(1)

Leagtar síos le Rialachán (AE) 2016/429 rialacha maidir le cosc agus rialú galar ainmhithe atá in-tarchurtha chuig ainmhithe nó chuig daoine, lena n-áirítear rialacha maidir le feasacht faoi ghalair, le hullmhacht agus le rialú. Go háirithe, leagtar síos le Rialachán (AE) 2016/429 rialacha sonracha ó thaobh galair de chun na galair a liostaítear ina Airteagal 5 a chosc agus a rialú.

(2)

Le Rialachán Tarmligthe (AE) 2020/687 ón gCoimisiún (2) leagtar síos rialacha lena bhforlíontar Rialachán (AE) 2016/429 a mhéid a bhaineann le galair liostaithe áirithe a chosc agus a rialú, go háirithe galair i gcatagóirí A, B agus C i gcomhréir le Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le Rialachán Tarmligthe (AE) 2020/687 maidir le crios srianta a bhunú i gcás ráig de ghalair i gcatagóir A agus i ndáil le gluaiseachtaí ainmhithe agus táirgí ainmhithe laistigh de na criosanna srianta agus ó na criosanna sin, mar chuid de na bearta chun rialú a dhéanamh ar leathadh galar i gcatagóir A.

(3)

Tugtar sainmhínithe difriúla ar “chásálacha” i Rialachán Tarmligthe (AE) 2020/687 agus i Rialachán Tarmligthe (AE) 2020/692 ón gCoimisiún (4), agus is é an sainmhíniú ceart an sainmhíniú a leagtar síos i Rialachán Tarmligthe (AE) 2020/692. Chun leanúnachas a áirithiú i measc fhorálacha na ngníomhartha tarmligthe lena bhforlíontar na ceanglais sláinte ainmhithe a leagtar síos i Rialachán (AE) 2016/429, ba cheart an sainmhíniú ar “chásálacha” a leagtar síos i Rialachán Tarmligthe (AE) 2020/687 a cheartú agus a ailíniú leis an sainmhíniú i Rialachán Tarmligthe (AE) 2020/692.

(4)

In Airteagal 23, pointe (c) de Rialachán Tarmligthe (AE) 2020/687, déantar foráil go bhféadfadh an t-údarás inniúil maoluithe a thabhairt ar na bearta atá le cur i bhfeidhm i gcrios srianta i gcás ráig de ghalair i gcatagóir A i mbunaíocht ina gcoimeádtar suas le 50 éan i mbraighdeanas, ach ní féidir maolú a thabhairt ar an oibleagáid crios srianta a bhunú, oibleagáid a thagann ó fhorálacha a leagtar síos in Airteagal 21 den Rialachán Tarmligthe sin. D’fhéadfadh an oibleagáid sin srianta trádála nach bhfuil gá leo a chruthú agus ualach gan údar a chur ar oibreoirí agus údaráis inniúla.

(5)

Ba cheart na bearta rialaithe galar dá bhforáiltear i Rialachán Tarmligthe (AE) 2020/687 a bheith comhréireach leis na rioscaí lena mbaineann. I gcúinsí áirithe, mura mbíonn teagmháil dhíreach nó indíreach ag bunaíocht ina gcoimeádtar suas le 50 éan i mbraighdeanas le bunaíochtaí eile ina gcoimeádtar éanlaith chlóis nó éin i mbraighdeanas, d’fhéadfadh an baol go gcuirfí le ráig an ghalair a bheith beag. Ar an gcúis sin, ba cheart cead a bheith ag na húdaráis inniúla maolú ar chrios srianta a bhunú nuair a thagann ráig de ghalar i gcatagóir A chun cinn i mbunaíocht ina gcoimeádtar suas le 50 éan i mbraighdeanas, má dhéanann an t-údarás inniúil measúnú riosca lena bhforáiltear nach mbíonn teagmháil dhíreach ná indíreach ag an mbunaíocht le héanlaith chlóis nó le bunaíochtaí eile ina gcoimeádtar éin i mbraighdeanas.

(6)

Dá bhrí sin, ba cheart Airteagal 21(3) de Rialachán Tarmligthe (AE) 2020/687 a leasú chun bunaíochtaí ina gcoimeádtar suas le 50 éan i mbraighdeanas a chur san áireamh sna háiteanna a bhféadfaidh an t-údarás inniúil cinneadh a dhéanamh crios srianta a bhunú nó gan é a bhunú faoi chúinsí áirithe, má thagann ráig de ghalar i gcatagóir A chun cinn iontu.

