|
Iris Oifigiúil |
GA Sraith L |
|
2026/1141 |
26.5.2026 |
CINNEADH CUR CHUN FEIDHME (AE) 2026/1141 ÓN gCOIMISIÚN
an 19 Bealtaine 2026
maidir leis an iarraidh ar chlárú an tionscnaimh Eorpaigh ó na saoránaigh dar teideal ‘Cearta don Dúlra: Cumhachtaítear na Saoránaigh chun Ionadaíocht a dhéanamh d’Éiceachórais agus iad a Chosaint’ de bhun Rialachán (AE) 2019/788 ó Pharlaimint na hEorpa agus ón gComhairle
(Is é an téacs Béarla amháin atá barántúil)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2019/788 ó Pharlaimint na hEorpa agus ón gComhairle an 17 Aibreán 2019 maidir leis an tionscnamh Eorpach ó na saoránaigh (1), agus go háirithe Airteagal 6(3) de,
De bharr an mhéid seo a leanas:
|
(1) |
An 27 Márta 2026 rinneadh iarraidh ar chlárú tionscnaimh Eorpaigh ó na saoránaigh dar teideal ‘Cearta don Dúlra: Cumhachtaítear na Saoránaigh chun Ionadaíocht a dhéanamh d’Éiceachórais agus iad a Chosaint’ a chur faoi bhráid an Choimisiúin. |
|
(2) |
Is é is cuspóir an tionscnaimh, mar a chuir na heagraithe in iúl é ‘Cearta an Dúlra a aithint i ndlí na hEorpa trí ghníomh dlí, mar atá treoir nó rialachán, chun cosaint éiceachóras a neartú’. Tá na heagraithe ‘ag féachaint le bogadh ó chaitheamh leis an dúlra mar mhaoin go héiceachórais a aithint mar eintitis bheo a mbaineann luach intreach leo agus a bhfuil cearta bunúsacha acu’ agus cuimsítear ar na cearta sin ‘na cearta chun bheith ann, chun a mbithacmhainní agus a dtimthriallta ríthábhachtacha a athghiniúint, agus chun iad a athbhunú’. Measann na heagraithe ‘[gur] cheart pearsantacht dhlítheanach a thabhairt d’éiceachórais freisin’. Tá sé de chuspóir ag an tionscnamh freisin ‘na saoránaigh agus na pobail a chumhachtú le gníomhú mar mhaoir agus mar ionadaithe éiceachóras, chun dochar a chosc agus chun tacú le cosaint, le hathbhunú agus le hathghiniúint. Dá bhrí sin, ba cheart seasamh dlíthiúil agus bearta dlíthiúla breise a bheith ag na hionadaithe sin agus cearta éiceachóras á gcosaint acu, iad ag cur le sampla Mar Menor sa Spáinn’. In iarscríbhinn a ghabhann leis an tionscnamh, tá tuilleadh sonraí maidir lena chúlra, leis an ábhar atá ann agus leis na cuspóirí a bhaineann leis. |
|
(3) |
Measann an Coimisiún go bhféadfadh sé togra a ghlacadh bunaithe ar Airteagal 192(1) den Chonradh ar Fheidhmiú an Aontais Eorpaigh (CFAE) i ndáil le hAirteagal 191(1) CFAE, le haghaidh gníomh dlí chun cosaint éiceachóras a neartú, lena gcuimsítear na cearta chun bheith ann, chun a mbithacmhainní agus a dtimthriallta ríthábhachtacha a athghiniúint, agus chun iad a athbhunú. Leis an ngníomh sin, d’fhéadfaí pearsantacht dhlítheanach a thabhairt d’éiceachórais agus d’fhéadfaí seasamh a thabhairt do shaoránaigh agus do phobail chun gníomhú thar a gceann. |
|
(4) |
Ar an gcúis sin, measann an Coimisiún nach bhfuil aon chuid den tionscnamh ann ar follas nach dtagann sí faoi chreat chumhachtaí an Choimisiúin togra a thíolacadh le haghaidh gníomh dlí de chuid an Aontais chun na Conarthaí a chur chun feidhme. |
|
(5) |
Is conclúid é sin nach ndéanann difear don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha ba ghá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha. |
|
(6) |
Tá fianaise iomchuí curtha ar fáil ag an ngrúpa d’eagraithe go gcomhlíontar na ceanglais a leagtar síos in Airteagal 5(1) agus (2) de Rialachán (AE) 2019/788, agus go bhfuil na daoine teagmhála ainmnithe aige i gcomhréir le hAirteagal 5(3), an chéad fhomhír, den Rialachán sin. |
|
(7) |
Ní tionscnamh é ar follas é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais mar a leagtar amach in Airteagal 2 den Chonradh ar an Aontas Eorpach iad ná do na cearta a chumhdaítear i gCairt um Chearta Bunúsacha an Aontais Eorpaigh. |
|
(8) |
Dá bhrí sin, ba cheart an tionscnamh dar teideal ‘Cearta don Dúlra: Cumhachtaítear na Saoránaigh chun Ionadaíocht a dhéanamh d’Éiceachórais agus iad a Chosaint’ a chlárú. |
|
(9) |
An chonclúid go gcomhlíontar na coinníollacha maidir le clárú faoi Airteagal 6(3) de Rialachán (AE) 2019/788, ní thugann sí le tuiscint go ndearbhaíonn an Coimisiún ar bhealach ar bith go bhfuil inneachar an tionscnaimh cruinn fíorasach, agus is iad an grúpa d’eagraithe atá i mbun an tionscnaimh, agus iadsan amháin, atá freagrach as an méid sin. Ní chuireann inneachar an tionscnaimh in iúl ach tuairimí an ghrúpa d’eagraithe, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé. |
TAR ÉIS AN CINNEADH SEO A GHLACADH:
Airteagal 1
Clárófar an tionscnamh Eorpach ó na saoránaigh dar teideal ‘Cearta don Dúlra: Cumhachtaítear na Saoránaigh chun Ionadaíocht a dhéanamh d’Éiceachórais agus iad a Chosaint’.
Airteagal 2
Tá an Cinneadh seo dírithe chuig an ngrúpa d’eagraithe atá i mbun an tionscnaimh Eorpaigh ó na saoránaigh dar teideal ‘Cearta don Dúlra: Cumhachtaítear na Saoránaigh chun Ionadaíocht a dhéanamh d’Éiceachórais agus iad a Chosaint’, grúpa a bhfuil Emmanuel SCHLICHTER agus Marine YZQUIERDO ag gníomhú mar theagmhálaithe thar a cheann.
Arna dhéanamh in Strasbourg, an 19 Bealtaine 2026.
Thar ceann an Choimisiúin
Maroš ŠEFČOVIČ
Comhalta den Choimisiún
(1) IO L 130, 17.5.2019, lch. 55, ELI: http://data.europa.eu/eli/reg/2019/788/oj.
ELI: http://data.europa.eu/eli/dec_impl/2026/1141/oj
ISSN 1977-0839 (electronic edition)