|
1.2.2008 |
MT |
Il-Ġurnal Uffiċjali ta’ l-Unjoni Ewropea |
L 28/12 |
REGOLAMENT TAL-KUMMISSJONI (KE) Nru 93/2008
tal-31 ta’ Jannar 2008
dwar l-irtirar ta' sospensjoni temporanja tar-reġim ta’ bla dazju għas-sena 2008 għall-importazzjoni fil-Komunità ta' ċerti oġġetti li joriġinaw min-Norveġja li jirriżultaw mill-ipproċessar ta' prodotti agrikoli koperti mir-Regolament tal-Kunsill (KE) Nru 3448/93
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament tal-Kunsill (KE) Nru 3448/93 tas-6 ta’ Diċembru 1993 li jistabbilixxi l-arranġamenti kummerċjali applikabbli għal ċerti oġġetti li jirriżultaw mill-ipproċessar ta' prodotti agrikoli (1), u b'mod partikolari l-Artikolu 7(2) tiegħu,
Wara li kkunsidrat id-Deċiżjoni tal-Kunsill 2004/859/KE tal-25 ta’ Ottubru 2004 dwar il-konklużjoni ta' Ftehim fl-għamla ta' Skambju ta' Ittri bejn il-Komunità Ewropea u r-Renju tan-Norveġja fuq il-Protokoll 2 għall-Ftehim bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja (2), u b'mod partikolari l-Artikolu 3 tagħha,
Billi:
|
(1) |
Il-Protokoll 2 għall-Ftehim bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja (3), u l-Protokoll 3 għall-Ftehim taż-ŻEE (4), jiddeterminaw l-arranġamenti kummerċjali għal ċerti prodotti agrikoli u prodotti agrikoli proċessati bejn il-Partijiet Kontraenti. |
|
(2) |
Il-Protokoll 3 għall-Ftehim taż-ŻEE, kif emendat bid-Deċiżjoni Nru 138/2004 tal-Kumitat Konġunt taż-ŻEE (5), jipprovdi għal dazju żero li huwa applikabbli għal ċerti tipi ta’ ilma li fihom zokkor miżjud jew ħlewwa oħra jew togħma, ikklassifikati taħt il-kodiċi NM 2202 10 00 u ċerti xarbiet oħra mhux alkoħoliċi li fihom iz-zokkor, ikklassifikati taħt il-kodiċi NM 2202 90 10 . |
|
(3) |
Id-dazju żero fuq l-ilma u xarbiet oħra kkonċernati ġie sospiż temporanjament għan-Norveġja mill-Ftehim f’għamla ta' Skambju ta' Ittri bejn il-Komunità Ewropea u r-Renju tan-Norveġja dwar il-Protokoll 2 għall-Ftehim bilaterali dwar il-kummerċ ħieles bejn il-Komunità Ekonomika Ewropea u r-Renju tan-Norveġja (6), minn hawn 'il quddiem “il-Ftehim”, approvat mid-Deċiżjoni 2004/859/KE. Skond il-punt IV tal-Minuti Miftehma tal-Ftehim, importazzjonijiet eżenti mid-dazju ta' oġġetti tal-kodiċi NM 2202 10 00 u ex 2202 90 10 li joriġinaw min-Norveġja għandhom – bħala prinċipju - jiġu permessi biss fil-limiti ta' kwota ta eżenzjoni mid-dazju, filwaqt li għandu jitħallas id-dazju fuq importazzjonjiet lil hinn mill-allokazzjoni tal-kwota. |
|
(4) |
Skond statistika pprovduta mill-Kummissjoni, il-kwota annwali għas-sena 2007 għall-prodotti kkonċernati li nfetħet mir-Regolament tal-Kummissjoni (KE) Nru 1798/2006 (7) ma ġietx eżawrita fil-31 ta’ Ottubru 2007. Skond il-Punt IV tal-Minuti Miftehma tal-Ftehim il-prodotti kkonċernati għandhom jingħataw aċċess illimitat bla dazju għall-Komunità mill-1 ta’ Jannar 2008 sal-31 ta’ Diċembru 2008. |
|
(5) |
Għalhekk huwa meħtieġ li tiġi rtirata s-sospensjoni temporanja tar-reġim ta’ bla dazju li ġiet applikata taħt il-Protokoll Nru 2. |
|
(6) |
Il-miżuri pprovduti f’dan ir-Regolament huma skond l-opinjoni tal-Kumitat ta’ Tmexxija għal kwistjonijiet orizzontali li jikkonċernaw il-kummerċ ta’ prodotti proċessati mhux elenkati fl-Anness I għat-Trattat, |
ADOTTAT DAN IR-REGOLAMENT:
Artikolu 1
1. Għall-1 ta’ Jannar sal-31 ta’ Diċembru 2008, is-sospensjoni temporanja tar-reġim ta’ bla dazju li ġiet applikata taħt il-Protokoll Nru 2 għall-ftehim bilaterali dwar il-kummerċ ħieles għal oġġetti kklassifikati taħt il-kodiċi NM 2202 10 00 (ilma, inkluż ilma minerali u ilma bil-gass, li jkun fihom zokkor miżjud jew ħlewwa oħra jew togħma) u ex 2202 90 10 (xarbiet oħra mhux alkoħoliċi li fihom iz-zokkor (sukrożju jew zokkor invertit)) għandha tiġi rtirata.
2. Ir-regoli ta' l-oriġini applikabbli reċiprokament għall-oġġetti msemmija fil-paragrafu 1 għandhom ikunu kif stipulat fi Protokoll 3 għall-Ftehim bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja.
Artikolu 2
Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Għandu jibda japplika mill-1 ta’ Jannar 2008.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 31 ta’ Jannar 2008.
Għall-Kummissjoni
Günter VERHEUGEN
Viċi President
(1) ĠU L 318, 20.12.1993, p. 18. Ir-Regolament kif emendat l-aħħar bir-Regolament (KE) Nru 2580/2000 (ĠU L 298, 25.11.2000, p. 5).
(2) ĠU L 370, 17.12.2004, p. 70.
(3) ĠU L 171, 27.6.1973, p. 1.
(4) ĠU L 22, 24.1.2002, p. 37.
(5) ĠU L 342, 18.11.2004, p. 30.