(1)

Wara investigazzjoni anti-dumping skont l-Artikolu 5 tar-Regolament tal-Kunsill (KE) Nru 1225/2009 (2), fis-6 ta’ Ottubru 2009, skont ir-Regolament tal-Kunsill (KE) Nru 926/2009 (3), ġie impost dazju anti-dumping definittiv fuq l-importazzjonijiet ta’ ċerti pajpijiet u tubi mingħajr saldaturi, tal-ħadid jew tal-azzar, li joriġinaw mir-Repubblika tal-Poplu taċ-Ċina. Il-miżuri ħadu l-forma ta’ rati ta’ dazju ad valorem: 17,7 % għal Shandong Luxing Steel Pipe Co. Ltd.); 27,2 % għall-kumpaniji l-oħra li kkooperaw u 39,2 % għall-kumpaniji kollha l-oħra.

(2)

Wara investigazzjoni tar-rieżami ta’ skadenza skont l-Artikolu 11(2) tar-Regolament (KE) Nru 1225/2009, fit-8 ta’ Diċembru 2015, skont ir-Regolament ta’ Implimentazzjoni tal-Kummissjoni (UE) 2015/2272, ġew imposti miżuri anti-dumping definittivi għal ħames snin oħra (4).

(3)

Fid-29 ta’ Jannar 2014, fis-sentenza tagħha tal-Kawża T-528/09, il-Qorti Ġenerali annullat ir-Regolament (KE) Nru 926/2009 sa fejn kienu kkonċernati l-esportazzjonijiet ta’ prodotti prodotti minn Hubei Xinyegang Steel Co. Ltd (“Hubei”) (5). Din is-Sentenza ġiet appellata mill-Kunsill.

(4)

Permezz tas-sentenza tas-7 ta’ April 2016 fil-Kawżi Konġunti C-186/14 P u C-193/14 P, il-Qorti tal-Ġustizzja (QĠUE) ikkonfermat is-sejbiet tal-Qorti Ġenerali u kkonfermat l-annullament tal-miżuri sa fejn kien ikkonċernat il-produttur esportatur Hubei (6).

(5)

Fid-9 ta’ Diċembru 2020, il-miżuri anti-dumping imposti mir-Regolament ta’ Implimentazzjoni (UE) 2015/2272 skadew (7).

(6)

Fl-4 ta’ Frar 2021, il-QĠUE ddeċidiet fil-Kawża C-324/19, dwar talba għal deċiżjoni preliminari skont l-Artikolu 267 TFUE mill-Finanzgericht Hamburg, li r-Regolament (KE) Nru 926/2009 huwa invalidu (“is-Sentenza”) (8).

(7)

Skont l-Artikolu 266 tat-Trattat dwar il-Funzjonament tal-Unjoni Ewropea, l-istituzzjonijiet tal-Unjoni għandhom l-obbligu li jieħdu l-passi neċessarji sabiex jikkonformaw mas-sentenzi tal-Qorti.

(8)

Fil-Kawża C-324/19, is-Sentenza kellha l-effett li tinvalida l-miżuri oriġinali erga omnes u ex tunc. Dan ifisser li s-Sentenza hija applikabbli għall-partijiet kollha u li r-Regolament (KE) Nru 926/2009 huwa meqjus invalidu mill-jum li fih daħal fis-seħħ.

(9)

Barra minn hekk, minħabba li l-miżura oriġinali kienet ġiet estiża fl-2015, is-Sentenza kellha wkoll impatt indirett fuq ir-Regolament (UE) 2015/2272. Dan għaliex, skont il-ġurisprudenza tal-QĠUE, “regolament li jtawwal huwa invalidu bl-istess mod bħar-regolament definittiv” (9). Barra minn hekk, il-konformità mar-regola tal-ekwivalenza tal-forma tirrikjedi li l-miżuri anti-dumping imposti mir-Regolament ta’ Implimentazzjoni (UE) 2015/2272 jenħtieġ li jitħassru permezz ta’ regolament tal-Kummissjoni (10).

(10)

Bħala riżultat tas-Sentenza li tiddikjara r-Regolament (KE) Nru 926/2009 bħala invalidu fl-intier tiegħu, jenħtieġ li d-dazji anti-dumping imposti mir-Regolament ta’ Implimentazzjoni (UE) 2015/2272 jitħassru wkoll ex tunc. Barra minn hekk, kull dazju definittiv imħallas skont ir-Regolament ta’ Implimentazzjoni (UE) 2015/2272 jista’ jitħallas lura jew jinħafer f’konformità mal-leġiżlazzjoni doganali applikabbli. Minn dan jirriżulta, b’mod partikolari, li l-operatur li ħallas dawn id-dazji jista’, bħala prinċipju, jitlob ir-rimbors tagħhom biss jekk u sa fejn il-perijodu ta’ tliet snin previst għal dan il-għan fl-Artikolu 121(1)(a) tal-Kodiċi Doganali tal-Unjoni (11) ma jkunx skada. Il-fatt li r-Regolament (KE) Nru 926/2009 ġie ddikjarat invalidu (inkluż b’effett erga omnes) ma jirrappreżentax ċirkostanza imprevedibbli jew force majeure li tippermetti estensjoni ta’ dan il-perjodu skont it-tieni subparagrafu tal-Artikolu 121(1) tal-Kodiċi Doganali tal-Unjoni (12).

(11)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament bażiku,