(1)

Socraíodh iarrachtaí iascaireachta sa Mheánmhuir Thiar le haghaidh na mblianta 2024, 2025 agus 2026, faoi seach, le Rialacháin (AE) 2024/259 (2), (AE) 2025/219 (3) agus (AE) 2026/266 ón gComhairle (4).

(2)

Maidir leis an mbliain iascaireachta 2025, foráiltear le hAirteagal 7(2) de Rialachán (AE) 2025/219 go leagtar amach an uasiarracht iascaireachta incheadaithe le haghaidh trálaer agus báid spiléireachta in Iarscríbhinn IV a ghabhann leis. Go háirithe, leagtar amach sa tábla i bpointe 1(a) den Iarscríbhinn seo an uasiarracht iascaireachta incheadaithe, ina laethanta iascaireachta, le haghaidh trálaeir i Muir Alboran, ar na hOileáin Bhailéaracha, i dTuaisceart na Spáinne agus i Murascaill an Leoin (Folimistéir gheografacha (FLGanna) 1, 5, 6 agus 7 den Choimisiún Ginearálta Iascaigh don Mheánmhuir (CGIM); (FLGanna) 1, 2, 5, 6 agus 7).

(3)

Chun feabhas a chur ar roghnaíocht trealaimh iascaireachta agus ar éifeachtúlacht na limistéar coiscthe chun éisc óga agus sceithirí a chosaint, le hAirteagal 8 de Rialachán (AE) 2025/219 bunaítear sásra cúitimh, lena gceadaítear do Bhallstát cionroinnt bhreise laethanta iascaireachta le haghaidh na bliana iascaireachta 2025 a dheonú do shoithí a bhfuil a bhratach ar foluain acu, ar choinníoll go gcomhlíonann an soitheach a fhaigheann an chionroinnt bhreise coinníollacha áirithe. Foráiltear le hAirteagal 8(5) nach ndéanfaidh an Ballstát lena mbaineann laethanta iascaireachta breise a chionroinnt lena sárófaí an leibhéal iarrachta iascaireachta arna shocrú don ghrúpa ábhartha iarrachta iascaireachta i Rialachán (AE) 2024/259.

(4)

Maidir leis an mbliain iascaireachta 2024, foráiltear le hAirteagal 7(2) de Rialachán (AE) 2024/259 go leagtar amach an uasiarracht iascaireachta incheadaithe le haghaidh trálaer agus báid spiléireachta in Iarscríbhinn III a ghabhann leis. Go háirithe, leagtar amach sa tábla i bpointe 1(a) den Iarscríbhinn seo an uasiarracht iascaireachta incheadaithe, ina laethanta iascaireachta, le haghaidh trálaeir i Muir Alboran, ar na hOileáin Bhailéaracha, i dTuaisceart na Spáinne agus i Murascaill an Leoin (FLGanna 1, 2, 5, 6 agus 7).

(5)

Ionas go gcuirfear chun cinn roghnaíocht trealaimh iascaireachta agus éifeachtúlacht na limistéar coiscthe chun éisc óga agus sceithirí a chosaint, le hAirteagal 8 de Rialachán (AE) 2024/259 bunaítear sásra cúitimh, lena gceadaítear do Bhallstát cionroinnt bhreise laethanta iascaireachta le haghaidh na bliana iascaireachta 2024 a dheonú do shoithí a bhfuil a bhratach ar foluain acu, ar choinníoll go gcomhlíonann an soitheach a fhaigheann an chionroinnt bhreise coinníollacha áirithe.

