|
24.2.2022 |
GA |
Iris Oifigiúil an Aontais Eorpaigh |
L 43/73 |
CINNEADH CUR CHUN FEIDHME (AE) 2022/289 ÓN gCOIMISIÚN
an 22 Feabhra 2022
lena mbunaítear an Anailís agus an Tástáil ar Éiceachórais ERIC (AnaEE-ERIC)
(a bhfuil fógra tugtha ina leith faoi dhoiciméad C(2022) 933)
(Téacs atá ábhartha maidir le LEE)
(Is ag na téacsanna sa Bhulgáiris, sa tSeicis, sa Danmhairgis, san Ollainnis, sa Fhraincis, san Iodáilis, san Fhionlainnis agus sa tSualainnis a bheidh an t-údarás agus acu siúd amháin)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (CE) Uimh. 723/2009 ón gComhairle an 25 Meitheamh 2009 maidir le Creat dlíthiúil an Chomhphobail maidir le Cuibhreannas don Bhonneagar Taighde Eorpach (ERIC) (1), agus go háirithe Airteagal 6(1), pointe (a) de,
De bharr an mhéid seo a leanas:
|
(1) |
An Bhulgáir, an tSeicia, an Danmhairg, an Fhrainc, an Iodáil, an Fhionlainn agus an Lárionad Idirnáisiúnta um Ardstaidéar Agranamaíoch i Réigiún na Meánmhara, chuir siad iarratas faoi bhráid an Choimisiúin chun an Anailís agus an Tástáil ar Éiceachórais ERIC (AnaEE-ERIC) (“an t-iarratas”) a bhunú. Chuir an Bheilg a cinneadh in iúl go mbeidh sí rannpháirteach in AnaEE-ERIC mar bhreathnóir ar dtús. |
|
(2) |
Chomhaontaigh na hiarratasóirí gurbh í an Fhrainc Ballstát óstach AnaEE-ERIC. |
|
(3) |
Rinneadh Rialachán (CE) Uimh. 723/2009 a ionchorprú sa Chomhaontú maidir leis an Limistéar Eorpach Eacnamaíoch (LEE) le Cinneadh Uimh. 72/2015 ó Chomhchoiste LEE (2). |
|
(4) |
Rinne an Coimisiún measúnú ar an iarratas, de bhun Airteagal 5(2) de Rialachán (CE) Uimh. 723/2009, agus chinn sé go gcomhlíonann sé na ceanglais a leagtar amach sa Rialachán sin. Le linn an mheasúnaithe, fuair an Coimisiún tuairimí ó shaineolaithe neamhspleácha i réimse na hAnailíse agus na Tástála ar Éiceachórais. |
|
(5) |
Tá na bearta a leagtar amach sa Chinneadh seo i gcomhréir leis an tuairim ón gCoiste arna bhunú faoi Airteagal 20 de Rialachán (CE) Uimh. 723/2009. |
TAR ÉIS AN CINNEADH SEO A GHLACADH:
Airteagal 1
1. Bunaítear leis seo an Anailís agus an Tástáil ar Éiceachórais ERIC (AnaEE-ERIC).
2. Leagtar amach gnéithe fíor-riachtanacha Reachtanna AnaEE-ERIC san Iarscríbhinn a ghabhann leis an gCinneadh Cur Chun Feidhme seo.
Airteagal 2
Dírítear an Cinneadh seo chuig Ríocht na Beilge, Poblacht na Bulgáire, Poblacht na Seice, Ríocht na Danmhairge, Poblacht na Fraince, Poblacht na hIodáile agus Poblacht na Fionlainne.
Arna dhéanamh sa Bhruiséil, 22 Feabhra 2022.
Thar ceann an Choimisiúin
Mariya GABRIEL
Comhalta den Choimisiún
(1) IO L 206, 8.8.2009, lch. 1.
