(1)

L-isforzi tas-sajd fil-Punent tal-Baħar Mediterran għas-snin 2024, 2025 u 2026 ġew stabbiliti, rispettivament, bir-Regolamenti tal-Kunsill (UE) 2024/259 (2), (UE) 2025/219 (3) u (UE) 2026/266 (4).

(2)

Fil-każ tas-sena tas-sajd 2025, l-Artikolu 7(2) tar-Regolament (UE) 2025/219 jipprevedi li l-isforz tas-sajd massimu permissibbli għall-bastimenti tat-tkarkir u għall-bastimenti tas-sajd bil-konz huwa stabbilit fl-Anness IV tiegħu. B’mod partikolari, it-tabella fil-punt 1(a) ta’ dan l-Anness tistabbilixxi l-isforz tas-sajd massimu permissibbli, espress f’jiem ta’ sajd, għall-bastimenti tat-tkarkir fil-Baħar Alboran, fil-Gżejjer Baleariċi, fit-Tramuntana ta’ Spanja u fil-Golf tal-Iljuni (is-subżoni ġeografiċi (GSAs) 1, 2, 5, 6 u 7 tal-Kummissjoni Ġenerali tas-Sajd għall-Mediterran (GFCM)).

(3)

Sabiex jittejbu s-selettività tal-irkaptu tas-sajd u l-effiċjenza taż-żoni magħluqin għall-protezzjoni tal-ħut li għadu qed jikber u l-ħut riproduttiv, l-Artikolu 8 tar-Regolament (UE) 2025/219 jistabbilixxi mekkaniżmu ta’ kumpens, li jippermetti lil Stat Membru jagħti lill-bastimenti li jtajru l-bandiera tiegħu allokazzjoni addizzjonali ta’ jiem ta’ sajd għas-sena tas-sajd 2025, dment li l-bastiment li jirċievi l-allokazzjoni addizzjonali jissodisfa ċerti kundizzjonijiet. L-Artikolu 8(5) jipprevedi li l-Istat Membru kkonċernat ma għandux jalloka jiem ta’ sajd addizzjonali li jirriżultaw fil-qbiż tal-livell tal-isforz tas-sajd stabbilit għall-grupp tal-isforz tas-sajd rilevanti fir-Regolament (UE) 2024/259.

(4)

Għas-sena tas-sajd 2024, l-Artikolu 7(2) tar-Regolament (UE) 2024/259 jipprevedi li l-isforz tas-sajd massimu permissibbli għall-bastimenti tat-tkarkir u għall-bastimenti tas-sajd bil-konz huwa stabbilit fl-Anness III tiegħu. B’mod partikolari, it-tabella fil-punt 1(a) ta’ dan l-Anness tistabbilixxi l-isforz tas-sajd massimu permissibbli, espress f’jiem ta’ sajd, għall-bastimenti tat-tkarkir fil-Baħar Alboran, fil-Gżejjer Baleariċi, fit-Tramuntana ta’ Spanja u fil-Golf tal-Iljuni (GSAs 1, 2, 5, 6 u 7).

(5)

Sabiex jippromwovi s-selettività tal-irkaptu tas-sajd u l-effiċjenza taż-żoni magħluqin għall-protezzjoni tal-ħut li għadu qed jikber u l-ħut riproduttiv, l-Artikolu 8 tar-Regolament (UE) 2024/259 jistabbilixxi mekkaniżmu ta’ kumpens, li jippermetti lil Stat Membru jagħti lill-bastimenti li jtajru l-bandiera tiegħu allokazzjoni addizzjonali ta’ jiem ta’ sajd għas-sena tas-sajd 2024, dment li l-bastiment li jirċievi l-allokazzjoni addizzjonali jissodisfa ċerti kundizzjonijiet.

