(1)

Fid-9 ta' Awwissu 2011, wara investigazzjoni antidumping, il-Kunsill impona permezz tar-Regolament ta' Implimentazzjoni (UE) Nru 791/2011 (2), dazju antidumping definittiv ta' 62,9 % fuq l-importazzjonijiet ta' ċerti drappijiet b'malja miftuħa tal-fibri tal-ħġieġ li joriġinaw mir-Repubblika tal-Poplu taċ-Ċina (“RPĊ”).

(2)

Fl-24 ta' Lulju 2012, wara investigazzjoni kontra ċ-ċirkomvenzjoni skont l-Artikolu 13 tar-Regolament tal-Kunsill (KE) Nru 1225/2009 (3) (“ir-Regolament bażiku”), il-Kunsill estenda permezz tar-Regolament ta' Implimentazzjoni (UE) Nru 672/2012 (4), il-miżuri għal importazzjonijiet ta' ċerti drappijiet b'malja miftuħa tal-fibri tal-ħġieġ ikkunsinjati mill-Malasja, kemm jekk iddikjarati li joriġinaw mill-Malasja kif ukoll jekk le.

(3)

Fis-16 ta' Jannar 2013, wara investigazzjoni kontra ċ-ċirkomvenzjoni skont l-Artikolu 13 tar-Regolament bażiku, il-Kunsill estenda, permezz tar-Regolament ta' Implimentazzjoni (UE) Nru 21/2013 (5), il-miżuri għal importazzjonijiet ta' ċerti drappijiet b'malja miftuħa tal-fibri tal-ħġieġ ikkunsinjati mit-Tajwan u mit-Tajlandja, kemm jekk iddikjarati li joriġinaw mit-Tajwan u t-Tajlandja u kemm jekk le.

(4)

Fl-20 ta' Diċembru 2013, wara investigazzjoni kontra ċ-ċirkomvenzjoni skont l-Artikolu 13 tar-Regolament bażiku, il-Kunsill, permezz tar-Regolament ta' Implimentazzjoni (UE) Nru 1371/2013 (6), estenda l-miżuri għall-importazzjonijiet ta' ċerti drappijiet b'malja miftuħa tal-fibri tal-ħġieġ ikkunsinjati mill-Indja u mill-Indoneżja, kemm jekk iddikjarati li joriġinaw mill-Indja u l-Indoneżja u kemm jekk le u ta eżenzjoni mid-dazju lil Montex Glass Fibre Industries Pvt. Ltd. Skont l-Artikolu 1(3) tar-Regolament ta' Implimentazzjoni (UE) Nru 1371/2013, id-dazji saru dovuti fuq l-importazzjonijiet kollha tal-prodott ikkonċernat (bl-eċċezzjoni ta' dawk prodotti minn Montex Glass Fibre Industries Pvt. Ltd) li preċedentement kienu suġġetti għal reġistrazzjoni skont ir-Regolament tal-Kummissjoni (UE) Nru 322/2013 (7) li fetaħ l-investigazzjoni kontra ċ-ċirkomvenzjoni.

(5)

Fil-21 ta' Jannar 2014, Pyrotek Incorporated, kumpanija mill-Amerika ta' Fuq b'fabbriki jew uffiċċji tal-bejgħ f'diversi pajjiżi, inklużi Stati Membri tal-Unjoni, talbet eżenzjoni mill-miżuri estiżi skont l-Artikolu 11(4) tar-Regolament bażiku fir-rigward ta' Pyrotek India Pvt. Ltd, produttur esportatur mill-Indja.

(6)

Bi tweġiba għal kwestjonarju mibgħut mill-Kummissjoni, Pyrotek India Pvt. Ltd indikat li kienet esportat il-prodott konċernat matul il-perjodu tal-investigazzjoni kontra ċ-ċirkomvenzjoni, ħaġa li wasslet għall-estensjoni tal-miżuri lill-Indja jiġifieri mill-1 ta' April 2012 sal-31 ta' Marzu 2013. Għaldaqstant, Pyrotek India Pvt. Ltd ma ssodisfatx il-kundizzjonijiet stabbiliti fl-Artikolu 11(4) tar-Regolament bażiku. Madankollu, it-talba kien fiha biżżejjed evidenza biex tiġġustifika l-bidu ta' rieżami interim parzjali tal-miżuri kif estiżi lill-Indja skont l-Artikoli 11(3) u 13(4) tar-Regolament bażiku.

