|
Il-Ġurnal Uffiċjali |
MT Is-serje L |
|
2025/1466 |
23.7.2025 |
REGOLAMENT TA’ IMPLIMENTAZZJONI TAL-KUMMISSJONI (UE) 2025/1466
tat-22 ta’ Lulju 2025
li jemenda r-Regolament ta’ Implimentazzjoni (UE) Nru 520/2012 dwar it-twettiq tal-attivitajiet ta’ farmakoviġilanza stipulati fir-Regolament (KE) Nru 726/2004 tal-Parlament Ewropew u tal-Kunsill u fid-Direttiva 2001/83/KE tal-Parlament Ewropew u tal-Kunsill
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri tal-Unjoni għall-awtorizzazzjoni u s-sorveljanza ta’ prodotti mediċinali għall-użu mill-bniedem u li jistabbilixxi l-Aġenzija Ewropea għall-Mediċini (1), u b’mod partikolari l-Artikolu 87a tiegħu,
Wara li kkunsidrat id-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (2), u b’mod partikolari l-Artikolu 108 tagħha,
Billi:
|
(1) |
Ir-Regolament ta’ Implimentazzjoni tal-Kummissjoni (UE) Nru 520/2012 (3) jistabbilixxi ċerti miżuri ta’ implimentazzjoni għat-twettiq tal-attivitajiet ta’ farmakoviġilanza. Fid-dawl tal-esperjenza prattika fl-applikazzjoni ta’ dak ir-Regolament ta’ Implimentazzjoni, il-progress tekniku u xjentifiku, u l-armonizzazzjoni internazzjonali fil-farmakoviġilanza, jixraq li jiġi rieżaminat, filwaqt li jiġi ggarantit l-istess livell ta’ protezzjoni tas-saħħa pubblika. |
|
(2) |
Ir-Regolament ta’ Implimentazzjoni (UE) Nru 520/2012 jistabbilixxi, fost affarijiet oħra, il-kontenut tal-master file tas-sistema ta’ farmakoviġilanza. Sabiex jiġi evitat piż amministrattiv bla bżonn kemm għall-applikanti kif ukoll għall-awtoritajiet kompetenti, jenħtieġ li fil-master file tas-sistema ta’ farmakoviġilanza jiġu ddokumentati biss devjazzjonijiet sinifikanti mill-proċeduri tal-farmakoviġilanza, l-impatt tagħhom u kif qed jiġu mmaniġġjati, sakemm dawn jiġu riżolti. |
|
(3) |
Id-detenturi tal-awtorizzazzjoni għall-kummerċjalizzazzjoni jistgħu jissottokuntrattaw ċerti attivitajiet tas-sistema ta’ farmakoviġilanza lil partijiet terzi, pereżempju lil fornituri tas-servizzi speċjalizzati. Meta l-kompiti tal-farmakoviġilanza jkunu ġew sottokuntrattati mid-detentur tal-awtorizzazzjoni għall-kummerċjalizzazzjoni lil parti terza (jew minn din il-parti terza lil parti terza oħra), l-arranġamenti ta’ delega, ir-responsabbiltajiet ta’ kull parti, u l-arranġamenti ta’ awditjar u ta’ spezzjoni jenħtieġ li jiġu ddokumentati b’mod ċar. Jenħtieġ li l-partijiet terzi jaqblu li jiġu awditjati mid-detenturi tal-awtorizzazzjoni għall-kummerċjalizzazzjoni jew f’isimhom u spezzjonati mill-awtoritajiet kompetenti sabiex jiggarantixxu u jivverifikaw il-konformità fir-rigward tal-aspetti kollha tas-sistema ta’ farmakoviġilanza. |
|
(4) |
