(1)

L-Artikolu 10 tar-Regolament (UE) Nru 1308/2013 jipprevedi li l-iskali tal-Unjoni għall-klassifikazzjoni tal-karkassi tal-majjali jridu japplikaw f’konformità mal-punt B tal-Anness IV ta’ dak ir-Regolament. It-Taqsima B.IV, il-punt 1, tal-Anness IV ta’ dak ir-Regolament jipprevedi li għall-klassifikazzjoni tal-karkassi tal-majjali, il-kontenut tal-laħam dgħif irid jiġi vvalutat permezz ta’ metodi ta’ gradazzjoni awtorizzati mill-Kummissjoni, li jistgħu jiġu awtorizzati biss metodi ta’ valutazzjoni ppruvati statistikament ibbażati fuq il-kejl fiżiku ta’ waħda jew aktar mill-partijiet anatomiċi tal-karkassa tal-majjal u li l-metodi ta’ gradazzjoni huma soġġetti għall-konformità mar-rata ta’ tolleranza massima għal żball statistiku fil-valutazzjoni. Dik it-tolleranza hija ddefinita fil-Parti A, il-punt 1, it-tieni paragrafu, tal-Anness V tar-Regolament Delegat tal-Kummissjoni (UE) 2017/1182 (2).

(2)

Id-Deċiżjoni ta’ Implimentazzjoni tal-Kummissjoni 2011/303/UE (3) awtorizzat l-użu ta’ tliet metodi għall-gradazzjoni tal-karkassi tal-majjali fin-Netherlands.

(3)

In-Netherlands talbu lill-Kummissjoni biex tirtira l-awtorizzazzjoni tal-metodi “Hennessy Grading Probe (HGP 7)” u “CSB Image-Meater (CSB)”.

(4)

In-Netherlands talbu wkoll lill-Kummissjoni biex tawtorizza l-metodi l-ġodda li ġejjin: “AutoFom IV”, “CSB Image-Meater 2.0” u “Fat-O-Meater II (FOM II)”. Għal dak l-għan, in-Netherlands ippreżentaw deskrizzjoni dettaljata tal-prova tad-dissezzjoni, li tindika l-prinċipji li fuqhom huwa bbażat dan il-metodu l-ġdid, ir-riżultati tal-prova tad-dissezzjoni u l-ekwazzjonijiet użati għall-valutazzjoni tal-perċentwal tal-laħam dgħif fil-protokoll imsemmi fl-Artikolu 11(3) tar-Regolament Delegat (UE) 2017/1182.

(5)

In-Netherlands talbu wkoll lill-Kummissjoni biex tawtorizza formola aġġornata għall-metodu “Capteur Gras Maigre (CGM)” diġà awtorizzat bid-Deċiżjoni ta’ Implimentazzjoni 2011/303/UE għall-gradazzjoni tal-karkassi tal-majjali fit-territorju tagħhom.

(6)

L-eżami ta’ dawk it-talbiet żvela li l-kundizzjonijiet u r-rekwiżiti minimi għall-awtorizzazzjoni tal-metodi l-ġodda ta’ gradazzjoni u għall-aġġornament tal-ekwazzjonijiet għall-metodi awtorizzati, kif stabbilit fil-Parti A tal-Anness V tar-Regolament Delegat (UE) 2017/1182, huma ssodisfati għal dawk ir-rikjesti kollha. Għalhekk, jenħtieġ li l-metodu l-ġdid ta’ gradazzjoni u l-formoli l-ġodda jiġu awtorizzati fin-Netherlands.

(7)

Sakemm ma jkunux ġew awtorizzati b’mod espliċitu minn Deċiżjoni ta’ Implimentazzjoni tal-Kummissjoni, jenħtieġ li l-modifiki tal-metodi ta’ gradazzjoni jew tal-apparati tagħhom ma jkunux permessi.

(8)

Għal raġunijiet ta’ ċarezza u ta’ ċertezza legali, jenħtieġ li d-Deċiżjoni ta’ Implimentazzjoni 2011/303/UE titħassar.

(9)

Sabiex l-operaturi jingħataw biżżejjed żmien biex jadattaw għar-rekwiżiti tekniċi tal-introduzzjoni ta’ apparati ġodda u ta’ ekwazzjonijiet ġodda, jenħtieġ li din id-Deċiżjoni tapplika mill-1 ta’ Jannar 2027.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(a)

l-apparat “AutoFom IV” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti I tal-Anness;

(b)

l-apparat “CSB Image-Meater 2.0” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti II tal-Anness;

(c)

l-apparat “Fat-O-Meat’er II (FOM II)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti III tal-Anness;

(d)

l-apparat “Capteur Gras Maigre (CGM)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti IV tal-Anness.