 19 agus 23 de Rún 1973 (2011) ó Chomhairle Slándála na Náisiún Aontaithe, mír 4 de Rún 2174 (2014) ó Chomhairle Slándála na Náisiún Aontaithe, mír 11 de Rún 2213 (2015) ó Chomhairle Slándála na Náisiún Aontaithe, mír 11 de Rún 2362 (2017) ó Chomhairle Slándála na Náisiún Aontaithe, mír 11 de Rún 2441 (2018) ó Chomhairle Slándála na Náisiún Aontaithe, mír 18 de Rún 2769 (2025) ó Chomhairle Slándála na Náisiún Aontaithe nó mír 19 de Rún 2819 (2026) ó Chomhairle Slándála na Náisiún Aontaithe, mar a liostaítear in Iarscríbhinn III, déanfar iad a reo.’

;

(b)

cuirtear an méid seo a leanas in ionad mhír 15:

‘15.   Tar éis don Bhallstát lena mbaineann fógra a thabhairt don Choiste, agus ar choinníoll gur fhormheas an Coiste úsáid cúlchistí airgid reoite dá dtagraítear i mír 14 de Rún 2769 (2025) ó Chomhairle Slándála na Náisiún Aontaithe, lena n-áirítear comhairliúchán le Rialtas na Libia, agus mír 14 de Rún 2819 (2026) ó Chomhairle Slándála na Náisiún Aontaithe, agus i gcomhréir leis an mír sin, údaróidh údaráis inniúla an Bhallstáit sin úsáid cúlchistí airgid reoite ar leis an eintiteas atá liostaithe faoi iontráil uimhir 1 in Iarscríbhinn VI iad, le haghaidh infheistíochta sna nithe seo a leanas, agus na nithe seo amháin:

(a)

taiscí téarma ísealriosca le hinstitiúid airgeadais iomchuí arna roghnú ag an eintiteas atá liostaithe faoi iontráil uimhir 1 in Iarscríbhinn VI agus atá lonnaithe sa Bhallstát ina bhfuil na cistí reoite, i gcás cúlchistí airgid reoite dá dtagraítear i “moladh 7.1” dá dtagraítear i Rún 2769(2025) ó Chomhairle Slándála na Náisiún Aontaithe, nó

(b)

ionstraimí ioncaim sheasta, i gcás cúlchistí airgid reoite dá dtagraítear i “moladh 7.2” dá dtagraítear i Rún 2769(2025) ó Chomhairle Slándála na Náisiún Aontaithe,

i gcomhréir le formheas an Choiste.’

;

(c)

cuirtear isteach na míreanna seo a leanas:

‘18.   Tar éis don Bhallstát lena mbaineann fógra a thabhairt don Choiste agus ar choinníoll gur fhormheas an Coiste go n-aistreofaí cistí reoite, sócmhainní airgeadais reoite nó acmhainní eacnamaíocha reoite eile, agus i gcomhréir le mír 15 de Rún 2819 (2026) ó Chomhairle Slándála na Náisiún Aontaithe, údaróidh údaráis inniúla an Bhallstáit sin go n-aistreofaí cistí reoite áirithe, sócmhainní airgeadais reoite nó acmhainní eacnamaíocha reoite eile ar leis an eintiteas a liostaítear faoi iontráil uimhir 1 in Iarscríbhinn VI iad, laistigh den dlínse chéanna, idir an banc coimeádta, nó an institiúid airgeadais atá ag gníomhú mar choimeádaí domhanda (nó aon fho-choimeádaí atá ag gníomhú thar a gceann), chuig banc coimeádta eile, nó chuig institiúid airgeadais eile (nó aon fho-choimeádaí atá ag gníomhú thar a gceann), chun ról an choimeádaí dhomhanda a aistriú chuig an mbanc coimeádta nó chuig an institiúid airgeadais sin, ar choinníoll:

(a)

le linn an aistrithe agus ar an aistriú a thabhairt i gcrích, go gcaithfear leis na sócmhainní mar shócmhainní reoite agus go mbeidh siad faoi réir na mbeart arna bhforchur leis an gCinneadh seo;

(b)

go ndéanfar an t-aistriú a fhorghníomhú ar bhealach a choinneoidh foirm agus luach na gcistí, na sócmhainní airgeadais nó na n-acmhainní eacnamaíocha eile a bheidh á n-aistriú.

19.   An fógra dá dtagraítear i mír 18 ón mBallstát lena mbaineann chuig an gCoiste, áireofar ann méid agus cineál na gcistí reoite, na sócmhainní airgeadais reoite nó na n-acmhainní eacnamaíocha reoite eile atá le haistriú agus céannacht na mbanc coimeádta reatha agus beartaithe, nó na n-institiúidí airgeadais atá ag gníomhú i gcáil choimeádaí.

20.   Cuirfidh an Ballstát lena mbaineann na Ballstáit eile agus an Coimisiún ar an eolas faoi aon údarú arna dheonú faoi mhír 18, laistigh de 2 sheachtain ón údarú.’.

Airteagal 2

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh i Lucsamburg, an 12 Meitheamh 2026.

Thar ceann na Comhairle

An tUachtarán

M. KERAVNOS


(1)  Cinneadh (CBES) 2015/1333 ón gComhairle an 31 Iúil 2015 a bhaineann le bearta sriantacha i bhfianaise na staide sa Libia, agus lena n-aisghairtear Cinneadh 2011/137/CBES ( IO L 206, 1.8.2015, lch. 34, ELI: http://data.europa.eu/eli/dec/2015/1333/oj).


ELI: http://data.europa.eu/eli/dec/2026/1334/oj

ISSN 1977-0839 (electronic edition)