(1)

Fis-6 ta’ Diċembru 2024, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet ta’ ċilindri tal-azzar mingħajr weldjatura ta’ pressjoni għolja li joriġinaw mir-Repubblika tal-Poplu taċ-Ċina (“il-pajjiż ikkonċernat”) abbażi tal-Artikolu 5 tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment ippreżentat fl-24 ta’ Ottubru 2024 minn ħames kumpaniji, Cylinders Holding a.s., Dalmine S.p.A. (Tenaris), Eurocylinder Systems AG, Faber Industrie S.p.A., u Worthington Cylinders GmbH (“l-ilmentaturi”). L-ilment sar mill-industrija tal-Unjoni taċ-ċilindri tal-azzar mingħajr weldjatura ta’ pressjoni għolja fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għal reġistrazzjoni bir-Regolament ta’ Implimentazzjoni tal-Kummissjoni (UE) 2025/531 (“ir-Regolament dwar ir-reġistrazzjoni”) (3) .

(4)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament informat lill-ilmentaturi, lil produtturi magħrufa oħra tal-Unjoni, lill-produtturi esportaturi magħrufa, lill-awtoritajiet Ċiniżi, lill-importaturi, lill-fornituri u lill-utenti magħrufa, lill-kummerċjanti, kif ukoll lill-assoċjazzjonijiet magħrufa li huma kkonċernati dwar il-bidu tal-investigazzjoni, u stednithom jieħdu sehem.

(5)

Il-partijiet interessati kellhom l-opportunità li jikkummentaw dwar il-bidu tal-investigazzjoni u li jitolbu seduta ta’ smigħ mal-Kummissjoni u mal-Uffiċjal tas-Seduta fil-proċedimenti kummerċjali.

(6)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

Kampjunar tal-produtturi tal-Unjoni

(7)

Fin-Notifika tal-Bidu tagħha, il-Kummissjoni ddikjarat li hija kienet għażlet b’mod proviżorju kampjun tal-produtturi tal-Unjoni. Il-Kummissjoni għażlet il-kampjun abbażi ta’ rappreżentattività f’termini tal-volum tal-produzzjoni u tal-bejgħ tal-prodott simili fl-UE fil-perjodu ta’ investigazzjoni. Dan il-kampjun ikkonsista minn żewġ produtturi tal-Unjoni. Il-produtturi tal-Unjoni inklużi fil-kampjun kienu jirrappreżentaw 47 % tal-produzzjoni totali stmata tal-UE u 42 % tal-kwantità tal-bejgħ totali stmata tal-UE tal-prodott simili. Il-Kummissjoni stiednet lill-partijiet interessati biex jikkummentaw dwar il-kampjun proviżorju. Ma wasal l-ebda kumment. Il-kampjun huwa rappreżentattiv tal-industrija tal-Unjoni.

Kampjunar ta’ importaturi mhux relatati

(8)

Biex tiddeċiedi jekk kienx meħtieġ li jittieħed kampjun u, jekk iva, biex tagħżel kampjun, il-Kummissjoni staqsiet lil importaturi mhux relatati sabiex jipprovdu l-informazzjoni speċifikata fin-Notifika tal-Bidu.

(9)

L-ebda importatur mhux relatat ma pprovda l-informazzjoni mitluba u qabel li jiġi inkluż fil-kampjun.

Kampjunar tal-produtturi esportaturi

(10)

Sabiex tiddeċiedi jekk il-kampjunar kienx meħtieġ u, jekk iva, sabiex tagħżel kampjun, il-Kummissjoni talbet lill-produtturi esportaturi kollha fir-Repubblika tal-Poplu taċ-Ċina biex jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(11)

Għoxrin produttur esportatur fil-pajjiż ikkonċernat li jirrappreżentaw 54,4 % tal-esportazzjonijiet totali stmata lejn l-Unjoni pprovdew l-informazzjoni mitluba u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun ta’ żewġ produtturi esportaturi abbażi tal-akbar volum rappreżentattiv tal-esportazzjonijiet lejn l-Unjoni li jista’ raġonevolment jiġi investigat fiż-żmien disponibbli. F’konformità mal-Artikolu 17(2) tar-Regolament bażiku, il-produtturi esportaturi magħrufa kollha kkonċernati, u l-awtoritajiet tal-pajjiż ikkonċernat, ġew ikkonsultati dwar l-għażla tal-kampjun.

(12)

Filwaqt li qablu mal-għażla tal-ewwel produttur esportatur li għandu l-akbar produzzjoni miż-żewġ gruppi ta’ kumpaniji magħżula, l-ilmentaturi kkummentaw li jenħtieġ li t-tieni wieħed jiġi sostitwit fid-dawl tal-fatt li pproduċa l-aktar tagħmir tat-tifi tan-nar bħal apparati tat-tifi tan-nar. L-ilmentaturi b’hekk ippreżentaw żewġ kumpaniji alternattivi li kkooperaw abbażi tar-raġunijiet li ġejjin:

(13)

Barra minn hekk, l-ilmentaturi enfasizzaw ir-riskji inerenti li jintgħażlu żewġ kumpaniji fil-kampjun f’każ ta’ nuqqas ta’ kooperazzjoni minn waħda minnhom.

(14)

Madankollu, skont l-informazzjoni disponibbli, it-tieni grupp ta’ kumpaniji magħżul ipproduċa firxa usa’ ta’ prodotti u mhux biss tagħmir għat-tifi tan-nar. Il-kummenti li saru rigward il-kapaċità tal-produzzjoni disponibbli u l-preżenza fis-suq tal-UE taż-żewġ kumpaniji alternattivi proposti jew ma setgħux jiġu vverifikati f’dan l-istadju jew ma kinux appoġġati b’evidenza sottostanti. Barra minn hekk, iż-żewġ produtturi esportaturi magħżula b’mod proviżorju kkonfermaw l-intenzjoni soda tagħhom li jikkooperaw fl-investigazzjoni.

(15)

Abbażi tal-informazzjoni disponibbli, ma kienx hemm bżonn li jiġi emendat il-kampjun propost. Il-kampjun definittiv jirrappreżenta 37,5 % tal-kwantità totali stmata tal-esportazzjoni taċ-ċilindri mingħajr weldjatura ta’ pressjoni għolja lejn l-Unjoni mir-Repubblika tal-Poplu taċ-Ċina fil-perjodu ta’ investigazzjoni.

(16)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(17)

Barra minn hekk, fl-ilment, l-ilmentatur ipprovda biżżejjed evidenza prima facie ta’ distorsjonijiet tal-materja prima fiċ-Ċina fir-rigward tal-prodott ikkonċernat. Għalhekk, kif imħabbar fin-Notifika tal-Bidu, l-investigazzjoni kopriet dawk id-distorsjonijiet fil-materja prima biex tiddetermina jekk għandhomx jiġu applikati d-dispożizzjonijiet tal-Artikolu 7(2a) u 7(2b) tar-Regolament bażiku fir-rigward taċ-Ċina. Għal din ir-raġuni, il-Kummissjoni bagħtet kwestjonarji addizzjonali f’dan ir-rigward lill-GTĊ.

(18)

Il-Kummissjoni bagħtet kwestjonarji lill-produtturi, lill-importaturi, lill-utenti u lill-produtturi esportaturi tal-Unjoni fir-Repubblika tal-Poplu taċ-Ċina. Il-Kummissjoni bagħtet ukoll kwestjonarju lil kummerċjant mhux relatat li permezz tiegħu wieħed mill-produtturi esportaturi inklużi fil-kampjun kien qed ibigħ il-prodott ikkonċernat għall-esportazzjoni lejn l-UE. Dawn il-kwestjonarji saru disponibbli online (4) fil-jum tal-bidu.

(19)

Il-Kummissjoni fittxet u vverifikat l-informazzjoni kollha li qieset meħtieġa għal determinazzjoni proviżorja ta’ dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(20)

L-investigazzjoni tad-dumping u tad-dannu kopriet il-perjodu mill-1 ta’ Ottubru 2023 sat-30 ta’ Settembru 2024 (“il-perjodu ta’ investigazzjoni” jew “PI”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2021 sa tmiem il-perjodu ta’ investigazzjoni (“il-perjodu kkunsidrat”).

(21)

Il-prodott taħt investigazzjoni huwa ċ-ċilindri tal-azzar mingħajr weldjatura ta’ pressjoni għolja vojta (“HPSC”, high-pressure seamless cylinders), inklużi l-apparati tat-tifi tan-nar, għall-gass ikkompressat jew likwifikat, tal-azzar, tad-dijametri u l-kapaċitajiet tal-volum kollha, kemm jekk bil-kamin kif ukoll jekk le, irrispettivament mill-kisi jew mill-kisi intern, irrispettivament mill-irfinar u l-forma esterni, kemm jekk b’bużżieqa tal-gass inserita jew le, irrispettivament minn jekk iċ-ċilindri ġewx attrezzati b’valv, b’ċirku tal-għonq, b’ċirku tas-sieq jew b’pajpijiet, kemm jekk imwaħħlin flimkien biex jiffurmaw mazz kif ukoll jekk le (“il-prodott taħt investigazzjoni”).

(22)

Ċilindri li ma jistgħux jerġgħu jimtlew ta’ kapaċitajiet sa 120 ml, koperti mill-istandard Ewropew EN 16509:2014 u/jew numru-NU 2037 assenjat mill-Kumitat ta’ Esperti tan-Nazzjonijiet Uniti dwar it-Trasport ta’ Oġġetti Perikolużi, huma esklużi mill-ambitu tal-prodott.

(23)

Iċ-ċilindri mingħajr weldjatura ta’ pressjoni għolja jintużaw f’firxa wiesgħa ta’ applikazzjonijiet: għal apparati tat-tifi tan-nar, gassijiet industrijali (pereż. l-iwweldjar u l-qtugħ, l-ikel u x-xorb), gassijiet mediċi għall-isptarijiet u għall-kura tas-saħħa, gassijiet elettroniċi u ta’ speċjalità, arja respirabbli għat-tifi tan-nar, trażżin tan-nar, scuba-diving u fjuwils alternattivi inkluż il-gass naturali kkompressat (CNG, compressed natural gas) u l-idroġenu.

(24)

Il-prodott ikkonċernat huwa ċilindri mingħajr weldjatura ta’ pressjoni għolja għall-gass ikkompressat jew likwifikat, tal-azzar, tad-dijametri u l-kapaċitajiet tal-volum kollha, kemm jekk bil-kamin kif ukoll jekk le, irrispettivament mill-kisi jew mill-kisi intern, irrispettivament mill-irfinar u l-forma esterni, kemm jekk b’bużżieqa tal-gass inserita jew le, irrispettivament minn jekk iċ-ċilindri ġewx attrezzati b’valv, b’ċirku tal-għonq, b’ċirku tas-sieq jew b’pajpijiet, kemm jekk imwaħħlin flimkien biex jiffurmaw mazz kif ukoll jekk le, attwalment ikklassifikati taħt il-kodiċi NM ex 7311 00 11 , ex 7311 00 13 , ex 7311 00 19 u x 7311 00 30 (il-kodiċi TARIC 7311 00 11 15, 7311 00 11 80, 7311 00 13 15, 7311 00 13 80, 7311 00 19 15, 7311 00 19 80, 7311 00 30 15 u 7311 00 30 80) (“il-prodott ikkonċernat”).

