(1)

Tháinig an Coinbhinsiún um Eitlíocht Shibhialta Idirnáisiúnta (‘Coinbhinsiún Chicago’) lena rialaítear aeriompar idirnáisiúnta i bhfeidhm an 4 Aibreán 1947. Bunaíodh an Eagraíocht Eitlíochta Sibhialta Idirnáisiúnta (ICAO) leis.

(2)

Is Stáit Chonarthacha i gCoinbhinsiún Chicago iad Ballstáit uile an Aontais agus is comhaltaí de ICAO iad, agus tá stádas breathnóra ag an Aontas i gcomhlachtaí áirithe de chuid ICAO. Tá ionadaithe ó shé Bhallstát i gComhairle ICAO le haghaidh na tréimhse 2022-2025.

(3)

De bhun Airteagal 37 j) de Choinbhinsiún Chicago, ó am go ham, de réir mar is gá, glacfaidh agus leasóidh Comhairle ICAO caighdeáin agus cleachtais agus nósanna imeachta molta idirnáisiúnta maidir le nósanna imeachta custaim agus inimirce. De bhun Airteagal 54(1) de Choinbhinsiún Chicago, féadfaidh Comhairle ICAO Caighdeáin agus Cleachtais Mholta (‘SARPanna’) idirnáisiúnta a ghlacadh, agus iad a ainmniú mar Iarscríbhinní a ghabhann le Coinbhinsiún Chicago.

(4)

Ag an 233ú seisiún a bheidh aici, tá Comhairle ICAO le Leasú 30 ar Iarscríbhinn 9 a ghabhann le Coinbhinsiún Chicago (‘Leasú 30’) a ghlacadh.

(5)

Is é is príomhchuspóir do Leasú 30, cur le soiléireacht Iarscríbhinn 9 a ghabhann le Coinbhinsiún Chicago (‘Iarscríbhinn 9’) agus, dá réir sin, lena comhsheasmhacht agus lena héifeachtúlacht, rud a chuimsítear i Litir Stáit CE 6/3 - 24/67 de chuid ICAO.

(6)

I Leasú 30, cuimsítear leasuithe ar Chaibidil 1 (‘Sainmhínithe agus prionsabail ghinearálta’), ar Chaibidil 3 (‘Teacht Isteach agus Imeacht daoine agus a gcuid bagáiste’) míreanna C (‘Slándáil doiciméad taistil’), D (‘Doiciméid taistil’), G (‘Cártaí Bordála/Díbhordála’) agus H (‘Iniúchadh doiciméad taistil’), agus ar Chaibidil 8 (‘Forálacha éascaíochta lena gcumhdaítear ábhair shonracha’), míreanna H (‘Gáinneáil ar dhaoine’) agus I (‘Gáinneáil ar Fhiadhúlra’), d’Iarscríbhinn 9.

(7)

Is iomchuí an seasamh atá le glacadh, thar ceann an Aontais, i gComhairle ICAO a bhunú, mar beidh Leasú 30 ina cheangal faoin dlí idirnáisiúnta i gcomhréir le hAirteagal 90(a) de Choinbhinsiún Chicago, agus baineann sé le hábhar ó thaobh dhlí an Aontais de, eadhon Rialacháin (CE) Uimh. 2252/2004 (1) agus (CE) Uimh. 1683/95 ón gComhairle (2). Ba cheart raon feidhme an Chinnidh seo a theorannú chuig inneachar Leasú 30, a mhéid a thagann an t-inneachar sin faoi réimse a chumhdaítear cuid mhór le comhrialacha de chuid an Aontais cheana. Níor cheart difear a dhéanamh leis an gCinneadh seo do dháileadh na n-inniúlachtaí idir na tAontas agus na Ballstáit i réimse na heitlíochta.

(8)

De bhun Airteagal 38 de Choinbhinsiún Chicago, aon Stát ar dofheidhmithe leis aon chaighdeán nó nós imeachta idirnáisiúnta arna ghlacadh ag ICAO a chomhlíonadh go hiomlán, nó a chuid rialachán nó cleachtas féin a chur i gcomhréir go hiomlán le haon chaighdeán nó nós imeachta idirnáisiúnta den sórt sin, nó aon Stát a mheasann gur gá rialacháin nó cleachtais a ghlacadh atá éagsúil ar aon bhealach ar leith leis na rialacháin nó na cleachtais arna leagan síos le caighdeán idirnáisiúnta, tabharfaidh an Stát sin fógra do ICAO láithreach faoi na héagsúlachtaí atá idir a chleachtas féin agus an cleachtas arna bhunú leis an gcaighdeán idirnáisiúnta.

(9)

Ba cheart gurb é an seasamh atá le glacadh, thar ceann an Aontais, ag an 233ú seisiún a bheidh ag Comhairle ICAO, nó ag aon seisiún eile ina dhiaidh sin a mhéid a bhaineann le glacadh na leasuithe atá beartaithe a dhéanamh ar Chaibidil 1, Caibidil 3 míreanna C, D, G, H, agus ar Chaibidil 8, míreanna H agus I, d’Iarscríbhinn 9, leasuithe ar cuid iad de Leasú 30 ar an Iarscríbhinn sin a chuimsítear i Litir Stáit CE 6/3 - 24/67 de chuid ICAO, tacú leis na leasuithe sin. Ba cheart do Bhallstáit an Aontais atá ina gcomhaltaí de Chomhairle ICAO an seasamh sin a chur in iúl, ag gníomhú dóibh go comhpháirteach chun leas an Aontais.

(10)

Tar éis do Chomhairle ICAO Leasú 30 a ghlacadh, rud a bheidh le fógairt ag Ardrúnaí ICAO trí nós imeachta Litir Stáit de chuid ICAO, ba cheart gurb é seasamh an Aontais gan aon míshástacht a chur ar taifead agus fógra a thabhairt maidir le comhlíonadh na leasuithe sin. I gcás ina mbeidh dlí an Aontais ar neamhréir leis na SARPanna nua-leasaithe tar éis an dáta a bheartaítear na SARPanna sin a chur i bhfeidhm, ba cheart fógra a thabhairt do ICAO faoi aon éagsúlacht idir dlí an Aontais agus na SARPanna áirithe sin. Ba cheart seasamh an Aontais i ndáil le héagsúlachtaí den sórt sin a bheith bunaithe ar dhoiciméad i scríbhinn a chuirfidh an Coimisiún faoi bhráid na Comhairle i gcomhair a phléite agus a fhormheasta. Ba cheart do Bhallstáit uile an Aontais an seasamh sin a chur in iúl, ag gníomhú dóibh go comhpháirteach chun leas an Aontais.

(11)

Is é atá sa Chinneadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (3); dá bhrí sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(12)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm. Ós rud é go gcuireann an Cinneadh seo le acquis Schengen, cinnfidh an Danmhairg, i gcomhréir le hAirteagal 4 den Phrótacal sin, laistigh de thréimhse 6 mhí tar éis don Chomhairle cinneadh a dhéanamh ar an gCinneadh seo, an gcuirfidh sí chun feidhme ina dlí náisiúnta é,