(2) Cinneadh Uimh. 72/2015 ó Chomhchoiste LEE an 20 Márta 2015 lena leasaítear Prótacal 31 a ghabhann le Comhaontú LEE, maidir le comhar i réimsí ar leith lasmuigh de na ceithre shaoirse (IO L 129, 19.5.2016, lch. 85)
IARSCRÍBHINN
GNÉITHE FÍOR-RIACHTANACHA REACHTANNA AnaEE-ERIC
Airteagal 1
Ainm
Bunófar Cuibhreannas don Bhonneagar Taighde Eorpach (ERIC) dáilte dá ngairtear “an Anailís agus an Tástáil ar Éiceachórais ERIC” (AnaEE-ERIC). Cuibhreannas don Bhonneagar Taighde Eorpach (ERIC) a bunaíodh faoi fhorálacha Rialachán (CE) Uimh. 723/2009 a bheidh sa Chuibhreannas seo.
Airteagal 2
Oifig chláraithe
Is in Gif-sur-Yvette na Fraince, a bheidh oifig chláraithe AnaEE-ERIC.
Airteagal 3
Cúram agus gníomhaíochtaí
1. Is é príomhchúram AnaEE-ERIC, Bonneagar Taighde dáilte a bheidh dírithe ar an Anailís agus an Tástáil ar Éiceachórais a bhunú agus a oibriú. Is é an sprioc atá aige na huirlisí, na seirbhísí agus an t-eolas is gá a sholáthar chun aghaidh a thabhairt ar na dúshláin chasta dhomhanda chomhshaoil agus aeráide atá roimh shochaithe daonna.
2. Oibreoidh AnaEE-ERIC leis an Mol Lárnach (CH), an Lárionad Comhéadain agus Sintéise (ISC), an Lárionad Teicneolaíochta (TC) agus an Lárionad um Shamhaltú Sonraí (DMC).
3. Chun críocha mhír 1, déanfaidh AnaEE-ERIC:
|
a. |
rochtain ar na hArdáin Náisiúnta thurgnamhacha, anailíseacha agus samhaltaithe a chomhordú agus an comhar le saoráidí Eorpacha a eagrú; |
|
b. |
cláir agus tionscadail Eorpacha um thaighde a éascú; |
|
c. |
teicneolaíocht a fhorbairt, modhanna a chomhchuibhiú, comhpháirtíochtaí tionsclaíocha a thógáil agus aistriú eolais a éascú; |
|
d. |
rannchuidiú le malartú eolais agus/nó inniúlachtaí laistigh den Limistéar Eorpach Taighde (LET) agus rannchuidiú le húsáid na hacmhainneachta intleachta ar fud na hEorpa a mhéadú; |
|
e. |
rochtain ar shonraí, comhroinnt sonraí agus samhaltú sonraí a fhorbairt; |
|
f. |
oiliúint a eagrú; |
|
g. |
straitéis cumarsáide a chur chun feidhme; |
|
h. |
aon ghníomhaíocht ghaolmhar eile is gá chun a chuid aidhmeanna a bhaint amach. |
4. Saothróidh AnaEE-ERIC a phríomhchúram ar bhonn neamheacnamaíoch. Féadfaidh AnaEE-ERIC gníomhaíochtaí eacnamaíocha teoranta a dhéanamh ar choinníoll go bhfuil dlúthbhaint acu leis na príomhchúraimí a leagtar amach in Airteagal 3(3) thuas agus nach gcuireann siad gnóthú na gcúraimí sin i gcontúirt.
Airteagal 4
Fad tréimhse agus an nós imeachta maidir le foirceannadh
1. Bunófar AnaEE-ERIC ar feadh tréimhse thosaigh 10 mbliana. Féadfaidh Tionól na gComhaltaí a chinneadh síneadh tréimhsí comhleanúnacha 10 mbliana a chur leis an bhfad.
2. Is é Tionól na gComhaltaí a chinnfidh foirceannadh AnaEE-ERIC i gcomhréir le hAirteagal 18(10) de na Reachtanna.
3. Gan moill mhíchuí agus, in aon chás, laistigh de 10 lá tar éis ghlacadh an chinnidh AnaEE-ERIC a fhoirceannadh, tabharfaidh AnaEE-ERIC fógra don Choimisiún Eorpach faoin gcinneadh.
4. Na sócmhainní a bheidh fágtha tar éis fiacha AnaEE-ERIC a íoc, comhroinnfear ar na Comhaltaí iad i gcomhréir lena ranníocaíocht bhliantúil charntha le AnaEE-ERIC mar a shonraítear in Airteagal 17 de na Reachtanna.