(25)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(26)

F’dan l-istadju l-Kummissjoni ddeċidiet li, għaldaqstant, dawk il-prodotti huma prodotti simili fis-sens tal-Artikolu 1(4) tar-Regolament bażiku.

(27)

Skont id-definizzjoni tal-prodott imsemmija hawn fuq, il-prodott soġġett għal din l-investigazzjoni huwa ċilindri mingħajr weldjatura ta’ pressjoni għolja għall-gass ikkompressat jew likwifikat.

(28)

Wara l-bidu tal-investigazzjoni, produttur esportatur wieħed, Zhejiang Winner Fire Fighting Equipment Co., Ltd., argumenta li l-apparati tat-tifi tan-nar, ikklassifikati taħt il-kodiċi NM 8424 10 00 , ma waqgħux fl-ambitu tal-prodott tal-investigazzjoni. Il-Kummissjoni fakkret li l-kodiċijiet NM u TARIC ingħataw għall-informazzjoni biss. Għalhekk, l-ambitu ta’ din l-investigazzjoni kien soġġett għad-definizzjoni tal-prodott taħt investigazzjoni kif tinsab fit-Taqsima 2 tan-Notifika tal-Bidu. Konsegwentement, l-apparati tat-tifi tan-nar li kellhom l-istess karatteristiċi fiżiċi u kimiċi bħaċ-ċilindri mingħajr weldjatura bi pressjoni għolja tqiesu li jaqgħu fl-ambitu tal-prodott li qed jiġi investigat.

(29)

Zhejiang Winner Fire Fighting Equipment Co., Ltd., iddikjarat ukoll li l-apparati tat-tifi tan-nar ikkargati, jiġifieri mimlija b’diversi sustanzi kimiċi xotti u mxarrba, jenħtieġ li ma jitqisux li jaqgħu fl-ambitu tal-prodott tal-investigazzjoni.

(30)

Fis-6 ta’ Marzu 2025, il-Kummissjoni ppubblikat nota ta’ informazzjoni (5) li tiċċara li:

(31)

L-ilmentaturi ppreżentaw li l-apparati tat-tifi tan-nar mimlija jew ikkargati x’aktarx kienu magħmula l-aktar minn ċilindri wweldjati jew ċilindri oħrajn mhux tal-azzar, u għalhekk ma waqgħux fl-ambitu tal-investigazzjoni. Filwaqt li rrikonoxxew li ma hemm l-ebda differenza bejn iċ-ċilindri mingħajr weldjatura ta’ pressjoni għolja użati għall-applikazzjonijiet tat-tifi tan-nar u dawk użati għal finijiet oħra (bħal ċilindri tas-CO2 għall-industrija tal-ikel u x-xorb), u li l-istess standards tekniċi japplikaw għat-tnejn li huma, l-ilmentaturi, madankollu, argumentaw li ċ-ċilindri mimlija mingħajr weldjatura ta’ pressjoni għolja jenħtieġ li jiġu inklużi fl-ambitu tal-prodott. Huma sostnew li l-esklużjoni ta’ dawn iċ-ċilindri tillimita bla bżonn l-ambitu tal-prodott ikkonċernat fl-investigazzjoni attwali u toħloq riskju ta’ ċirkomvenzjoni

(32)

L-ilmentaturi nnotaw b’mod speċifiku li l-pakketti taċ-ċilindri huma koperti mid-definizzjoni tal-prodott, għalkemm il-qafas użat biex iċ-ċilindri jiġu assemblati f’mazz ma huwiex. Bl-istess mod, iċ-ċilindri tal-aċetilen kienu koperti taħt id-definizzjoni tal-prodott, għalkemm fihom materjal poruż biex jinżamm il-mili tal-aċeton peress li l-prodott issodisfa l-kriterji kollha tal-prodott kif definit fid-definizzjoni tal-prodott ikkonċernat bħalma hu stabbilit fin-Notifika tal-Bidu.

(33)

Bħala konklużjoni, l-ilmentaturi qiesu li l-kjarifika dwar il-prodott mill-Kummissjoni kif imsemmi hawn fuq jenħtieġ li tiġi eżaminata mill-ġdid.

(34)

Il-Kummissjoni l-ewwel innotat li la l-ilment, u lanqas in-Notifika tal-Bidu sussegwenti ma speċifikaw li l-prodott taħt investigazzjoni għamel referenza għal ċilindri mimlija.

(35)

Barra minn hekk, l-investigazzjoni żvelat li l-klijenti ta’ ċilindri mingħajr weldjatura ta’ pressjoni għolja spiss wettqu l-operazzjoni ta’ assemblaġġ u ta’ mili biex jagħmlu l-prodott ikkonċernat adattat għall-użu finali tiegħu, kemm jekk bħala ċilindru tat-tifi tan-nar kif ukoll jekk bħala kontenitur għal prodotti kimiċi.

(36)

Barra minn hekk, meta jitqiesu r-rekwiżiti partikolarment għaljin u kkumplikati ta’ sikurezza u sigurtà applikabbli għat-trasport interkontinentali ta’ oġġetti perikolużi ħafna bħal ċilindri mimlija mingħajr weldjatura ta’ pressjoni għolja, l-allegati riskji ta’ ċirkomvenzjoni nstabu li kienu limitati.

(37)

Fid-dawl ta’ dan ta’ hawn fuq, id-dikjarazzjonijiet ippreżentati mill-ilmentaturi ġew miċħuda.

(38)

Produttur esportatur wieħed mhux inkluż fil-kampjun, Leebucc (Tianjin) Hydraulics Equipment Co., Ltd, talab l-esklużjoni tal-qxur tal-akkumulaturi mill-ambitu tal-investigazzjoni. Din il-parti ressqet l-argumenti li ġejjin:

(39)

L-ilmentaturi argumentaw li:

(40)

Leebucc (Tianjin) Hydraulics Equipment Co., Ltd argumentat li qajmet il-kwistjoni dwar l-esklużjoni tal-qxur tal-akkumulaturi mill-ambitu tal-investigazzjoni wara verifika fuq il-post, u li l-iskadenzi għall-kummenti dwar l-ambitu tal-prodott jenħtieġ li jitqiesu bħala skadenza “flessibbli” għall-kuntrarju ta’ skadenza statutorja aktar stretta kif speċifikat fir-Regolament bażiku.

(41)

Leebucc (Tianjin) Hydraulics Equipment Co., Ltd saħqet fuq id-differenzi bejn prodott nofsu lest (qoxra tal-akkumulatur) u prodott lest (akkumulatur), li kien fattur kritiku biex tiġi ddeterminata s-similarità ta’ qoxra tal-akkumulatur ma’ akkumulatur u ċilindru għall-industrija tal-gass. Barra minn hekk, hija sostniet li jenħtieġ li prodott nofsu lest ma jitqabbilx ma’ prodott lest għall-fini tal-kalkolu tad-dumping. Fl-aħħar nett, din il-kumpanija ddikjarat li qoxra tal-akkumulaturi hija mfassla speċifikament biex toqgħod f’akkumulatur imfassal, li t-tnejn li huma jirrikjedu ċertifikati speċifiċi rispettivament, u kkonkludiet li qoxra tal-akkumulatur ma tistax tiġi sostitwita b’HPSC għall-industrija tal-gass u ma tistax tintuża bħala prodott kummerċjali rilaxxat għaċ-ċirkolazzjoni fis-suq tal-UE.

(42)

Il-Kummissjoni analizzat it-talba għall-esklużjoni abbażi tal-elementi ppreżentati mill-parti inkwistjoni u kkonkludiet b’mod proviżorju li l-qxur tal-akkumulaturi jaqgħu taħt id-definizzjoni ta’ prodott skont il-premessa (21) u għandhom l-istess karatteristiċi fiżiċi, tekniċi u kimiċi bażiċi bħaċ-ċilindri l-oħrajn. Barra minn hekk, dawn kienu koperti mid-definizzjoni tal-prodott ikkonċernat u ġew identifikati fiċ-ċifri tal-kontroll tal-prodott użati mill-Kummissjoni għall-kalkolu tal-marġnijiet tad-dumping u tad-dannu, li jidentifikaw kif xieraq il-qxur tal-akkumulaturi u jippermettu b’mod adegwat lill-Kummissjoni twettaq tqabbil ġust tal-prezzijiet bejn il-produtturi tal-Unjoni u dawk Ċiniżi. Għalhekk, id-dikjarazzjoni ġiet miċħuda.

(43)

Fid-dawl tal-evidenza suffiċjenti disponibbli fil-bidu tal-investigazzjoni li għandha t-tendenza li turi, fir-rigward tar-Repubblika tal-Poplu taċ-Ċina (“RPĊ”), l-eżistenza ta’ distorsjonijiet sinifikanti skont it-tifsira tal-Artikolu 2(6a), il-punt (b), tar-Regolament bażiku, il-Kummissjoni qieset li huwa xieraq li tibda l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(44)

Konsegwentement, sabiex tinġabar id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika tal-Bidu l-Kummissjoni stiednet lill-produtturi esportaturi kollha fir-RPĊ biex jipprovdu informazzjoni dwar l-inputs użati għall-produzzjoni tal-prodott. Disa’ produtturi esportaturi ssottomettew l-informazzjoni relevanti.

(45)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jippreżentaw informazzjoni dwar l-inputs użati għall-produzzjoni ta’ ċilindri tal-azzar mingħajr weldjatura ta’ pressjoni għolja u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku sal-iskadenza. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(46)

Fil-punt 5.3.2 tan-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, kienet għażlet b’mod proviżorju lill-Brażil bħala pajjiż rappreżentattiv xieraq skont l-Artikolu 2(6a)(a) tar-Regolament bażiku għall-fini tad-determinazzjoni tal-valur normali abbażi ta’ prezzijiet jew valuri ta’ riferiment mingħajr distorsjoni. Il-Kummissjoni ddikjarat ukoll li kienet se teżamina pajjiżi rappreżentattivi oħrajn possibbilment xierqa f’konformità mal-kriterji stabbiliti fl-Artikolu 2(6a), l-ewwel inċiż, tar-Regolament bażiku.

(47)

Fit-13 ta’ Frar 2025, il-Kummissjoni infurmat b’nota (“l-Ewwel Nota”) lill-partijiet interessati dwar is-sorsi rilevanti li kien beħsiebha tuża għad-determinazzjoni tal-valur normali. F’din in-nota, il-Kummissjoni pprovdiet lista tal-fatturi kollha tal-produzzjoni, bħall-materja prima, il-manodopera u l-enerġija użati fil-produzzjoni tal-prodott ikkonċernat. Barra minn hekk, abbażi tal-kriterji li jiggwidaw l-għażla ta’ prezzijiet u parametri referenzjarji mingħajr distorsjoni, il-Kummissjoni identifikat pajjiżi rappreżentattivi possibbli, jiġifieri l-Brażil, l-Arġentina u t-Turkija bħala pajjiż rappreżentattiv xieraq. Il-Kummissjoni rċeviet kummenti dwar l-Ewwel Nota kif imsemmi fil-premessi (116) sa (131)

(48)

Fis-7 ta’ Marzu 2025, il-Kummissjoni infurmat bit-tieni nota (“it-Tieni Nota”) lill-partijiet interessati dwar is-sorsi rilevanti li kien beħsiebha tuża għad-determinazzjoni tal-valur normali, bit-Turkija bħala l-pajjiż rappreżentattiv. Infurmat ukoll lill-partijiet interessati li kienet se tistabbilixxi kostijiet ta’ bejgħ, ġenerali u amministrattivi (“kostijiet SG&A”, selling, general and administrative costs) u profitti bbażati fuq l-informazzjoni disponibbli għas-settur. Il-Kummissjoni rċeviet kummenti dwar it-Tieni Nota kif imsemmi fil-premessi (132) sa (145).