Id-detenturi tal-awtorizzazzjoni għall-kummerċjalizzazzjoni jridu jistabbilixxu sistemi tal-kwalità għat-twettiq tal-attivitajiet ta’ farmakoviġilanza skont l-Artikolu 8(1) tar-Regolament ta’ Implimentazzjoni (UE) Nru 520/2012. F’konformità mal-Artikolu 13 ta’ dak ir-Regolament, dawk is-sistemi tal-kwalità jridu jiġu awditjati. Sabiex tiġi żgurata effiċjenza aħjar tal-awditi, il-kontenut ta’ dawk l-awditi jenħtieġ li jiġi ddefinit aktar f’dan ir-Regolament. Il-parti terza sottokuntrattata biex twettaq il-kompiti tal-farmakoviġilanza b’mod sħiħ jew parzjali f’isem id-detenturi tal-awtorizzazzjoni għall-kummerċjalizzazzjoni jew flimkien magħhom jenħtieġ li tiġi awditjata mid-detentur tal-awtorizzazzjoni għall-kummerċjalizzazzjoni jew f’ismu u tista’ tiġi spezzjonata mill-awtoritajiet kompetenti, irrispettivament minn jekk dan l-obbligu jissemmiex jew le fis-sottokuntratt. Huwa importanti li s-sottokuntratturi jkollhom ċarezza dwar l-obbligi tagħhom, li jenħtieġ li jiġu stabbiliti fis-sottokuntratt, iżda n-nuqqasijiet tas-sottokuntratt jenħtieġ li ma jaffettwawx it-twettiq tal-awditi u tal-ispezzjonijiet. |
|
(5) |
Il-bażi tad-data EudraVigilance hija s-sistema li timmaniġġja u tanalizza informazzjoni dwar reazzjonijiet avversi għal mediċini li jkunu ġew awtorizzati jew li jkunu qed jiġu studjati fil-provi kliniċi. L-Aġenzija Ewropea għall-Mediċini (“l-Aġenzija”) u l-awtoritajiet nazzjonali kompetenti jimmonitorjaw kontinwament id-data fil-bażi tad-data EudraVigilance. Il-bażi tad-data hija aċċessibbli wkoll għad-detenturi tal-awtorizzazzjoni għall-kummerċjalizzazzjoni safejn ikun meħtieġ għalihom biex jissodisfaw l-obbligi tagħhom tal-farmakoviġilanza. Abbażi tal-esperjenza miksuba mill-monitoraġġ tad-data tad-detenturi tal-awtorizzazzjoni għall-kummerċjalizzazzjoni fil-bażi tad-data EudraVigilance, ir-rekwiżiti għad-detenturi tal-awtorizzazzjoni għall-kummerċjalizzazzjoni jenħtieġ li jiġu ċċarati, inklużi r-rekwiżiti għall-validazzjoni tas-sinjali u n-notifika sussegwenti lill-Aġenzija u lill-awtoritajiet nazzjonali kompetenti. |
|
(6) |
Sabiex tiġi ffaċilitata l-interoperabbiltà tas-sistemi, tiġi evitata d-duplikazzjoni tal-attivitajiet tal-ikkowdjar li jikkonċernaw l-istess informazzjoni u jkun jista’ jsir skambju aktar faċli ta’ informazzjoni, dan ir-Regolament iqis l-iżviluppi fl-istandards internazzjonali li jużaw id-detenturi tal-awtorizzazzjoni għall-kummerċjalizzazzjoni, l-awtoritajiet nazzjonali kompetenti u l-Aġenzija għat-twettiq tal-attivitajiet ta’ farmakoviġilanza, kif ukoll il-ħtieġa ta’ ċerti aġġornamenti tat-terminoloġija. |
|
(7) |
Ir-reazzjonijiet avversi suspettati għal prodott mediċinali jiġu rrappurtati fil-bażi tad-data EudraVigilance permezz ta’ rapporti dwar is-sikurezza ta’ każijiet individwali. Ir-rapporti jenħtieġ li jkunu kemm jista’ jkun kompluti, iżda sabiex tiġi żgurata ċerta standardizzazzjoni tar-rapporti, ir-rekwiżiti minimi tar-rappurtar jenħtieġ li japplikaw fil-każijiet kollha. |
|
(8) |