(7)

Fit-23 ta' Settembru 2014, il-Kummissjoni bdiet rieżami interim parzjali skont l-Artikoli 11(3) u 13(4) tar-Regolament bażiku. Matul dan ir-rieżami interim parzjali, il-Kummissjoni stabbilixxiet li Pyrotek India Pvt. Ltd kienet produttur ġenwin ta-prodott konċernat billi kienet bdiet il-produzzjoni tagħha f'Awwissu 2011 u ma kinitx involviet ruħha fil-prattiki ta' ċirkomvenzjoni.

(8)

Fl-10 ta' Settembru 2015, wara investigazzjoni skont l-Artikoli 11(3) u 13(4) tar-Regolament bażiku, il-Kummissjoni eżentat permezz tar-Regolament ta' Implimentazzjoni (UE) 2015/1507 (8), lil ċerti produtturi Indjani, inkluża Pyrotek India Pvt. Ltd mill-estensjoni tad-dazju applikabbli għall-importazzjonijiet tal-prodott konċernat ikkunsinjat mill-Indja, kemm jekk iddikjarat li joriġina mill-Indja kif ukoll jekk le. Konsegwentement, Pyrotek India Pvt. Ltd ingħatat eżenzjoni mill-miżuri estiżi għall-esportazzjonijiet lejn l-Unjoni minn dik id-data.

(9)

Fis-6 ta' Novembru 2017, wara rieżami ta' skadenza skont l-Artikolu 11(2) tar-Regolament bażiku, il-Kummissjoni imponiet permezz tar-Regolament ta' Implimentazzjoni (UE) 2017/1993 (9), dazju antidumping definittiv fuq importazzjonijiet ta' ċerti drappijiet b'malja miftuħa tal-fibri tal-ħġieġ li joriġinaw mir-RPĊ kif estiż għal importazzjonijiet ta' ċerti drappijiet b'malja miftuħa tal-fibri tal-ħġieġ ikkunsinjati mill-Indja, l-Indoneżja, il-Malasja, it-Tajwan u t-Tajlandja, kemm jekk iddikjarati bħala li joriġinaw f'dawn il-pajjiżi jew le.

(10)

Kif stipulat fil-premessa(6) ta' hawn fuq, il-Kummissjoni stabbilixxiet li Pyrotek India Pvt. Ltd kienet produttur ġenwin tal-prodott konċernat billi kienet bdiet il-produzzjoni tagħha f'Awwissu 2011 u ma kinitx involviet ruħha fil-prattiki ta' ċirkomvenzjoni. Għalhekk, il-Kummissjoni ddeċidiet li terġa' tiftaħ parzjalment l-investigazzjoni ta' eżenzjoni.

(11)

Fit-18 ta' Mejju 2018, il-Kummissjoni bdiet il-ftuħ mill-ġdid parzjali tal-investigazzjoni ta' eżenzjoni rigward l-importazzjonijiet ta' drappijiet b'malja miftuħa tal-fibri tal-ħġieġ, b'daqs taċ-ċellula ta' aktar minn 1,8 mm kemm fit-tul u kif ukoll fil-wisa' u li jiżnu aktar minn 35 g/m2, mingħajr id-diski tal-fibra tal-ħġieġ, li joriġinaw mir-RPĊ jew ikkonsenjati mill-Indja, sew jekk dikjarati li joriġinaw mill-Indja kif ukoll jekk le, li bħalissa jaqgħu taħt il-kodiċijiet NM ex 7019 51 00 u ex 7019 59 00. Hija ppubblikat Notifika ta' Bidu f'Il-Ġurnal Uffiċjali tal-Unjoni Ewropea (10) (“in-Notifika ta' Bidu”).