(6)

Le ríomhphost dar dáta an 19 Samhain 2025, chuir údaráis na Spáinne an Coimisiún ar an eolas, de réir léirmhíniú na Spáinne ar Airteagal 8 de Rialachán (AE) 2025/219, gur cheart a áireamh sa teorainn laethanta iascaireachta le haghaidh na bliana iascaireachta 2025 ní hamháin an uasiarracht iascaireachta incheadaithe a socraíodh le haghaidh na bliana iascaireachta 2024 (ar a dtugann an Spáinn ‘laethanta tosaigh’), ach an chionroinnt bhreise laethanta iascaireachta a deonaíodh faoin sásra cúitimh le haghaidh 2024 freisin. Mar thoradh air sin, d’iarr an Spáinn ar an gCoimisiún cionroinnt iarrachta iascaireachta na Spáinne le haghaidh 2025 a thabhairt cothrom le dáta in uirlis QUOTA an Choimisiúin ar FIDES.

(7)

D’fhreagair an Coimisiún le ríomhphost an 23 Samhain 2025 gur cheart ríomh na laethanta breise a eascraíonn as an sásra cúitimh le haghaidh 2025 a dhéanamh agus Airteagal 8(5) de Rialachán (AE) 2025/219 agus Airteagal 7(2) de Rialachán (AE) 2024/259 araon á gcur san áireamh, ina dtagraítear don uasiarracht iascaireachta incheadaithe a leagtar amach in Iarscríbhinn III a ghabhann leis an Rialachán seo. Tháinig an Coimisiún ar an gconclúid nach n-áirítear san iarracht iascaireachta a shocraítear i Rialachán (AE) 2024/259 na laethanta breise a deonaíodh faoi shásra cúitimh 2024.

(8)

Le Rún an 25 Samhain 2025 (5), leasaigh an Spáinn Rún an 10 Deireadh Fómhair 2025, lenar foilsíodh na cainníochtaí a bhí ar fáil faoin sásra cúitimh, agus dheonaigh sí 7 125 lá iascaireachta breise dá cabhlach trálaeireachta sa Mheánmhuir, is é sin thart ar 13 lá iascaireachta in aghaidh an tsoithigh, atá le húsáid roimh dheireadh 2025.

(9)

Dá bhrí sin, sheol an Coimisiún litir dar dáta an 1 Nollaig 2025 chuig údaráis na Spáinne inar iarradh orthu mínithe mionsonraithe a thabhairt maidir leis an mbunús dlí a d’úsáid an Spáinn chun na laethanta iascaireachta breise sin a dheonú le haghaidh 2025 trí Rún sin an 25 Samhain. D’athdhearbhaigh an Coimisiún nach n-áirítear sa leibhéal iarrachta iascaireachta a shocraítear i Rialachán (AE) 2024/259 na laethanta breise iascaireachta a deonaíodh faoi shásra cúitimh 2024. Mheabhraigh an Coimisiún don Spáinn freisin, i gcomhréir le hAirteagal 106(1) agus (2) de Rialachán (CE) Uimh. 1224/2009, go gceanglaítear ar an gCoimisiún aon iarracht iascaireachta a cuireadh in úsáid de bhreis ar iarracht iascaireachta 2025 a cionroinneadh ar an Spáinn le haghaidh an stoic lena mbaineann a asbhaint as an iarracht iascaireachta a bhí ar fáil le haghaidh an stoic sin sa bhliain dár gcionn nó sna blianta dár gcionn.

(10)

I litir dar dáta an 22 Eanáir 2026, d’fhreagair an Spáinn ‘ós rud é go ndearnadh foráil i Rialachán (AE) 2024/259 freisin maidir le sásra cúitimh, ar dá réir a fhéadfaidh na Ballstáit cionroinnt bhreise laethanta iascaireachta suas le 6 % a dheonú, ar choinníoll gur comhlíonadh na coinníollacha a leagadh síos, measfar gurb é an leibhéal iarrachta iascaireachta a shocraítear i Rialachán (AE) 2024/259 an chionroinnt tosaigh móide 6 % (i gcás inar comhlíonadh na coinníollacha), is é sin an t-uasmhéid nach sáróidh cionroinnt bhreise laethanta iascaireachta in 2025 ar bhonn an tsásra cúitimh in Airteagal 8(5) de Rialachán (AE) 2025/219.’ Mhínigh an Spáinn, ‘de bhun Airteagal 8(5) de Rialachán (AE) 2025/219, go bhféadfaidh an Ballstát laethanta iascaireachta breise a chionroinnt suas le teorainn an leibhéal iarrachta iascaireachta arna bhunú le (…) Rialachán (AE) 2024/259, ar choinníoll go gcinntear an teorainn sin le cionroinnt tosaigh laethanta iascaireachta, arna mhéadú faoi 6 %, má chomhlíontar coinníollacha áirithe’.

