(1)

Le hAirteagal 10 de Rialachán (AE) Uimh. 1308/2013, foráiltear go mbeidh feidhm ag scálaí an Aontais um aicmiú conablach muc i gcomhréir le pointe B d’Iarscríbhinn IV a ghabhann leis an Rialachán sin. Maidir le haicmiú conablach muc, foráiltear le Roinn B.IV, pointe 1, d’Iarscríbhinn IV a ghabhann leis an Rialachán sin go bhfuil measúnú le déanamh ar an gcion feola trua trí bhíthin modhanna grádúcháin a údaróidh an Coimisiún, nach bhféadfar a údarú ach modhanna measúnaithe atá cruthaithe de réir staidrimh bunaithe ar thomhas fisiceach cuid anatamaíoch amháin nó níos mó den chonablach muice agus go bhfuil modhanna grádúcháin faoi réir comhlíonadh ráta uaslamháltais le haghaidh earráid staidrimh le linn measúnú. Sainítear an lamháltas sin i gCuid A, pointe 1, an dara mír, d’Iarscríbhinn V a ghabhann le Rialachán Tarmligthe (AE) 2017/1182 ón gCoimisiún (2).

(2)

Le Cinneadh Cur Chun Feidhme 2011/303/AE ón gCoimisiún (3), údaraíodh trí mhodh a úsáid chun conablaigh muc a ghrádú san Ísiltír.

(3)

D’iarr an Ísiltír ar an gCoimisiún údarú na modhanna ‘Hennessy Grading Probe (HGP 7)’ agus ‘CSB Image-Meater (CSB)’ a tharraingt siar

(4)

D’iarr an Ísiltír ar an gCoimisiún freisin na modhanna nua seo a leanas a údarú: ‘AutoFom IV’, ‘CSB Image-Meater 2.0’ agus ‘Fat-O-Meater II (FOM II)’. Chun na críche sin, chuir an Ísiltír tuairisc mhionsonraithe ar an triail dhiosctha i láthair, lena léirítear na prionsabail ar a bhfuil an modh nua sin bunaithe, torthaí na trialach diosctha agus na cothromóidí a úsáidtear chun measúnú a dhéanamh ar an gcéatadán feola trua sa phrótacal dá dtagraítear in Airteagal 11(3) de Rialachán Tarmligthe (AE) 2017/1182.

(5)

D’iarr an Ísiltír ar an gCoimisiún freisin foirmle cothrom le dáta a údarú le haghaidh an mhodha ‘Capteur Gras Maigre (CGM)’ atá údaraithe cheana féin le Cinneadh Cur Chun Feidhme 2011/303/AE chun conablaigh muc a ghrádú ar a críoch.

(6)

Trí scrúdú a dhéanamh ar na hiarrataí sin, fuarthas amach i gcás na n-iarrataí sin uile go gcomhlíontar na coinníollacha agus na híoscheanglais maidir leis na modhanna nua grádúcháin a údarú agus na cothromóidí le haghaidh na modhanna údaraithe a thabhairt cothrom le dáta mar a leagtar síos i gCuid A d’Iarscríbhinn V a ghabhann le Rialachán Tarmligthe (AE) 2017/1182. Ba cheart, dá bhrí sin, an modh nua grádúcháin agus na foirmlí nua a údarú san Ísiltír.

(7)

Níor cheart modhnuithe ar na modhanna grádúcháin ná ar an ngléasra lena mbaineann a cheadú, ach amháin má údaraítear sin go sainráite le cinneadh cur chun feidhme ón gCoimisiún.

(8)

Ar chúiseanna soiléireachta agus deimhneachta dlíthiúla, ba cheart Cinneadh Cur Chun Feidhme 2011/303/AE a aisghairm.

(9)

Chun go mbeidh am leordhóthanach ag oibreoirí oiriúnú do na ceanglais theicniúla maidir le gairis nua agus cothromóidí nua a thabhairt isteach, ba cheart feidhm a bheith ag an gCinneadh seo ón 1 Eanáir 2027 ar aghaidh.

(10)

Tá na bearta dá bhforáiltear sa Chinneadh seo i gcomhréir leis an tuairim ón gCoiste um Chomheagrú na Margaí Talmhaíochta,

(a)

an gléasra ‘AutoFom IV’ agus na modhanna measúnaithe lena mbaineann, a leagtar amach sonraí ina leith i gCuid I den Iarscríbhinn;

(b)

an gléasra ‘CSB Image-Meater 2.0’ agus na modhanna measúnaithe lena mbaineann, a leagtar amach sonraí ina leith i gCuid II den Iarscríbhinn;

(c)

an gléasra ‘Fat-O-Meat’er II (FOM II)’ agus na modhanna measúnaithe lena mbaineann, a leagtar amach sonraí ina leith i gCuid III den Iarscríbhinn.

(d)

an gléasra ‘Capteur Gras Maigre (CGM)’ agus na modhanna measúnaithe lena mbaineann, a leagtar amach sonraí ina leith i gCuid IV den Iarscríbhinn.