(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide arb é atá inti ion-1,4-béite-xiolanáis arna táirgeadh le Trichoderma reesei CBS 114044. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide arb é atá inti ion-1,4-béite-xiolanáis arna táirgeadh le Trichoderma reesei CBS 114044 mar bhreiseán beathaithe le haghaidh muca lena ramhrú, béaróg agus mionspeicis éanlaithe clóis, agus iarrtar ann go n-aicmeofaí an breiseán sin i gcatagóir na mbreiseán ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 18 Meán Fómhair 2024 (2) maidir leis an ullmhóid arb é atá inti ion-1,4-béite-xiolanáis arna táirgeadh le Trichoderma reesei CBS 114044, go bhfuil sí sábháilte don spriocspeiceas, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin maidir leis an ullmhóid arb é atá inti ion-1,4-béite-xiolanáis arna táirgeadh le Trichoderma reesei CBS 114044, nach greannaitheoir craicinn í i ngach foirm ach go meastar gur íogróir riospráide í. Maidir le gach foirm leachtach den ullmhóid sin ní greannaitheoirí súl iad agus ní íogróirí deirmeacha iad. Níorbh fhéidir leis an Údarás teacht ar chonclúid i dtaobh an bhféadfadh na foirmeacha soladacha a bheith ina ngreannaitheoirí súl agus ina n-íogróirí deirmeacha. Thairis sin, tháinig an tÚdarás ar an gconclúid go bhféadfadh an ullmhóid arb é atá inti ion-1,4-béite-xiolanáis arna táirgeadh le Trichoderma reesei CBS 114044 a bheith éifeachtúil i muca lena ramhrú ag 20 000 BXU/kg d’ábhar beatha iomlán, i mbéaróga agus i mionspeicis éanlaithe clóis breithe ag 12 000 BXU/kg d’ábhar beatha iomlán agus i mionspeicis éanlaithe clóis seachas éin ubh-bhreithe ag 8 000 BXU/kg d’ábhar beatha iomlán. Níor mheas sé go bhfuil gá le ceanglais shonracha maidir le faireachán iarmhargaidh.

(5)

I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (3), mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí ar ar thángthas i measúnú roimhe seo i ndáil leis an mbreiseán céanna bailí agus infheidhme maidir leis an iarratas atá ann faoi láthair.

(6)

I bhfianaise an mhéid thuas, measann an Coimisiún maidir leis an ullmhóid arb é atá inti ion-1,4-béite-xiolanáis arna táirgeadh le Trichoderma reesei CBS 114044 go gcomhlíonann sí na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh muca lena ramhrú, béaróg agus mionspeicis éanlaithe clóis. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,