(1)

Fit-2 ta’ Marzu 2020, il-Greċja nediet talba għall-assistenza skont it-tifsira tal-Artikolu 15 tad-Deċiżjoni 1313/2013/UE tal-Parlament Ewropew u tal-Kunsill (3) wara perjodu ta’ kriżi tal-migrazzjoni.

(2)

Fis-6 ta’ Marzu 2020, bi tweġiba għat-talba tal-Greċja, il-Ministeru tad-Difiża tal-Belġju, bħala organizzazzjoni tal-Istat skont it-tifsira tal-Artikolu 74 tar-Regolament (KE) Nru 1186/2009 u tal-Artikolu 51 tad-Direttiva 2009/132/KE, importa u bagħat lejn il-Greċja tagħmir urġenti ta’ għajnuna u provvisti oħra meħtieġa għad-distribuzzjoni jew it-tqegħid għad-dispożizzjoni għal dawk li jfittxu l-ażil u l-migranti.

(3)

Sakemm tasal in-notifika tad-deċiżjoni tal-Kummissjoni, il-Belġju awtorizza s-sospensjoni tad-dazji fuq l-importazzjoni u tat-taxxa fuq il-valur miżjud (“VAT”) applikabbli għall-oġġetti skont it-tifsira tal-Artikolu 76, it-tieni paragrafu, tar-Regolament (KE) Nru 1186/2009 u tat-tieni paragrafu tal-Artikolu 53 tad-Direttiva 2009/132/KE.

(4)

Fit-23 ta’ Marzu 2020, il-Belġju ressaq talba għal eżenzjoni mid-dazji fuq l-importazzjoni u eżenzjoni mill-VAT fuq oġġetti fornuti lill-Greċja. Il-Belġju pprovda lill-Kummissjoni b’lista dettaljata li tindika n-natura u l-kwantitajiet tal-oġġetti ammessi mingħajr dazji fuq l-importazzjoni u eżentati mill-VAT mibgħuta lill-Greċja.

(5)

It-talba tal-Belġju biex tingħata eżenzjoni mid-dazji fuq l-importazzjoni u eżenzjoni mit-taxxa fuq il-valur miżjud ta’ oġġetti fornuti lill-Greċja tidher li tressqet mill-Istat Membru kkonċernat skont it-tifsira tal-Artikolu 76, l-ewwel paragrafu, tar-Regolament (KE) Nru 1186/2009 u l-Artikolu 53, l-ewwel paragrafu, tad-Direttiva 2009/132/KE, b’kont meħud li t-talba għall-assistenza tnediet mill-Greċja u li l-Belġju wieġeb skont it-tifsira tal-Artikolu15 tad-Deċiżjoni 1313/2013/UE.

(6)

Il-kriżi umanitarja li teħtieġ b’mod urġenti l-assistenza tal-Istati Membri l-oħra sabiex jiġi protett għadd akbar ta’ persuni li jfittxu ażil u migranti matul ix-xitwa u l-isfidi estremi li qed tikkawża, tikkostitwixxi diżastru skont it-tifsira tal-Kapitolu XVII, Taqsima C, tar-Regolament (KE) Nru 1186/2009 u tat-Titolu VIII, Kapitolu 4, tad-Direttiva 2009/132/KE.

(7)

Għalhekk huwa xieraq li l-Belġju jingħata eżenzjoni mid-dazji fuq l-importazzjoni imponibbli fuq l-oġġetti importati għall-finijiet deskritti fl-Artikolu 74 tar-Regolament (KE) Nru 1186/2009 u eżenzjoni mill-VAT imponibbli fuq l-oġġetti importati għall-finijiet deskritti fl-Artikolu 51 tad-Direttiva 2009/132/KE.

(8)

Fit-22 ta’ Ottubru 2020 il-Greċja kkonfermat lill-Kummissjoni li rċeviet l-oġġetti msemmija fil-lista dettaljata, ippreżentata mill-Belġju; informat li s-Segretarjat Ġenerali għall-Protezzjoni Ċivili tal-Ministeru tal-Protezzjoni taċ-Ċittadini kien inħatar bħala r-riċevitur tal-oġġetti msemmija hawn fuq għad-distribuzzjoni jew id-disponibbiltà ta’ dawn tal-aħħar mingħajr ħlas għall-migranti u l-persuni li jfittxu ażil; u rrikonoxxiet li ttieħdu miżuri xierqa biex tiġi żgurata l-konformità mal-Artikoli 78, 79 u 80 tar-Regolament (KE) Nru 1186/2009 u mal-Artikoli 55, 56 u 57 tad-Direttiva 2009/132/KE fir-rigward tal-oġġetti msemmija hawn fuq.

(9)

L-eżenzjoni mid-dazji fuq l-importazzjoni u l-eżenzjoni mill-VAT jenħtieġ għalhekk li jingħataw fir-rigward tal-importazzjoni magħmula mill-Belġju fis-6 ta’ Marzu 2020 bil-ħsieb li tiġi ttrasferita ulterjorment lejn il-Greċja.

(10)

Fil-11 ta’ Frar 2021, l-Istati Membri ġew ikkonsultati f’konformità mal-Artikolu 76 tar-Regolament (KE) Nru 1186/2009 u l-Artikolu 53 tad-Direttiva 2009/132/KE,

(a)

l-oġġetti kienu maħsuba biex jitqassmu u jiġu magħmula disponibbli mingħajr ħlas mis-Segretarjat Ġenerali għall-Protezzjoni Ċivili tal-Ministeru tal-Protezzjoni taċ-Ċittadini tal-Greċja għall-benefiċċju ta’ dawk li jfittxu l-ażil u l-migranti;

(b)

l-oġġetti jissodisfaw ir-rekwiżiti stabbiliti fl-Artikoli 75, 78, 79 u 80 tar-Regolament (KE) Nru 1186/2009 u fl-Artikoli 52, 55, 56 u 57 tad-Direttiva 2009/132/KE;

(c)

ittieħdu miżuri xierqa mill-awtoritajiet Griegi biex tiġi żgurata l-konformità mal-Artikoli 78, 79 u 80 tar-Regolament (KE) Nru 1186/2009 u mal-Artikoli 55, 56 u 57 tad-Direttiva 2009/132/KE fir-rigward tal-oġġetti importati li jaqgħu fil-kamp ta’ applikazzjoni ta’ din id-Deċiżjoni.