(7)

In Airteagail 28 agus 43 de Rialachán Tarmligthe (AE) 2020/687, leagtar síos coinníollacha ginearálta maidir le maoluithe a thabhairt ar na toirmisc atá ar ghluaiseachtaí ainmhithe agus táirgí sna criosanna cosanta agus criosanna faireachais, faoi seach. Sonraítear sna coinníollacha ginearálta na bearta atá le cur i bhfeidhm ag an údarás inniúil chun a áirithiú gur diomaibhseach an riosca go leathfaí galar i gcatagóir A trí ghluaiseachtaí den sórt sin. Áirítear sna bearta sin bearta bithshlándála forlíontacha diana áirithe le linn gach oibríochta iompair ón mbunaíocht tionscnaimh go dtí go ndéanfar an díluchtú ag an mbunaíocht cinn scríbe, rud a ainmníonn údarás inniúil na bunaíochta tionscnaimh, i gcomhréir le hAirteagail 28 agus 43 de Rialachán Tarmligthe (AE) 2020/687. Nuair atá údarás inniúil na bunaíochta tionscnaimh éagsúil le húdarás inniúil na bunaíochta cinn scríbe, d’fhéadfadh sé nach mbeadh údarás inniúil na bunaíochta tionscnaimh in ann cur chun feidhme na mbeart sin go léir a áirithiú, go háirithe suíomh na bunaíochta ina bhfuil ainmhithe de speicis liostaithe a bheith ar eolas acu, bealach a seachnódh na suíomhanna sin a roghnú nó cur chun feidhme beart bithshlándála forlíontacha a áirithiú agus díluchtú á dhéanamh ag an mbunaíocht cinn scríbe ainmnithe.

(8)

Ina theannta sin, má tá údarás inniúil na bunaíochta tionscnaimh éagsúil le húdarás inniúil na bunaíochta cinn scríbe ainmnithe, ba cheart d’údarás inniúil na bunaíochta tionscnaimh údarás inniúil na bunaíochta cinn scríbe a chur ar an eolas faoin ainmniú sin. Chun cur chun feidhme na mbeart go léir a leagtar síos le hAirteagail 28 agus 43 de Rialachán Tarmligthe (AE) 2020/687 a áirithiú, áfach, ba cheart d’údarás inniúil na bunaíochta tionscnaimh i gcomhar le húdarás inniúil na bunaíochta cinn scríbe an bhunaíocht cinn scríbe a ainmniú. Dá bhrí sin, ba cheart Airteagal 28(3) agus Airteagal 43(3) de Rialachán Tarmligthe (AE) 2020/687 a leasú dá réir.

(9)

In Airteagal 30(2) agus Airteagal 46(2) de Rialachán Tarmligthe (AE) 2020/687, déantar foráil maidir leis na coinníollacha sonracha chun gluaiseachtaí éanlaithe clóis atá réidh le breith a údarú ó bhunaíochtaí i gcriosanna cosanta agus i gcriosanna faireachais faoi seach a bunaíodh mar fhreagra ar ráig galair i gcatagóir A. I gcomhréir leis na hAirteagail sin, féadfaidh an t-údarás inniúil gluaiseachtaí den sórt sin a údarú mura bhfuil aon ainmhí ar coimeád de speicis liostaithe sa bhunaíocht cinn scríbe. Go hiarbhír, i gcásanna áirithe, sna bunaíochtaí ina gcoimeádtar béaróga agus a n -aistrítear na héanlaith chlóis atá réidh le breith chucu, féadfar roinnt aonaid eipidéimeolaíocha a bheith iontu, mar a shainmhínítear in Airteagal 4, pointe (39) de Rialachán (AE) 2016/429, agus ní mór na haonaid eipidéimeolaíocha sin a bheith líonta ag tréimhsí difriúla chun táirgeacht bhliantúil sheasta uibheacha a áirithiú. Dá bhrí sin, ba cheart Airteagal 30(2) agus Airteagal 46(2) de Rialachán Tarmligthe (AE) 2020/687 a leasú chun go bhféadfaidh éanlaith chlóis atá réidh le breith ó chriosanna cosanta nó criosanna faireachais a aistriú freisin in aonad eipidéimeolaíoch folamh laistigh de bhunaíocht ina gcoimeádtar ainmhithe de speicis liostaithe in aonaid eipidéimeolaíocha eile.

