<!DOCTYPE html PUBLIC "yes" "xhtml1-strict.dtd">
<html xmlns="http://www.w3.org/1999/xhtml">
<!--GENDOC2XHTML # converter_version: 1.2.11-->
  <head>
    <title>2024-07-202407C104202204250-00-TRA-DOC-MT-ARRET-C-0425-22-202406205-07_00</title>
    <meta content="text/html; charset=utf-8" http-equiv="Content-Type"/>
    <meta content="" name="Gendoc_DGTGeneratedDate"/>
    <meta content="mt-MT" name="Gendoc_Lang"/>
    <meta content="" name="Gendoc_GenerationDate"/>
    <meta content="" name="IsFlattened"/>
    <meta content="1" name="NumProc"/>
    <meta content="Final" name="Gendoc_EditionType"/>
    <meta content="0001" name="Gendoc_CaseNumberSuite"/>
    <meta content="30/07/2024 14:24:43" name="Gendoc_LastVerificationDate"/>
    <meta content="" name="Gendoc_ProcedureNumber"/>
    <meta content="mt" name="Gendoc_LangCode"/>
    <meta content="ARR" name="TypeDoc"/>
    <meta content="Y6F0U8cDgMFKTuwZiKBqkVseTDBN/VsZ28tx/qpuS2WEsJn2rEB4uSUa1yuR43+oTt8/hImEFWyuPskOHCjtfbmmC8tFpCcyCzjoAo5amOc/DYzb5Jq2TqyrfsjQrb4qbsNNL5xtBORId8INexMGHt5YylpcktCjSCb50whVxWM=" name="GenDocUID"/>
    <meta content="P" name="TypeProc"/>
    <meta content="" name="CreateCustomParts"/>
    <meta content="OK" name="ReadyToPublish"/>
    <meta content="stsc" name="Gendoc_User"/>
    <meta content="" name="EP_Mode"/>
    <meta content="" name="Gendoc_DGTGenerated"/>
    <meta content="" name="Gendoc_Vademecum"/>
    <meta content="0425" name="NumeroOrdre"/>
    <meta content="2022" name="Annee"/>
    <meta content="P" name="Gendoc_ProcedureType"/>
    <meta content="" name="EP_Version"/>
    <meta content="MT" name="Langue"/>
    <meta content="stsc" name="Gendoc_DGTGeneratedUser"/>
    <meta content="FAST_document_go_ok" name="Gendoc_LastVerificationStatus"/>
    <meta content="ARR_C" name="Gendoc_GendocTemplateType"/>
    <meta content="TRUE" name="WithoutAuthorBlockFlatP"/>
    <meta content="GenDoc 01-07-24 16:17:54" name="Created"/>
    <meta content="" name="Canevas3_Vademecum"/>
    <meta content="TRUE" name="WithoutAuthorBlock"/>
    <meta content="" name="Gendoc_CaseYear"/>
    <meta content="false" name="Generation_In_Progress"/>
    <meta content="C" name="Juridiction"/>
    <meta content="150b32293eeb465f931a2cb170785573" name="DocumentIdentifier"/>
    <meta content="0425" name="Gendoc_CaseNumber"/>
    <meta content="ImportedWithoutSource" name="SdlIdentifier"/>
    <meta content="RP" name="NatureAff"/>
    <meta content="RP" name="Gendoc_CaseNature"/>
    <meta content="0001" name="NumSuite"/>
    <meta content="C" name="Gendoc_Juridiction"/>
  </head>
  <body>
    <div style="header">
      <div id="rId24" style="first"/>
      <div id="rId20" style="even">Sentenza tal‑4.7.2024 – Kawża C‑425/22</div>
      <div id="rId21" style="default">MOL</div>
    </div>
    <p class="C19Centre" id="para-1" title="page-1">
      SENTENZA TAL‑QORTI TAL‑ĠUSTIZZJA (Il‑Ħames Awla)
    </p>
    <p class="C19Centre" id="para-2" title="page-1">
      4 ta’ Lulju 2024  (<span class="note footnote notemarker">
<a id="c-1" href="#t-1">*</a>
</span>)
    </p>
    <p class="C71Indicateur" id="para-3" title="page-1">
      “Rinviju għal deċiżjoni preliminari – Kooperazzjoni ġudizzjarja f’materji ċivili u kummerċjali – Ġurisdizzjoni tal-qrati, rikonoxximent u eżekuzzjoni tas-sentenzi f’materji ċivili u kummerċjali – Regolament (UE) Nru 1215/2012 – Il-punt 2 tal-Artikolu 7 – Ġurisdizzjoni fil-qasam ta’ delitt jew kważi‑delitt – Post fejn immaterjalizza d-dannu – Akkordju ddikjarat li jmur kontra l-Artikolu 101 TFUE u l-Artikolu 53 tal-Ftehim dwar iż-Żona Ekonomika Ewropea – Kumpanniji sussidjarji stabbiliti fi Stati Membri differenti – Dannu dirett imġarrab esklużivament mill-kumpanniji sussidjarji – Azzjoni għad-danni tal-kumpannija omm – Kunċett ta’ ‘unità ekonomika’”
    </p>
    <p class="C02AlineaAltA" id="para-4" title="page-1">
      Fil-Kawża C‑425/22,
    </p>
    <p class="C02AlineaAltA" id="para-5" title="page-1">
      li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Kúria (il-Qorti Suprema, l-Ungerija), permezz ta’ deċiżjoni tas‑7 ta’ Ġunju 2022, li waslet fil-Qorti tal-Ġustizzja fit‑28 ta’ Ġunju 2022, fil-proċedura
    </p>
    <p class="C02AlineaAltA" id="para-6" title="page-1">
      MOL Magyar Olaj- és Gázipari Nyrt.