(49)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(50)

Madankollu, skont l-Artikolu 2(6a)(a) tar-Regolament bażiku, “[f]il-każ li jiġi determinat … li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” minn hawn ’il quddiem jissejħu “kostijiet SG&A”).

(51)

Kif spjegat aktar fid-dettall hawn taħt, fl-investigazzjoni attwali l-Kummissjoni kkonkludiet li, abbażi tal-evidenza disponibbli u fid-dawl tan-nuqqas ta’ kooperazzjoni mill-GTĊ, l-applikazzjoni tal-Artikolu 2(6a) tar-Regolament bażiku kienet xierqa.

(52)

F’investigazzjonijiet riċenti dwar is-settur tal-azzar fir-Repubblika tal-Poplu taċ-Ċina (“RPĊ”) (6), il-Kummissjoni sabet li kien hemm distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(53)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (7). B’mod partikolari, il-Kummissjoni kkonkludiet li fis-settur tal-azzar, li huwa l-materja prima prinċipali għall-produzzjoni tal-prodott taħt investigazzjoni, mhux biss għad hemm grad sostanzjali ta’ sjieda mill-Gvern taċ-Ċina (“GTĊ”) fis-sens tal-Artikolu 2(6a)(b), l-ewwel inċiż, tar-Regolament bażiku (8), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku (9). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett distorsiv addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (10). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġu ġġenerati distorsjonijiet b’mod partikolari meta jinżammu ħajjin ditti insolventi u meta jiġu allokati d-drittijiet għall-użu tal-art fir-RPĊ (11). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-azzar fis-sens tal-Artikolu 2(6a)(b), il-ħames inċiż, tar-Regolament bażiku (12), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (13).

(54)

Bħal fl-investigazzjonijiet preċedenti dwar is-settur tal-azzar fir-RPĊ, fl-investigazzjoni attwali l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a), il-punt (b), tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fl-ilment, kif ukoll fid-Dokument ta’ Ħidma tal-Persunal tal-Kummissjoni dwar “Significant Distortions in the Economy of the People’s Republic of China for the Purposes of Trade Defence Investigations” (14) (ir-“Rapport”), li jiddependi fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott taħt investigazzjoni. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif instab ukoll mill-investigazzjonijiet preċedenti tagħha f’dan ir-rigward.

(55)

L-ilment ipprovda eżempji ta’ elementi li jindikaw l-eżistenza ta’ distorsjonijiet, kif elenkati mill-ewwel sas-sitt inċiż tal-Artikolu 2(6a)(b) tar-Regolament bażiku, u allega li l-kundizzjonijiet tas-suq, b’mod partikolari l-kostijiet u l-prezzijiet, fl-industrija Ċiniża tal-azzar ma humiex xprunati mill-forzi tas-suq tal-provvista u tad-domanda, iżda minflok huma distorti mill-intervent mill-Istat fl-ekonomija.

(56)

L-ilment ipprovda wkoll referenzi għall-partijiet rilevanti tar-Rapport, u indika dan li ġej:

(57)

is-settur tal-azzar, inkluż is-suq tal-prodott ikkonċernat, huwa servut b’mod sinifikanti minn intrapriżi li joperaw taħt is-sjieda, il-kontroll jew is-superviżjoni politika jew il-gwida tal-awtoritajiet tal-pajjiż esportatur. Fir-rigward ta’ dan, l-ilmentaturi innotaw l-influwenza eżerċitata mill-Istat kemm permezz tal-preżenza ġenerali tal-Partit Komunista Ċiniż (“CCP”) fl-intrapriżi Ċiniżi kif ukoll permezz tar-rwol prominenti tagħhom fl-assoċjazzjonijiet.

(58)

L-ewwel nett, fl-ilment ġie msemmi li l-ekonomija Ċiniża topera prinċipalment permezz tal-SOEs, li jikkontribwixxu għal 25 % tal-PDG taċ-Ċina (15). Biex isaħħaħ dan, l-ilmentaturi innotaw li l-SOEs huma wkoll l-ixpruni ewlenin li jippermettu lill-Istat jimplimenta direttament il-politiki tiegħu fis-suq. Barra minn hekk, fir-rigward tas-settur tal-azzar, li jipproduċi l-materja prima ewlenija għall-manifattura tal-prodott ikkonċernat, issemma li l-SOEs jirrappreżentaw 40 % tal-produzzjoni tas-settur. Fil-fatt, erbgħa mill-akbar għaxar produtturi tal-azzar huma SOEs, fosthom Baowu Steel Group, HBIS Group, Ansteel Group u Shougang (16). L-ilmentaturi innotaw wkoll SOEs iżgħar oħra, bħal Maanshan iron & Steel Company Limited, Batou Steel Group u CITIC Pacific Special Steel, li huma importanti ħafna wkoll, bħala sors dirett tal-azzar għall-produtturi tal-HPSC fiċ-Ċina.

(59)

It-tieni nett, l-ilmentaturi semmew ir-rwol ewlieni tal-intervenzjoniżmu tal-GTĊ, permezz ta’ assoċjazzjonijiet. Dan ġie nnotat li huwa partikolarment minnu għas-settur tal-azzar u konsegwentement anke għas-suq tal-HPSC. Dan minħabba li fis-settur tal-azzar, l-assoċjazzjonijiet huma magħrufa li “għandhom ir-rwol ta’ pont u rabta bejn il-gvern u l-membri” (17). Fir-rigward ta’ dan, l-ilmentaturi semmew li għalkemm ma hemm l-ebda assoċjazzjoni kummerċjali speċifika tal-industrija tal-HPSC li timplimenta politiki industrijali, hemm atturi oħrajn, bħall-Kumitat Tekniku Nazzjonali għall-Istandardizzazzjoni taċ-Ċilindri tal-Gass (“TC31”) u l-Assoċjazzjoni taċ-Ċina tat-Tagħmir Speċjali ta’ Spezzjoni (“CASEI”, China Association of Special Equipment Inspection) li jeżegwixxu direttament l-istandards u r-regolamenti nazzjonali applikabbli għall-produtturi tal-HPSC (18).

(60)

L-influwenza tal-GTĊ fis-settur tal-azzar hija riflessa fil-produzzjoni tal-prodott ikkonċernat, li tippermettilu jeżerċita influwenza u kontroll tul il-katina tal-valur kollha.

(61)

Rigward il-preżenza tal-Istat f’ditti li jippermettu lill-Istat jinterferixxi mal-prezzijiet u l-kostijiet, l-ilmentaturi innotaw li kemm il-kumpaniji pubbliċi kif ukoll dawk privati involuti fil-produzzjoni tal-azzar b’mod ġenerali u tal-HPSC b’mod partikolari, huma taħt il-kontroll wiesa’ tal-GTĊ, u f’tali setturi dan jirriżulta f’distorsjoni tal-prezzijiet u tal-kostijiet tal-Istat. L-ilmentaturi iddikjaraw preżenza ġenerali ta’ membri tas-CCP kemm fl-SOEs kif ukoll f’kumpaniji privati, li tirriżulta speċifikament fl-involviment tas-CCP mhux biss fl-għażla tal-eżekuttivi iżda wkoll tar-riżorsi umani.

(62)

Barra minn hekk, l-ilmentaturi innotaw li fl-SOEs, l-organizzazzjonijiet fil-livell tal-partit għandhom l-obbligi li jimplimentaw il-prinċipji u l-politiki tal-partit. Dan huwa żgurat bl-eżistenza ta’ ċelloli tal-partit fil-kumpaniji, li huma meħtieġa joħolqu taqsima dixxiplinarja biex tiġi żgurata l-applikazzjoni tal-istruzzjonijiet tal-GTĊ. Minbarra dan, l-ilment innota sitwazzjoni simili għal kumpaniji privati. Fil-fatt, ġie nnotat li fl-2017, 70 % tal-1,86 miljun kumpanija privata kienu jinkludu ċelloli tas-CCP, li fihom kien hemm “pressjoni dejjem akbar sabiex l-organizzazzjonijiet tal-PKĊ ikollhom l-aħħar kelma fuq id-deċiżjonijiet kummerċjali fil-kumpaniji rispettivi tagħhom (19)”.

(63)

Barra minn hekk, ġie nnotat li s-CCP jitlob l-implimentazzjoni ta’ unitajiet magħrufa bħala “Fronti Magħquda” biex ikompli javvanza l-influwenza u l-ideoloġija tal-PKĊ f’kumpaniji privati permezz tal-istabbiliment ta’ “sistema moderna ta’ intrapriża b’karatteristiċi Ċiniżi.” B’mod partikolari, l-ilmentaturi ikkwotaw lill-Viċi President tal-All-China Federation of Industry and Commerce, li spjega li tali sistema għandha “tintegra t-tmexxija tal-Partit fl-aspetti kollha tal-pubbliku u tinkorpora l-organizzazzjoni tal-partit fl-istruttura tal-governanza korporattiva”. Huwa nnota wkoll li min-naħa tas-sistema tal-ekonomija privata, hija “trid taderixxi u ssaħħaħ it-tmexxija ġenerali tal-Partit”. Fl-2023, l-ilmentaturi rrapportaw li 92 % tal-aqwa 500 intrapriża privata taċ-Ċina jospitaw unitajiet tal-partit.

(64)

L-ilmentaturi semmew ukoll li l-GTĊ jinfluwenza wkoll il-ħatra ta’ eżekuttivi ewlenin u impjegati tar-riżorsi umani kemm fl-SOEs kif ukoll f’kumpaniji privati.

(65)

Fl-SOEs, pereżempju, is-CCP jestendi l-kontroll tiegħu permezz tal-proċedura ta’ ħatra ta’ eżekuttivi maniġerjali ewlenin. B’mod preċiż, l-ilmentaturi ddikjaraw li f’konformità mar-Regolamenti dwar il-Ħidma tal-Organizzazzjonijiet ta’ Bażi tal-Intrapriżi tal-Istat tal-Partit Komunista Ċiniż, “il-pożizzjonijiet tas-segretarju u l-president tal-kumitat tal-partit (grupp tal-partit) ġeneralment jinżammu minn persuna waħda, u l-maniġer ġenerali tal-membru tal-partit iservi bħala l-viċi segretarju (20).” Ir-regolamenti jirrikjedu bl-istess mod li f’kumpanija “mingħajr bord ta’ diretturi u diretturi eżekuttivi biss,” is-segretarju tal-kumitat tal-Partit għandu jkun id-direttur eżekuttiv u f’ “intrapriżi korporattivi mhux indipendenti” għandu jkun viċi maniġer ġenerali.

(66)

Fir-rigward tal-kumpaniji privati, l-ilment innota li dawk huma wkoll tal-parir li jistabbilixxu mekkaniżmu ta’ superviżjoni mmexxi miċ-ċellola tal-Partit b’setgħat dixxiplinarji biex jiġu żgurati “l-implimentazzjoni tal-konformità korporattiva u s-sistema ta’ ġestjoni korporattiva, it-twissija u l-edukazzjoni tal-maniġment tat-tmexxija u tal-persunal, is-superviżjoni u l-ġestjoni tal-persunal.” Jenħtieġ li l-mekkaniżmu ta’ superviżjoni jkollu wkoll is-setgħa fuq il-cadres u l-impjegati ewlenin biex “jirregolaw […] l-użu tas-setgħa (21).”