Għal referenzjar aħjar tal-letteratura fir-rapporti dwar is-sikurezza ta’ każijiet individwali, meta jirrappurtaw reazzjonijiet avversi suspettati, l-Istati Membri u d-detenturi tal-awtorizzazzjoni għall-kummerċjalizzazzjoni jenħtieġ li jipprovdu l-identifikatur tal-oġġett diġitali (DOI), jekk dan ikun disponibbli. |
|
(9) |
Sabiex jiġi ċċarat u msaħħaħ il-kontenut tar-rapport perjodiku ta’ aġġornament dwar is-sikurezza, dak ir-rapport jenħtieġ li jinkludi aġġornamenti dwar l-implimentazzjoni ta’ miżuri għall-minimizzazzjoni tar-riskji. |
|
(10) |
Jekk l-awtoritajiet nazzjonali kompetenti, l-Aġenzija jew il-Kummissjoni jkollhom tħassib dwar is-sikurezza ta’ prodott mediċinali, huma jistgħu jobbligaw lil detentur tal-awtorizzazzjoni għall-kummerċjalizzazzjoni biex jibda, jimmaniġġja u jiffinanzja studji dwar is-sikurezza wara l-awtorizzazzjoni mingħajr intervent. Sabiex ikunu trasparenti, id-detentur tal-awtorizzazzjoni għall-kummerċjalizzazzjoni jenħtieġ li jqiegħed dawn l-istudji fir-reġistru elettroniku tal-istudji wara l-awtorizzazzjoni miżmum mill-Aġenzija. |
|
(11) |
Għaldaqstant, jenħtieġ li r-Regolament ta’ Implimentazzjoni (UE) Nru 520/2012 jiġi emendat kif xieraq. |
|
(12) |
Il-miżuri stipulati f’dan ir-Regolament huma f’konformità mal-opinjoni tal-Kumitat Permanenti għal Prodotti Mediċinali għall-Użu mill-Bniedem, |
ADOTTAT DAN IR-REGOLAMENT:
Artikolu 1
Ir-Regolament ta’ Implimentazzjoni (UE) Nru 520/2012 huwa emendat kif ġej:
|
(1) |
Fl-Artikolu 2, il-punt (2) huwa sostitwit b’dan li ġej:
|
|
(2) |
fl-Artikolu 4, il-paragrafu 3 huwa sostitwit b’dan li ġej: “3. Kwalunkwe devjazzjoni maġġuri jew kritika mill-proċeduri tal-farmakoviġilanza, u l-impatt u l-immaniġġjar tagħha għandhom jiġu ddokumentati fil-master file tas-sistema ta’ farmakoviġilanza sakemm tiġi riżolta.” |
|
(3) |
fl-Artikolu 6, jiżdiedu l-paragrafi 3 u 4 li ġejjin: “3. Mingħajr preġudizzju għat-tieni sentenza tal-paragrafu 1 u għall-Artikolu 11(2), id-detentur tal-awtorizzazzjoni għall-kummerċjalizzazzjoni għandu jinkludi fis-sottokuntratti l-elementi li ġejjin:
Dan il-paragrafu japplika mutatis mutandis għall-partijiet terzi li jissottokuntrattaw il-kompiti sottokuntrattati lilhom mid-detentur tal-awtorizzazzjoni għall-kummerċjalizzazzjoni. 4. Il-partijiet terzi ma għandhom jissottokuntrattaw l-ebda kompitu tal-farmakoviġilanza assenjat lilhom mid-detentur tal-awtorizzazzjoni għall-kummerċjalizzazzjoni mingħajr il-kunsens bil-miktub tad-detentur tal-awtorizzazzjoni għall-kummerċjalizzazzjoni.” |
|
(4) |
fl-Artikolu 11, il-paragrafu 1, il-punt (d) huwa sostitwit b’dan li ġej:
|
|
(5) |
L-Artikolu 13 huwa emendat kif ġej:
|
|
(6) |