(6)

Permezz ta’ email datata d-19 ta’ Novembru 2025, l-awtoritajiet Spanjoli infurmaw lill-Kummissjoni li, skont l-interpretazzjoni ta’ Spanja tal-Artikolu 8 tar-Regolament (UE) 2025/219, il-limitu tal-jiem ta’ sajd għas-sena tas-sajd 2025 jenħtieġ li jinkludi mhux biss l-isforz tas-sajd massimu permissibbli stabbilit għas-sena tas-sajd 2024 (imsemmi minn Spanja bħala “jiem inizjali”), iżda wkoll l-allokazzjoni addizzjonali tal-jiem ta’ sajd mogħtija skont il-mekkaniżmu ta’ kumpens għall-2024. B’konsegwenza ta’ dan, Spanja talbet lill-Kummissjoni taġġorna l-allokazzjoni tal-isforz tas-sajd Spanjol għall-2025 fl-għodda tal-Kummissjoni QUOTA fuq il-FIDES.

(7)

Il-Kummissjoni wieġbet permezz ta’ email tat-23 ta’ Novembru 2025 li l-kalkolu tal-jiem addizzjonali li jirriżultaw mill-mekkaniżmu ta’ kumpens għall-2025 jenħtieġ li jsir filwaqt li jitqiesu kemm l-Artikolu 8(5) tar-Regolament (UE) 2025/219 kif ukoll l-Artikolu 7(2) tar-Regolament (UE) 2024/259, li jirreferi għall-isforz tas-sajd massimu permissibbli stabbilit fl-Anness III ta’ dan ir-Regolament. Il-Kummissjoni kkonkludiet li l-isforz tas-sajd stabbilit fir-Regolament (UE) 2024/259 ma jinkludix il-jiem addizzjonali mogħtija skont il-mekkaniżmu ta’ kumpens tal-2024.

(8)

Permezz tar-Riżoluzzjoni tal-25 ta’ Novembru 2025 (5), Spanja emendat ir-Riżoluzzjoni tal-10 ta’ Ottubru 2025, li ppubblikat il-kwantitajiet disponibbli skont il-mekkaniżmu ta’ kumpens, u tat 7 125 jum ta’ sajd addizzjonali lill-flotta tat-tkarkir tal-Mediterran tagħha, li jirrappreżentaw madwar 13-il jum ta’ sajd għal kull bastiment, li għandhom jintużaw qabel tmiem l-2025.

(9)

Konsegwentement, il-Kummissjoni bagħtet ittra datata l-1 ta’ Diċembru 2025 lill-awtoritajiet Spanjoli li fiha talbithom jipprovdu spjegazzjonijiet dettaljati dwar il-bażi legali użata minn Spanja biex tagħti dawn il-jiem ta’ sajd addizzjonali għall-2025 permezz tar-Riżoluzzjoni msemmija tal-25 ta’ Novembru 2025. Il-Kummissjoni tenniet li l-livell tal-isforz tas-sajd stabbilit fir-Regolament (UE) 2024/259 ma jinkludix il-jiem ta’ sajd addizzjonali mogħtija skont il-mekkaniżmu ta’ kumpens tal-2024. Il-Kummissjoni fakkret ukoll lil Spanja li, f’konformità mal-Artikolu 106(1) u (2) tar-Regolament (KE) Nru 1224/2009, il-Kummissjoni hija meħtieġa tnaqqas kwalunkwe sforz tas-sajd imwettaq li jaqbeż l-isforz tas-sajd tal-2025 allokat lil Spanja għall-istokk ikkonċernat mill-isforz tas-sajd disponibbli għal dak l-istokk fis-sena jew fis-snin ta’ wara.

(10)