    </p>
    <p class="C02AlineaAltA" id="para-7" title="page-1">
      vs
    </p>
    <p class="C02AlineaAltA" id="para-8" title="page-1">
      Mercedes-Benz Group AG,
    </p>
    <p class="C19Centre" id="para-9" title="page-1">
      IL‑QORTI TAL‑ĠUSTIZZJA (Il‑Ħames Awla),
    </p>
    <p class="C02AlineaAltA" id="para-10" title="page-1">
      komposta minn E. Regan, President tal-Awla, K. Lenaerts, President tal-Qorti tal-Ġustizzja, li qiegħed jaġixxi bħala Mħallef tal-Ħames Awla, M. Ilešič (Relatur), I. Jarukaitis u D. Gratsias, Imħallfin,
    </p>
    <p class="C02AlineaAltA" id="para-11" title="page-1">
      Avukat Ġenerali: N. Emiliou,
    </p>
    <p class="C02AlineaAltA" id="para-12" title="page-1">
      Reġistratur: A. Calot Escobar,
    </p>
    <p class="C02AlineaAltA" id="para-13" title="page-1">
      wara li rat il-proċedura bil-miktub,
    </p>
    <p class="C02AlineaAltA" id="para-14" title="page-1">
      wara li kkunsidrat l-osservazzjonijiet ippreżentati: 
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">–</p>
</td>
<td valign="top">
<p class="normal">għal MOL Magyar Olaj- és Gázipari Nyrt., minn G. Kutai, D. Petrányi u M. Sz. Szendrő, ügyvédek, </p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">–</p>
</td>
<td valign="top">
<p class="normal">għal Mercedes‑Benz Group AG, minn K. Hetényi, M. Kovács u A. Turi, ügyvédek, M. Kocí u C. von Köckritz, Rechtsanwälte,</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">–</p>
</td>
<td valign="top">
<p class="normal">għall-Gvern Ċek, minn M. Smolek, A. Edelmannová u J. Vláčil, bħala aġenti,</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">–</p>
</td>
<td valign="top">
<p class="normal">għall-Kummissjoni Ewropea, minn V. Bottka, G. Meessen u S. Noë, bħala aġenti,</p>
</td>
</tr>
</table>
    <p class="C02AlineaAltA" id="para-19" title="page-1">
      wara li semgħet il-konklużjonijiet tal-Avukat Ġenerali, ippreżentati fis-seduta tat‑8 ta’ Frar 2024,
    </p>
    <p class="C02AlineaAltA" id="para-20" title="page-1">
      tagħti l-preżenti
    </p>
    <p class="C75Debutdesmotifs" id="para-21" title="page-1">
      Sentenza
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">1</p>
</td>
<td valign="top">
<p class="normal">It-talba għal deċiżjoni preliminari tirrigwarda l-interpretazzjoni tal-punt 2 tal-Artikolu 7 tar-Regolament (UE) Nru 1215/2012 tal-Parlament Ewropew u tal-Kunsill tat‑12 ta’ Diċembru 2012 dwar il-ġurisdizzjoni u r-rikonoxximent u l-eżekuzzjoni ta’ sentenzi fi kwistjonijiet ċivili u kummerċjali (ĠU 2012, L 351, p. 1).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">2</p>
</td>
<td valign="top">
<p class="normal">Din it-talba tressqet fil-kuntest ta’ tilwima bejn MOL Magyar Olaj‑ és Gázipari Nyrt. (iktar ’il quddiem “MOL”) u Mercedes‑Benz Group AG, dwar talba għal kumpens imressqa minn MOL għad-dannu li hija tqis li ġarrbet minħabba prattiki antikompetittivi ta’ Mercedes‑Benz Group imwettqa bi ksur tal-Artikolu 101 TFUE u tal-Artikolu 53 tal-Ftehim taż-Żona Ekonomika Ewropea tat‑2 ta’ Mejju 1992 (ĠU Edizzjoni Speċjali bil-Malti, Kapitolu 11, Vol. 52, p. 3, iktar ’il quddiem il-“Ftehim ŻEE”).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Il‑kuntest ġuridiku</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Ir‑Regolament (KE) Nru 864/2007</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">3</p>
</td>
<td valign="top">
<p class="normal">Il-premessa 7 tar-Regolament (KE) Nru 864/2007 tal-Parlament Ewropew u tal-Kunsill tal‑11 ta’ Lulju 2007 dwar il-liġi applikabbli għall-obbligazzjonijiet mhux kuntrattwali (“Ruma II”) (ĠU 2007, L 199, p. 40) hija fformulata bil-mod kif ġej:</p>
</td>
</tr>
</table>
    <p class="C02AlineaAltA" id="para-27" title="page-2">
      “Il-kamp sostantiv u d-dispożizzjonijiet ta’ dan ir-Regolament għandhom ikunu konsistenti mar-[Regolament 1215/2012] u l-istrumenti relattivi għal-liġi applikabbli għall-obbligazzjonijiet kuntrattwali.”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">4</p>
</td>
<td valign="top">
<p class="normal">L-Artikolu 6(3)(a) ta’ dan ir-regolament, intitolat “Kompetizzjoni żleali u atti li jirrestrinġu l-kompetizzjoni libera”, jipprovdi:</p>
</td>
</tr>
</table>
    <p class="C02AlineaAltA" id="para-29" title="page-2">
      “Il-liġi applikabbli għal obbligazzjoni mhux kuntrattwali li tirriżulta minn restrizzjoni ta’ kompetizzjoni għandha tkun il-liġi tal-pajjiż fejn is-suq ikun, jew probabbilment ikun, milqut.”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Ir‑Regolament (KE) Nru 1215/2012</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">5</p>
</td>
<td valign="top">
<p class="normal">Il-premessi 15 u 16 tar-Regolament Nru 1215/2012 jiddikjaraw:</p>
</td>
</tr>
</table>
    <p class="C09Marge0avecretrait" id="para-32" title="page-2">
      “(15) Ir-regoli ta’ ġurisdizzjoni għandhom ikunu prevedibbli ħafna u stabbiliti fuq il-prinċipju li l-ġurisdizzjoni hija ġeneralment ibbażata fuq id-domiċilju tal-konvenut. Il-ġurisdizzjoni għandha dejjem tkun disponibbli fuq il-bażi ta’ din ir-raġuni ħlief għal ftit sitwazzjonijiet definiti sewwa li fihom is-suġġett tat-tilwima jew ta’ awtonomija tal-partijiet ikunu jeħtieġu fattur ta’ konnessjoni differenti. Id-domiċilju ta’ persuna ġuridika għandu jiġi definit b’awtonomija u b’hekk jagħmel ir-regoli komuni aktar trasparenti u jevita kunflitti ta’ ġurisdizzjoni.