fl-Artikolu 17, il-paragrafu 1 huwa sostitwit b’dan li ġej: “1. L-awtoritajiet nazzjonali kompetenti u l-Aġenzija għandhom iwettqu awditi bbażati fuq ir-riskju tas-sistema tal-kwalità f’intervalli regolari skont metodoloġija komuni biex jiżguraw li din tkun konformi mar-rekwiżiti stabbiliti fl-Artikoli 8, 14, 15 u 16 u biex jiddeterminaw l-effettività tagħha. L-awditi għandhom ikopru perjodu definit u jivverifikaw il-konformità tal-attivitajiet rilevanti ta’ farmakoviġilanza kkonċernati mill-awditu mal-politiki, mal-proċessi u mal-proċeduri tas-sistema tal-kwalità.” |
|
(7) |
fl-Artikolu 18, il-paragrafi 2 u 3 huma sostitwiti b’dan li ġej: “2. Id-detenturi tal-awtorizzazzjoni għall-kummerċjalizzazzjoni għandhom jimmonitorjaw id-data disponibbli fil-bażi tad-data EudraVigilance u jużawha flimkien ma’ data minn sorsi oħra disponibbli. 3. L-awtoritajiet kompetenti nazzjonali u l-Aġenzija għandhom jiżguraw il-monitoraġġ kontinwu tal-bażi tad-data EudraVigilance bi frekwenza proporzjonata skont ir-riskji identifikati, ir-riskji potenzjali, u l-ħtieġa ta’ informazzjoni addizzjonali.” |
|
(8) |
fl-Artikolu 19(1), it-tielet subparagrafu huwa sostitwit b’dan li ġej: “Għall-fini tal-monitoraġġ tad-data fil-bażi tad-data EudraVigilance, għandhom jitqiesu biss is-sinjali relatati ma’ reazzjoni avversa suspettata.”; |
|
(9) |
fl-Artikolu 21, jitħassar il-paragrafu 2; |
|
(10) |
fl-Artikolu 21, il-paragrafi 3 u 4 huma sostitwiti b’dan li ġej: “3. Meta jitqies li sinjal ivvalidat minn awtorità nazzjonali kompetenti jew mill-Aġenzija jkun jeħtieġ aktar analiżi, dan għandu jiġi kkonfermat mill-aktar fis possibbli u mhux aktar tard minn 30 jum minn meta jkun wasal kif ġej:
Meta jkunu qed janalizzaw is-sinjal ivvalidat, l-awtoritajiet nazzjonali kompetenti u l-Aġenzija jistgħu jqisu informazzjoni oħra disponibbli dwar il-prodott mediċinali. Meta l-validità tas-sinjal ma tkunx ikkonfermata, għandha tingħata attenzjoni speċjali lil sinjali mhux ikkonfermati li jikkonċernaw prodott mediċinali fil-każ meta dawk is-sinjali jkunu segwiti minn sinjali ġodda li jikkonċernaw l-istess prodott mediċinali. 4. Mingħajr preġudizzju għall-paragrafu 3, l-awtoritajiet nazzjonali kompetenti u l-Aġenzija għandhom jivvalidaw u jikkonfermaw kull sinjal li jkunu identifikaw tul il-monitoraġġ kontinwu tagħhom tal-bażi tad-data EudraVigilance.” |
|
(11) |
fl-Artikolu 23, is-subparagrafu 2 huwa sostitwit b’dan li ġej: “L-Aġenzija għandha tiżgura wkoll li jingħata appoġġ xieraq lid-detenturi tal-awtorizzazzjoni għall-kummerċjalizzazzjoni sabiex jużaw il-bażi tad-data EudraVigilance.”; |
|
(12) |
fl-Artikolu 25, il-paragrafi 1 u 2 huma sostitwiti b’dan li ġej: “1. Għall-klassifikazzjoni, l-irkupru, il-preżentazzjoni, l-evalwazzjoni u l-valutazzjoni tal-benefiċċji u r-riskji, l-iskambju u l-komunikazzjoni elettroniċi ta’ informazzjoni tal-farmakoviġilanza u tal-prodotti mediċinali, l-Istati Membri, id-detenturi tal-awtorizzazzjoni għall-kummerċjalizzazzjoni u l-Aġenzija għandhom jużaw it-terminoloġija li ġejja:
