(1)

Foráiltear le Rialachán (AE) 2015/2283 nach bhféadfar ach bianna núíosacha a údaraítear agus a áirítear ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 21 Nollaig 2018 chuir an chuideachta BK Giulini GmbH, comhalta de ICL Group, (‘an t-iarratasóir’) iarratas ar údarú faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 chun heicsihiodráit tríchlóiríde mhaignéisiam photaisiam a chur ar mhargadh an Aontais mar bhia núíosach. D’iarr an t-iarratasóir go n-úsáidfí an bia núíosach mar shubstaint ionadach do shalann in arán a bhfuil deasca curtha leis nó feoil amhleasaithe, feoil leasaithe chócaráilte nó bhlaistithe, ispíní leasaithe nó leasaithe go páirteach, agus béilí píotsa domhainreoite atá beartaithe do dhaoine fásta freisin.

(4)

An 11 Meán Fómhair 2019, d’iarr an Coimisiún ar an Údarás Eorpach um Shábháilteacht Bia (‘an tÚdarás’) measúnú a dhéanamh ar heicsihiodráit tríchlóiríde mhaignéisiam photaisiam mar bhia núíosach.

(5)

Le linn an mheasúnaithe, an 19 Aibreán 2023, chuir an t-iarratasóir iarraidh isteach ar chosaint an staidéir eolaíoch dhílsithe agus na sonraí eolaíocha dílsithe arna gcur isteach mar thaca leis an iarratas, is iad sin staidéar agus sonraí maidir leis an bpróiseas táirgthe (3) agus sonraí comhdhéanaimh (4).

(6)

Mar gheall ar an leibhéal bróimíde sa bhia núíosach agus i bhfianaise obair leanúnach Choiste Eolaíoch an Údaráis maidir leis na rioscaí do shláinte an duine agus do shláinte ainmhithe de bharr bróimíd a bheith i mbia agus i mbeatha (5), d’iarr an tÚdarás ar an iarratasóir, an 13 Meán Fómhair 2024, athbhreithniú a dhéanamh ar úsáidí agus leibhéil úsáide an bhia núíosaigh atá beartaithe. An 26 Samhain 2024, chomhaontaigh an t-iarratasóir athbhreithniú a dhéanamh dá réir sin ar na húsáidí atá beartaithe agus ar na leibhéil úsáide le haghaidh heicsihiodráit tríchlóiríde mhaignéisiam photaisiam. Mar thoradh air sin, tá sé beartaithe an bia núíosach a úsáid i bhfeoil amhleasaithe nó bhlaistithe, i bhfeoil chócaráilte leasaithe nó bhlaistithe, i mbéilí gránachbhunaithe agus in ispíní leasaithe nó leasaithe go páirteach, atá beartaithe don phobal fásta.

(7)

An 17 Nollaig 2024 ghlac an tÚdarás a thuairim eolaíoch dar teideal ‘safety of mineral salt containing potassium and magnesium as a novel food pursuant to Article 10 of Regulation (EU) 2015/2283’ [sábháilteacht salainn mhianraigh a bhfuil potaisiam agus maignéisiam ann mar bhia núíosach de bhun Rialachán (AE) 2015/2283] (6) i gcomhréir le hAirteagal 11 de Rialachán (AE) 2015/2283.

(8)

Sa tuairim eolaíoch uaidh, tháinig an tÚdarás ar an gconclúid go bhfuil heicsihiodráit tríchlóiríde mhaignéisiam photaisiam sábháilte faoi na coinníollacha úsáide atá beartaithe. Dá bhrí sin, is leor na forais sa tuairim eolaíoch ón Údarás chun a shuí go gcomhlíonann heicsihiodráit tríchlóiríde mhaignéisiam photaisiam na coinníollacha maidir lena cur ar an margadh i gcomhréir le hAirteagal 12(1) de Rialachán (AE) 2015/2283, nuair a úsáidtear í faoi na coinníollacha úsáide atá beartaithe.

(9)

Sa tuairim sin, thug an tÚdarás dá aire freisin nach ábhar imní sábháilteachta don phobal i gcoitinne í an iontógáil bhreise mhaignéisiam agus photaisiam ón mbia núíosach. Mar sin féin, os rud é go bhféadfadh méid maignéisiam agus/nó potaisiam a mheastar a bheith mór de réir Phointe 2 de Chuid A d’Iarscríbhinn XIII a ghabhann le Rialachán (AE) Uimh. 1169/2011 ó Pharlaimint na hEorpa agus ón gComhairle (7) a bheith sna bianna ina bhfuil an bia núíosach, is iomchuí tomhaltóirí a chur ar an eolas faoi sin. Sna cásanna sin, beidh an méid potaisiam agus/nó maignéisiam sa dearbhú cothúcháin.

(10)

Sa tuairim eolaíoch uaidh, thug an tÚdarás dá aire freisin go raibh a chonclúid i ndáil le sábháilteacht an bhia núíosaigh bunaithe ar staidéar eolaíoch dílsithe agus sonraí eolaíocha dílsithe arna gcur isteach mar thaca leis an iarratas, mar atá sonraí maidir leis an bpróiseas táirgthe agus sonraí comhdhéanaimh, nithe nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(11)

D’iarr an Coimisiún ar an iarratasóir soiléiriú breise a thabhairt maidir leis an údar a soláthraíodh i dtaca lena éileamh dílsithe ar an staidéar eolaíoch dílsithe agus na sonraí eolaíocha dílsithe sin, agus soiléiriú a thabhairt maidir lena éileamh ar cheart eisiach tagartha orthu i gcomhréir le hAirteagal 26(2), pointe (b) de Rialachán (AE) 2015/2283.

(12)

Dhearbhaigh an t-iarratasóir go raibh cearta tagartha dílsithe agus eisiacha acu ar an staidéar eolaíoch agus na sonraí eolaíocha dílsithe sin tráth a chuir siad an t-iarratas isteach, agus dhearbhaigh siad nach féidir leis na tríú páirtithe sin rochtain dhlíthiúil a fháil ar na sonraí agus an staidéar sin ná iad a úsáid ná tagairt a dhéanamh dóibh.

(13)

Rinne an Coimisiún measúnú ar an bhfaisnéis uile a sholáthair an t-iarratasóir agus mheas sé go bhfuil bunús leordhóthanach tugtha aige gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, ba cheart an staidéar eolaíoch dílsithe agus na sonraí eolaíocha dílsithe sin a chosaint i gcomhréir le hAirteagal 27(1) de Rialachán (AE) 2015/2283. Dá réir sin, níor cheart ach an t-iarratasóir a údarú chun heicsihiodráit tríchlóiríde mhaignéisiam photaisiam a chur ar an margadh laistigh den Aontas ar feadh tréimhse 5 bliana ó theacht i bhfeidhm an Rialacháin seo.

(14)

Mar sin féin, maidir le húdarú heicsihiodráite tríchlóiríde mhaignéisiam photaisiam agus an tagairt don staidéar agus na sonraí eolaíocha atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh sin iarratas a dhéanamh ar údarú chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(15)

Is iomchuí go mbeadh an fhaisnéis dá dtagraítear in Airteagal 9(3) de Rialachán (AE) 2015/2283 san iontráil a bhaineann le heicsihiodráit tríchlóiríde mhaignéisiam photaisiam mar bhia núíosach ar liosta an Aontais de bhianna núíosacha.

(16)

Ba cheart heicsihiodráit tríchlóiríde mhaignéisiam photaisiam a áireamh i liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,