(67)

L-ilmentaturi żvelaw li tali distorsjonijiet ma humiex preżenti biss f’kumpaniji li jipproduċu l-prodott taħt investigazzjoni iżda wkoll fl-industrija upstream tiegħu, jiġifieri fis-settur tal-azzar. Dan ma huwiex biss minħabba s-sjieda u l-preżenza tal-Istat iżda wkoll minħabba politiki ta’ konsolidazzjoni differenti li rriżultaw f’fużjonijiet kbar bħal dik li saret fl-2016 li tinvolvi lill-Boasteel Group Corp u Wuhan Iron and Steel Group Corp li ngħaqdu f’Baowu Steel Group. F’dan il-każ, il-president tal-bord tal-maniġers ma huwiex biss is-segretarju tas-CCP iżda wkoll il-president tat-trade union tal-kumpanija.

(68)

B’riżultat ta’ dan, l-ilmentaturi ikkonkludew li l-kumpaniji attivi fis-setturi tal-HPSC u tal-azzar huma ristretti ħafna għall-GTĊ. Tali interventiżmu jfixkel id-dinamika tas-suq, u jaffettwa l-iffissar tal-prezzijiet u l-kostijiet.

(69)

L-ilmentaturi iddikjaraw ukoll li politiki jew miżuri pubbliċi jiddiskriminaw favur fornituri domestiċi jew li b’xi mod ieħor jinfluwenzaw il-forzi tas-suq ħieles. L-ilmentaturi allegaw li l-GTĊ stabbilixxa sistema ta’ ppjanar li tinċentiva direttament lill-industrija tal-prodott ikkonċernat u lis-setturi upstream, fosthom dak tal-azzar, li tirriżulta f’influwenza qawwija fuq il-forzi tas-suq. L-ilmentaturi saħqu fuq in-natura vinkolanti ta’ tali pjanijiet, peress li l-implimentazzjoni hija awtorizzata mil-liġi, inkluż fil-livell kostituzzjonali. L-ilmentaturi nnotaw li tali sistema tal-ippjanar tirriżulta f’“riżorsi jiġu allokati lil setturi ddeżinjati bħala strateġiċi jew inkella politikament importanti mill-gvern, minflok ma jiġu allokati skont il-forzi tas-suq” (22).

(70)

Fir-rigward tas-settur tal-azzar, l-ilmentaturi ddikjaraw mill-ġdid diversi regolamenti tal-Kummissjoni li jirrikonoxxu d-distorsjonijiet, speċjalment fir-rigward tal-komponenti ewlenin tal-HPSC. B’mod partikolari, l-ilmentaturi rreferew għar-Rapport dwar l-importanza strateġika tal-pjan għall-iżvilupp tal-materja prima u l-14-il FYP (“l-14-il FYP”, Five-Year Plan) għall-iżvilupp soċjali u ekonomiku.

(71)

L-ilmentaturi allegaw ukoll li hemm nuqqas ta’ applikazzjoni jew infurzar diskriminatorju u inadegwat tal-liġijiet dwar il-fallimenti, il-kumpaniji jew il-proprjetà. L-ilmentaturi ddikjaraw li l-liġijiet dwar il-falliment fiċ-Ċina ma humiex infurzati biżżejjed. Dan ġie ddikjarat li huwa r-riżultat tar-relazzjoni mill-qrib bejn l-amministraturi tal-insolvenza u l-gvern lokali, u tal-influwenza ġenerali tal-gvern fl-affarijiet korporattivi. Ġie nnotat li dan iffavorixxa wkoll il-ħolqien ta’ “negozji ekonomikament mhux disponibbli, normalment f’industriji b’kapaċità żejda gravi ħafna (23) .” Dan huwa partikolarment evidenti għall-produtturi tal-HPSC (jiġifieri Bohai Iron and Steel Group), f’kuntest li fih l-eċċess tal-kapaċitajiet tal-produzzjoni jinżamm mill-Istat.

(72)

Barra minn hekk, l-ilmentaturi nnotaw sejbiet preċedenti tal-Kummissjoni rigward is-setturi upstream tal-prodott ikkonċernat (jiġifieri s-settur tal-azzar u s-suq tal-HPSC b’mod partikolari), li bbenefikaw minn allokazzjoni selettiva tal-art. Huma nnotaw li l-art hija proprjetà tal-Istat biss, u li l-allokazzjoni tagħha hija fil-kompetenza esklużiva tal-Istat (24). Dan iwassal biex l-Istat jingrana l-liġijiet tiegħu dwar il-proprjetà favur il-produtturi domestiċi tal-HPSC u fis-settur tal-azzar.

(73)

L-ilmentaturi nnotaw ukoll interventi sinifikanti tar-RPĊ fuq il-pagi, li jaffettwaw il-katina tal-valur kollha u jsiru aktar severi hekk kif il-katina tal-valur tittawwal. Tali distorsjonijiet huma ddikjarati li huma doppji, l-ewwel iseħħu meta jiġu prodotti l-HPSC jew l-inputs ewlenin tagħhom, u t-tieni indirettament meta jiġu aċċessati l-inputs minn kumpaniji li joperaw taħt l-istess sistema lavorattiva Ċiniża.

(74)

Fl-aħħar nett, l-ilmentaturi ddikjaraw li s-swieq finanzjarji fiċ-Ċina joperaw biex “jiżguraw il-kontroll u jippermettu l-intervent mill-Istat u mis-CCP (25) .” Huma nnotaw li l-Istat jikkontrolla erbgħa mill-akbar banek, u jipprovdi finanzjament preferenzjali lill-SOEs għal raġunijiet ta’ politika. Huma ddikjaraw ukoll id-distorsjonijiet tal-bonds u tal-klassifikazzjonijiet tal-kreditu, peress li ħafna kumpaniji jirċievu rata aktar baxxa fuq livell internazzjonali meta mqabbla ma’ dik Ċiniża. Dan għaliex ħafna aġenziji tal-klassifikazzjoni jippermettu lill-mutwatarji jagħżlu l-aktar klassifikazzjoni ta’ benefiċċju, u rarament jirriżultaw f’inadempjenzi. Meta titqies id-dominanza tal-SOEs fl-industrija, dan huwa ta’ rilevanza partikolari għas-settur tal-azzar u għall-produzzjoni tal-HPSC li tirriżulta.

(75)

Barra minn hekk, fl-ilment ġie nnotat li l-preżenza tal-Istat fis-suq twassal għal ipprezzar sostanzjalment aktar baxx fl-IPOs. Dan huwa kkawżat mit-tentattiv tal-Istat li jsegwi għanijiet ta’ politika permezz tal-IPOs. Permezz ta’ tali aċċess preferenzjali għall-finanzjament, l-assi miżmuma mill-SOEs ikkontrollati mis-SASAC żdiedu b’ħames darbiet bejn l-2005 u l-2017 u laħqu EUR 7,1 triljun (26). Fl-aħħar nett, l-ilmentaturi żvelaw li, peress li huwa s-settur tal-azzar fost l-industriji mħeġġa, dan jibbenefika minn finanzjament aktar aċċessibbli, li huwa wkoll ta’ benefiċċju indirett għas-suq tal-prodott ikkonċernat.

(76)

Bħala konklużjoni, l-ilmentaturi kkunsidraw li, minħabba dawn id-distorsjonijiet minn intervent sostanzjali tal-gvern, il-kostijiet u l-prezzijiet fiċ-Ċina ma humiex affidabbli għall-fini tad-determinazzjoni tal-valur normali. Bħala tali, il-valur normali jenħtieġ li jiġi stabbilit bl-użu ta’ kostijiet tal-produzzjoni mingħajr distorsjoni f’pajjiż rappreżentattiv xieraq.

(77)

L-investigazzjoni tal-Kummissjoni kkonfermat li fis-settur tal-prodott taħt investigazzjoni, li huwa parti mis-settur tal-azzar downstream, għad hemm grad sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż, tar-Regolament bażiku. Pereżempju, Tianjin Tianhai High Pressure Container Corp., Ltd. (27), produttur u esportatur tal-prodott taħt investigazzjoni, hija fl-aħħar mill-aħħar ikkontrollata minn Beijing Jingcheng Machinery Electric Company Ltd. (28), SOE li fl-aħħar mill-aħħar hija kkontrollata mill-Gvern tal-Muniċipalità ta’ Beijing (29). Eżempju ieħor huwa Sinoma Science & Technology Co., Ltd. (30) li hija kkontrollata miċ-China National Building Materials Group Co., Ltd. (31), SOE taħt SASAC (32). Filwaqt li l-Kummissjoni ma identifikatx informazzjoni estensiva dwar is-sjieda tal-Istat fost il-produtturi tal-HPSC, għad hemm grad sostanzjali ta’ sjieda mill-GTĊ fis-settur tal-azzar Ċiniż, li jipproduċi l-materja prima ewlenija għall-produzzjoni tal-HPSC. Ħafna mill-akbar produtturi tal-azzar huma proprjetà tal-Istat. Eżempji ta’ SOEs attivi fis-settur tal-azzar jinkludu: l-Ansteel Group (33) u l-Baowu Steel Group (34), li t-tnejn huma SOEs taħt il-Kummissjoni Ċentrali għas-Superviżjoni u l-Amministrazzjoni tal-Assi tal-Istat tal-Kunsill tal-Istat (“SASAC”, State-owned Assets Supervision and Administration Commission of the State Council); il-Baotou Steel Group, SOE proprjetà tal-Gvern tal-Mongolja Interna (35); kif ukoll Shougang Group (36), SOE proprjetà sħiħa tal-Beijing State-Owned Asset Management Ltd. (37)

(78)

Barra minn hekk, l-aktar dokumenti ta’ politika Ċiniżi reċenti dwar is-settur tal-azzar jikkonfermaw l-importanza kontinwa li l-GTĊ jattribwixxi lis-settur, inkluża l-intenzjoni li jintervjeni fis-settur sabiex jifformah f’konformità mal-politiki tal-gvern. Dan jidher mill-Opinjoni Gwida tal-Ministeru għall-Industrija u t-Teknoloġija tal-Informazzjoni (“MIIT”, Ministry of Industry and Information Technology) dwar it-Trawwim ta’ Żvilupp ta’ Kwalità Għolja tal-Industrija tal-Azzar, li titlob għal aktar konsolidazzjoni tal-pedament industrijali u titjib sinifikanti fil-livell ta’ modernizzazzjoni tal-katina industrijali (38), inkluża l-provvista ta’ azzar speċjali, input użat għall-produzzjoni tal-prodott taħt investigazzjoni. B’mod speċifiku, din l-Opinjoni Gwida tirrikjedi “il-promozzjoni tal-fużjonijiet u r-riorganizzazzjonijiet tal-intrapriżi. Tinkoraġġixxi intrapriżi ewlenin fl-industrija biex jimplimentaw fużjonijiet u riorganizzazzjonijiet u joħolqu għadd ta’ gruppi ta’ intrapriżi tal-azzar kbar ħafna ta’ klassi dinjija. Filwaqt li jiddependu fuq l-intrapriżi dominanti tal-industrija, jikkultivaw intrapriża waħda jew tnejn speċjalizzati fl-oqsma tal-azzar inossidabbli, l-azzar speċjali, pajpijiet tal-azzar mingħajr weldjatura (...).” Barra minn hekk, din tirrikjedi b’mod espliċitu li “[L-]impriżi tal-azzar jiġu megħjuna biex jimmiraw lejn li jtejbu l-industriji downstream u d-direzzjoni tal-iżvilupp ta’ industriji emerġenti strateġiċi, jiffokaw fuq l-iżvilupp ta’ lottijiet żgħar u diversi varjetajiet ta’ azzar ewlenin bħal azzar speċjali ta’ kwalità għolja, azzar illigat speċjali għal tagħmir ta’ livell għoli (39).”