2. L-Istati Membri, l-awtoritajiet nazzjonali kompetenti jew id-detenturi tal-awtorizzazzjoni għall-kummerċjalizzazzjoni għandhom jitolbu lill-International Council for Harmonisation of Technical Requirements for Pharmaceuticals for Human Use, lill-Kummissjoni tal-Farmakopea Ewropea, lill-Kumitat Ewropew għall-Istandardizzazzjoni, jew lill-Organizzazzjoni Internazzjonali għall-Istandardizzazzjoni biex iżidu terminu ġdid mat-terminoloġija msemmija fil-paragrafu 1, meta jkun meħtieġ. F’dan il-każ, dawn għandhom jinfurmaw lill-Aġenzija kif xieraq.” |
|
(13) |
L-Artikolu 26 huwa emendat kif ġej:
|
|
(14) |
L-Artikolu 28 huwa emendat kif ġej:
|
|
(15) |
fl-Artikolu 34, il-paragrafu 3 huwa sostitwit b’dan li ġej: “3. Ir-rapport perjodiku ta’ aġġornament dwar is-sikurezza għandu jkun fih aġġornamenti dwar l-implimentazzjoni tal-miżuri għall-minimizzazzjoni tar-riskji u r-riżultati tal-valutazzjonijiet tal-effettività tal-attivitajiet għall-minimizzazzjoni tar-riskji rilevanti għall-valutazzjoni tal-benefiċċji u r-riskji.” |
|
(16) |
fl-Artikolu 36, jiżdied il-paragrafu 5: “5. Id-detentur tal-awtorizzazzjoni għall-kummerċjalizzazzjoni għandu jdaħħal il-protokoll tal-istudju, l-astratt tar-rapport finali dwar l-istudju u r-rapport finali dwar l-istudju fir-reġistru elettroniku tal-istudji wara l-awtorizzazzjoni miżmum mill-Aġenzija. Id-detentur tal-awtorizzazzjoni għall-kummerċjalizzazzjoni għandu jippreżenta b’mod elettroniku fir-reġistru l-protokoll tal-istudju qabel ma tibda tinġabar id-data u l-astratt tar-rapport finali dwar l-istudju fi żmien xahar wara l-finalizzazzjoni tar-rapport finali dwar l-istudju.” |
|
(17) |
fil-Parti III tal-Anness II “Il-format tar-rapporti perjodiċi, elettroniċi, ta’ aġġornament dwar is-sikurezza”, il-punt 16.5 huwa emendat kif ġej:
|
|
(18) |
fit-Taqsima 3 tal-Anness III “Il-format tar-rapport finali tal-istudju”, il-punt 5(f) huwa emendat kif ġej:
|
Artikolu 2
Dħul fis-seħħ u applikazzjoni
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mit-12 ta’ Frar 2026..
Madankollu, l-Artikolu 1, il-punti (7) u (9), għandu japplika mid-data tad-dħul fis-seħħ tiegħu.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-22 ta’ Lulju 2025.
Għall-Kummissjoni
Il-President
Ursula VON DER LEYEN
(1) ĠU L 136, 30.4.2004, p. 1, ELI: http://data.europa.eu/eli/reg/2004/726/oj.
(2) ĠU L 311, 28.11.2001, p. 67, ELI: http://data.europa.eu/eli/dir/2001/83/oj.
(3) Ir-Regolament ta’ Implimentazzjoni tal-Kummissjoni (UE) Nru 520/2012 tad-19 ta’ Ġunju 2012 dwar it-twettiq tal-attivitajiet ta’ farmakoviġilanza stipulati fir-Regolament (KE) Nru 726/2004 tal-Parlament Ewropew u tal-Kunsill u fid-Direttiva 2001/83/KE tal-Parlament Ewropew u tal-Kunsill (ĠU L 159, 20.6.2012, p. 5, ELI: http://data.europa.eu/eli/reg_impl/2012/520/oj).
ELI: http://data.europa.eu/eli/reg_impl/2025/1466/oj
ISSN 1977-074X (electronic edition)