    </p>
    <p class="C09Marge0avecretrait" id="para-33" title="page-2">
      (16) Barra d-domiċilju tal-konvenut, għandu jkun hemm raġunijiet alternattivi ta’ ġurisdizzjoni bbażati fuq konnessjoni mill-qrib bejn il-qorti u l-azzjoni jew sabiex tkun iffaċilitata l-amministrazzjoni tajba tal-ġustizzja. L-eżistenza ta’ konnessjoni mill-qrib għandha tiżgura ċ-ċertezza legali u tevita l-possibbiltà li l-konvenut jiġi mħarrek f’qorti ta’ Stat Membru li dan il-konvenut ma setax raġonevolment jipprevedi. Dan hu importanti b’mod partikolari fir-rigward ta’ tilwim li jirriżulta minn obbligi mhux kuntrattwali li jirriżultaw minn ksur tal-privatezza u tad-drittijiet relatati mal-personalità, inkluża l-malafama.”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">6</p>
</td>
<td valign="top">
<p class="normal">Skont l-Artikolu 4(1) ta’ dan ir-regolament:</p>
</td>
</tr>
</table>
    <p class="C02AlineaAltA" id="para-35" title="page-2">
      “Soġġetti għal dan ir-Regolament, persuni b’domiċilju fi Stat Membru għandhom, independentament min-nazzjonalità tagħhom, jitressqu quddiem il-qrati ta’ dak l-Istat Membru.”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">7</p>
</td>
<td valign="top">
<p class="normal">L-Artikolu 5(1) tal-imsemmi regolament jipprevedi:</p>
</td>
</tr>
</table>
    <p class="C02AlineaAltA" id="para-37" title="page-2">
      “Persuni domiċiljati fi Stat Membru jistgħu jitressqu quddiem il-qrati ta’ Stat Membru ieħor biss bis-saħħa tar-regoli mniżżla fit-Taqsimiet 2 sa 7 [tal-Kapitolu 2].”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">8</p>
</td>
<td valign="top">
<p class="normal"> Il-Kapitolu II tar-Regolament Nru 1215/2012, intitolat “Ġurisdizzjoni”, jinkludi, b’mod partikolari, it-Taqsima 2, intitolata “Ġurisdizzjoni speċjali”. Il-punt 2 tal-Artikolu 7 ta’ dan ir-regolament, li jinsab f’din it-Taqsima 2, huwa fformulat kif ġej:</p>
</td>
</tr>
</table>
    <p class="C02AlineaAltA" id="para-39" title="page-3">
      “Persuna domiċiljata fi Stat Membru tista’ tiġi mħarrka fi Stat Membru ieħor:
    </p>
    <p class="C02AlineaAltA" id="para-40" title="page-3">
      [...]
    </p>
    <p class="C09Marge0avecretrait" id="para-41" title="page-3">
      (2)  fi kwistjonijiet li għandhom x’jaqsmu ma’ tort, delitt jew kważi delitt, fil-qrati tal-post fejn l-avveniment dannuż jkun twettaq jew jista’ jitwettaq”.
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Il‑kawża prinċipali u d‑domandi preliminari</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">9</p>
</td>
<td valign="top">
<p class="normal">MOL, impriża stabbilita fl-Ungerija, għandha ishma ta’ kontroll f’diversi kumpanniji sussidjarji stabbiliti fi Stati Membri differenti, jiġifieri Moltrans Kft., stabbilita fl-Ungerija, INA d.d., stabbilita fil-Kroazja, Panta Distribuzione SpA u Nelsa Srl, stabbiliti fl-Italja, Roth Energie GmbH, stabbilita fl-Awstrija, kif ukoll Slovnaft a.s., stabbilita fis-Slovakkja. </p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">10</p>
</td>
<td valign="top">
<p class="normal">Fid‑19 ta’ Lulju 2016, il-Kummissjoni Ewropea adottat id-Deċiżjoni C(2016) 4673 final li tirrigwarda proċediment skont l-Artikolu 101 TFUE u l-Artikolu 53 tal-Ftehim ŻEE (Każ AT.39824 – Trakkijiet) (ĠU 2017, C 108, p. 6).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">11</p>
</td>
<td valign="top">
<p class="normal">Permezz ta’ din id-deċiżjoni, il-Kummissjoni kkonstatat l-eżistenza ta’ akkordju li fih ipparteċipaw Mercedes‑Benz Group u ħmistax‑il kostruttur internazzjonali tat-trakkijiet. Hija qieset li dan l-akkordju, li l-għan tiegħu kien li jiġu kkoordinati l-prezzijiet gross (gross list pricing) tat-trakkijiet medji u tqal, kien jikkostitwixxi ksur kontinwu tal-Artikolu 101 TFUE u tal-Artikolu 53 tal-Ftehim ŻEE, li jipprojbixxu l-akkordji u l-prattiki kummerċjali restrittivi l-oħra. Il-Kummissjoni qieset li dan il-ksur kien dam mis‑17 ta’ Jannar 1997 sat‑18 ta’ Jannar 2011 u kien jestendi għaż-Żona Ekonomika Ewropea kollha.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">12</p>
</td>
<td valign="top">
<p class="normal">Il-kumpanniji sussidjarji ta’ MOL indirettament xtraw, jew ħadu b’leasing, total ta’ 71 trakk mingħand Mercedes‑Benz Group matul il-perijodu tal-imsemmi ksur. </p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">13</p>
</td>
<td valign="top">
<p class="normal">Fl‑14 ta’ Ottubru 2019, MOL ressqet azzjoni għad-danni kontra Mercedes‑Benz Group quddiem il-Fővárosi Törvényszék (il-Qorti tal-Belt ta’ Budapest, l-Ungerija), li insostenn tagħha hija allegat li hija ġarrbet dannu li huwa ugwali għall-ispiża addizzjonali li l-kumpanniji sussidjarji tagħha ħallsu indebitament minħabba l-aġir antikompetittiv issanzjonat mill-Kummissjoni.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">14</p>
</td>
<td valign="top">
<p class="normal">Fil-kuntest ta’ din it-talba, MOL ibbażat ruħha fuq il-kunċett ta’ “unità ekonomika”. Hija invokat għalhekk il-ġurisdizzjoni internazzjonali tal-qrati Ungeriżi abbażi tal-punt 2 tal-Artikolu 7 tar-Regolament Nru 1215/2012, billi sostniet li s-sede tagħha, bħala ċ-ċentru tal-interessi ekonomiċi u finanzjarji tal-grupp, li hija tifforma flimkien mal-kumpanniji sussidjarji tagħha, kien il-post li fih seħħ l-“avveniment dannuż”, fis-sens ta’ din id-dispożizzjoni.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">15</p>