F’ittra datata t-22 ta’ Jannar 2026, Spanja wieġbet li “minħabba li r-Regolament (UE) 2024/259 ippreveda wkoll mekkaniżmu ta’ kumpens, li skontu l-Istati Membri jistgħu jagħtu allokazzjoni addizzjonali ta’ jiem ta’ sajd sa 6 %, dment li l-kundizzjonijiet stabbiliti jiġu ssodisfati, il-livell tal-isforz tas-sajd stabbilit fir-Regolament (UE) 2024/259 għandu jitqies bħala l-allokazzjoni inizjali flimkien ma’ dak is-6 % (jekk il-kundizzjonijiet jiġu ssodisfati), u li dan huwa l-massimu li l-allokazzjoni addizzjonali ta’ jiem ta’ sajd fl-2025 ma għandhiex taqbeż abbażi tal-mekkaniżmu ta’ kumpens fl-Artikolu 8(5) tar-Regolament tal-Kunsill (UE) 2025/219.” Spanja spjegat li “skont l-Artikolu 8(5) tar-Regolament (UE) 2025/219, l-Istat Membru jista’ jalloka jiem ta’ sajd addizzjonali sal-limitu tal-livell tal-isforz tas-sajd stabbilit bi (…) ir-Regolament (UE) 2024/259, filwaqt li huwa mifhum li tali limitu huwa ddeterminat mill-allokazzjoni inizjali ta’ jiem ta’ sajd, miżjuda b’ 6 %, jekk jiġu ssodisfati ċerti kundizzjonijiet”.

(11)

Skont l-Artikolu 106(1) tar-Regolament (KE) Nru 1224/2009, meta l-Kummissjoni tkun stabbiliet li Stat Membru jkun qabeż l-isforz tas-sajd li ġie allokat lilu, il-Kummissjoni, wara li tkun ikkonsultat l-Istat Membru kkonċernat, trid topera tnaqqis mill-isforz tas-sajd futur li jiġi allokat lil dak l-Istat Membru.

(12)

L-Artikolu 106(2) tar-Regolament (KE) Nru 1224/2009 jipprevedi li dan it-tnaqqis irid isir fis-sena jew fis-snin ta’ wara billi jiġi applikat fattur ta’ multiplikazzjoni stipulat fih.

(13)

Wara li vvalutat l-użu eċċessiv tal-opportunitajiet tas-sajd minn Spanja f’konformità mal-Artikolu 47 tar-Regolament ta’ Implimentazzjoni tal-Kummissjoni (UE) 2025/2196 (6), il-Kummissjoni kkonkludiet li Spanja qabżet l-isforz tas-sajd disponibbli tagħha bil-kwantitajiet li ġejjin:

(14)

Permezz ta’ email tat-30 ta’ Marzu 2026, il-Kummissjoni kkonsultat b’mod informali lil Spanja dwar it-tnaqqis li jrid isir mill-isforz tas-sajd disponibbli għal Spanja fl-2026 minħabba s-sajd eċċessiv fl-2025. Spanja wieġbet permezz ta’ email fis-7 ta’ April 2026 li ma setgħetx taqbel mat-tnaqqis maħsub, peress li Spanja ma rrapportat l-ebda qbiż tal-isforz tas-sajd imwettaq fi kwalunkwe segment tal-flotta għall-2025. Fit-tweġiba tagħha, Spanja rreferiet għall-ittra msemmija hawn fuq datata t-22 ta’ Jannar 2026, fejn sostniet li l-jiem addizzjonali li Stat Membru jista’ jalloka skont l-Artikolu 8(5) tar-Regolament (UE) 2025/219 għas-sena 2025 jenħtieġ li ma jaqbżux il-jiem inizjali tal-isforz tas-sajd stabbiliti mir-Regolament (UE) 2024/259 għas-sena 2024 miżjuda b’ 6 % li jirriżulta mill-mekkaniżmu ta’ kumpens għall-2024, jekk jiġu ssodisfati ċerti kundizzjonijiet.

(15)

Skont l-Artikolu 106(1) u (2) tar-Regolament tar-Regolament (KE) Nru 1224/2009, il-Kummissjoni, permezz ta’ ittra tal-11 ta’ Ġunju 2026, ikkonsultat formalment lil Spanja. Il-Kummissjoni tenniet l-intenzjoni tagħha li tapplika tnaqqis fuq l-isforz tas-sajd allokat lil Spanja fl-2026. F’din l-ittra, il-Kummissjoni spjegat li l-kalkoli tas-sajd eċċessiv huma bbażati fuq l-isforz tas-sajd adattat, li jikkorrispondi għall-isforz tas-sajd stabbilit fl-Anness IV tar-Regolament (UE) 2025/219 li miegħu jiżdiedu jiem ta’ sajd addizzjonali possibbli allokati f’konformità mal-Artikolu 8(1) tal-istess Regolament, mingħajr ma jinqabeż il-livell tal-isforz tas-sajd imsemmi fl-Artikolu 8(5), it-trasferiment possibbli tal-opportunitajiet tas-sajd f’konformità mal-Artikolu 9(3) tar-Regolament (UE) 2019/1022, l-iskambji tal-opportunitajiet tas-sajd f’konformità mal-Artikolu 16(8) tar-Regolament (UE) Nru 1380/2013, kif ukoll it-tnaqqis tal-opportunitajiet tas-sajd f’konformità mal-Artikolu 106 tar-Regolament (KE) Nru 1224/2009.