(11)

De bhun Airteagal 106(1) de Rialachán (CE) Uimh. 1224/2009, i gcás ina bhfuil sé suite ag an gCoimisiún go bhfuil Ballstát tar éis an iarracht iascaireachta a cionroinneadh air a shárú, tá an Coimisiún, tar éis dó dul i gcomhairle leis an mBallstát lena mbaineann, le hasbhaintí a dhéanamh ón iarracht iascaireachta a chionroinnfear ar an mBallstát sin amach anseo.

(12)

Foráiltear le hAirteagal 106(2) de Rialachán (CE) Uimh. 1224/2009 go bhfuil na hasbhaintí sin le déanamh sa bhliain dár gcionn nó sna blianta dár gcionn trí fhachtóir iolraithe a chur i bhfeidhm mar a leagtar amach ann.

(13)

Tar éis measúnú a dhéanamh ar ró-úsáid deiseanna iascaireachta ag an Spáinn i gcomhréir le hAirteagal 47 de Rialachán Cur Chun Feidhme (AE) 2025/2196 ón gCoimisiún (6), tháinig an Coimisiún ar an gconclúid gur sháraigh an Spáinn an iarracht iascaireachta a bhí ar fáil di de réir na gcainníochtaí seo a leanas:

(14)

Le ríomhphost an 30 Márta 2026, chuaigh an Coimisiún i gcomhairle go neamhfhoirmiúil leis an Spáinn maidir leis na hasbhaintí atá le déanamh ón iarracht iascaireachta atá ar fáil don Spáinn in 2026 de dheasca na ró-iascaireachta in 2025. D’fhreagair an Spáinn le ríomhphost an 7 Aibreán 2026 nach bhféadfadh sí aontú leis na hasbhaintí a bhí beartaithe ós rud é nár thuairiscigh an Spáinn aon bharrachas iarrachta iascaireachta a cuireadh in úsáid in aon roinn chabhlaigh le haghaidh 2025. Ina freagra, thagair an Spáinn don litir thuasluaite dar dáta an 22 Eanáir 2026, inar áitigh sí nár cheart na laethanta breise a fhéadfaidh Ballstát a chionroinnt de bhun Airteagal 8(5) de Rialachán (AE) 2025/219 le haghaidh 2025 a bheith níos mó ná an líon laethanta iarrachta iascaireachta tosaigh arna mbunú le Rialachán (AE) 2024/259 le haghaidh 2024 arna méadú faoi 6 % mar thoradh ar an sásra cúitimh le haghaidh 2024, dá gcomhlíonfaí coinníollacha áirithe.

(15)

De bhun Airteagal 106(1) agus (2) de Rialachán (CE) Uimh. 1224/2009, chuaigh an Coimisiún i gcomhairle go foirmiúil leis an Spáinn i litir dar dáta an 11 Meitheamh 2026. D’athdhearbhaigh an Coimisiún go bhfuil sé ar intinn aige asbhaintí a chur i bhfeidhm maidir leis an iarracht iascaireachta a cionroinneadh ar an Spáinn in 2026. Mhínigh an Coimisiún sa litir sin go bhfuil ríomhanna na ró-iascaireachta bunaithe ar an iarracht iascaireachta oiriúnaithe, a chomhfhreagraíonn don iarracht iascaireachta a leagtar amach in Iarscríbhinn IV a ghabhann le Rialachán (AE) 2025/219 lena gcuirtear laethanta iascaireachta breise a d’fhéadfadh a bheith ann agus a chionroinntear i gcomhréir le hAirteagal 8(1) den Rialachán céanna gan an leibhéal iarrachta iascaireachta dá dtagraítear in Airteagal 8(5) a shárú, aistriú deiseanna iascaireachta a d’fhéadfadh a bheith ann i gcomhréir le hAirteagal 9(3) de Rialachán (AE) 2019/1022, malartuithe deiseanna iascaireachta i gcomhréir le hAirteagal 16(8) de Rialachán (AE) Uimh. 1380/2013, chomh maith le hasbhaintí deiseanna iascaireachta i gcomhréir le hAirteagal 106 de Rialachán (CE) Uimh. 1224/2009.