(79)

Eżempju ieħor tal-intenzjoni tal-GTĊ li jintervjeni fis-settur tal-azzar jinstab fl-14-il FYP li skontu s-settur se “jaderixxi mal-kombinazzjoni tat-tmexxija tas-suq u l-promozzjoni tal-gvern” u se “jikkultiva grupp ta’ kumpaniji ewlenin bi tmexxija ekoloġika u kompetittività ewlenija” (40).

(80)

Barra minn hekk, il-Pjan ta’ Ħidma tal-MIIT 2023 dwar it-Tkabbir Stabbli tal-Industrija tal-Azzar (41) jistabbilixxi l-objettivi li ġejjin: “Fl-2023, [...] l-investiment f’assi fissi fl-industrija kollha għandu jżomm tkabbir kostanti, u l-benefiċċji ekonomiċi għandhom jittejbu b’mod sinifikanti; l-investiment fir-R&Ż tal-industrija għandu eventwalment jilħaq il-1,5 %; it-tkabbir tal-valur miżjud tal-industrija għandu jilħaq madwar it-3,5 %; fl-2024, l-ambjent tal-iżvilupp tal-industrija u l-istruttura tal-industrija għandhom jiġu ottimizzati aktar, il-bidla lejn prodotti ta’ livell għoli, intelliġenti u ekoloġiċi għandha tkompli, u t-tkabbir tal-valur miżjud tal-industrija għandu jaqbeż l-4 %”, u jipprevedi konsolidazzjoni korporattiva obbligatorja tas-settur tal-azzar min-naħa tal-gvern: “[it-]tħeġġiġ lill-intrapriżi ewlenin fl-industrija biex jimplimentaw fużjonijiet u akkwiżizzjonijiet, jibnu gruppi ta’ intrapriżi tal-ħadid u tal-azzar kbar ħafna ta’ klassi dinjija, u t-trawwim tal-aħjar tqassim tal-kapaċità nazzjonali tal-produzzjoni tal-ħadid u tal-azzar. L-appoġġ għall-intrapriżi speċjalizzati b’setgħa ewlenija b’mod partikolari segmenti tas-suq tal-azzar sabiex ikomplu jintegraw ir-riżorsi u joħolqu ekosistema tal-industrija tal-azzar. It-tħeġġiġ lill-intrapriżi tal-ħadid u tal-azzar sabiex iwettqu attivitajiet transreġjonali […] fużjonijiet u riorganizzazzjonijiet […]. Il-kunsiderazzjoni tal-għoti ta’ appoġġ politiku akbar għas-sostituzzjoni tal-kapaċità lill-intrapriżi tal-ħadid u tal-azzar li wettqu fużjonijiet u riorganizzazzjonijiet sostantivi.”

(81)

Eżempji simili tal-intenzjoni tal-GTĊ li jwettaq superviżjoni u jiggwida l-iżviluppi tas-settur tal-azzar jistgħu jidhru fil-livell provinċjali, bħal f’Hebei fejn il-gvern provinċjali ħareġ il-Pjan ta’ Azzjoni ta’ 3 Snin dwar l-Iżvilupp tar-Raggruppamenti fil-Katina tal-Industrija tal-Azzar fl-2020. Dan il-pjan jirrikjedi “l-implimentazzjoni b’mod kostanti tal-iżvilupp tal-grupp ta’ organizzazzjonijiet, jaċċellera r-riforma tas-sjieda mħallta ta’ intrapriżi tal-Istat, jiffoka fuq il-promozzjoni tal-fużjoni u r-riorganizzazzjoni interreġjonali tal-intrapriżi privati tal-ħadid u tal-azzar, u jistinka biex jistabbilixxi minn 1–2 gruppi kbar ta’ klassi dinjija, minn 3–5 gruppi kbar b’influwenza domestika.” (42) Barra minn hekk, il-pjan ta’ Hebei fis-settur tal-azzar jiddikjara li: “ikun hemm konformità mal-aġġustament strutturali u tiġi enfasizzata d-diversifikazzjoni tal-prodott. Jiġu promossi bla waqfien l-aġġustament strutturali u l-ottimizzazzjoni tat-tqassim tal-industrija tal-ħadid u tal-azzar, jiġu promossi l-konsolidazzjoni, ir-riorganizzazzjoni, it-trasformazzjoni u t-titjib tal-intrapriżi, u jiġu promossi b’mod komprensiv l-iżvilupp tal-industrija tal-ħadid u tal-azzar fid-direzzjoni ta’ intrapriżi fuq skala kbira, il-modernizzazzjoni tat-tagħmir tekniku, id-diversifikazzjoni tal-proċessi tal-produzzjoni, u d-diversifikazzjoni tal-prodotti downstream (43) .”

(82)

B’mod aktar speċifiku fir-rigward tal-inputs użati għall-produzzjoni tal-prodott taħt investigazzjoni, il-Pjan ta’ Hebei jirrikjedi li jiġu aċċellerati l-iżvilupp u l-applikazzjoni ta’ materjali tal-azzar ġodda ta’ livell għoli u ewlenin, jiżdied il-proporzjon ta’ varjetajiet tal-azzar ta’ kwalità għolja u speċjali, tissaħħaħ l-istabbiltà tal-kwalità ta’ prodotti vantaġġużi fuq skala kbira u fuq firxa wiesgħa, u tinħoloq struttura tal-prodott “piramida”. Sa tmiem l-2020, il-proporzjon tal-azzar ordinarju b’liga baxxa u tal-azzar illigat se jiżdied għal 20 %, u sa tmiem l-2022, se jilħaq madwar 25 %, u se jipprovdi appoġġ u garanzija għat-titjib tal-industriji downstream.”  (44)

(83)

Bl-istess mod, il-Pjan ta’ Implimentazzjoni ta’ Henan għat-Trasformazzjoni u l-Aġġornament tal-Industrija tal-Azzar matul l-14-il FYP jirrikjedi li “jiffoka fuq il-ħtiġijiet strateġiċi nazzjonali, jiggwida lill-intrapriżi biex jippromwovu l-ottimizzazzjoni u l-aġġornament tal-istruttura tal-prodott, jiżviluppaw azzar speċjali ta’ kwalità għolja, azzar tal-inġinerija marittima ta’ prestazzjoni għolja, azzar illigat speċjali għal tagħmir ta’ livell għoli, partijiet bażiċi ewlenin tal-azzar u varjetajiet ewlenin oħra “speċjali, fini, għoljin”, u jtejbu l-valur miżjud u l-kompetittività tal-prodotti tal-azzar.” (45)

(84)

B’mod aktar speċifiku, f’Zhejiang, fejn tinsab Zhejiang Winner Fire Fighting Equipment Co., Ltd., il-GTĊ ifittex li “jesplora u jistabbilixxi integrazzjoni innovattiva ta’ intrapriżi upstream u downstream fil-qasam tal-azzar ewlieni għat-tagħmir. (46)”

(85)

Objettivi tal-politika industrijali simili jistgħu jinstabu wkoll fid-dokumenti tal-ippjanar ta’ provinċji oħra, bħal Jiangsu (47), Shandong (48), jew Shanxi (49).

(86)

Barra minn hekk, il-GTĊ jintervjeni wkoll fil-livell lokali fl-industrija tal-azzar. Pereżempju, “il-ħames bliet fin-Nofsinhar ta’ Jiangsu, inkluż Nanjing, Wuxi, Suzhou, Changzhou u Zhenjiang, gradwalment stabbilew sistema tal-industrija ta’ azzar speċjali u ta’ liga ta’ livell għoli bi skala ewlenija, varjetajiet ta’ livell għoli u faċilitajiet ta’ appoġġ kompluti, li jiffurmaw ħames ktajjen industrijali vantaġġuża inkluż pjanċi tal-azzar speċjali ta’ prestazzjoni għolja ta’ Nanjing, staneg tal-azzar speċjali ta’ livell għoli ta’ Wuxi, wajers tal-azzar speċjali ta’ kwalità għolja ta’ Suzhou, azzar inossidabbli ta’ livell għoli ta’ Changzhou, u ligi ta’ livell għoli ta’ Zhenjiang. L-iskala industrijali u l-kompetittività komprensiva jikklassifikaw l-ewwel fil-pajjiż (50) .”

(87)

Barra minn hekk, eżempju ieħor ta’ gwida effettiva mill-GTĊ permezz tal-pjanijiet hija n-Notifika tal-Kumitat tal-Partit tal-Ansteel Group Co., Ltd. dwar l-istudju, il-pubbliċità u l-implimentazzjoni b’mod kuxjenzjuż tal-ispirtu tal-20 Kungress Nazzjonali tal-Partit (51). In-notifika tiddikjara li l-Ansteel Group se jimplimenta b’mod kuxjenzjuż il-pjanijiet ta’ gwida u jintroduċihom aħjar lill-membri tal-Partit, lill-cadres u lill-impjegati tal-grupp kollu.

(88)

Fir-rigward tal-fatt li l-GTĊ huwa f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku, l-investigazzjoni kkonfermat li jeżistu wkoll duplikazzjonijiet bejn il-pożizzjonijiet maniġerjali u s-sħubija fis-CCP / il-funzjonijiet tal-Partit fis-settur taħt investigazzjoni. Pereżempju, il-President ta’ Beijing Jingcheng Machinery Electric Company Ltd. iservi wkoll bħala s-Segretarju tal-Kumitat tal-Partit (52) u jiżgura li s-sussidjarja tiegħu, Tianjin Tianhai High Pressure Container Corp., Ltd. “tippromwovi l-implimentazzjoni tal-istrateġija (…), u tagħmel dak kollu li tista’ biex tirbaħ il-battalja finali tal-“14-il Pjan ta’ 5 Snin (53) .” Barra minn hekk, il-President ta’ China National Building Materials Group Co., Ltd. iservi wkoll bħala s-Segretarju tal-Kumitat tal-Partit (54).

(89)

Barra minn hekk, China National Building Materials Group Co., Ltd. “tieħu bħala r-responsabbiltà [tagħha] li (…) taqdi l-proġetti nazzjonali ewlenin, taqdi l-kamp tal-battalja tal-ekonomija nazzjonali” u flimkien mas-sussidjarji tagħha “għamlet sforzi bla waqfien biex tippromwovi l-iżvilupp ta’ kwalità għolja tal-industrija tal-ħżin u t-trasport tal-gass (55).”

(90)

Barra minn hekk, minħabba li l-prodott taħt investigazzjoni jirrappreżenta sottosettur tas-settur tal-azzar, l-informazzjoni disponibbli fir-rigward tal-produtturi tal-azzar hija rilevanti wkoll għall-prodott taħt investigazzjoni.