5. Gan moill mhíchuí agus, in aon chás, laistigh de 10 lá ó dhúnadh an nós imeachta foirceanta, tabharfaidh AnaEE-ERIC fógra faoi sin don Choimisiún.
6. Tiocfaidh deireadh le AnaEE-ERIC an lá a fhoilseoidh an Coimisiún Eorpach an fógra iomchuí i sraith L d’Iris Oifigiúil an Aontais Eorpaigh.
Airteagal 5
Córas dliteanais
1. Beidh AnaEE-ERIC faoi dhliteanas i leith a chuid fiach.
2. Maidir le dliteanas airgeadais na gComhaltaí as fiacha AnaEE-ERIC, cibé cineál iad, beidh siad teoranta dá rannchuidiú féin le AnaEE-ERIC i leith na bliana iomláine deiridh d’oibríochtaí.
3. Beidh árachas iomchuí ag AnaEE-ERIC chun rioscaí atá sonrach dá ghníomhaíochtaí a chumhdach.
Airteagal 6
Beartas rochtana d’úsáideoirí
1. Is ar bhonn phrionsabail na rochtana oscailte a sholáthrófar rochtain ar shaoráidí agus ar sheirbhísí AnaEE-ERIC arna soláthar ag an Mol Lárnach nó ag Lárionaid Seirbhíse AnaEE-ERIC. Cuirfidh AnaEE-ERIC rialacha rochtana bonneagair chun feidhme, mar aon le beartas maidir le táillí lena soláthraítear dreasachtaí dá Chomhaltaí.
2. Soláthróidh AnaEE-ERIC faisnéis trína thairseach gréasáin maidir leis na grádáin aeráide agus bhithgheografacha, agus scileanna agus teicnící comhlántacha ardáin AnaEE-ERIC, chun cabhrú le heolaithe ag céim na forbartha tionscadail agus chun goradh tionscadal ina n-úsáidtear roinnt ardán le haghaidh a Chomhaltaí uile a éascú.
3. Deonóidh Mol Lárnach AnaEE-ERIC rochtain ar shaoráidí agus ar sheirbhísí AnaEE-ERIC arna soláthar ag na Lárionaid Seirbhíse nó ag na hArdáin Náisiúnta, bunaithe ar mheasúnú a dhéanfar ar cháilíocht eolaíoch na húsáide atá beartaithe, ar bhonn meastóireacht eolaíoch neamhspleách a dhéanfaidh coiste saineolaithe arna cheapadh ag Tionól na gComhaltaí agus indéantacht theicniúil a ndéanfaidh AnaEE-ERIC measúnú uirthi. Is é an Coiste Comhairleach Eitice Neamhspleách a dhéileálfaidh le ceisteanna eitice a d’fhéadfadh a bheith ann i dtogra (féach Airteagal 25 de na Reachtanna).
4. I gcás nach mór srian a chur le rochtain taighde ar shaoráidí agus ar sheirbhísí AnaEE-ERIC ar chúiseanna acmhainneachta, déanfar rogha de réir an nós imeachta a leagtar amach i Rialacha Oibríochta na Reachtanna, ina mbreithneofar critéir roghnúcháin atá bunaithe ar an sármhaitheas eolaíochta agus ar indéantacht theicniúil agus airgeadais na dtograí.
5. Cuirfidh AnaEE-ERIC ar fáil meiteashonraí gach tionscadail ag an tús, i gcás socruithe turgnamhacha in Ardáin Náisiúnta agus i gcás sonraí a tháirgeann lárionaid seirbhíse araon.
6. Cuirfear sonraí ar fáil de réir bheartas rochtana oscailte AnaEE-ERIC. Rialófar rochtain de réir Rialacha Oibríochta na Reachtanna, lena ngabhfaidh, i gcoitinne, tréimhse chairde choiteann, agus beidh na sonraí ar fáil don phobal ina dhiaidh sin. Cuirfear san áireamh sa bheartas rochtana an creat dlíthiúil Eorpach um chosaint sonraí (1), ar creat é a bhaineann le sonraí pearsanta úsáideoirí a roinnt i measc na gComhaltaí.