(16)

Thug an Spáinn freagra an 24 Meitheamh 2026 inar chuir sí in aghaidh barrachas iarrachta iascaireachta a cuireadh in úsáid, ós rud é ‘nach mór an líon uasta laethanta iascaireachta a fhéadfar a chionroinnt le linn na bliana iascaireachta 2025 a ríomh faoi threoir shuim na laethanta a cionroinneadh ar dtús agus na laethanta a eascraíonn as an sásra cúitimh is infheidhme maidir le 2024.’

(17)

Measann an Coimisiún go bhfuil cinneadh na Spáinne maidir le laethanta iascaireachta breise a dheonú le haghaidh 2025 bunaithe ar léirmhíniú mícheart ar Airteagal 8(5) de Rialachán (AE) 2025/219, lena gceanglaítear ar na Ballstáit gan laethanta iascaireachta breise a chionroinnt a mbeadh sárú ar an leibhéal iarrachta iascaireachta a socraíodh le haghaidh an ghrúpa ábhartha iarrachta iascaireachta i Rialachán (AE) 2024/259 mar thoradh orthu. Tá an fhoráil sin le léamh i gcomhar le hAirteagal 7(2) de Rialachán (AE) 2024/259, ar dá bhun a leagtar amach an uasiarracht iascaireachta incheadaithe in Iarscríbhinn III a ghabhann leis an Rialachán seo. Leagtar amach san Iarscríbhinn seo leibhéal sonrach iarrachta iascaireachta le haghaidh trálaer agus báid spiléireachta, i dtaca le laethanta iascaireachta, i gcás gach grúpa iarrachta iascaireachta. Is é an toradh atá air sin nach n-áirítear sa leibhéal iarrachta iascaireachta a shocraítear le Rialachán (AE) 2024/259, dá dtagraítear in Airteagal 8(5) de Rialachán (AE) 2025/219, na laethanta iascaireachta breise a deonaíodh faoin sásra cúitimh le haghaidh 2024 ós rud é nach socraítear na laethanta sin i Rialachán (AE) 2024/259 ach go mbraitheann siad ar an úsáid a bhaineann na Ballstáit, go páirteach nó go hiomlán, as an sásra cúitimh sin.

(18)

Cuireadh an Spáinn ar an eolas trí ríomhphost cláraithe a seoladh an 22 Meán Fómhair 2026 go gcoinníonn an Coimisiún a sheasamh ar bun a mhéid a bhaineann le léirmhíniú Airteagal 8(5) de Rialachán (AE) 2025/219.

(19)

Dá bhrí sin, ba cheart asbhaintí a oibriú ón iarracht iascaireachta atá ar fáil don Spáinn in 2026 as an iarracht iascaireachta a sáraíodh sna limistéir iascaireachta agus san iascach lena mbaineann, i gcomhréir le hAirteagal 106(1) agus (2) de Rialachán (CE) Uimh. 1224/2009.

(20)

Féadfar tuilleadh uasdátuithe nó ceartúchán a dhéanamh fós i ndiaidh earráidí, easnaimh nó míthuairisciú a bhrath, i gcás na gcleachtaí asbhainte atá ann faoi láthair nó na gcleachtaí asbhainte roimhe seo, sna sonraí maidir leis an iarracht iascaireachta a cuireadh in úsáid arna ndearbhú ag an Spáinn de bhun Airteagal 33 de Rialachán (CE) Uimh. 1224/2009,