(1)

Ir-Regolament (UE) 2015/2283 jipprevedi li l-ikel ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Fil-21 ta’ Diċembru 2018, il-kumpanija BK Giulini GmbH, membru ta’ ICL Group(“l-applikant”) ippreżentat applikazzjoni għall-awtorizzazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tintroduċi t-triklorur tal-potassju u tal-manjeżju eżaidrat fis-suq tal-Unjoni bħala ikel ġdid. L-applikant talab li l-ikel ġdid jintuża bħala sostitut għall-melħ fil-ħobż tal-ħmira jew simili, fil-laħam ippreservat nej, fil-laħam ippreservat jew staġjonat imsajjar, fiz-zalzett ippreservat jew parzjalment ippreservat, kif ukoll fil-pizez tal-friża maħsuba għall-popolazzjoni adulta.

(4)

Fil-11 ta’ Settembru 2019, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tat-triklorur tal-potassju u tal-manjeżju eżaidrat bħala ikel ġdid.

(5)

Matul il-valutazzjoni, fid-19 ta’ April 2023, l-applikant għamel talba għall-protezzjoni ta’ studji u data xjentifiċi proprjetarji sottomessi b’appoġġ għall-applikazzjoni, jiġifieri l-proċess tal-produzzjoni (3) u d-data dwar il-kompożizzjoni (4).

(6)

Minħabba l-livell tal-bromur fl-ikel ġdid u minħabba l-ħidma li għaddejja tal-Kumitat Xjentifiku tal-Awtorità dwar ir-riskji għas-saħħa tal-bniedem u tal-annimali mill-preżenza tal-bromur fl-ikel u fl-għalf (5), fit-13 ta’ Settembru 2024 l-Awtorità talbet lill-applikant jirrevedi l-użi u l-livelli tal-użu proposti tal-ikel ġdid. Fis-26 ta’ Novembru 2024, l-applikant qabel li jirrevedi l-użi u l-livelli tal-użu proposti għat-triklorur tal-potassju u tal-manjeżju eżaidrat kif xieraq. B’riżultat ta’ dan, l-ikel il-ġdid huwa maħsub biex jintuża fil-laħam nej ippreservat jew staġjonat, fil-laħam imsajjar ippreservat jew staġjonat, fil-platti bbażati fuq iċ-ċereali u fiz-zalzett ippreservat jew parzjalment ippreservat, maħsuba għall-popolazzjoni adulta.

(7)

Fis-17 ta’ Diċembru 2024, l-Awtorità adottat l-opinjoni xjentifika tagħha dwar is-sikurezza tal-melħ minerali li fih il-potassju u l-manjeżju bħala ikel ġdid skont l-Artikolu 10 tar-Regolament (UE) 2015/2283 (6) f’konformità mal-Artikolu 11 tar-Regolament (UE) 2015/2283.

(8)

Fl-opinjoni xjentifika tagħha, l-Awtorità kkonkludiet li t-triklorur tal-potassju u tal-manjeżju eżaidrat huwa sikur fil-kundizzjonijiet tal-użu proposti. Għalhekk, l-opinjoni xjentifika tal-Awtorità tagħti biżżejjed raġunijiet biex jiġi stabbilit li t-triklorur tal-potassju u tal-manjeżju eżaidrat, meta jintuża fil-kundizzjonijiet tal-użu proposti, jissodisfa l-kundizzjonijiet għall-introduzzjoni tiegħu fis-suq f’konformità mal-Artikolu 12(1) tar-Regolament (UE) 2015/2283.