</td>
<td valign="top">
<p class="normal">Mercedes‑Benz Group qajmet eċċezzjoni ta’ nuqqas ta’ ġurisdizzjoni, billi sostniet li l-qorti li quddiemha tressqet il-kawża ma setax ikollha ġurisdizzjoni abbażi tad-dispożizzjoni invokata.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">16</p>
</td>
<td valign="top">
<p class="normal">Il-Fővárosi Törvényszék (il-Qorti tal-Belt ta’ Budapest) laqgħet din l-eċċezzjoni u qieset li r-regola dwar il-ġurisdizzjoni speċjali prevista fil-punt 2 tal-Artikolu 7 tar-Regolament Nru 1215/2012 kellha tiġi interpretata b’mod strett u setgħet tapplika biss kemm‑il darba jkun hemm rabta partikolarment mill-qrib bejn il-qorti li quddiemha titressaq il-kawża u s-suġġett tat-tilwima. F’dan ir-rigward, hija kkonstatat li ma kinitx MOL li kienet ħallset il-prezzijiet miżjuda artifiċjalment iżda l-kumpanniji sussidjarji tagħha stabbiliti fi Stati Membri oħra tal-Unjoni Ewropea, liema kumpanniji sussidjarji ġarrbu ħsara minħabba d-distorsjoni ta’ kompetizzjoni inkwistjoni. Id-dannu mġarrab minn MOL kien, min-naħa tiegħu, ta’ natura purament finanzjarja, ħaġa li ma kinitx tippermetti li s-sede tagħha titqies li tinsab fil-post li fih seħħ il-fatt dannuż, fis-sens tal-punt 2 tal-Artikolu 7 ta’ dan ir-regolament, u ma kinitx biżżejjed sabiex tiġi rrikonoxxuta l-ġurisdizzjoni tal-qorti Ungeriża.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">17</p>
</td>
<td valign="top">
<p class="normal">Id-deċiżjoni ta’ dik il-qorti ġiet ikkonfermata fi stadju ta’ appell mill-Fővárosi Ítélőtábla (il-Qorti tal-Appell Reġjonali tal-Belt ta’ Budapest, l-Ungerija), liema qorti ddikjarat li, skont il-ġurisprudenza tal-Qorti tal-Ġustizzja, it-teorija tal-unità ekonomika tapplika biss sabiex tiġi stabbilita r-responsabbiltà għal ksur tad-dritt tal-kompetizzjoni u li, essenzjalment, il-parti li tkun ġarrbet ħsara ma tistax tinvokaha għall-finijiet tal-allokazzjoni tal-ġurisdizzjoni. Hija tirrileva li, konformement mas-sentenza tal‑21 ta’ Mejju 2015, CDC Hydrogen Peroxide, (C‑352/13, EU:C:2015:335), il-ġurisdizzjoni taħt il-punt 2 tal-Artikolu 7 tal-imsemmi regolament kellha tiġi ddeterminata skont is-sede tal-impriża li tkun ġarrbet ħsara u mhux skont dik tal-kumpannija omm tagħha.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">18</p>
</td>
<td valign="top">
<p class="normal">MOL ippreżentat appell ta’ kassazzjoni quddiem il-Kúria (il-Qorti Suprema, l-Ungerija), li fih talbet lil dik il-qorti tannulla d-digriet mogħti mill-Fővárosi Ítélőtábla (il-Qorti tal-Appell Reġjonali tal-Belt ta’ Budapest) u tkompli l-proċedura quddiem il-qrati preċedentement aditi.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">19</p>
</td>
<td valign="top">
<p class="normal">MOL sostniet, essenzjalment, li t-teorija tal-unità ekonomika hija rilevanti għall-evalwazzjoni tal-ġurisdizzjoni tal-qrati Ungeriżi fil-kawża prinċipali u li, bħala l-unika impriża li teżerċita kontroll fuq il-grupp ta’ impriżi li hija tifforma flimkien mal-kumpanniji sussidjarji tagħha, hija direttament involuta fl-operazzjoni, bi qligħ jew b’telf, ta’ dawn tal-aħħar.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">20</p>
</td>
<td valign="top">
<p class="normal">Mercedes‑Benz Group irrispondiet li r-rikorrenti fil-kawża prinċipali ma kienet xtrat ebda wieħed mit-trakkijiet ikkonċernati mill-akkordju inkwistjoni u li għaldaqstant hija ma kienet sofriet ebda dannu. Barra minn hekk, hija sostniet li t-teorija tal-unità ekonomika ma tapplikax sabiex tiġi ddeterminata l-ġurisdizzjoni tal-qrati Ungeriżi u li tali approċċ ma huwiex ikkorroborat mill-ġurisprudenza tal-Qorti tal-Ġustizzja.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">21</p>
</td>
<td valign="top">
<p class="normal">F’dan ir-rigward, il-qorti tar-rinviju tirrileva li l-ġurisprudenza tal-Qorti tal-Ġustizzja tippermetti lill-vittma ta’ prattika antikompetittiva tressaq azzjoni għad-danni kontra waħda jew l-oħra mill-entitajiet ġuridiċi li jifformaw unità ekonomika. Madankollu, il-Qorti tal-Ġustizzja għadha ma ddeċidietx, fil-kuntest tal-interpretazzjoni tal-punt 2 tal-Artikolu 7 tar-Regolament Nru 1215/2012, dwar jekk it-teorija tal-unità ekonomika tistax tiġi invokata b’mod validu meta din l-unità tkun il-vittma u mhux l-awtur tal-ksur antikompetittiv.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">22</p>
</td>
<td valign="top">
<p class="normal">F’dawn iċ-ċirkustanzi, il-Kúria (il-Qorti Suprema) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:</p>
</td>
</tr>
</table>
    <p class="C09Marge0avecretrait" id="para-57" title="page-5">
      “(1) Meta kumpannija omm tippreżenta azzjoni għal kumpens għad-danni għal aġir antikompetittiv ta’ kumpannija oħra bl-għan li tikseb kumpens għad-dannu li rriżulta minn dan l-aġir esklużivament lis-sussidjarji tagħha, il-ġurisdizzjoni tal-qorti għandha tiġi stabbilita fis-sede tal-kumpannija omm, bħala l-post fejn seħħ l-avveniment dannuż fis-sens tal-punt 2 tal-Artikolu 7 tar-[Regolament 1215/2012]?
