(1)

Fid-9 ta’ Ottubru 2023, il-Kunsill adotta d-Deċiżjoni (PESK) 2023/2135 (1).

(2)

Fis-27 ta’ Novembru 2023, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”) ħareġ dikjarazzjoni f’isem l-Unjoni, li fiha l-Unjoni u l-Istati Membri tagħha tennew il-kundanna qawwija tagħhom tal-ġlied kontinwu bejn il-Forzi Armati Sudaniżi (SAF) u l-Forzi ta’ Appoġġ Rapidu (RSF) u l-milizzji affiljati rispettivi tagħhom. Id-dikjarazzjoni ddeplorat ukoll l-eskalazzjoni drammatika tal-vjolenza u d-dannu irreparabbli li sar għall-ħajja tan-nies f’Darfur u fil-pajjiż kollu, kif ukoll il-ksur tal-liġi internazzjonali dwar id-drittijiet tal-bniedem u tal-liġi umanitarja internazzjonali.

(3)

Fit-28 ta’ Ottubru 2025, inħarġet dikjarazzjoni konġunta mir-Rappreżentant Għoli u l-Kummissarju Lahbib dwar is-sekwestru ta’ El Fasher. Id-dikjarazzjoni ssottolinjat li s-sekwestru tal-kapital tad-Darfur mill-RSF immarka punt ta’ bidla perikoluż fil-gwerra u hedded li jkompli jaggrava s-sitwazzjoni umanitarja diġà mwiegħra. Barra minn hekk, id-dikjarazzjoni żiedet li l-fatt li persuni ċivili jinsabu fil-mira abbażi tal-etniċità tagħhom jenfasizza l-brutalità tal-RSF.

(4)

Fl-20 ta’ Novembru 2025, ir-Rappreżentant Għoli ħareġ dikjarazzjoni f’isem l-Unjoni li kkundannat bil-qawwa l-atroċitajiet imwettqa f’El Fasher mill-RSF. Id-dikjarazzjoni enfasizzat ukoll li r-responsabbiltà primarja biex jintemm il-kunflitt hija tat-tmexxija kemm tal-RSF, is-SAF u l-milizzji alleati tagħhom, kif ukoll ta’ dawk li jipprovdulhom appoġġ dirett jew indirett, u ħeġġet lill-partijiet kollha fil-kunflitt biex jerġgħu jibdew in-negozjati biex jinkiseb waqfien mill-ġlied immedjat u dejjiemi.

(5)

Fil-21 ta’ April 2026, ir-Rappreżentant Għoli ħareġ dikjarazzjoni f’isem l-Unjoni tliet snin mill-bidu tal-gwerra fis-Sudan. Id-dikjarazzjoni enfasizzat li l-kunflitt bejn l-SAF, l-RSF u l-milizzji affiljati rispettivi tagħhom qed jeqred il-ħajjiet u jċaħħad lill-popolazzjoni mill-aspirazzjonijiet tagħha tar-rivoluzzjoni fl-2018/19. Id-dikjarazzjoni żiedet li l-Unjoni tuża l-għodod kollha disponibbli, fosthom id-diplomazija u miżuri restrittivi – biex tirsisti għall-paċi, inkluż sanzjonijiet addizzjonali mmirati lejn l-ekonomija tal-gwerra tas-Sudan.

(6)

Fid-dawl tal-gravità tas-sitwazzjoni, huwa xieraq li jiġu introdotti aktar miżuri restrittivi.

(7)

B’mod partikolari, l-estrazzjoni tad-deheb u l-isfruttament tad-deheb huma sorsi ewlenin ta’ introjtu għas-SAF u għall-RSF, li jużaw biex isostnu l-kunflitt fis-Sudan.

(8)

Għalhekk, huwa xieraq li jiġi pprojbit ix-xiri, l-importazzjoni, jew it-trasferiment, direttament jew indirettament, ta’ deheb jekk joriġina mis-Sudan u jkun ġie esportat mis-Sudan lejn l-Unjoni jew lejn kwalunkwe pajjiż terz wara l-15 ta’ Lulju 2026.

(9)

Huwa xieraq ukoll li jiġu pprojbiti l-bejgħ, il-forniment, it-trasferiment jew l-esportazzjoni, direttament jew indirettament, ta’ ċerti oġġetti li jistgħu jintużaw għall-estrazzjoni tad-deheb jew għall-isfruttament tad-deheb, kemm jekk joriġinaw fl-Unjoni kif ukoll jekk le, lil kwalunkwe persuna fiżika jew ġuridika, entità jew korp fis-Sudan jew għall-użu fis-Sudan.

(10)

Biex tkun tista’ ssir it-terminazzjoni ordnata tal-kuntratti rilevanti eżistenti,, huwa xieraq li tiġi prevista eċċezzjoni temporanja għall-projbizzjoni fuq il-bejgħ, il-forniment, it-trasferiment jew l-esportazzjoni ta’ ċerti oġġetti li jistgħu jintużaw għall-estrazzjoni tad-deheb jew għall-isfruttament tad-deheb fis-Sudan.

(11)

Għalhekk, jenħtieġ li d-Deċiżjoni (PESK) 2023/2135 tiġi emendata skont dan.

(12)

Hija meħtieġa aktar azzjoni mill-Unjoni sabiex jiġu implimentati ċerti miżuri,