(1)

Cuireadh própaconasól san áireamh in Iarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 8. Dá bhrí sin, de bhun Airteagal 86 de Rialachán (AE) Uimh. 528/2012, measadh é a bheith formheasta go dtí an 31 Márta 2020 faoin Rialachán sin faoi réir na gceanglas a leagtar amach in Iarscríbhinn I a ghabhann le Treoir 98/8/CE.

(2)

An 1 Deireadh Fómhair 2018, cuireadh isteach iarratas i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le própaconasól lena úsáid i dtáirgí bithicídeacha de chineál táirge 8 (“an t-iarratas”).

(3)

An 8 Feabhra 2019, chuir údarás inniúil meastóireachta na Fionlainne in iúl don Choimisiún gur chinn sé, de bhun Airteagal 14(1) de Rialachán (AE) Uimh. 528/2012, go raibh gá le meastóireacht iomlán ar an iarratas. De bhun Airteagal 8(1) den Rialachán sin, tá an t-údarás inniúil meastóireachta le meastóireacht iomlán a dhéanamh ar an iarratas laistigh de 365 lá tar éis a bhailíochtaithe.

(4)

Le Cinneadh Cur Chun Feidhme (AE) 2020/27 ón gCoimisiún (3), cuireadh ar atráth go dtí an 31 Márta 2021 dáta éaga an fhormheasa maidir le própaconasól lena úsáid i dtáirgí bithicídeacha de chineál táirge 8 ionas go mbeidh go leor ama ann chun scrúdú a dhéanamh ar an iarratas.

(5)

Le Cinneadh Cur Chun Feidhme (AE) 2021/354 ón gCoimisiún (4), cuireadh ar atráth arís, go dtí an 31 Nollaig 2022, dáta éaga an fhormheasa maidir le própaconasól lena úsáid i dtáirgí bithicídeacha de chineál táirge 8.

(6)

An 2 Meitheamh 2021, chuir an t-údarás inniúil meastóireachta an tuarascáil mheasúnaithe agus conclúidí a mheastóireachta faoi bhráid na Gníomhaireachta Eorpaí Ceimiceán (“an Ghníomhaireacht”). Laistigh de 270 lá tar éis don Ghníomhaireacht moladh a fháil ón údarás inniúil meastóireachta, déanfaidh sí tuairim maidir le hathnuachan ar fhormheas na substainte gníomhaí a ullmhú agus a chur faoi bhráid an Choimisiúin, i gcomhréir le hAirteagal 14(3) de Rialachán (AE) Uimh. 528/2012.

(7)

An 9 Márta 2022, ghlac an Ghníomhaireacht a tuairim (5) maidir le hathnuachan ar fhormheas própaconasóil i gcomhréir le hAirteagal 14(3) de Rialachán (AE) Uimh. 528/2012.

(8)

Ós rud é go bhfuil própaconasól aicmithe mar shubstaint thocsaineach le haghaidh an atáirgthe de chatagóir 1B i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (6), comhlíonann sé na critéir eisiaimh a leagtar amach in Airteagal 5(1), pointe (c) de Rialachán (AE) Uimh. 528/2012. Thairis sin, meastar go bhfuil airíonna réabtha inchrínigh ag própaconasól a d’fhéadfadh a bheith ina gcúis le héifeachtaí díobhálacha ar an duine, agus dá bhrí sin go gcomhlíonann sé an critéar eisiaimh a leagtar amach in Airteagal 5(1), pointe (d) de Rialachán (AE) Uimh. 528/2012. Cé go bhfuil obair leanúnach á déanamh ar an scrúdú chun cinneadh a dhéanamh an gcomhlíontar ar a laghad coinníoll amháin den chéad fhomhír d’Airteagal 5(2) den Rialachán sin, agus an bhféadfaí an formheas maidir le própaconasól a athnuachan dá bhrí sin, ní fhéadfar an scrúdú seo a thabhairt chun críche roimh dhul in éag don fhormheas reatha.

(9)

Dá bhrí sin, ar chúiseanna nach bhfuil neart ag an iarratasóir orthu, an formheas maidir le própaconasól lena úsáid i dtáirgí bithicídeacha de chineál táirge 8, is dócha go rachaidh sé in éag sula mbeidh cinneadh déanta maidir lena n-athnuachan. Dá bhrí sin, is iomchuí dáta éaga an fhormheasa a chur ar atráth go ceann tréimhse leordhóthanach chun gur féidir nós imeachta iomlán scrúdú an iarratais a thabhairt chun críche. Agus á chur san áireamh an t-am is gá chun measúnú a dhéanamh an bhfuil ar a laghad ceann amháin de na coinníollacha atá sa chéad fhomhír d’Airteagal 5(2) de Rialachán (AE) Uimh. 528/2012 á chomhlíonadh, agus an t-am chun cinneadh a dhéanamh i dtaobh athnuachan a dhéanamh ar fhormheas própaconasóil lena úsáid i dtáirgí bithicídeacha de chineál táirge 8, ba cheart an dáta éaga a chur ar atráth go dtí an 31 Nollaig 2023.

(10)

Tar éis dáta éaga an fhormheasa a chur ar atráth, leanfaidh própaconasól de bheith formheasta lena úsáid i dtáirgí bithicídeacha de chineál táirge 8 faoi réir na gceanglas a leagtar amach in Iarscríbhinn I a ghabhann le Treoir 98/8/CE,