(1)

Il-ġidri tan-nagħaġ u l-ġidri tal-mogħoż huwa marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, u tikkawża tfixkil għall-movimenti tal-kunsinni ta’ dawk l-annimali u tal-prodotti tagħhom fl-Unjoni u għall-esportazzjonijiet lejn pajjiżi terzi.

(2)

F’każ ta’ tifqigħa tal-ġidri tan-nagħaġ u l-ġidri tal-mogħoż f’annimali kaprini u ovini, hemm riskju serju li dik il-marda tinxtered fi stabbilimenti oħra ta’ annimali kaprini jew ovini.

(3)

Ir-Regolament Delegat tal-Kummissjoni 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żona ristretta ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Sabiex jiġu indirizzati t-tifqigħat tal-ġidri tan-nagħaġ u tal-ġidri tal-mogħoż fil-Bulgarija, il-Kummissjoni adottat id-Deċiżjoni ta’ Implimentazzjoni (UE) 2024/2778 (4) abbażi tal-Artikolu 259(2) tar-Regolament (UE) 2016/429. Sal-21 ta’ Novembru 2024, din id-Deċiżjoni stabbiliet ċerti miżuri interim ta’ emerġenza relatati mal-infezzjoni bil-ġidri tan-nagħaġ u l-ġidri tal-mogħoż fil-Bulgarija.

(5)

Wara l-adozzjoni tad-Deċiżjoni ta’ Implimentazzjoni (UE) 2024/2778, il-Bulgarija nnotifikat lill-Kummissjoni dwar tifqigħa addizzjonali tal-ġidri tan-nagħaġ u tal-ġidri tal-mogħoż fi stabbiliment li kien iżomm l-annimali ovini u kaprini. B’hekk, fid-19 ta’ Novembru 2024, id-Deċiżjoni ta’ Implimentazzjoni tal-Kummissjoni (UE) 2024/2918 (5) ħassret u ssostitwiet id-Deċiżjoni ta’ Implimentazzjoni (UE) 2024/2778 b’effett mit-22 ta’ Novembru 2024. Barra minn hekk, id-Deċiżjoni ta’ Implimentazzjoni (UE) 2024/2918 tipprevedi li ż-żoni ta’ protezzjoni, iż-żoni ta’ sorveljanza u żoni ristretti ulterjuri li jridu jiġu stabbiliti mill-Bulgarija, f’konformità mar-Regolament Delegat (UE) 2020/687, b’reazzjoni għall-aktar tifqigħat riċenti tal-ġidri tan-nagħaġ u tal-ġidri tal-mogħoż fil-Bulgarija jridu jinkludu mqar iż-żoni elenkati fl-Anness ta’ dik id-Deċiżjoni ta’ Implimentazzjoni.

(6)

L-Anness tad-Deċiżjoni ta’ Implimentazzjoni (UE) 2024/2918 ġie emendat ulterjorment bid-Deċiżjonijiet ta’ Implimentazzjoni tal-Kummissjoni (UE) 2024/3111 (6) fis-6 ta’ Diċembru 2024 u 2024/3232 (7) fid-19 ta’ Diċembru 2024 b’reazzjoni għal tifqigħat ulterjuri tal-ġidri tan-nagħaġ u tal-ġidri tal-mogħoż fi stabbilimenti fejn jinżammu l-annimali ovini u kaprini fil-Bulgarija.

(7)

Mindu ġiet adottata d-Deċiżjoni ta’ Implimentazzjoni (UE) 2024/3232, il-Bulgarija nnotifikat lill-Kummissjoni b’tifqigħat ulterjuri tal-ġidri tan-nagħaġ u tal-ġidri tal-mogħoż fi stabbilimenti fejn jinżammu annimali ovini u kaprini, li jinsabu fir-reġjuni ta’ Sliven u Kardzhali.

(8)

Il-Bulgarija ħadet il-miżuri meħtieġa għall-kontroll tal-mard f’konformità mar-Regolament Delegat (UE) 2020/687, fosthom l-istabbiliment ta’ żoni ta’ protezzjoni u ta’ sorveljanza madwar it-tifqigħat.

(9)

Sabiex jiġi evitat kull tfixkil bla bżonn fil-kummerċ fl-Unjoni u tiġi evitata l-impożizzjoni ta’ ostakli mhux ġustifikati għall-kummerċ minn pajjiżi terzi, jeħtieġ mingħajr dewmien jiġu deskritti, u jiġu aġġustati spazjalment u temporanjament fil-livell tal-Unjoni, b’kollaborazzjoni mal-Bulgarija, iż-żoni ta’ protezzjoni, ta’ sorveljanza u ta’ restrizzjoni ulterjuri stabbiliti kif xieraq minn dan l-Istat Membru f’konformità mar-Regolament Delegat (UE) 2020/687. Id-durata ta’ dawn il-miżuri tqis ukoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (WOAH, World Organisation for Animal Health (8)). Fis-sitwazzjoni epidemjoloġika attwali, hemm riskju għoli li l-marda tinxtered iżjed minħabba l-fatt li faqqgħet tifqigħa ġdida tal-ġidri tan-nagħaġ u tal-ġidri tal-mogħoż u l-ewwel tifqigħa ġiet ikkonfermata fir-reġjun ta’ Kardzhali fit-18 ta’ Diċembru 2024. Dan jindika li l-marda għadha tippersisti u tinfirex fuq distanzi twal, minkejja l-miżuri diġà fis-seħħ.

(10)

Għalhekk, iż-żoni elenkati bħala żoni ta’ protezzjoni, żoni ta’ sorveljanza u żoni ristretti oħra għall-Bulgarija fl-Anness tad-Deċiżjoni ta’ Implimentazzjoni (UE) 2024/2918 kif ukoll it-tul ta’ żmien tal-miżuri applikabbli fihom jenħtieġ li jiġu emendati u aġġornati, filwaqt li jitqiesu l-aħħar tifqigħat kif ukoll il-kunsiderazzjonijiet kollha msemmija fil-premessa 9.

(11)

Għalhekk, jenħtieġ li d-Deċiżjoni ta’ Implimentazzjoni (UE) 2024/2918 tiġi emendata kif xieraq.

(12)

Minħabba l-urġenza tas-sitwazzjoni epidemjoloġika fl-Unjoni rigward it-tixrid tal-ġidri tan-nagħaġ u tal-ġidri tal-mogħoż, hu importanti li l-emendi li jridu jsiru fid-Deċiżjoni ta’ Implimentazzjoni (UE) 2024/2918 b’din id-Deċiżjoni jsiru effettivi kemm jista’ jkun malajr.

(13)

Filwaqt li titqies is-sitwazzjoni epidemjoloġika attwali fl-Unjoni rigward il-ġidri tan-nagħaġ u l-ġidri tal-mogħoż, il-perjodu li matulu il-miżuri previsti mid-Deċiżjoni ta’ Implimentazzjoni (UE) 2024/2918 hemm bżonn li japplika jenħtieġ li jiġi estiż sal-31 ta’ Marzu 2025.

(14)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.

1.

fl-Artikolu 4, id-data tal-“1 ta’ Marzu 2025” hija sostitwita mid-data tal-“31 ta’ Marzu 2025”;

2.

l-Anness huwa sostitwit bit-test stabbilit fl-Anness ta’ din id-Deċiżjoni.