(10)

In Airteagail 39 agus 55 de Rialachán Tarmligthe (AE) 2020/687, leagtar síos coinníollacha maidir le deireadh a chur leis na bearta rialaithe a cuireadh i bhfeidhm sna criosanna cosanta agus criosanna faireachais, faoi seach. Is bearta riachtanacha iad an réamhghlanadh agus an réamhdhíghalrú agus is gá iad a dhéanamh go héifeachtach chun leathadh galair i gcatagóir A ón mbunaíocht atá buailte leis a sheachaint. Leagtar amach na nósanna imeachta maidir le glanadh agus díghalrú i bpointí A agus B d’Iarscríbhinn IV a ghabhann leis an Rialachán Tarmligthe sin. I gcomhréir leis na nósanna imeachta sin, tá an réamhghlanadh agus an réamhdhíghalrú curtha i gcrích má fágadh an díghalrán ar an dromchla cóireáilte ar feadh 24 uair ar a laghad. Prionsabail aitheanta is ea réamhghlanadh agus réamhdhíghalrú i gcosc agus díothú galar i gcatagóir A, agus dá bhrí sin, ní ríomhtar íostréimhse na mbeart atá le cur chun feidhme i gcriosanna srianta go dtí go gcuirtear an réamhghlanadh agus an réamhdhíghalrú i gcrích.

(11)

Téacs reatha Airteagail 39 agus 55 de Rialachán Tarmligthe (AE) 2020/687, níl sé soiléir maidir le túsphointe íostréimhse na mbeart atá le cur chun feidhme sna criosanna cosanta agus sna criosanna faireachais agus d’fhéadfadh sé go gcuirfeadh na Ballstáit an ceanglas sin chun feidhme ar bhealaí éagsúla. Dá bhrí sin, ba cheart Airteagail 39 agus 55 de Rialachán Tarmligthe (AE) 2020/687 a leasú chun an túsphointe lena ríomhfaí íostréimhse na mbeart i gcriosanna cosanta agus criosanna faireachais a shonrú go soiléir.

(12)

Le hAirteagal 31(1), pointe (a), de Rialachán Tarmligthe (AE) 2020/687, ceadaítear don údarás inniúil gluaiseacht uibheacha goir a údarú ó bhunaíocht sa chrios cosanta go dtí gorlann sa Bhallstát céanna, lena n-áirítear gluaiseacht uibheacha goir ó bhunaíocht i gcrios cosanta go dtí gorlann i gcrios faireachais. I gcomhréir leis na forálacha a leagtar síos le hAirteagal 46(1), pointe (a), den Rialachán Tarmligthe sin, áfach, ní féidir gluaiseachtaí sicíní lae de thionscnamh criosanna faireachais go dtí bunaíochtaí sa Bhallstát céanna a údarú ach amháin más rud é gur goradh iad ó uibheacha de thionscnamh bunaíochtaí laistigh den chrios faireachais. Dá bhrí sin, faoi Airteagal 46(1), pointe (a), de Rialachán Tarmligthe (AE) 2020/687, ní cheadaítear don údarás inniúil gluaiseachtaí ón gcrios faireachais de shicíní lae a goradh ó uibheacha de thionscnamh bunaíochtaí laistigh den chrios cosanta a údarú.

(13)

Le hAirteagal 30(1), pointe (a), de Rialachán Tarmligthe (AE) 2020/687, ceadaítear gluaiseacht sicíní lae ó bhunaíocht sa chrios cosanta má goradh ó uibheacha de thionscnamh an chreasa srianta iad. Dá bharr sin, i gcomhréir le hAirteagal 30(1), pointe (a), de Rialachán Tarmligthe (AE) 2020/687, féadfaidh an t-údarás inniúil gluaiseacht ó chrios srianta de shicíní lae a goradh ó uibheacha de thionscnamh bunaíochtaí laistigh den chrios cosanta a údarú, má chomhlíontar coinníollacha áirithe. Ba cheart don údarás inniúil a bheith in ann gluaiseacht ó chrios faireachais de shicíní lae a goradh ó uibheacha de thionscnamh bunaíochtaí laistigh den chrios cosanta a údarú, má chomhlíontar coinníollacha comhchosúla. Dá bhrí sin, ba cheart Airteagal 46(1), pointe (a), a leasú dá réir sin.