    </p>
    <p class="C09Marge0avecretrait" id="para-58" title="page-5">
      (2) Il-fatt li, fil-mument tal-akkwisti differenti li huma s-suġġett tat-tilwima, mhux is-sussidjarji kollha kienu jappartjenu lill-grupp ta’ impriżi tal-kumpannija omm huwa rilevanti fir-rigward tal-applikazzjoni tal-punt 2 tal-Artikolu 7 tar-Regolament [Nru 1215/2012]?”
    </p>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Fuq id‑domandi preliminari</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Fuq l‑ewwel domanda </p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">23</p>
</td>
<td valign="top">
<p class="normal">Permezz tal-ewwel domanda tagħha, il-qorti tar-rinviju qiegħda essenzjalment tistaqsi jekk il-punt 2 tal-Artikolu 7 tar-Regolament Nru 1215/2012 għandux jiġi interpretat fis-sens li l-kunċett ta’ “post fejn l-avveniment dannuż ikun twettaq” ikopri s-sede tal-kumpannija omm li tressaq azzjoni għall-kumpens għad-danni mġarrba esklużivament mill-kumpanniji sussidjarji tagħha minħabba l-aġir antikompetittiv ta’ terz, fis-sens tal-Artikolu 101 TFUE, jekk jiġi allegat li din il-kumpannija omm u dawn il-kumpanniji sussidjarji jagħmlu parti mill-istess unità ekonomika.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">24</p>
</td>
<td valign="top">
<p class="normal">Preliminarjament, għandu jitfakkar li, kif jirriżulta minn ġurisprudenza stabbilita, l-interpretazzjoni ta’ dispożizzjoni tad-dritt tal-Unjoni teħtieġ li jittieħdu inkunsiderazzjoni mhux biss kliemha, iżda wkoll il-kuntest tagħha, kif ukoll l-objettivi u l-għan li l-att li tagħmel parti minnu jfittex li jilħaq (ara, b’mod partikolari, is-sentenza tat‑8 ta’ Frar 2024, Inkreal, C‑566/22, EU:C:2024:123, punt 15).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">25</p>
</td>
<td valign="top">
<p class="normal">Fir-rigward tal-kliem tal-punt 2 tal-Artikolu 7 tar-Regolament Nru 1215/2012, minn din id-dispożizzjoni jirriżulta li, f’materji ta’ delitt jew kważi delitt, persuna ddomiċiljata fit-territorju ta’ Stat Membru wieħed tista’ tiġi mħarrka fi Stat Membru ieħor, quddiem il-qrati tal-“post fejn l-avveniment dannuż jkun twettaq”.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">26</p>
</td>
<td valign="top">
<p class="normal">Il-Qorti tal-Ġustizzja ddeċidiet ripetutament li l-kunċett ta’ “post fejn l-effett tal-ħsara jkun twettaq”, fis-sens tal-punt 3 tal-Artikolu 5 tar-Regolament tal-Kunsill (KE) Nru 44/2001 tat‑22 ta’ Diċembru 2000 dwar ġurisdizzjoni u rikonoxximent u eżekuzzjoni ta’ sentenzi f’materji ċivili u kummerċjali (ĠU Edizzjoni Speċjali bil-Malti, Kapitolu 19, Vol. 4, p. 42), li jikkorrispondi għall-punt 2 tal-Artikolu 7 tar-Regolament Nru 1215/2012, ikopri kemm il-post li fih ikun immaterjalizza d-dannu, kif ukoll dak li fih ikun seħħ l-avveniment li jikkawża dan id-dannu, b’tali mod li l-konvenut jista’ jiġi mħarrek, fuq għażla tar-rikorrent, quddiem il-qorti ta’ wieħed jew l-ieħor minn dawn iż-żewġ postijiet (sentenza tal‑15 ta’ Lulju 2021, Volvo et, C‑30/20, EU:C:2021:604, punt 29, kif ukoll il-ġurisprudenza ċċitata).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">27</p>
</td>
<td valign="top">
<p class="normal">Il-Qorti tal-Ġustizzja diġà kellha l-opportunità tippreċiża fis-sentenza tad‑29 ta’ Lulju 2019, Tibor‑Trans (C‑451/18, EU:C:2019:635, punt 33), liema sentenza kienet tirrigwarda l-istess ksur tar-regoli tal-kompetizzjoni bħal dak inkwistjoni fil-kawża prinċipali, li, f’sitwazzjoni fejn is-suq affettwat mill-aġir antikompetittiv ikun jinsab fl-Istat Membru li fit-territorju tiegħu jkun allegatament seħħ l-allegat dannu, għandu jitqies, għall-finijiet tal-applikazzjoni tal-punt 2 tal-Artikolu 7 tar-Regolament Nru 1215/2012, li dak l-Istat Membru huwa l-post li fih ikun immaterjalizza d-dannu (ara wkoll, f’dan is-sens, is-sentenza tal‑15 ta’ Lulju 2021, Volvo et, C‑30/20, EU:C:2021:604, punt 31).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">28</p>
</td>
<td valign="top">
<p class="normal">Barra minn hekk, il-Qorti tal-Ġustizzja ddeċidiet li l-kunċett ta’ “post fejn l-avveniment dannuż jkun twettaq ” ma jistax jiġi interpretat b’mod wiesa’ tant li jinkludi kull post li fih jistgħu jinħassu l-konsegwenzi dannużi ta’ fatt li jkun diġà kkawża dannu li jkun effettivament seħħ f’post ieħor. Konsegwentement, hija speċifikat li dan il-kunċett ma jistax jiġi interpretat fis-sens li jinkludi l-post li fih il-vittma tallega li sofriet dannu finanzjarju kaġun ta’ dannu inizjali li jkun seħħ, u li hija tkun ġarrbet, fi Stat ieħor (sentenza tad‑29 ta’ Lulju 2019, Tibor‑Trans, C‑451/18, EU:C:2019:635, punt 28 u l-ġurisprudenza ċċitata).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">29</p>
