(1)

Ba cheart é a bheith d’aidhm ag gníomhaíocht an Aontais san earnáil muiriompair an tsábháilteacht mhuirí a fheabhsú agus an comhshaol muirí agus sláinte an duine a chosaint.

(2)

Meastar go nglacfaidh Coiste Muir-Shábháilteachta (MSC) na hEagraíochta Muirí Idirnáisiúnta (IMO), le linn a 109ú seisiún ón 2 go dtí an 6 Nollaig 2024 (‘MSC 109’), leasuithe ar an gCód Idirnáisiúnta um Shábháilteacht Long a úsáideann Gáis nó Breoslaí Íseal-splancphointe eile (Cód IGF).

(3)

Is iomchuí an seasamh atá le glacadh thar ceann an Aontais ag MSC 109 a bhunú, ós rud é go bhféadfadh na leasuithe ar Chód IGF atá beartaithe tionchar cinntitheach a imirt ar inneachar dhlí an Aontais, eadhon Treoir 2009/45/CE ó Pharlaimint na hEorpa agus ón gComhairle (1).

(4)

Áirítear leis na leasuithe saincheisteanna éagsúla, lena n-áirítear toibreacha caidéal súite, comhlaí sábháilteachta chun brú a scaoileadh, seomraí ullmhúcháin breosla, criosanna struchtúracha cosanta dóiteáin agus criosanna struchtúracha guaiseacha. Ba cheart don Aontas tacú leis na leasuithe sin toisc go gcuirfear feabhas leo ar shábháilteacht long, lena n-áirítear longa paisinéirí, agus gás nádúrtha á úsáid mar bhreosla. Soláthraíonn na leasuithe sin leibhéal coibhéiseach cosanta don chóras píopaí agus d’ionraon umair ó línte comhlaí sábháilteachta chun brú a scaoileadh le linn gnáthoibríochta agus éigeandála. Ina theannta sin, ba cheart a aithint leis na leasuithe sin gur ann do thoibreacha beaga d’umair bhreosla gás nádúrtha leachtaithe (GNL).

(5)

Níl an tAontas ina bhall de IMO, ná ina pháirtí conarthach i gCód IGF. Dá bhrí sin, ba cheart don Chomhairle na Ballstáit a údarú seasamh ón Aontas a chur in iúl ag MSC 109.

(6)

Ba cheart raon feidhme an Chinnidh seo a theorannú don mhéid atá sna leasuithe beartaithe, a mhéid atá ar cumas na leasuithe sin difear a dhéanamh do rialacha comhchoiteanna an Aontais agus a mhéid a thagann siad faoi inniúlacht eisiach an Aontais. Níor cheart don Chinneadh seo difear a dhéanamh do roinnt na n-inniúlachtaí idir an tAontas agus na Ballstáit,