(91)

Pereżempju, il-President tal-Bord tad-Diretturi u l-Maniġer Ġenerali ta’ Baoshan Iron and Steel Ltd., produttur tal-azzar li l-azzjonist kontrollanti tiegħu huwa l-Baowu Steel Group, iservu wkoll bħala s-Segretarju u l-Viċi Segretarju, rispettivament, tal-Kumitat tal-Partit tal-kumpanija (56). Bl-istess mod, il-President tal-Bord tad-Diretturi ta’ Wuhan Iron and Steel Group, ikkontrollat ukoll mill-Baowu Steel Group, iservi bħala s-Segretarju tal-Kumitat tal-Partit (57). Barra minn hekk, “Wuhan Iron and Steel Group organizza l-għaxar studju ċentralizzat u diskussjoni tal-Grupp ta’ Studju tat-Teorija tal-Kumitat tal-Partit fl-2022 biex iwassal u jistudja l-ispirtu tal-Konferenza ta’ Ħidma Ekonomika Ċentrali u jippromwovi l-implimentazzjoni tad-deċiżjonijiet u l-arranġamenti tal-20 Kungress Nazzjonali tal-Partit u l-ispirtu tal-Konferenza ta’ Ħidma Ekonomika Ċentrali fil-Wuhan Iron and Steel Group. [Ir-]Rappreżentant Ġenerali tal-Kwartieri Ġenerali ta’ China Baowu Wuhan, is-Segretarju tal-Kumitat tal-Partit u l-President ta’ Wuhan Iron and Steel Group, ippresedew il-laqgħa u ppreżentaw rekwiżiti għall-implimentazzjoni tar-rekwiżiti tal-Kumitat Ċentrali tal-Partit, il-Kumitat tal-Partit Provinċjali ta’ Hubei u l-Kumitat tal-Partit ta’ China Baowu, u komplew jimplimentaw l-ispirtu tal-Konferenza ta’ Ħidma Ekonomika Ċentrali (58)”.

(92)

Barra minn hekk, il-President tal-Bord tad-Diretturi ta’ Baotou Steel Union, li jappartjeni għal Baotou Steel Group, iservi wkoll bħala s-Segretarju tal-Partit tal-kumpanija. Bl-istess mod, il-Maniġer Eżekuttiv ta’ Baotou Steel Union kif ukoll il-President tat-trade union tal-kumpanija, it-tnejn huma Viċi Segretarji tal-Partit (59). Barra minn hekk, f’Shougang Group, il-President tal-Bord tad-Diretturi jservi bħala s-Segretarju tal-Kumitat tal-Partit, filwaqt li l-Maniġer Eżekuttiv huwa l-Viċi Segretarju tal-Kumitat tal-Partit tal-kumpanija (60). Fl-aħħar nett, f’CITIC Pacific Special Steel, il-President tal-Bord tad-Diretturi u l-President tal-Bord Superviżorju huma rispettivament Segretarju u Viċi Segretarju tal-Kumitat tal-Partit (61).

(93)

Iċ-China Industrial Gases Industry Association (62) (“CIGIA”) hija rilevanti għall-prodott taħt investigazzjoni peress li stabbiliet taqsima ddedikata għall-apparat ta’ pressjoni (63). Is-CIGIA hija membru taċ-China Petroleum and Chemical Industry Federation (“CPCIF”) u tokkupa l-Viċi Presidenza eżekuttiva tas-CPCIF (64). Is-CPCIF taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet meħtieġa għall-attivitajiet tal-organizzazzjonijiet tal-partit (65). Barra minn hekk, “l-awtorità ta’ reġistrazzjoni u ġestjoni tal-Assoċjazzjoni hija l-Ministeru għall-Affarijiet Ċivili” (66) u l-kundizzjonijiet biex wieħed ikun eliġibbli bħala rappreżentant tas-CPCIF jinkludu li “jaderixxi mat-tmexxija tas-CCP, jappoġġa s-soċjaliżmu b’karatteristiċi Ċiniżi, jimplimenta b’mod riżolut il-linja, il-prinċipji u l-politiki tal-Partit, u jħaddan kwalitajiet politiċi tajbin” (67).

(94)

Beijing Jingcheng Machinery Electric Company Ltd. hija membru tas-CIGIA (68).

(95)

Bl-istess mod, l-Artikolu 2 tal-Artikoli taċ-China Iron and Steel Association (69) (“CISA”), li l-produtturi ewlenin tal-ħadid u tal-azzar huma membri tagħha, jistipula li “l-għan tal-Assoċjazzjoni huwa li tkun iggwidata mil-linja, mill-prinċipji u mill-politiki tal-Partit” u l-Artikolu 3 jiddikjara li l-Assoċjazzjoni “taderixxi mat-tmexxija ġenerali tal-Partit Komunista taċ-Ċina, tistabbilixxi l-organizzazzjoni tal-Partit Komunista taċ-Ċina f’konformità mad-dispożizzjonijiet tal-Kostituzzjoni tal-Partit Komunista taċ-Ċina, twettaq attivitajiet tal-Partit, u tipprovdi l-kundizzjonijiet meħtieġa għall-attivitajiet tal-organizzazzjonijiet tal-Partit. (70)”

(96)

Barra minn hekk, fis-settur tal-azzar Ċiniż hemm fis-seħħ politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż, tar-Regolament bażiku, u dawn huma ġeneralment applikabbli għall-prodott taħt investigazzjoni minħabba li l-industrija tal-HPSC hija sottosettur tas-settur tal-azzar.

(97)

L-industrija tal-azzar titqies b’mod konsistenti bħala industrija ewlenija mill-GTĊ (71). Dan huwa kkonfermat fil-bosta pjanijiet, direttivi u dokumenti oħrajn iffokati fuq is-settur, li jinħarġu fil-livell nazzjonali, reġjonali u muniċipali. Skont l-14-il FYP, il-GTĊ immarka lill-industrija tal-azzar għat-trasformazzjoni u għall-aġġornament, kif ukoll għall-ottimizzazzjoni u għall-aġġustament strutturali (72). Bl-istess mod, l-14-il FYP dwar l-Iżvilupp tal-Industrija tal-Materja Prima, applikabbli wkoll għall-industrija tal-azzar, jelenka s-settur bħala l-“pedament tal-ekonomija reali” u “qasam ewlieni li jsawwar il-vantaġġ kompetittiv internazzjonali taċ-Ċina” u jistabbilixxi għadd ta’ objettivi u metodi ta’ ħidma li jixprunaw l-iżvilupp tas-settur fil-perjodu ta’ żmien mill-2021 sal-2025, bħall-aġġornament teknoloġiku, it-titjib tal-istruttura tas-settur (mhux l-inqas permezz ta’ aktar konċentrazzjonijiet korporattivi) jew it-trasformazzjoni diġitali (73).

(98)

Barra minn hekk, il-Pjan ta’ Ħidma msemmi hawn fuq dwar it-Tkabbir Stabbli tal-Industrija tal-Azzar (ara l-premessa (80)) juri kif l-enfasi tal-awtoritajiet Ċiniżi fuq is-settur titqiegħed fil-kuntest usa’ tal-GTĊ li jmexxi l-ekonomija Ċiniża: “l-appoġġ lill-kumpaniji tal-azzar sabiex isegwu mill-qrib il-ħtiġijiet ta’ infrastruttura ġdida, ta’ urbanizzazzjoni ġdida, ta’ rivitalizzazzjoni rurali, u ta’ industriji emerġenti, l-allinjament ma’ proġetti tal-inġinerija kbar li huma marbutin mal-‘14-il Pjan ta’ 5 Snin’ f’diversi reġjuni, u t-twettiq ta’ kull sforz biex tiġi żgurata l-provvista tal-azzar. L-istabbiliment u l-approfondiment ta’ mekkaniżmi ta’ kooperazzjoni upstream u downstream bejn l-azzar u s-setturi ewlenin li jużaw l-azzar bħall-bini tal-bastimenti, it-trasport, il-kostruzzjoni, l-enerġija, il-karozzi, l-apparati domestiċi, il-makkinarju agrikolu, u t-tagħmir tqil, it-twettiq ta’ attivitajiet ta’ allinjament bejn il-produzzjoni u d-domanda, u l-espansjoni b’mod attiv tal-oqsma ta’ applikazzjoni tal-azzar” (74).

(99)

Fil-livell lokali, l-14-il FYP ta’ Shandong għall-Iżvilupp tal-Industrija tal-Ħadid u l-Azzar (75) jirrikjedi dan li ġej: “azzar għal żejt u tagħmir kimiku: f’konformità mal-ħtiġijiet tal-iżvilupp tas-settur taż-żejt u tas-sustanzi kimiċi, tiżdied il-prestazzjoni tal-azzar użat għall-apparat ta’ pressjoni (76) (…)”.

(100)

Barra minn hekk, fil-livell lokali, f’Jiangsu jfittex li “[j]iffoka fuq l-iżvilupp tal-azzar għall-karozzi, il-ferroviji b’veloċità għolja, il-vapuri, l-elettriku, it-trasport taż-żejt u tal-gass […]. Sal-2025, l-iskala tal-industrija se tilħaq madwar 90 biljun yuan (77)” u għadd ta’ muniċipalitajiet stabbilew ir-“Ragruppament ta’ Materjali ta’ Azzar Speċjali […] li jistinka biex sal-2027 jintlaħaq il-valur tal-output ta’ RMB 1 triljun tal-industriji mmexxija mir-raggruppamenti (78).”

(101)

Minbarra dan ta’ hawn fuq, Sinoma Science & Technology Co., Ltd. ġiet elenkata bħala “ġgant żgħir” (79). Il-GTĊ jiddefinixxi kumpaniji “ġganti żgħar” bħala “l-eliti ġodda ta’ intrapriżi żgħar u ta’ daqs medju taċ-Ċina li huma involuti fil-manifattura, jispeċjalizzaw f’suq niċċa u li għandhom teknoloġiji mill-aktar avvanzati” u għandu l-ħsieb li “jżid l-appoġġ għall-‘ġganti żgħar’ matul il-perjodu mill-2024 sal-2026, b’enfasi fuq ktajjen industrijali ewlenin, industriji emerġenti strateġiċi u setturi oħrajn. Dawn il-fondi se jintużaw biex iħeġġu lil dawn id-ditti jindirizzaw l-isfidi teknoloġiċi, jiżviluppaw prodotti ġodda, jibnu l-kapaċitajiet ta’ appoġġ tal-katina industrijali, u jappoġġaw lill-gvernijiet lokali fit-trawwim ta’ ‘ġganti żgħar’ ” (80).

(102)

Fil-qosor, il-GTĊ għandu miżuri fis-seħħ biex iħeġġeġ lill-operaturi jikkonformaw mal-objettivi tal-ordni pubbliku li jappoġġaw lill-industriji mħeġġa, inkluż il-produzzjoni tal-materja prima ewlenija użata għall-manifattura tal-prodott taħt investigazzjoni. Tali miżuri jimpedixxu l-forzi tas-suq milli joperaw b’mod ħieles.

(103)

L-investigazzjoni attwali ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà fis-settur tal-azzar, skont l-Artikolu 2(6a)(b), ir-raba’ inċiż, tar-Regolament bażiku, ma jaffettwawx lill-manifatturi tal-prodott taħt investigazzjoni.