(9)

F’dik l-opinjoni, l-Awtorità nnotat ukoll li l-konsum addizzjonali tal-manjeżju u tal-potassju mill-ikel ġdid ma jirrappreżentax tħassib għas-sikurezza tal-popolazzjoni ġenerali. Madankollu, meta jitqies li ikel li jkun fih l-ikel ġdid jista’ jispiċċa b’ammont ta’ manjeżju u/jew potassju li jitqies sinifikanti skont il-Punt 2 tal-Parti A tal-Anness XIII tar-Regolament (UE) Nru 1169/2011 tal-Parlament Ewropew u tal-Kunsill (7), il-Kummissjoni tqis li huwa xieraq li l-konsumaturi jiġu infurmati dwar dak il-fatt. F’każijiet bħal dawn, id-dikjarazzjoni dwar in-nutrizzjoni għandu jkun fiha l-ammont ta’ potassju u/jew ta’ manjeżju.

(10)

Fl-opinjoni xjentifika tagħha, l-Awtorità nnotat ukoll li l-konklużjoni tagħha dwar is-sikurezza tal-ikel ġdid kienet ibbażata fuq studji u data xjentifiċi proprjetarji mressqa b’appoġġ għall-applikazzjoni, jiġifieri fuq data li tikkonċerna l-proċess tal-produzzjoni u d-data dwar il-kompożizzjoni, li mingħajrha ma setgħetx tivvaluta l-ikel ġdid u tasal għall-konklużjoni tagħha.

(11)

Il-Kummissjoni talbet lill-applikant jiċċara aktar il-ġustifikazzjoni pprovduta fir-rigward tal-pretensjoni proprjetarja tiegħu fuq dawk l-istudji u d-data xjentifiċi proprjetarji u biex jiċċara l-pretensjoni tiegħu għal dritt esklużiv ta’ referenza għalihom f’konformità mal-Artikolu 26(2), il-punt (b), tar-Regolament (UE) 2015/2283.

(12)

L-applikant iddikjara li fil-waqt meta ssottometta l-applikazzjoni huwa kellu d-drittijiet proprjetarji u esklużivi ta’ referenza għal dawk l-istudji u d-data xjentifiċi proprjetarji, u li l-partijiet terzi ma jistgħux jaċċessaw, jużaw jew jirreferu legalment għal dik id-data u dawk l-istudji.

(13)

Il-Kummissjoni vvalutat l-informazzjoni kollha pprovduta mill-applikant u qieset li dan kien wera biżżejjed provi li kien issodisfa r-rekwiżiti stabbiliti fl-Artikolu 26(2) tar-Regolament (UE) 2015/2283. Għalhekk, jenħtieġ li dawk l-istudji u d-data xjentifiċi proprjetarji jkunu protetti f’konformità mal-Artikolu 27(1) tar-Regolament (UE) 2015/2283. Għaldaqstant, jenħtieġ li l-applikant biss ikun awtorizzat jintroduċi t-triklorur tal-potassju u tal-manjeżju eżaidrat fis-suq tal-Unjoni matul perjodu ta’ ħames snin mid-dħul fis-seħħ ta’ dan ir-Regolament.

(14)

Madankollu, ir-restrizzjoni tal-awtorizzazzjoni tat-triklorur tal-potassju u tal-manjeżju eżaidrat u tar-referenza għall-istudji u għad-data xjentifiċi fil-fajl tal-applikant għall-użu tiegħu biss, ma twaqqafx lil applikanti sussegwenti milli japplikaw għal awtorizzazzjoni għall-introduzzjoni fis-suq tal-istess ikel ġdid, dment li l-applikazzjoni tagħhom tissejjes fuq informazzjoni miksuba legalment li tappoġġa t-tali awtorizzazzjoni.

(15)

Jixraq li l-inklużjoni tat-triklorur tal-potassju u tal-manjeżju eżaidrat bħala ikel ġdid fil-lista tal-Unjoni tal-ikel ġdid ikun fiha l-informazzjoni msemmija fl-Artikolu 9(3) tar-Regolament (UE) 2015/2283.

(16)

It-triklorur tal-potassju u tal-manjeżju eżaidrat jenħtieġ li jiġi inkluż fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(17)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,