(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta' rkaptu rmunkat fl-inħawi ta' 3 mili nawtiċi mill-kosta jew fl-inħawi ta' 50 metru isobath fejn il-fond jintlaħaq f'distanza iqsar mill-kosta.

(2)

B'talba ta' Stat Membru, il-Kummissjoni tista' tippermetti deroga mill-Artikolu 13(1) tar-Regolament (KE) Nru 1967/2006, diment li jintlaħqu għadd ta' kundizzjonijiet stabbiliti fl-Artikolu 13(5) u (9).

(3)

Fl-1 ta' Ottubru 2013, il-Kummissjoni rċeviet talba mingħand Franza għal deroga mill-ewwel subparagrafu tal-Artikolu 13(1) ta' dak ir-Regolament, għall-użu ta' tartaruni tax-xatt f'ċertu żoni tal-ilmijiet territorjali ta' Franza, irrispettivament mill-fond.

(4)

Franza tat ġustifikazzjonijiet xjentifiċi u tekniċi aġġornati għad-deroga.

(5)

Matul is-sessjoni plenarja mill-4 sat-8 ta' Novembru 2013 il-Kumitat Xjentifiku, Tekniku u Ekonomiku għas-Sajd (STECF) ivvaluta d-deroga li talbet Franza u l-abbozz relatat tal-pjan ta' ġestjoni.

(6)

Id-deroga li talbet Franza hi konformi mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(7)

Hemm limitazzjonijiet ġeografiċi speċifiċi minħabba d-daqs limitat tal-blata kontinentali.

(8)

Is-sajd tat-tartaruni tax-xatt ma jħalli ebda impatt sinifikanti fuq l-ambjent tal-baħar.

(9)

Id-deroga li talbet Franza tolqot għadd limitat ta' bastimenti, jiġifieri 23 bastiment biss.

(10)

Is-sajd tat-tartaruni tax-xatt isir mill-kosta f'baħar baxx u jimmira varjetà ta' speċijiet. In-natura ta' dan it-tip ta' sajd hi tali li ma jistax isir b'xi rkaptu ieħor.

(11)

Il-pjan ta' ġestjoni jiggarantixxi li fil-ġejjieni mhux se jiżdied l-isforz tas-sajd, peress li l-awtorizzazzjonijiet tas-sajd se jinħarġu lit-23 bastiment speċifikat li jinvolvu sforz totali ta' 1 225 kW li diġà huma awtorizzati għas-sajd minn Franza.

(12)

It-talba tkopri bastimenti b'esperjenza vasta fis-sajd ta' aktar minn ħames snin u li jaħdmu bi pjan ta' ġestjoni adottat minn Franza fil-15 ta' April 2014 (2) skont l-Artikolu 19(2) tar-Regolament (KE) Nru 1967/2006.

(13)

Dawk il-bastimenti huma inklużi f'lista li ntbagħtet lill-Kummissjoni skont ir-rekwiżiti tal-Artikolu 13(9) tar-Regolament (KE) Nru 1967/2006.

(14)

L-attivitajiet tas-sajd ikkonċernati jissodisfaw ir-rekwiżiti tal-Artikolu 4 tar-Regolament (KE) Nru 1967/2006 peress li l-pjan ta' ġestjoni Franċiż jipprojbixxi b'mod espliċitu li jsir sajd f'ħabitats protetti.

(15)

Ir-rekwiżiti tal-Artikolu 8(1)(h) tar-Regolament (KE) Nru 1967/2006 mhumiex applikabbli għax dawn għandhom x'jaqsmu ma' bastimenti tat-tkarkir.

(16)

Dwar ir-rekwiżit ta' konformità mal-Artikolu 9(3) li jistabbilixxi d-daqs minimu tal-malja, il-Kummissjoni tinnota li billi l-attivitajiet tas-sajd ikkonċernati huma selettivi ħafna, għandhom effett negliġibbli fuq l-ambjent tal-baħar u ma jsirux f'ħabitati protetti, f'konformità mal-Artikolu 9(7) tar-Regolament (KE) Nru 1967/2006, Franza awtorizzat deroga minn dawn id-dispożizzjonijiet fil-pjan ta' ġestjoni tagħha.

(17)

L-attivitajiet tas-sajd ikkonċernati jissodisfaw ir-rekwiżiti ta' reġistrazzjoni stabbiliti fl-Artikolu 14 tar-Regolament tal-Kunsill (KE) Nru 1224/2009 (3).

(18)

L-attivitajiet tas-sajd ikkonċernati ma jfixklux l-attivitajiet ta' bastimenti bi rkapti oħra li mhumiex tat-tkarkir, tartaruni jew bi xbieki rmunkati simili.

(19)

L-attività tat-tartaruni tax-xatt jirregolaha l-pjan ta' ġestjoni Franċiż biex ikun żgurat li l-qabdiet tal-ispeċijiet imsemmija fl-Anness III tar-Regolament (KE) Nru 1967/2006 ikunu minimi.

(20)

It-tartaruni tax-xatt ma jimmirawx għaċ-ċefalopodi.

(21)

Il-pjan ta' ġestjoni Franċiż fih miżuri għall-monitoraġġ tal-attivitajiet tas-sajd, kif previst fit-tielet subparagrafu tal-Artikolu 13(9) tar-Regolament (KE) Nru 1967/2006.

(22)

Għaldaqstant, id-deroga mitluba għandha tingħata.

(23)

Franza għandha tirrapporta lill-Kummissjoni fil-waqt xieraq u skont il-pjan ta' monitoraġġ previst fil-pjan ta' ġestjoni Franċiż.

(24)

L-Artikolu 15(11) tar-Regolament (UE) Nru 1380/2013 tal-Parlament Ewropew u tal-Kunsill (4) jeżiġi li għall-ispeċijiet soġġetti għall-obbligu ta' ħatt l-art kif jispeċifika l-Artikolu 15(1) tal-istess Regolament, l-użu tal-qabdiet tal-ispeċi li jkunu inqas mid-daqs tar-referenza ta' konservazzjoni minima, għandu jkun ristrett għal skopijiet oħra ħlief għall-konsum dirett tal-bniedem.

(25)

Il-pjan ta' ġestjoni Franċiż fih deroga għad-daqs minimu tal-organiżmi tal-baħar għall-frieħ tas-sardin li jinħattu għall-konsum tal-bniedem u li huma fil-mira tal-attivitajiet tas-sajd regolati fih, skont l-Artikolu 15(3) tar-Regolament (KE) Nru 1967/2006.

(26)

It-tul taż-żmien tad-deroga għandu jibda jiġi limitat biex jirrifletti l-iskeda taż-żmien tad-dħul fis-seħħ tal-obbligu ta' ħatt l-art kif jiddefinixxi l-Artikolu 15(1) tar-Regolament (UE) Nru 1380/2013

(27)

Il-miżuri previsti f'dan ir-Regolament huma skont l-opinjoni tal-Kumitat dwar is-Sajd u l-Akkwakultura,

(a)

jkollhom in-numru tar-reġistrazzjoni msemmi fil-pjan ta' ġestjoni Franċiż

(b)

għandhom esperjenza fis-sajd ta' aktar minn ħames snin u fil-ġejjieni mhux se jiżdied l-isforz tas-sajd eżerċitat; u

(c)

għandhom awtorizzazzjoni għas-sajd u joperaw bil-pjan ta' ġestjoni li adottat Franza skont l-Artikolu 19(2) tar-Regolament (KE) Nru 1967/2006.