(1)

De dhroim dhá lainseáil Soyuz ó Ionad Spáis na Guáine a bheith curtha ar ceal i mí Aibreáin agus i mí Mheán Fómhair 2022, agus an moill a fógraíodh maidir le Ariane-6, ní mór don Aontas teacht ar roghanna malartacha chun tús a chur arís go práinneach le lainseálacha shatailítí Galileo. Tá sé sin ríthábhachtach chun oibriú cuí chóras Galileo a áirithiú, ar cuid de Chlár Spáis an Aontais é arna bhunú le Rialachán (AE) 2021/696 ó Pharlaimint na hEorpa agus ón gComhairle (1).

(2)

Tá comhar seanbhunaithe ag an Aontas leis na Stáit Aontaithe maidir le loingseoireacht satailíte. Tháinig an Comhaontú maidir le córais loingseoireachta satailíte Galileo agus GPS agus a bhfeidhmchláir ghaolmhara a chur chun cinn, a sholáthar agus a úsáid idir an Comhphobal Eorpach agus a Bhallstáit, de pháirt, agus Stáit Aontaithe Mheiriceá, den pháirt eile (2), i bhfeidhm an 12 Nollaig 2011.

(3)

An 23 Samhain 2023, d’údaraigh an Chomhairle tús a chur leis an gcaibidlíocht thar ceann an Aontais d’fhonn comhaontú a thabhairt i gcrích idir an tAontas agus na Stáit Aontaithe lena leagfar síos na nósanna imeachta slándála maidir le satailítí Galileo a lainseáil ó chríoch na Stát Aontaithe.

(4)

Cuireadh an chaibidlíocht idir an tAontas Eorpach, agus Stáit Aontaithe Mheiriceá, ina leagtar amach ina leagtar amach nósanna imeachta slándála maidir le satailítí Galileo a lainseáil ó chríoch na Stát Aontaithe (‘an Comhaontú’) i gcrích go rathúil.

(5)

Beidh feidhm ag an gComhaontú idir an tAontas Eorpach agus Rialtas Stáit Aontaithe Mheiriceá maidir le slándáil faisnéise rúnaicmithe (3) maidir le faisnéis rúnaicmithe an Aontais Eorpaigh a chuirfear ar fáil do na Stáit Aontaithe.

(6)

Ba cheart an Comhaontú a shíniú, faoi réir a thabhairt i gcrích tráth níos déanaí. I bhfianaise íogaireacht ama lainseálacha Galileo, ba cheart an Comhaontú a chur i bhfeidhm ar bhonn sealadach, go dtí go gcomhlánófar na nósanna imeachta is gá chun go dtiocfaidh sé i bhfeidhm,