(16)

Spanja wieġbet fl-24 ta’ Ġunju 2026 u kkontestat l-eżistenza ta’ qbiż tal-isforz tas-sajd imwettaq, billi qieset li “l-għadd massimu ta’ jiem ta’ sajd li jista’ jiġi allokat matul is-sena tas-sajd 2025 irid jiġi kkalkolat b’referenza għas-somma tal-jiem inizjalment allokati u tal-jiem li jirriżultaw mill-mekkaniżmu ta’ kumpens applikabbli għall-2024.”

(17)

Il-Kummissjoni tqis li d-deċiżjoni ta’ Spanja li tagħti jiem ta’ sajd addizzjonali għall-2025 hija bbażata fuq interpretazzjoni żbaljata tal-Artikolu 8(5) tar-Regolament (UE) 2025/219, li jirrikjedi li l-Istati Membri ma jallokawx jiem ta’ sajd addizzjonali li jirriżultaw fil-qbiż tal-livell tal-isforz tas-sajd stabbilit għall-grupp tal-isforz tas-sajd rilevanti fir-Regolament (UE) 2024/259. Dik id-dispożizzjoni trid tinqara flimkien mal-Artikolu 7(2) tar-Regolament (UE) 2024/259, li skontu l-isforz tas-sajd massimu permissibbli huwa stabbilit fl-Anness III ta’ dan ir-Regolament. Dan l-Anness jistabbilixxi livell speċifiku ta’ sforz tas-sajd għall-bastimenti tat-tkarkir u għall-bastimenti tas-sajd bil-konz, espress f’jiem ta’ sajd, għal kull grupp ta’ sforz tas-sajd. Jirriżulta li l-livell tal-isforz tas-sajd stabbilit bir-Regolament (UE) 2024/259, imsemmi fl-Artikolu 8(5) tar-Regolament (UE) 2025/219, ma jinkludix il-jiem ta’ sajd addizzjonali mogħtija skont il-mekkaniżmu ta’ kumpens għall-2024, peress li tali jiem ma humiex stabbiliti fir-Regolament (UE) 2024/259 iżda jiddependu mill-użu, parzjalment jew kompletament, ta’ dan il-mekkaniżmu ta’ kumpens mill-Istati Membri.

(18)

Spanja ġiet infurmata permezz ta’ email irreġistrata mibgħuta fit-22 ta’ Settembru 2026 li l-Kummissjoni żżomm il-pożizzjoni tagħha fir-rigward tal-interpretazzjoni tal-Artikolu 8(5) tar-Regolament (UE) 2025/219.

(19)

Għalhekk, jenħtieġ li jsir tnaqqis mill-isforz tas-sajd disponibbli għal Spanja fl-2026 għall-isforz tas-sajd maqbuż fiż-żoni tas-sajd u fis-sajd ikkonċernati, f’konformità mal-Artikolu 106(1) u (2) tar-Regolament (KE) Nru 1224/2009.

(20)

Xorta jistgħu jsiru aktar aġġornamenti jew korrezzjonijiet wara d-detezzjoni, għall-eżerċizzji attwali jew preċedenti tat-tnaqqis, ta’ erruri, ta’ ommissjonijiet jew ta’ rappurtar ħażin fid-data dwar l-użu tal-isforz tas-sajd iddikjarata minn Spanja skont l-Artikolu 33 tar-Regolament (KE) Nru 1224/2009,