</td>
<td valign="top">
<p class="normal">Il-Qorti tal-Ġustizzja ddeċidiet ukoll li dannu li ma jkunx ħlief il-konsegwenza indiretta tad-dannu mġarrab inizjalment minn persuni oħra li kienu vittmi diretti tad-dannu li jkun seħħ f’post differenti minn dak li fih il-vittma indiretta sussegwentement tkun ġarrbet id-dannu ma jistax jistabbilixxi ġurisdizzjoni taħt l-Artikolu 7(2) tar-Regolament Nru 1215/2012 (ara, f’dan is-sens, is-sentenza tad‑29 ta’ Lulju 2019, Tibor‑Trans, C‑451/18, EU:C:2019:635, punt 29 u l-ġurisprudenza ċċitata).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">30</p>
</td>
<td valign="top">
<p class="normal">Mid-deċiżjoni tar-rinviju jirriżulta li, f’dan il-każ, huma biss il-kumpanniji sussidjarji, stabbiliti fi Stati Membri differenti, li ġarrbu direttament id-dannu allegat minn MOL, jiġifieri l-ispiża addizzjonali mħallsa minħabba l-prezzijiet artifiċjalment għolja applikati għax-xiri jew il-leasing tal‑71 trakk inkwistjoni fil-kawża prinċipali taħt arranġamenti kollużivi li jikkostitwixxu ksur uniku u kontinwu tal-Artikolu 101 TFUE.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">31</p>
</td>
<td valign="top">
<p class="normal">B’hekk, għandu jiġi kkonstatat li għandha ġurisdizzjoni internazzjonali u territorjali, skont il-post li fih ikun seħħ id-dannu inkwistjoni fil-kawża prinċipali, il-qorti li fil-ġurisdizzjoni tagħha l-kumpannija sussidjarja li tallega li ġarrbet ħsara tkun xtrat jew ħadet b’leasing l-oġġetti affettwati mill-imsemmija arranġamenti, jew, fil-każ ta’ xiri jew ta’ leasing minn din il-kumpannija sussidjarja f’diversi postijiet, il-qorti li fil-ġurisdizzjoni tagħha din tal-aħħar ikollha s-sede tagħha.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">32</p>
</td>
<td valign="top">
<p class="normal">Minkejja li MOL ma akkwistatx hija stess tali trakkijiet u lanqas, għaldaqstant, ġarrbet dannu dirett minħabba l-imsemmi ksur, hija qiegħda ssostni li l-kunċett ta’ “post fejn l-avveniment dannuż jkun twettaq” għandu jiġi interpretat fid-dawl tal-kunċett ta’ “unità ekonomika” użat fid-dritt tal-kompetizzjoni.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">33</p>
</td>
<td valign="top">
<p class="normal">F’dan ir-rigward, għandu jiġi nnotat li huwa ġeneralment meqjus li kumpannija omm u l-kumpannija sussidjarja tagħha jifformaw unità ekonomika fejn, essenzjalment, din tal-aħħar tkun suġġetta għal influwenza determinanti eżerċitata mill-kumpannija omm u ma taġixxix b’mod awtonomu (ara, f’dan is-sens, is-sentenzi tas‑27 ta’ April 2017, Akzo Nobel et vs Il‑Kummissjoni, C‑516/15 P, EU:C:2017:314, punti 52 u 53, kif ukoll tas‑6 ta’ Ottubru 2021, Sumal, C‑882/19, EU:C:2021:800, punt 43).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">34</p>
</td>
<td valign="top">
<p class="normal">F’sitwazzjoni bħal din, il-grupp jitqies kollu kemm hu bħala “impriża” li għaliha japplikaw ir-regoli tad-dritt tal-kompetizzjoni li l-membri tal-grupp għandhom, ilkoll kemm huma, josservaw, f’qafas ta’ responsabbiltà in solidum (ara, f’dan is-sens, is-sentenza tas‑6 ta’ Ottubru 2021, Sumal, C‑882/19, EU:C:2021:800, punti 39 sa 44 u l-ġurisprudenza ċċitata).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">35</p>
</td>
<td valign="top">
<p class="normal">F’dan il-każ, MOL qiegħda ssostni li, inkwantu l-ksur tad-dritt tal-kompetizzjoni jiskatta r-responsabbiltà in solidum tal-unità ekonomika kollha kemm hi, l-invers tal-istess prinċipju għandu japplika għal talba għal kumpens għad-dannu li jirriżulta minn ksur tad-dritt tal-kompetizzjoni li jaffettwa lil membru tal-unità ekonomika.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">36</p>
</td>
<td valign="top">
<p class="normal">Fil-fehma tal-MOL, il-kunċett ta’ “unità ekonomika” ma jistax ikollu tifsira differenti skont jekk l-impriża kkonċernata għandhiex il-kwalità ta’ rikorrent jew ta’ konvenut. Konsegwentement, għall-finijiet tal-applikazzjoni tal-punt 2 tal-Artikolu 7 tar-Regolament Nru 1215/2012, il-post tas-sede tal-kumpannija omm għandu jitqies bħala l-“post fejn l-avveniment dannuż jkun twettaq” anki jekk id-dannu dirett ikun ġie esklużivament imġarrab mill-kumpanniji sussidjarji ta’ din il-kumpannija.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">37</p>
</td>
<td valign="top">