(12)

Fin-Notifika ta' Bidu, il-Kummissjoni ddikjarat li l-ftuħ mill-ġdid kien limitat għall-valutazzjoni ta' jekk ikunx xieraq li jiġi estiż l-ambitu temporali tal-eżenzjoni għall-perjodu bejn il-21 ta' Diċembru 2013 u l-10 ta' Settembru 2015.

(13)

Fin-Notifika ta' Bidu, il-Kummissjoni stiednet ukoll lill-partijiet interessati jikkuntattjawha sabiex jipparteċipaw fl-investigazzjoni. Hija speċifikament informat lil Pyrotek India Pvt. Ltd, lill-industrija tal-Unjoni u lil partijiet interessati oħrajn li kien magħruf li kienu kkonċernati dwar il-bidu tal-investigazzjoni ta' eżenzjoni, u stednithom jipparteċipaw.

(14)

Il-partijiet interessati ngħataw l-opportunità li jippreżentaw l-opinjonijiet tagħhom bil-miktub u jitolbu smigħ mal-Kummissjoni u/jew mal-Uffiċjal tas-Seduta fi proċedimenti kummerċjali skont iż-żmien stipulat fin-Notifika ta' Bidu.

(15)

Il-prodott soġġett għal din l-investigazzjoni huwa drappijiet b'malja miftuħa tal-fibri tal-ħġieġ, b'daqs taċ-ċellula ta' aktar minn 1,8 mm kemm fit-tul u kif ukoll fil-wisa' u li jiżnu aktar minn 35 g/m2, mingħajr id-diski tal-fibra tal-ħġieġ, li joriġinaw mir-RPĊ jew ikkonsenjati mill-Indja, kemm jekk iddikjarati li joriġinaw mill-Indja u kemm jekk le, li bħalissa jaqgħu taħt il-kodiċijiet NM ex 7019 51 00 u ex 7019 59 00 (il-kodiċijiet TARIC 7019510014, 7019590014).

(16)

Il-kamp ta' applikazzjoni tal-investigazzjoni huwa limitat għall-valutazzjoni ta' jekk ikunx xieraq li jiġi estiż l-ambitu temporali tal-eżenzjoni għall-perjodu bejn il-21 ta' Diċembru 2013 u l-10 ta' Settembru 2015.

(17)

Pyrotek India Pvt. Ltd hija sussidjarja Indjana tal-grupp multinazzjonali Pyrotek ibbażat fl-Istati Uniti tal-Amerika. Il-grupp Pyrotek huwa fornitur ta' diversi tipi ta' oġġetti ta' konsum u għodod għall-industrija tal-metall u l-aluminju.

(18)

L-applikant jipproduċi l-prodott taħt rieżami fl-impjant Indjan tiegħu f'Chennai u jbigħu lill-kumpaniji relatati tiegħu fl-Unjoni. Il-kumpaniji relatati fl-Unjoni fil-maġġoranza tal-każijiet komplew jipproċessaw il-prodott taħt rieżami u jbigħu l-prodott li jirriżulta lill-konsumaturi aħħarin.

(19)

Wieħed ifakkar li fir-rieżami interim parzjali aktar kmieni (11), il-Kummissjoni kienet stabbiliet li Pyrotek India Pvt. Ltd hija produttur ġenwin tal-prodott ikkonċernat u li ma kinitx involviet ruħha fil-prattiki ta' ċirkomvenzjoni.

(20)

Kif stabbilit fil-premessa (6), Pyrotek India Pvt. Ltd kienet esportat il-prodott ikkonċernat matul il-perjodu tal-investigazzjoni kontra ċ-ċirkomvenzjoni li wassal biex il-miżuri jiġu estiżi għall-Indja, jiġifieri mill-1 ta' April 2012 sal-31 ta' Marzu 2013, u kienet ħallset id-dazji antidumping fuq l-esportazzjonijiet tagħha lejn l-Unjoni skont ir-Regolament ta' Implimentazzjoni (UE) Nru 1371/2013.