(14)

In Airteagal 52 de Rialachán Tarmligthe (AE) 2020/687, déantar foráil maidir le coinníollacha sonracha atá le comhlíonadh nuair a dhéanann an t-údarás inniúil gluaiseachtaí ábhar beatha de bhunadh plandaí agus tuí a thairgtear sa chrios faireachais a údarú. Is féidir a thuiscint ó Airteagal 52 de Rialachán Tarmligthe (AE) 2020/687, de réir na foclaíocht reatha, gur gá na coinníollacha go léir a liostaítear i bpointí (a) go (d) den Airteagal sin a chomhlíonadh. Mar sin féin, tagraíonn Airteagal 52, pointe (d) de Rialachán Tarmligthe (AE) 2020/687 don chás ina ndearnadh ceann amháin ar a laghad de na cóireálacha maolaithe riosca a leagtar amach in Iarscríbhinn VIII a ghabhann leis an Rialachán Tarmligthe sin ar na hábhair bheatha de bhunadh plandaí agus tuí. Nuair a dhéantar an chóireáil maolaithe riosca, déantar tráchtearraí sábháilte de na hábhair bheatha de bhunadh plandaí agus tuí agus féadfar iad a ghluaiseacht lasmuigh den chrios faireachais dá bharr. Sa bhreis air sin, in Airteagal 36 de Rialachán Tarmligthe (AE) 2020/687, déantar foráil maidir le coinníollacha sonracha chun gluaiseacht ábhar beatha de bhunadh plandaí agus tuí ón gcrios cosanta a údarú. I gcomhréir le hAirteagal 36 de Rialachán Tarmligthe (AE) 2020/687, féadfaidh gluaiseachtaí ábhar beatha de bhunadh plandaí agus tuí ón gcrios cosanta a údarú má rinneadh orthu ceann amháin ar a laghad de na cóireálacha maolaithe riosca i gcomhréir le hIarscríbhinn VIII a ghabhann le Rialachán Tarmligthe (AE) 2020/687. Ina theannta sin, tá na coinníollacha a leagtar síos in Airteagal 52, pointí (a) go (d) de Rialachán Tarmligthe (AE) 2020/687 comhchosúil leis na coinníollacha a leagtar síos in Airteagal 36 den Rialachán tarmligthe sin. Dá bhrí sin, níor cheart gluaiseacht ábhar beatha de bhunadh plandaí agus tuí a thairgtear sa chrios faireachais a bheith faoi réir coinníollacha a bheadh níos déine ná na coinníollacha is infheidhme maidir le gluaiseacht ábhar beatha de bhunadh plandaí agus tuí a thairgtear sa chrios cosanta. Dá bhrí sin, ba cheart Airteagal 52 de Rialachán Tarmligthe(AE) 2020/687 a cheartú chun a áirithiú go mbeidh na srianta sa chrios faireachais comhchosúil leis na srianta sa chrios cosanta nuair a chomhlíontar coinníollacha comhchosúla.

(15)

In Airteagal 59(2) de Rialachán Tarmligthe (AE) 2020/687, leagtar síos na ceanglais maidir le hainmhithe ar coimeád de speicis liostaithe a bhfuil sé beartaithe iad a úsáid chun athdhaonrú a dhéanamh i mbunaíochtaí atá buailte le ráig galair i gcatagóir A. Ní mór do na hainmhithe sin a bheith de thionscnamh bunaíocht nach bhfuil lonnaithe i gcrios srianta agus nach bhfuil faoi réir bearta rialaithe galar le haghaidh galair i gcatagóir A in ainmhithe talún ar coimeád, mar a leagtar síos i gCuid II, Caibidil II, de Rialachán Tarmligthe (AE) 2020/687. In Airteagal 59(2), pointe (a) de Rialachán Tarmligthe (AE) 2020/687, tagraítear go hearráideach, áfach, do shrianta dá bhforáiltear i gCaibidil III den Rialachán Tarmligthe sin. Dá bhrí sin, ba cheart téacs Airteagail 59(2), pointe (a) de Rialachán Tarmligthe (AE) 2020/687 a cheartú chun tagairt a dhéanamh do na srianta dá bhforáiltear i gCaibidil II den Rialachán Tarmligthe sin.

