(1)

I bhfianaise na dteagmhas meitéareolaíochta díobhálach dian a tharla i réigiúin roinnt Ballstát in earrach 2023, rinneadh dochar mór do tháirgeadh torthaí agus glasraí. Sa Spáinn, laghdaíodh an táirgeadh atá beartaithe i réigiún na Catalóine de 50 % ar a laghad mar gheall ar thriomach, agus scriosadh an táirgeadh i réigiún Emilia-Romagna na hIodáile de dheasca tuilte. Bhí tionchar tromchúiseach ag triomach freisin ar leibhéal an táirgthe agus ar a cháilíocht i roinnt réigiún sa Fhrainc agus sa Phortaingéil.

(2)

Dá bhrí sin, i ngeall ar nádúr na dteagmhas meitéareolaíochta díobhálach dian in earrach na bliana 2023 nach bhfacthas a leithéid riamh, is gá na deacrachtaí sin a fhuascailt trí mhaolú ar fhorálacha a bhaineann le ríomh luach an táirgthe mhargaithe a leagtar síos i Rialachán Tarmligthe (AE) 2022/126 (2) ón gCoimisiún is infheidhme san earnáil torthaí agus glasraí.

(3)

Tá eagraíochtaí táirgeoirí leochaileach freisin maidir leis an gcur isteach agus an suaitheadh a tharla de dheasca na dteagmhas meitéareolaíochta díobhálach dian in earrach 2023 agus tá deacrachtaí airgeadais agus fadhbanna sreafa airgid acu de thairbhe laghdú nó scrios a dtáirgeachta. Tá tionchar díreach aige sin ar chobhsaíocht airgeadais eagraíochtaí táirgeoirí agus ar a gcumas cláir oibríochtúla a chur chun feidhme ní hamháin in 2023 ach sna blianta ina dhiaidh sin freisin, toisc go mbíonn tionchar ag luach na táirgeachta margaíochta le haghaidh 2023 ar ríomh an chúnaimh airgeadais ón Aontas le haghaidh na mblianta ina dhiaidh sin. Tá sé sin ag dul i bhfeidhm a thuilleadh ar chumas na n-eagraíochtaí táirgeoirí bearta agus gníomhaíochtaí a thabhairt isteach lena ndírítear ar thionchair na géarchéime sin. Ina theannta sin, leis an laghdú ar luach an táirgthe mhargaithe de thairbhe teagmhais mheitéareolaíochta dhíobhálacha, déantar dochar do leanúnachas agus d’inmharthanacht chláir oibríochtúla na n-eagraíochtaí táirgeoirí san earnáil torthaí agus glasraí a bheidh ann amach anseo.

(4)

Is gnách go mbíonn tionchar mór ag caillteanais ar luach an táirgthe mhargaithe san earnáil torthaí agus glasraí de thairbhe teagmhais mheitéareolaíochta dhíobhálacha ar mhéid na cabhrach ón Aontas a fhaigheann eagraíochtaí táirgeoirí sa bhliain ina dhiaidh sin, toisc go bhfuil méid na cabhrach ón Aontas le ríomh mar chéatadán de luach an táirgthe mhargaithe ag gach eagraíocht táirgeoirí. Dá dtarlódh caillteanas suntasach i luach an táirgthe mhargaithe in 2023, bheadh baol ann go gcaillfeadh eagraíochtaí táirgeoirí a n-aitheantas mar eagraíochtaí táirgeoirí, toisc go bhfuil ceann de na critéir maidir le haitheantas den sórt sin ag baint amach íosluach áirithe de tháirgeadh arna mhargú, arna shocrú ar an leibhéal náisiúnta. Bheadh cobhsaíocht fhadtéarmach na n-eagraíochtaí táirgeoirí i mbaol dá thairbhe. Dá bhrí sin, dá dtarlódh laghdú 35 % ar a laghad ar luach táirge in 2023 de thairbhe teagmhais mheitéareolaíochta dhíobhálacha in earrach 2023, agus dá dtarlódh sé sin lasmuigh de fhreagracht agus de rialú na n-eagraíochtaí táirgeoirí, ba cheart luach an táirgthe mhargaithe le haghaidh 2023 a bhunú mar 100 % de luach an táirgthe mhargaithe do mheán na gcúig thréimhse tagartha 12 mhí roimhe sin gan na luachanna is ísle agus is airde a áireamh, chun na caillteanais sin a fhritháireamh.

(5)

I bhfianaise an ghá atá ann gníomhú láithreach, ba cheart an Rialachán seo a theacht i bhfeidhm lá a fhoilsithe in Iris Oifigiúil an Aontais Eorpaigh,