(1)

Is galar víreasach tromchúiseach, an-tógálach é an galar crúb agus béil a d’fhéadfadh tionchar suntasach eacnamaíoch a imirt ar an earnáil talmhaíochta, agus a d’fhéadfadh leathadh go tapa trí ábhair plandaí éillithe, lena n-áirítear féar tirim agus tuí.

(2)

Is iad féar tirim agus tuí amháin na hábhair plandaí ar ina leith a leagadh síos srianta maidir le coinsíneachtaí díobh a theacht isteach san Aontas i Rialachán (CE) Uimh. 136/2004 ón gCoimisiún (3), a raibh feidhm aige go dtí an 20 Aibreán 2021. Go háirithe, níor ceadaíodh ach coinsíneachtaí d’fhéar tirim agus coinsíneachtaí tuí ó thríú tíortha nó ó thríú críocha a liostaítear in Iarscríbhinn V a ghabhann le Rialachán (CE) Uimh. 136/2004 a theacht isteach san Aontas. Ós rud é go bhfuil an baol ann go scaipfí an galar crúb agus béil trí na hábhair sin, is iomchuí leanúint de shrianta den sórt sin a leagan síos i ndlí an Aontais.

(3)

Leis an gcreat reachtach nua le haghaidh sláinte ainmhithe, a bunaíodh faoi Rialachán (AE) 2016/429, agus a mbeidh feidhm aige ón 21 Aibreán 2021, ba cheart go n-áiritheofaí aistriú rianúil ó na ceanglais a leagtar síos i ngníomhartha de chuid an Aontais atá ann cheana, lena n-áirítear gníomhartha a bhaineann le hábhair plandaí a theacht isteach san Aontas, mar is léir go raibh siad éifeachtach. Dá bhrí sin, ba cheart aidhm agus substaint na rialacha sin a bhí ann cheana a choinneáil sna rialacha a leagtar síos sa Chinneadh seo, go dtí go bhfaighfear tuairim eolaíoch ón Údarás Eorpach Bia (EFSA) lena ndéantar meastóireacht ar na rioscaí do shláinte ainmhithe maidir le galar crúb agus béil agus galair eile de chatagóir A a thabhairt (4) isteach san Aontas, dá dtagraítear in Airteagal 1(1) de Rialachán Cur Chun Feidhme (AE) 2018/1882 ón gCoimisiún trí choinsíneachtaí d’fhéar tirim agus coinsíneachtaí tuí ó thríú tíortha nó ó thríú críocha.

(4)

Dá bhrí sin, is gá liosta a leagan síos sa Chinneadh seo de thríú tíortha nó de thríú críocha óna n-údaraítear do choinsíneachtaí d’fhéar tirim agus coinsíneachtaí tuí a theacht isteach san Aontas. Ba cheart a chur san áireamh i liosta den sórt sin an liosta in Iarscríbhinn V a ghabhann le Rialachán (CE) Uimh. 136/2004, agus an liosta, in Iarscríbhinn II a ghabhann le Rialachán Cur Chun Feidhme (AE) 2021/404 ón gCoimisiún (5), de thríú tíortha nó de thríú críocha, nó de chriosanna díobh, óna n-údaraítear coinsíneachtaí crúbach a theacht isteach san Aontas mar gheall ar a staid fhabhrach sláinte ainmhithe, go háirithe a mhéid a bhaineann le galar crúb agus béil. Ionas nach gcuirfear isteach ar thrádáil agus ar mhaithe le soiléireacht, ba cheart freisin liosta ar leith a bheith ann de thríú tíortha nó de thríú críocha óna n-údaraítear coinsíneachtaí de thuí i bhfoirm millíní le haghaidh a ndó i ngléasra a theacht isteach san Aontas.

(5)

Chun nach mbeidh teagmháil ann idir coinsíneachtaí de thuí i bhfoirm millíní le haghaidh a ndó agus ainmhithe atá soghabhálach i leith galar crúb agus béil, ba cheart dianbhearta maolaithe riosca a leagan síos leis an gCinneadh seo freisin maidir le seachadadh coinsíneachtaí den sórt sin chuig an ngléasra cinn scríbe san Aontas. Ba cheart iad a chur faoin nós imeachta custaim speisialta dá bhforáiltear i bpointe (a) d’Airteagal 210 de Rialachán (AE) Uimh. 952/2013 ó Pharlaimint na hEorpa agus ón gComhairle, agus ba cheart faireachán a dhéanamh ar a n-iompar (6), i gcomhréir le Rialachán (7) Tarmligthe (AE) 2019/1666 ón gCoimisiún, tríd an gcóras bainistithe faisnéise ríomhairithe le haghaidh rialuithe oifigiúla (IMSOC) dá bhforáiltear in Airteagal 131 de Rialachán (AE) 2017/625, agus ba cheart iad a sheachadadh go díreach ón bpost rialaithe teorann iontrála isteach san Aontas chuig an ngléasra cinn scríbe san Aontas, áit a ndófar iad.

(6)

Tá na cóid AC le haghaidh féar tirim agus tuí leagtha síos i gCaibidil 12 den Iarscríbhinn a ghabhann le Rialachán Cur Chun Feidhme (AE) 2021/632 ón gCoimisiún, agus ba cheart, (8) dá bhrí sin, iad a chur san áireamh sa Chinneadh seo.

(7)

Ar mhaithe le simpliú agus le soiléireacht dhlíthiúil, ba cheart Rialachán Cur Chun Feidhme (AE) 2020/2208 ón (9) gCoimisiún lena n-údaraítear faoi láthair coinsíneachtaí d’fhéar tirim agus coinsíneachtaí tuí ón mBreatain Mhór agus ó Spleá na Corónach a allmhairiú isteach san Aontas a aisghairm, agus ba cheart iad a liostú i gCuid 1 den Iarscríbhinn a ghabhann leis an gCinneadh seo.

(8)

Na bearta dá bhforáiltear sa Chinneadh seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,