<p class="normal">Kif jindika l-Avukat Ġenerali fil-punti 71 sa 73 tal-konklużjonijiet tiegħu, għandu jiġi rrilevat, qabelxejn, li l-argument invokat minn MOL ma huwiex ikkorroborat mill-ġurisprudenza tal-Qorti tal-Ġustizzja. Sussegwentement, dan imur kontra l-prinċipji li fuqhom hija bbażata r-regola ta’ ġurisdizzjoni tal-punt 2 tal-Artikolu 7 tar-Regolament Nru 1215/2012, jiġifieri l-għanijiet ta’ prossimità u ta’ prevedibbiltà tar-regoli ta’ ġurisdizzjoni, u ta’ koerenza bejn il-forum u l-liġi applikabbli. Fl-aħħar nett, il-possibbiltà li jintalab kumpens għad-dannu kkawżat minn ksur tad-dritt tal-kompetizzjoni ma għandhiex tiġi ostakolata mill-inapplikabbiltà tat-teorija tal-unità ekonomika għad-determinazzjoni tal-“post fejn l-avveniment dannuż jkun twettaq” għall-finijiet tal-applikazzjoni tal-punt 2 tal-Artikolu 7 tar-Regolament Nru 1215/2012, f’kundizzjonijiet bħal dawk inkwistjoni fil-kawża prinċipali.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">38</p>
</td>
<td valign="top">
<p class="normal">Fir-rigward tal-għanijiet ta’ prossimità u ta’ prevedibbiltà tar-regoli ta’ ġurisdizzjoni, mill-ġurisprudenza tal-Qorti tal-Ġustizzja jirriżulta, minn naħa, li l-qrati tal-Istat Membru li fih ikun jinsab is-suq affettwat huma fl-aħjar pożizzjoni sabiex jistħarrġu tali kawżi għad-danni u, min-naħa l-oħra, operatur ekonomiku li jwettaq aġir antikompetittiv jista’ raġonevolment jistenna li jitressaq quddiem il-qrati tal-post li fih l-aġir tiegħu jkun wettaq distorsjoni tar-regoli ta’ kompetizzjoni b’saħħitha (sentenza tad‑29 ta’ Lulju 2019, Tibor‑Trans, C‑451/18, EU:C:2019:635, punt 34).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">39</p>
</td>
<td valign="top">
<p class="normal">Barra minn hekk, skont il-premessa 15 tar-Regolament Nru 1215/2012, ir-regoli ta’ ġurisdizzjoni għandhom ikunu stabbiliti fuq il-prinċipju li, bis-saħħa tal-Artikolu 4 ta’ dan ir-regolament, il-ġurisdizzjoni hija ġeneralment ibbażata fuq id-domiċilju tal-konvenut.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">40</p>
</td>
<td valign="top">
<p class="normal">Fir-rigward tal-għan ta’ koerenza bejn il-forum u l-liġi applikabbli, il-Qorti tal-Ġustizzja ddeċidiet li jkun ukoll konformi mar-rekwiżiti ta’ koerenza previsti fil-premessa 7 tar-Regolament Nru 864/2007 li kellu wieħed jiddetermina li l-post li fih ikun immaterjalizza d-dannu jinsab fis-suq affettwat, inkwantu, skont l-Artikolu 6(3)(a) ta’ dan ir-regolament, il-liġi applikabbli fil-każ ta’ kawżi għad-danni b’rabta ma’ att li jirrestrinġi l-kompetizzjoni hija dik tal-pajjiż li fih is-suq ikun jew jista’ jkun affettwat (sentenza tal‑15 ta’ Lulju 2021, Volvo et, C‑30/20, EU:C:2021:604, punti 31 u 32, kif ukoll il-ġurisprudenza ċċitata).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">41</p>
</td>
<td valign="top">
<p class="normal">Fir-rigward, barra minn hekk, tal-argument dwar l-ostakolu għall-possibbiltà li jintalab kumpens għad-dannu li jirriżulta minn ksur tad-dritt tal-kompetizzjoni, liema ksur jirriżulta mill-inapplikabbiltà tal-kunċett ta’ “unità ekonomika” għad-determinazzjoni tal-“post fejn l-avveniment dannuż jkun twettaq” għall-finijiet tal-punt 2 tal-Artikolu 7 tar-Regolament Nru 1215/2012, għandu jiġi kkonstatat, bħalma proprju għamel l-Avukat Ġenerali fil-punt 97 tal-konklużjonijiet tiegħu, li r-regoli ta’ ġurisdizzjoni ma jżommux lill-allegati vittmi ta’ aġir antikompetittiv milli jinvokaw id-drittijiet tagħhom għal kumpens.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">42</p>
</td>
<td valign="top">
<p class="normal">Skont ir-regola prinċipali tal-forum li tirriżulta mir-Regolament Nru 1215/2012, huwa dejjem possibbli għall-vittmi ta’ tali ksur li, konformement mal-Artikolu 4(1) ta’ dan ir-regolament, jadixxu lill-qorti tal-post li fih ikun iddomiċiljat l-awtur tar-reat.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">43</p>
</td>
<td valign="top">
<p class="normal">Madankollu, hekk kif tfakkar fil-punt 27 ta’ din is-sentenza, il-punt 2 tal-Artikolu 7 tar-Regolament Nru 1215/2012 jippermetti li, fi ħdan is-suq affettwat minn arranġamenti kollużivi dwar l-iffissar ta’, u ż-żieda fi, il-prezzijiet ta’ oġġetti, wieħed jadixxi jew lill-qorti li fil-ġurisdizzjoni tagħha l-impriża li tallega li ġarrbet ħsara tkun xtrat jew ħadet b’leasing l-oġġetti affettwati mill-imsemmija arranġamenti, jew, fil-każ ta’ xiri jew ta’ leasing minn din l-impriża f’diversi postijiet, lill-qorti li fil-ġurisdizzjoni tagħha din tal-aħħar ikollha s-sede tagħha (ara wkoll, f’dan is-sens, is-sentenza tal‑15 ta’ Lulju 2021, Volvo et, C‑30/20, EU:C:2021:604, punt 43).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">44</p>
</td>
<td valign="top">