(16)

Le hAirteagail 27 agus 42 de Rialachán Tarmligthe (AE) 2020/687, leagtar síos toirmisc maidir le gníomhaíochtaí, lena n-áirítear gluaiseachtaí, a bhaineann le hainmhithe, táirgí agus ábhair eile, ar gluaiseachtaí iad laistigh de na criosanna cosanta agus faireachais nó gluaiseachtaí chucu, nó gluaiseachtaí uathu. Tá na toirmisc liostaithe sa tábla a leagtar amach in Iarscríbhinn VI a ghabhann leis an Rialachán Tarmligthe sin. Tá toirmeasc ar ghluaiseachtaí ainmhithe ar coimeád de speicis liostaithe go dtí bunaíochtaí sa chrios srianta i gcomhréir leis an tábla sin ionas nach dtiocfaidh méadú ar an líon ainmhithe ar coimeád atá soghabhálach i leith galar i gcatagóir A atá deimhnithe sa chrios sin. Má aistrítear uibheacha goir chuig gorlann atá lonnaithe i gcrios srianta, d’fhéadfaí sicíní lae a tháirgeadh, rud a mhéadóidh an líon ainmhithe ar coimeád de speicis liostaithe sa chrios srianta. Dá bhrí sin, bheadh gluaiseacht den sórt sin ag teacht salach ar chuspóir an toirmisc ar ainmhithe ar coimeád de speicis liostaithe a aistriú go dtí bunaíochtaí sa chrios srianta. Dá réir sin, mar riail ghinearálta, meastar go bhfuil toirmeasc ar ghluaiseacht den sórt sin. Mar sin féin, sa tábla a leagtar amach in Iarscríbhinn VI a ghabhann le Rialachán Tarmligthe (AE) 2020/687, ní liostaítear ach an toirmeasc ar ghluaiseacht uibheacha goir ó bhunaíochtaí sa chrios srianta ach tá sé sin mícheart. Dá bhrí sin, ba cheart téacs an tábla a leagtar amach in Iarscríbhinn VI a ghabhann le Rialachán Tarmligthe (AE) 2020/687 a cheartú, chun tagairt a dhéanamh don toirmeasc ar ghluaiseacht uibheacha goir go dtí bunaíochtaí sa chrios srianta freisin.

(17)

Ina theannta sin, tá an toirmeasc a liostaítear in Iarscríbhinn VI a ghabhann le Rialachán Tarmligthe (AE) 2020/687 ar ghluaiseachtaí ábhar beatha de bhunadh plandaí agus tuí teoranta go mícheart dóibh a fhaightear sa chrios cosanta, rud a fhagann go gceadaítear gluaiseachtaí ábhar beatha de bhunadh plandaí agus tuí a fhaightear sa chrios faireachais, rud a d’fhéadfadh a bheith ina riosca maidir le leathadh an ghalair. Ba cheart Iarscríbhinn VI de Rialachán Tarmligthe (AE) 2020/687 a leasú mar sin chun gluaiseachtaí ábhar beatha de bhunadh plandaí agus tuí a fhaightear sa chrios srianta a thoirmeasc.

(18)

Le hIarscríbhinn VII a ghabhann le Rialachán Tarmligthe (AE) 2020/687, déantar foráil maidir le cóireálacha maolaithe riosca le haghaidh táirgí de bhunadh ainmhíoch, go háirithe feoil, cásálacha agus bainne, ón gcrios srianta. Na cóireálacha sin lena ndéantar na hoibreáin galair a dhíghníomhú, ba cheart na cóireálacha a bheith i gcomhréir le reachtaíocht an Aontais atá ann cheana, le caighdeáin idirnáisiúnta agus le fianaise eolaíoch nua. An iontráil san Iarscríbhinn sin maidir le víreas bolgaí caorach agus víreas bolgaí gabhar, tá an iontráil sin folamh faoi láthair de dheasca easpa sonraí eolaíocha agus easpa staidéir maidir le cóireálacha a fuarthas go dtí seo. I bhfianaise na ráigeanna de bholgach caorach agus bolgach gabhar a bhuail an tAontas le déanaí, ba cheart do na Ballstáit sin atá i mbun ráigeanna den sórt sin a bhainistiú a bheith in ann cóireáil a dhéanamh ar fheoil agus ar bhainne ó ainmhithe de chineál gabhair agus de chineál caorach. Ní dhearnadh foráil maidir le cóireálacha den sórt sin in Iarscríbhinn VII de Rialachán Tarmligthe (AE) 2020/687 toisc go bhfuil an Coimisiún ag fanacht ar thorthaí staidéir arna choimisiniú chuig saotharlann tagartha an Aontais le haghaidh víris bolgaí caorach agus gabhair, nó ar thuilleadh comhairle eolaíche ón Údarás Eorpach um Shábháilteacht Bia (“an tÚdarás”). Mar sin féin, agus an chosúlacht idir víreas bolgaí caorach, víreas bolgaí gabhar agus víreas ghalar an chraicinn chnapánaigh á cur san áireamh, ar den fhine Poxviridae agus den ghéineas Capripoxvirus iad araon, is iomchuí cur i bhfeidhm cóireálacha maolaithe riosca sa tábla ábhartha d’Iarscríbhinn VII a ghabhann le Rialachán Tarmligthe (AE) 2020/687 a cheadú. Déanfar athbhreithniú ar chóireálacha maolaithe riosca le haghaidh bolgach caorach agus bolgach gabhar a luaithe a bheidh tuilleadh fianaise eolaíoch ar fáil.