(104)

Il-prodott taħt investigazzjoni huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż, tar-Regolament bażiku, kif imsemmi wkoll hawn fuq fil-premessa (53)(53). Dawk id-distorsjonijiet jaffettwaw lis-settur kemm b’mod dirett (meta jipproduċi l-prodott taħt investigazzjoni jew l-inputs ewlenin), kif ukoll b’mod indirett (meta jkollu aċċess għal inputs minn kumpaniji soġġetti għall-istess sistema tal-manodopera fir-RPĊ) (81).

(105)

Barra minn hekk, ma tressqet l-ebda evidenza fl-investigazzjoni attwali li turi li s-settur tal-prodott taħt investigazzjoni ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż, tar-Regolament bażiku, kif imsemmi wkoll hawn fuq fil-premessa (53). Il-Pjan ta’ Ħidma msemmi hawn fuq (ara l-premessa (78)) dwar it-Tkabbir Stabbli juri tajjeb ħafna wkoll dan it-tip ta’ intervent mill-gvern: “l-istituzzjonijiet finanzjarji jiġu mħeġġa jipprovdu b’mod attiv servizzi finanzjarji lill-kumpaniji tal-azzar li jimplimentaw fużjonijiet u riorganizzazzjonijiet, aġġustamenti tat-tqassim, trasformazzjoni u aġġornament, f’konformità mal-prinċipji tal-kontroll tar-riskju u tas-sostenibbiltà tan-negozju.” Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod sever fil-livelli kollha.

(106)

Fl-aħħar nett, il-Kummissjoni tfakkar li sabiex jiġi prodott il-prodott taħt investigazzjoni, huma meħtieġa għadd ta’ inputs. Meta l-produtturi tal-prodott taħt investigazzjoni jixtru/jikkuntrattaw dawn l-inputs, il-prezzijiet li dawn iħallsu (u li jiġu rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/fl-allokazzjoni tal-kapital. Minbarra dan, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(107)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt investigazzjoni ma humiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fit-Taqsimiet I u II tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fir-RPĊ billi ġew ikkombinati firxa ta’ fatturi ta’ produzzjoni, huwa espost għal distorsjonijiet sinifikanti. L-istess japplika għall-input tal-input u l-bqija.

(108)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt investigazzjoni, inklużi l-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħielsa minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku kif muri mill-impatt reali jew potenzjali ta’ wieħed jew aktar mill-elementi rilevanti elenkati fih. Abbażi ta’ dak, il-Kummissjoni kkonkludiet li, f’dan il-każ, ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali.

(109)

Il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali pprovduta mill-ilmentaturi, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(110)

Il-Kummissjoni ma rċeviet l-ebda kumment mingħand il-partijiet interessati b’rabta mal-eżistenza ta’ distorsjonijiet sinifikanti fir-RPĊ.

(111)

Fid-dawl ta’ dan ta’ hawn fuq, il-Kummissjoni pproċediet biex taħdem il-valur normali esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-taqsima li ġejja.

(112)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(113)

Kif spjegat fil-premessi (47) sa (48), il-Kummissjoni ħarġet żewġ noti għall-fajl dwar is-sorsi għad-determinazzjoni tal-valur normali: l-ewwel nota dwar is-sorsi għad-determinazzjoni tal-valur normali tat-13 ta’ Frar 2025 (minn hawn ’il quddiem “l-Ewwel Nota”) u t-tieni nota tas-7 ta’ Marzu 2025 dwar il-fatturi ta’ produzzjoni (“FOP”, factors of production) bħall-materja prima ewlenija, l-enerġija, l-ilma, l-istim, il-materjal konsumabbli u l-manodopera użati fil-produzzjoni taċ-ċilindri tal-azzar mingħajr weldjatura ta’ pressjoni għolja (minn hawn ’il quddiem “it-Tieni Nota”). Dawn in-noti dwar id-determinazzjoni tal-valur normali u l-fatturi ta’ produzzjoni ddeskrivew il-fatti u l-evidenza li fuqhom huma bbażati l-kriterji rilevanti msemmija fil-premessa (112), u indirizzaw ukoll il-kummenti ppreżentati mill-partijiet interessati dwar dawn il-fatturi u dwar is-sorsi rilevanti maħsuba għad-determinazzjoni tal-valur normali.

(114)

Fl-Ewwel Nota dwar il-fatturi tal-produzzjoni, il-Kummissjoni identifikat lill-Brażil, l-Arġentina u t-Turkija bħala pajjiżi b’livell simili ta’ żvilupp ekonomiku bħar-RPĊ skont il-Bank Dinji, jiġifieri huma kollha kklassifikati mill-Bank Dinji bħala pajjiżi “b’introjtu medju superjuri” fuq il-bażi tal-introjtu gross nazzjonali fejn kien magħruf li ssir il-produzzjoni tal-prodott taħt investigazzjoni.

(115)

Fit-Tieni Nota, il-Kummissjoni informat lill-partijiet interessati bl-intenzjoni tagħha li finalment tqis lit-Turkija bħala pajjiż rappreżentattiv xieraq f’dan il-każ, jekk tiġi kkonfermata l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku.

(116)

Fl-Ewwel Nota, il-Kummissjoni pprovdiet lista tal-fatturi kollha ta’ produzzjoni, bħall-materja prima, l-enerġija, l-ilma u l-manodopera użati fil-produzzjoni taċ-ċilindri tal-azzar mingħajr weldjatura ta’ pressjoni għolja.

(117)

Il-Kummissjoni rċeviet kummenti dwar l-Ewwel Nota mingħand iż-żewġ produtturi inklużi fil-kampjun Tianjin Tianhai High Pressure Container Corp., Ltd., Zhejiang Winner Fire Fighting Equipment Co., Ltd. kif ukoll mill-ilmentaturi.

(118)

L-ilmentaturi qiesu lill-Brażil bħala l-aktar għażla adegwata peress li kien hemm informazzjoni finanzjarja faċilment disponibbli għall-produttur ta’ prodotti tal-azzar li huwa rikonoxxut b’mod wiesa’ (pereż. Arcelor Mittal S.A. (il-Brażil)), segwit mit-Turkija, li ġiet ikkunsidrata wkoll bħala pajjiż rappreżentattiv potenzjali. L-ilmentaturi qiesu li l-Arġentina ma kinitx tikkwalifika bħala pajjiż rappreżentattiv.

(119)

Tianjin Tianhai High Pressure Container Corp., Ltd. (“Tianjin Tianhai”) qieset ukoll li fin-nuqqas ta’ data finanzjarja rilevanti faċilment disponibbli dwar il-produttur lokali identifikat, jenħtieġ li l-Arġentina tiġi skartata. Hija esprimiet ukoll preferenza għat-Turkija bħala l-aktar għażla xierqa. Tianjin Tianhai nnotat ukoll li, wara l-eżami tad-data finanzjarja ta’ Arcelor Mittal S.A., din il-kumpanija operat f’settur relatat iżda differenti (NACE 24) mill-prodott taħt investigazzjoni (NACE 25). Barra minn hekk, din il-kumpanija qieset li l-marġni ta’ profitt ikkalkolat ma huwiex raġonevoli, u li tali marġni ta’ profitt inkluda b’mod mhux xieraq xi elementi li jenħtieġ li jiġu esklużi mill-kalkolu tal-marġni tad-dumping.

(120)

Fir-rigward tal-Brażil, il-Kummissjoni sabet li, abbażi tal-kodiċi tas-settur NACE 24, din il-kumpanija, tabilħaqq, ma kinitx attiva fis-settur tal-prodott taħt investigazzjoni. Barra minn hekk, il-Kummissjoni sabet li r-rapporti finanzjarji disponibbli għall-produttur Brażiljan tal-prodott taħt investigazzjoni, Mat Equipamentos Para Gases Ltda., kienu skaduti peress li kienu jappartjenu għas-sena 2016, jiġifieri ħafna qabel il-perjodu ta’ investigazzjoni ta’ dan il-proċediment.

(121)

Zhejiang Winner Fire Fighting Equipment Co., Ltd. (“Winner”) qieset li la l-Brażil, l-Arġentina u lanqas it-Turkija ma setgħu jikkwalifikaw bħala pajjiżi rappreżentattivi potenzjali għal din l-investigazzjoni. Alternattivament, Winner ipproponiet lill-Kolombja bħala pajjiż rappreżentattiv kemm fil-kumment tagħha għall-Ewwel Nota kif ukoll għat-Tieni Nota.

(122)

Fir-rigward tat-Turkija, filwaqt li tirrikonoxxi li ma kien hemm l-ebda informazzjoni faċilment disponibbli dwar kumpaniji speċifiċi li jipproduċu l-prodott taħt investigazzjoni, il-Kummissjoni tista’, madankollu, tidentifika informazzjoni finanzjarja xierqa disponibbli għas-settur li jipproduċi l-prodott taħt investigazzjoni għas-sena 2023 (C-Manifattura > 25.2-Manifattura ta’ tankijiet, reservoirs u kontenituri tal-metall) (83). Tali informazzjoni kkoinċidiet parzjalment mal-perjodu ta’ investigazzjoni u tista’ tkun pertinenti għal dik il-kumpanija waħda li tipproduċi l-prodott taħt investigazzjoni, jiġifieri CMV Cylinders Endustri Sanayi Ve Ticaret A.S. (“CMV”) (84), li tappartjeni għal dan is-settur speċifiku.

(123)

Winner argumentat ukoll kontra l-għażla tat-Turkija minħabba li din daħħlet fis-seħħ ukoll miżuri anti-dumping fuq l-importazzjonijiet ta’ ċerti pajpijiet tal-azzar mingħajr weldjatura (inkluż prodott taħt il-kodiċi SA 730439 u 730459) mill-2016.

(124)

L-ilmentaturi ddikjaraw ukoll li l-inflazzjoni fit-Turkija kienet għolja u dan irriżulta f’volatilità għolja tal-prezzijiet u wassal għal interventi ripetuti tal-gvern. L-ilmentaturi argumentaw li r-rata tal-inflazzjoni fil-Brażil kienet biss ta’ 4,6 % fl-2023.

(125)

Winner argumentat li r-rata għolja tal-inflazzjoni fit-Turkija u d-deprezzament kontinwu tal-Lira Torka kontra d-dollaru Amerikan jistgħu jżidu l-prezzijiet domestiċi permezz tal-importazzjonijiet ta’ oġġetti bħall-enerġija u l-materja prima, filwaqt li l-prezzijiet tal-importazzjoni komplew jiżdiedu minkejja l-politiki monetarji stabbiliti mill-Gvern biex titnaqqas l-inflazzjoni.

(126)

Il-Kummissjoni nnotat li, kemm il-Brażil kif ukoll it-Turkija esperjenzaw pressjonijiet inflazzjonarji sinifikanti fl-2022, bir-rata tat-Turkija tilħaq livell ħafna ogħla minn dak tal-Brażil, li xorta kienet għadha għolja fil-livell ta’ 9,2 % fl-2022. Barra minn hekk, il-Kummissjoni nnotat li ż-żewġ nazzjonijiet raw tnaqqis gradwali fir-rati tal-inflazzjoni fis-snin sussegwenti, bir-rata tat-Turkija tonqos b’mod aktar qawwi minn dik tal-Brażil.