<p class="normal">Għaldaqstant, l-għanijiet ta’ prossimità u ta’ prevedibbiltà tar-regoli ta’ ġurisdizzjoni u ta’ koerenza bejn il-forum u l-liġi applikabbli, kif ukoll l-assenza ta’ ostakolu għall-possibbiltà li jintalab kumpens għad-dannu li jirriżulta minn ksur tad-dritt tal-kompetizzjoni li jaffettwa lil membru tal-unità ekonomika, jipprekludu applikazzjoni inversa tal-kunċett ta’ “unità ekonomika” sabiex jiġi ddeterminat il-post li fih ikun seħħ id-dannu għall-finijiet tal-applikazzjoni tal-punt 2 tal-Artikolu 7 tar-Regolament Nru 1215/2012.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">45</p>
</td>
<td valign="top">
<p class="normal">Barra minn hekk, il-Qorti tal-Ġustizzja ddeċidiet li l-għan taċ-ċertezza legali jeħtieġ li l-qorti nazzjonali tkun tista’ faċilment tiddeċiedi dwar il-ġurisdizzjoni tagħha stess, mingħajr ma tkun marbuta li teżamina l-kawża fil-mertu (sentenzi tat‑28 ta’ Jannar 2015, Kolassa, C‑375/13, EU:C:2015:37, punt 61, u tat‑8 ta’ Frar 2024, Inkreal, C‑566/22, EU:C:2024:123, punt 27).</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">46</p>
</td>
<td valign="top">
<p class="normal">Fid-dawl tal-kunsiderazzjonijiet kollha premessi, ir-risposta għall-ewwel domanda għandha tkun li l-punt 2 tal-Artikolu 7 tar-Regolament Nru 1215/2012 għandu jiġi interpretat fis-sens li l-kunċett ta’ “post fejn l-avveniment dannuż jkun twettaq” ma jkoprix is-sede tal-kumpannija omm li tressaq azzjoni għal kumpens għad-danni mġarrba esklużivament mill-kumpanniji sussidjarji tagħha minħabba l-aġir antikompetittiv ta’ terz, li jikkostitwixxi ksur tal-Artikolu 101 TFUE, anki jekk jiġi allegat li din il-kumpannija omm u dawn il-kumpanniji sussidjarji jagħmlu parti mill-istess unità ekonomika.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Fuq it‑tieni domanda</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">47</p>
</td>
<td valign="top">
<p class="normal">Permezz tat-tieni domanda tagħha, il-qorti tar-rinviju qiegħda essenzjalment tistaqsi dwar ir-rilevanza, għall-finijiet tal-applikazzjoni tal-punt 2 tal-Artikolu 7 tar-Regolament Nru 1215/2012, tal-fatt li, fil-mument li fih inxtrat ċerta merkanzija li kienet is-suġġett ta’ ksur tal-Artikolu 101 TFUE, il-kumpanniji sussidjarji kkonċernati kienu għadhom ma kinux ikkontrollati mill-kumpannija omm.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">48</p>
</td>
<td valign="top">
<p class="normal">Għandu jiġi rrilevat li din id-domanda titlaq mill-premessa li l-punt 2 tal-Artikolu 7 tar-Regolament Nru 1215/2012 jista’ jiġi interpretat fis-sens li l-kunċett ta’ “post fejn l-avveniment dannuż jkun twettaq” jista’ jkopri s-sede tal-kumpannija omm li tressaq azzjoni għal kumpens għad-danni diretti mġarrba mill-kumpanniji sussidjarji tagħha minħabba l-aġir antikompetittiv ta’ terz.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">49</p>
</td>
<td valign="top">
<p class="normal">Fid-dawl tar-risposta mogħtija għall-ewwel domanda, ma hemmx lok li tingħata risposta għat-tieni domanda.</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count"/>
</td>
<td valign="top">
<p class="normal">Fuq l‑ispejjeż</p>
</td>
</tr>
</table>
    <table cellpadding="0" cellspacing="0" border="0" width="100%">
<col width="5%"/>
<col width="95%"/>
<tr>
<td valign="top">
<p class="count">50</p>
</td>
<td valign="top">
<p class="normal">Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li għandha tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.</p>
</td>
</tr>
</table>
    <p class="C41DispositifIntroduction" id="para-91" title="page-10">
      Għal dawn il-motivi, Il-Qorti tal-Ġustizzja (Il-Ħames Awla) taqta’ u tiddeċiedi:
    </p>
    <p class="C30Dispositifalinea" id="para-92" title="page-10">
      Il-punt 2 tal-Artikolu 7 tar-Regolament (UE) Nru 1215/2012 tal-Parlament Ewropew u tal-Kunsill tat‑12 ta’ Diċembru 2012 dwar il-ġurisdizzjoni u r-rikonoxximent u l-eżekuzzjoni ta’ sentenzi fi kwistjonijiet ċivili u kummerċjali,
    </p>
    <p class="C30Dispositifalinea" id="para-93" title="page-10">
      għandu jiġi interpretat fis-sens li:
    </p>
    <p class="C30Dispositifalinea" id="para-94" title="page-10">
      il-kunċett ta’ “post fejn l-avveniment dannuż jkun twettaq” ma jkoprix is-sede tal-kumpannija omm li tressaq azzjoni għal kumpens għad-danni mġarrba esklużivament mill-kumpanniji sussidjarji tagħha minħabba l-aġir antikompetittiv ta’ terz, li jikkostitwixxi ksur tal-Artikolu 101 TFUE, anki jekk jiġi allegat li din il-kumpannija omm u dawn il-kumpanniji sussidjarji jagħmlu parti mill-istess unità ekonomika.
    </p>
    <div class="signatures">
<p class="C77Signatures" id="para-95" title="page-10">
<span class="signatory">Firem</span>
</p>
</div>
    <div/>
  <hr class="note"/>
<p class="note footnote">(<span class="note footnote notemarker">
<a id="t-1" href="#c-1">*</a>
</span>) Lingwa tal-kawża: l-Ungeriż.</p>
</body>
</html>
