(1)

Tháinig an Comhaontú idir an Comhphobal Eorpach agus Cónaidhm na hEilvéise maidir le cigireachtaí agus foirmiúlachtaí a shimpliú i leith earraí a iompar agus maidir le bearta slándála custaim (1) (“an Comhaontú”) i bhfeidhm an 1 Eanáir 2011.

(2)

De bhun Airteagal 21(2) den Chomhaontú, féadfaidh an Comhchoiste arna bhunú leis an gComhaontú (“an Comhchoiste”) Caibidil III den Chomhaontú, agus na hIarscríbhinní a ghabhann leis an gComhaontú, a leasú, trí chinntí uaidh le linn an chéad seisiúin eile dá chuid nó trí mhalartú litreacha.

(3)

I gcomhréir le hAirteagal 22(4) den Chomhaontú, más rud é nach féidir cinneadh a ghlacadh chun na leasuithe ar an gComhaontú agus na leasuithe ar reachtaíocht an Aontais a chur chun feidhme go comhuaineach, tá na leasuithe dá bhforáiltear sa dréachtchinneadh arna chur isteach lena fhormheas ag na Páirtithe Conarthacha le cur chun feidhme go sealadach, i gcás inar féidir, ón 15 Márta 2021 amach, i gcomhréir le nósanna imeachta inmheánacha na bPáirtithe Conarthacha. Beidh an rogha dáta sin i gcomhthráth leis an gcéad eisiúint de Chóras Rialaithe Allmhairí 2, rud ar chomhaontaigh an Eilvéis páirt a ghlacadh ann.

(4)

Is iomchuí an seasamh atá le glacadh thar ceann an Aontais sa Chomhchoiste a mhéid a bhaineann le leasú ar Chaibidil III den Chomhaontú, agus ar Iarscríbhinní I agus II a ghabhann leis an gComhaontú, a bhunú, toisc go mbeidh an leasú ina cheangal ar an Aontas.

(5)

Dá bhrí sin, ba cheart seasamh an Aontais sa Chomhchoiste a bheith bunaithe ar an dréachtchinneadh,