(1)

L-Anness II għad-Deċiżjoni 2002/358/KE jistabbilixxi l-impenji dwar il-limitazzjoni jew it-tnaqqis ikkwantifikat tal-emissjonijiet bl-iskop li jiġu ddeterminati l-livelli rispettivi ta' emissjonijiet allokati lill-Komunità u lill-Istati Membri tagħha skont l-Artikolu 4 tal-Protokoll ta' Kjoto. L-Anness B għall-Protokoll ta' Kjoto jistabbilixxi l-impenji dwar il-limitazzjoni jew it-tnaqqis ikkwantifikat tal-emissjonijiet bl-iskop li jiġu ddeterminati l-livelli ta' emissjonijiet allokati lill-Istati Membri li ssieħbu mal-Komunità wara l-25 ta' April 2002, ħlief Ċipru u Malta li għad ma għandhomx impenji dwar il-limitazzjoni jew it-tnaqqis ikkwantifikat tal-emissjonijiet taħt il-Protokoll ta' Kjoto.

(2)

Il-livelli rispettivi ta' emissjonijiet allokati lill-Komunità u lill-Istati Membri tagħha, espressi f'tunnellati tal-ekwivalent tad-dijossidu tal-karbonju, huma ddeterminati fl-Anness għal din id-Deċiżjoni. Dawn il-livelli tal-emissjonijiet huma kkalkulati abbażi tad-dejta riveduta dwar l-emissjonijiet għas-sena bażi mressqa mill-Istati Membri skont l-Artikolu 23 tad-Deċiżjoni tal-Kummissjoni 2005/166/KE tal-10 ta' Frar 2005 li tistabbilixxi regoli li jimplimentaw id-Deċiżjoni 280/2004/KE tal-Parlament Ewropew u tal-Kunsill dwar mekkaniżmu għall-monitoraġġ tal-emissjonijiet tal-gass b'effett tas-serra tal-Komunità u għall-implimentazzjoni tal-Protokoll ta' Kjoto [titlu mhux uffiċjali] ( 2 ), immultiplikata bl-impenji dwar il-limitazzjoni jew it-tnaqqis ikkwantifikat tal-emissjonijiet stipulati fl-Anness II għad-Deċiżjoni 2002/358/KE u fl-Anness B għall-Protokoll ta' Kjoto, immultiplikata għal ħames darbiet biex jirrappreżentaw il-ħames snin tal-ewwel perjodu ta' impenn tal-Protokoll.

(3)

Skont l-Artikolu 3 tad-Deċiżjoni 2002/358/KE, l-ammonti assenjati tal-Komunità u ta' kull Stat Membru jridu jkunu daqs il-livell ta' emissjonijiet rispettivi tagħhom, iddeterminat fl-Anness għal din id-Deċiżjoni.

(4)

Ir-reviżjoni tad-dejta dwar l-emissjonijiet għas-sena bażi taħt il-Protokoll ta' Kjoto, mressqa mill-Istati Membri skont l-Artikolu 23 tad-Deċiżjoni 2005/166/KE, kienet teħtieġ kalkolu mill-ġdid li rriżulta f'differenza aritmetika ta' 11 393 397 tunnellati tal-ekwivalent tad-dijossidu tal-karbonju bejn l-ammont assenjat tal-Komunità Ewropea u s-somma tal-ammonti assenjati tal-Istati Membri elenkati fl-Anness II għad-Deċiżjoni 2002/358/KE. Din id-differenza għandha tinħareġ bħala unitajiet ta' ammonti assenjati mill-Komunità.

(5)

Id-Danimarka konsistement esprimiet stimi dwar l-emissjonijiet ta' sena bażi tagħha. Dawn l-istimi huma sostnuti b'informazzjoni dwar l-emissjonijiet eċċezzjonalment baxxi ta' sena bażi tagħha mogħtija fir-rapport tagħha ppreżentat skont l-Artikolu 23 tad-Deċiżjoni 2005/166/KE. B'rikonoxximent tas-sitwazzjoni speċjali tad-Danimarka, li tirriżulta mill-emissjonijiet baxxi ta' sena bażi aktar mis-soltu u li għandha wieħed mill-ogħla tnaqqis obbligat ta' emissjoni kwantifikata skont l-Anness II tad-Deċiżjoni 2002/358/KE, il-Komunità għandha tavvanza 5 miljun unità tal-ammont assenjat lid-Danimarka.

(6)

Kwalunkwe tibdil fil-livelli finali tal-emissjonijiet tal-Komunità u tal-Istati Membri tagħha li jkun ġej mir-reviżjoni tal-livelli tal-emissjonijiet skont l-Artikolu 8 tal-Protokoll ta' Kjoto għandu jiġi speċifikat permezz ta' emenda għal din id-Deċiżjoni.

(7)

Il-miżuri pprovduti f'din id-Deċiżjoni huma skont l-opinjoni tal-Kumitat dwar il-Bidla fil-Klima,