(19)

I dtuairim eolaíoch a fuarthas le déanaí (5), rinne an tÚdarás measúnú ar éifeachtacht cóireálacha maolaithe riosca áirithe le haghaidh táirgí de bhunadh ainmhíoch agus le haghaidh ábhair eile i ndáil le galair i gcatagóir A. I measc cóireálacha eile, mheas an tÚdarás gur cóireáil éifeachtach í an chóireáil teasa feola chun lár-theocht 70 °C a bhaint amach ar feadh 30 nóiméad ar a laghad chun víreas fhiabhras Afracach na muc a dhíghníomhú. Dá bhrí sin, bunaithe ar an bhfianaise eolaíoch nua agus i gcomhréir le caighdeán idirnáisiúnta na hEagraíochta Domhanda um Shláinte Ainmhithe (WOAH) (6) a bhaineann le fiabhras Afracach na muc, ba cheart Iarscríbhinn VII a ghabhann le Rialachán Tarmligthe (AE) 2020/687 a leasú dá réir chun cóireáil maolaithe riosca bhreise le haghaidh fhiabhras Afracach na muc a chur san áireamh.

(20)

Leagtar síos in Iarscríbhinn VIII a ghabhann le Rialachán Tarmligthe (AE) 2020/687 na ‘cóireálacha maolaithe riosca le haghaidh táirgí nach de bhunadh ainmhíoch iad ón gcrios cosanta’, ach déantar tagairtí do na cóireálacha sin in Airteagal 52 den Rialachán Tarmligthe sin freisin, rud a bhaineann le coinníollacha sonracha maidir le gluaiseachtaí ábhar beatha de bhunadh plandaí agus tuí ón gcrios faireachais a údarú. Dá bhrí sin, ba cheart teideal Iarscríbhinn VIII a ghabhann le Rialachán Tarmligthe (AE) 2020/687 a cheartú chun tagairt a dhéanamh do na ‘cóireálacha maolaithe riosca le haghaidh táirgí nach de bhunadh ainmhíoch iad ón gcrios srianta’.

(21)

Dá bhrí sin, ba cheart Rialachán Tarmligthe (AE) 2020/687 a leasú dá réir sin,

(1)

in Airteagal 21(3), cuirtear an pointe (g) seo a leanas leis:

(2)

cuirtear an méid seo a leanas in ionad Airteagal 28(3):

(3)

in Airteagal 30(2), cuirtear an méid seo a leanas in ionad phointe (a):

(4)

cuirtear an méid seo a leanas in ionad Airteagal 39(1):

(5)

cuirtear an méid seo a leanas in ionad Airteagal 43(3):

(6)

leasaítear Airteagal 46(1), pointe (a), mar seo a leanas:

(7)

in Airteagal 46(2), cuirtear an méid seo a leanas in ionad phointe (a):

(8)

cuirtear an méid seo a leanas in ionad Airteagal 55(1):

(9)

cuirtear an tábla a leagtar amach san Iarscríbhinn a ghabhann leis an Rialachán seo in ionad an chéad tábla maidir le feoil, cásálacha agus bainne in Iarscríbhinn VII.

(1)

in Airteagal 2, pointe (10), cuirtear an méid seo a leanas in ionad an tsainmhínithe ar “chásálacha”:

(2)

in Airteagal 52, cuirtear an méid seo a leanas in ionad phointe (c):

(3)

in Airteagal 59(2), cuirtear an méid seo a leanas in ionad phointe (a):

(4)

in Iarscríbhinn VI, ceartaítear an tábla mar a leanas:

(5)

in Iarscríbhinn VIII, cuirtear an méid seo a leanas in ionad an teidil:

‘ CÓIREÁLACHA MAOLAITHE RIOSCA LE hAGHAIDH TÁIRGÍ NACH DE BHUNADH AINMHÍOCH IAD ÓN gCRIOS SRIANTA ’.