Airteagal 7
Beartas um Meastóireacht Eolaíoch
Déanfaidh coiste eolaíoch neamhspleách ad hoc meastóireacht ar ghníomhaíochtaí AnaEE-ERIC gach 5 bliana. Tionscnóidh Tionól na gComhaltaí meastóireacht den sórt sin agus, más iomchuí, tabharfaidh sé treoracha sonracha. I Rialacha Oibríochta na Reachtanna, saineofar prionsabail agus nósanna imeachta na meastóireachta sin.
Airteagal 8
Beartas um Scaipeadh
1. Éascaitheoir i leith taighde a bheidh in AnaEE-ERIC agus spreagfaidh sé, mar riail ghinearálta, an oiread saor-rochtana agus is féidir ar shonraí taighde.
2. Iarrfaidh AnaEE-ERIC ar úsáideoirí a dtorthaí taighde a chur ar fáil go poiblí agus a dtorthaí a chur ar fáil trí AnaEE-ERIC.
3. Úsáidfidh AnaEE-ERIC roinnt bealaí chun a spriocphobal a bhaint amach, lena n-áirítear tairseach ghréasáin, nuachtlitir, ceardlanna, ailt in irisí agus i nuachtáin laethúla, líonraí sóisialta, etc. agus beidh sé i láthair ag comhdhálacha.
Airteagal 9
Beartas um Chearta Maoine Intleachtúla
1. Beidh na cearta maoine intleachtúla uile a chruthóidh AnaEE-ERIC, a eascróidh as AnaEE-ERIC, a gheobhaidh AnaEE-ERIC nó a fhorbróidh AnaEE-ERIC le linn a chuid gníomhaíochtaí, beidh siad faoi úinéireacht AnaEE-ERIC.
2. Faoi réir téarmaí aon chonartha idir AnaEE-ERIC agus Comhaltaí nó Breathnóirí, beidh na cearta maoine intleachtúla uile a chruthóidh Comhalta nó Breathnóir, a eascróidh as Comhalta nó Breathnóir, a gheobhaidh nó a fhorbróidh Comhalta nó Breathnóir, beidh siad faoi úinéireacht an Chomhalta nó an Bhreathnóra sin.
Airteagal 10
Beartas fostaíochta
1. Beidh coinníollacha fostaíochta AnaEE-ERIC á rialú le dlíthe na tíre ina bhfostaítear an fhoireann nó le dlíthe na tíre ina ndéantar gníomhaíochtaí AnaEE-ERIC.
2. Beidh nósanna imeachta roghnúcháin le haghaidh phoist foirne AnaEE-ERIC trédhearcach agus neamh-idirdhealaitheach agus urramófar leo prionsabal an chomhionannais deiseanna. Ní bheidh an earcaíocht agus an fhostaíocht idirdhealaitheach.
3. Déanfar an earcaíocht trí ghlao a fhoilsiú go hidirnáisiúnta.
Airteagal 11
Beartas um sholáthar
1. Caithfidh AnaEE-ERIC le hiarrthóirí agus le táirgeoirí soláthair ar bhonn cothrom agus gan idirdhealú, bíodh siad bunaithe laistigh den Aontas Eorpach nó ná bíodh. Le beartas AnaEE-ERIC um sholáthar urramófar prionsabail na trédhearcachta, na hiomaíochta agus an neamh-idirdhealaithe. I Rialacha Oibríochta na Reachtanna a leagfar amach rialacha mionsonraithe maidir le nósanna imeachta soláthair agus critéir sholáthair.
2. An soláthar a dhéanfaidh Comhaltaí agus Breathnóirí faoi raon feidhme ghníomhaíochtaí AnaEE-ERIC, déanfar é ar bhealach a dtabharfar aird chuí do riachtanais AnaEE-ERIC, do cheanglais theicniúla agus do shonraíochtaí arna n-eisiúint ag na comhlachtaí ábhartha.
(1) Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (An Rialachán Ginearálta maidir le Cosaint Sonraí) (IO L 119, 4.5.2016, lch. 1)