(21)

Kif stabbilit fil-premessa (11), fl-10 ta' Settembru 2015, permezz tar-Regolament ta' Implimentazzjoni (UE) 2015/1507, Pyrotek India Pvt. Ltd kisbet eżenzjoni mill-miżuri estiżi għall-esportazzjonijiet lejn l-Unjoni b'seħħ mill-11 ta' Settembru 2015. Madankollu, id-data tal-bidu ta' din l-eżenzjoni ma kinitx tkopri l-perjodu qabel dik id-data, li fih kellhom jitħallsu d-dazji antidumping fuq l-esportazzjonijiet ta' Pyrotek India Pvt. Ltd lill-Unjoni Ewropea.

(22)

Il-Kummissjoni vvalutat is-sitwazzjoni mill-ġdid u kkonkludiet li l-esportazzjonijiet ta' Pyrotek India Pvt. Ltd lill-Unjoni matul il-perjodu mill-21 ta' Diċembru 2013 sal-10 ta' Settembru 2015 jenħtieġ li jiġu esklużi mill-ħlas tad-dazju kontra ċ-ċirkomvenzjoni.

(23)

L-ebda parti interessata ma ppreżentat ruħha sal-iskadenza stabbilita fin-Notifika ta' Bidu. Lanqas ma kien hemm xi parti interessata li għarrfet l-opinjonijiet tagħha bil-miktub jew talbet seduta mal-Kummissjoni jew mal-Uffiċjal tas-Seduta fi proċedimenti kummerċjali.

(24)

Il-Kummissjoni għalhekk ikkunsidrat li jkun xieraq jekk tingħata eżenzjoni lil Pyrotek India Pvt. Ltd. Din l-eżenzjoni jenħtieġ li tapplika għall-perjodu mill-21 ta' Diċembru 2013 sal-10 ta' Settembru 2015 b'konformità mal-Artikolu 11(3) tar-Regolament bażiku.

(25)

Għaldaqstant, jenħtieġ li r-Regolament ta' Implimentazzjoni (UE) Nru 1371/2013 jiġi emendat biex jiġi ċċarat li l-eżenzjonijiet mogħtija lil Montex Glass Fibre Industries Pvt. Ltd u lil Pyrotek India Pvt. Ltd ikunu japplikaw it-tnejn mid-data tad-dħul fis-seħħ tar-Regolament ta' Implimentazzjoni (UE) Nru 1371/2013, jiġifieri mill-21 ta' Diċembru 2013, sad-dħul fis-seħħ tar-Regolament ta' Implimentazzjoni (UE) 2015/1507 fil-11 ta' Settembru 2015. Jenħtieġ li l-Artikolu 1(2) tar-Regolament ta' Implimentazzjoni (UE) Nru 1371/2013 jiġi emendat skont dan.

(26)

Barra minn hekk, wara l-kummenti ppreżentati minn Pyrotek India Pvt. Ltd wara l-iżvelar, il-Kummissjoni qieset li jkun xieraq li tiċċara li jenħtieġ li kull dazju antidumping imħallas għall-prodott ikkonċernat minn Pyrotek India Pvt. Ltd u importat fl-Unjoni waqt il-perjodu ta' reġistrazzjoni tal-oġġetti stabbilit mir-Regolament (UE) Nru 322/2013 ikun eliġibbli wkoll għall-applikazzjoni għal remissjoni jew ripagament.

(27)

Għalhekk, huwa xieraq li jiġi estiż il-perjodu msemmi fl-Artikolu 121(1) tar-Regolament (UE) Nru 952/2013 tal-Parlament Ewropew u tal-Kunsill (12) sal-1 ta' Settembru 2019 sabiex jiġi żgurat li t-taxxa mħallsa indebitament tkun tista' titħallas lura jew tiġi rimessa mill-awtoritajiet doganali nazzjonali f'konformità mal-leġiżlazzjoni doganali applikabbli f'każijiet fejn il-limiti ta' żmien previsti f'dak il-paragrafu ikunu skadew qabel id-data ta' applikazzjoni ta' dan ir-Regolament.

(28)

Il-miżuri previsti f'dan ir-Regolament huma konformi mal-opinjoni tal-Kumitat stabbilit permezz tal-Artikolu 15(1) tar-Regolament (UE) 2016/1036,