(127)

Il-Kummissjoni nnotat ukoll li filwaqt li l-inflazzjoni tista’ taffettwa l-kost lavorattiv jew tal-enerġija, il-prezzijiet tal-importazzjoni li kienu l-bażi għall-istabbiliment tal-valuri ta’ riferiment għall-biċċa l-kbira tal-FOPs, kienu bbażati fuq tranżazzjonijiet transfruntiera li normalment saru f’muniti oħra għajr dawk tal-pajjiż importatur, u għalhekk ma kinux affettwati mill-inflazzjoni. Barra minn hekk, il-valuri ta’ riferiment jiġu kkonvertiti fil-munita tal-pajjiż ikkonċernat, fejn l-impatt tal-inflazzjoni, li spiss ikun relatat mal-iżvalutazzjoni tal-munita, ma jkunx sinifikanti.

(128)

Fir-rigward tal-Kolombja, li ġiet proposta bħala pajjiż rappreżentattiv possibbli minn Winner, il-Kummissjoni nnotat li, b’mod simili għar-RPĊ, dan il-pajjiż jaqa’ taħt il-kategorija ta’ pajjiżi b’“introjtu medju superjuri” skont il-klassifikazzjoni tal-Bank Dinji.

(129)

Winner identifikat wkoll lil Ternium S.A. (85), kumpanija elenkata li timmanifattura prodotti tal-azzar fil-Kolombja. Madankollu, ma kien hemm l-ebda evidenza disponibbli li turi li l-output ta’ din il-kumpanija kien qrib il-prodott taħt investigazzjoni. Barra minn hekk, b’mod simili għal Arcelor Mittal S.A., il-Kummissjoni nnotat li din il-kumpanija operat f’settur relatat iżda differenti (NACE 24) mill-prodott taħt investigazzjoni. Fl-aħħar nett, Winner ipprovdiet rapporti finanzjarji li jkopru l-grupp Ternium kollu u mhux speċifikament lil Ternium Colombia S.A.S.

(130)

Barra minn hekk, il-Kummissjoni nnotat li l-Kolombja kellha restrizzjonijiet u regolamenti kummerċjali speċifiċi fil-forma ta’ miżuri anti-dumping fuq l-importazzjonijiet ta’ ċerti FOPs irrapportati mill-produtturi esportaturi inklużi fil-kampjun li joriġinaw mir-Repubblika tal-Poplu taċ-Ċina; jiġifieri:

(131)

Għalhekk, il-Kummissjoni qieset li la l-Kolombja f’dan il-każ, u lanqas il-kumpanija ppreżentata minn Winner ma setgħu jitqiesu fl-għażla ta’ pajjiż rappreżentattiv xieraq.

(132)

Il-kummenti kollha dwar l-Ewwel Nota ġew indirizzati f’din it-Tieni Nota u ġew ikkonfermati s-sorsi rilevanti li l-Kummissjoni kienet beħsiebha tuża biex tiddetermina l-valur normali. It-Tieni Nota informat lill-partijiet interessati dwar l-għażla tat-Turkija bħala l-pajjiż rappreżentattiv. L-Anness II tat-Tieni Nota pprovda ħarsa ġenerali lejn l-istatistika dwar l-importazzjoni fit-Turkija bbażata fuq Global Trade Atlas (“GTA”, Global Trade Atlas) għall-fatturi kollha ta’ produzzjoni elenkati fl-Anness I (ara l-premessa (149)). Informat ukoll lill-partijiet interessati li se jistabbilixxi l-kostijiet tal-bejgħ, ġenerali u amministrattivi (“kostijiet SG&A”) u l-profitti abbażi tad-data mill-bażi ta’ data ta’ Türkiye Cumhuriyet Merkez Bankasi (TCMB) (88) għas-Settur 25.2 (il-manifattura ta’ tankijiet, reservoirs u kontenituri tal-metall) biex jinħadem il-valur normali. Madankollu, peress li l-ispejjeż ġenerali tal-manifattura ma ġewx identifikati separatament fiċ-ċifri tal-kont tal-profitt u t-telf disponibbli u peress li dawn tqiesu li kienu inklużi fil-kost tal-oġġetti mibjugħa, il-valur għall-ispejjeż ġenerali tal-manifattura kien ibbażat fuq id-data speċifika tal-produttur esportatur inkluż fil-kampjun u ġie applikat fuq il-kost “ikkalkulat mill-ġdid” tal-manifattura.

(133)

F’din it-Tieni Nota, il-Kummissjoni ddikjarat l-intenzjoni tagħha li tuża l-istatistika ppubblikata mill-Istitut Tork tal-Istatistika (89) fir-rigward tal-manodopera, bħala l-aktar sors statistiku affidabbli għal dan il-fattur. Tabilħaqq, dan l-istitut ippubblika informazzjoni dettaljata dwar il-kostijiet lavorattivi f’setturi ekonomiċi differenti fit-Turkija. Il-Kummissjoni ddikjarat li beħsiebha tistabbilixxi l-valuri ta’ riferiment abbażi tal-kostijiet lavorattivi medji fis-siegħa għall-2022 għall-attività ekonomika “Manifattura ta’ metalli bażiċi”, il-kodiċi NACE 24 skont il-klassifikazzjoni NACE Rev.2. Il-valuri se jiġu aġġustati aktar għall-inflazzjoni permezz tal-indiċi domestiku tal-prezzijiet għall-konsumatur (90) sabiex jirriflettu l-kostijiet għall-perjodu ta’ investigazzjoni.

(134)

L-ilmentaturi argumentaw li għalhekk, il-Kummissjoni jenħtieġ li tuża l-kostijiet lavorattivi li kienu rappreżentattivi tal-ammont sħiħ tal-kost lavorattiv fil-pajjiż rappreżentattiv, b’mod partikolari billi jintużaw ċifri li kienu jidhru affidabbli, bħall-Eurostat. B’hekk, l-Ilmentaturi sostnew li l-Kummissjoni jenħtieġ li tiddependi fuq iċ-ċifri tal-Eurostat, li tqiesu li huma aktar affidabbli mill-istatistika ppubblikata mill-Istitut Tork tal-Istatistika.

(135)

Madankollu, l-ilmentaturi ddikjaraw li jekk dan l-approċċ jinżamm xorta waħda, il-Kummissjoni jenħtieġ li tikkunsidra l-aħħar informazzjoni disponibbli dwar is-sigħat tax-xogħol reali fil-ġimgħa u l-kost lavorattiv medju fix-xahar skont l-attività ekonomika, u mhux is-“Sigħat medji mħallsa fix-xahar, il-pagi grossi u l-qligħ skont l-attività ekonomika” tal-2022 kif deskritt fit-Tieni Nota (91). L-Ilmentaturi nnotaw ukoll li l-kostijiet tal-impjegaturi għall-kontribuzzjonijiet tal-fond tas-sigurtà soċjali u tal-qgħad kienu sottovalutati fit-Turkija, peress li l-obbligazzjoni totali tal-assigurazzjoni tal-impjegaturi mill-kostijiet lavorattivi totali kienet ta’ 22,75 % biss.

(136)

Il-Kummissjoni sostniet li l-użu tal-istatistiċi ppubblikati mill-Istitut Statistiku Tork fir-rigward tax-xogħol, kif aġġustat għall-inflazzjoni bl-użu tal-indiċi tal-prezz tal-konsumatur domestiku biex jiġu riflessi l-kostijiet għall-perjodu ta’ investigazzjoni baqa’ l-aktar sors statistiku affidabbli għal dan il-fattur ta’ produzzjoni.

(137)

L-ilmentaturi tennew li l-Brażil kellu livell aktar baxx ta’ importazzjonijiet tal-fatturi ewlenin ta’ produzzjoni miċ-Ċina milli t-Turkija u l-Arġentina. Għalhekk, argumentaw li l-prezzijiet ġenerali tal-FOP ikunu l-inqas affettwati minn kwalunkwe distorsjoni tal-prezz tal-inputs.

(138)

Fir-rigward tal-Brażil u l-kumpanija li ġiet identifikata fl-Ewwel Nota bħala produttur, jiġifieri Arcelor Mittal S.A., il-Kummissjoni nnotat li ma kinitx qed tipproduċi l-prodott taħt investigazzjoni u għalhekk ma kinitx kandidat adattat għad-determinazzjoni tal-ispejjeż ġenerali tal-manifattura, il-kostijiet SG&A u l-profitt.

(139)

Fin-nuqqas ta’ informazzjoni oħra fil-fajl disponibbli għall-Kummissjoni dwar il-preżenza ta’ kumpaniji oħrajn li jipproduċu l-prodott taħt investigazzjoni fil-Brażil b’data finanzjarja disponibbli għall-pubbliku, il-Kummissjoni kkonkludiet li l-pajjiż ma setax jibqa’ jitqies bħala pajjiż rappreżentattiv xieraq.

(140)

Fir-rigward tal-inflazzjoni, filwaqt li qablu mal-affermazzjoni tal-Kummissjoni li kemm it-Turkija kif ukoll il-Brażil esperjenzaw tnaqqis sinifikanti fl-inflazzjoni fl-2023, l-ilmentaturi argumentaw li r-rata tal-inflazzjoni fil-Brażil kienet biss ta’ 4,6 % fl-2023. Barra minn hekk, l-ilmentaturi qiesu li l-prezzijiet tat-tranżazzjonijiet denominati f’munita għajr dik tal-pajjiż importatur xorta jistgħu jiġu affettwati minn tendenzi inflazzjonarji.

(141)

Fin-nuqqas ta’ unitajiet supplimentari fl-istatistiċi tal-importazzjoni relatati mal-parts tal-attrezzatura taċ-ċilindri bħal valvi li jippermettu l-kalkolu ta’ valuri ta’ riferiment sinifikanti fuq bażi ta’ kull biċċa, il-Kummissjoni kellha l-ħsieb li terġa’ teżamina s-sitwazzjoni matul l-investigazzjoni. Filwaqt li nnotaw li ma kienet disponibbli l-ebda informazzjoni verifikabbli faċilment dwar il-metodoloġija ta’ konverżjoni, l-Ilmentaturi esprimew tħassib fir-rigward tal-approċċ propost għad-determinazzjoni tal-prezz tal-valvi. L-Ilmentaturi fakkru li l-konverżjonijiet tal-piż unitarju kienu fost dawk l-elementi li setgħu jintużaw faċilment sabiex jiġu distorti ċ-ċifri rrapportati bil-għan li jfittxu li jiksbu marġnijiet tad-dumping aktar baxxi.

(142)

Matul iż-żjarat ta’ verifika fuq il-post li saru fil-bini tal-produtturi esportaturi inklużi fil-kampjun, il-Kummissjoni setgħet tivverifika li t-tabelli ta’ konverżjoni tal-valvi f’kg kienu jaqblu mar-rekwiżiti taċ-ċertifikazzjoni. Fi kwalunkwe każ, kif spjegat fil-premessa (155), il-valvi ġew ittrasferiti taħt “materjal konsumabbli” sabiex ma ġie kkalkolat l-ebda valur ta’ riferiment għal dan il-fattur partikolari tal-produzzjoni.

(143)

Fir-rigward tal-Arġentina, fin-nuqqas ta’ informazzjoni oħra fil-fajl disponibbli għall-Kummissjoni dwar il-preżenza ta’ kumpaniji oħrajn li jipproduċu l-prodott taħt investigazzjoni f’dak il-pajjiż b’data finanzjarja disponibbli għall-pubbliku, il-Kummissjoni kkonkludiet li dak il-pajjiż ma setax jibqa’ jitqies bħala pajjiż rappreżentattiv xieraq.

(144)

Fil-kummenti tagħha għat-Tieni Nota, Winner tenniet li l-Kolombja baqgħet il-pajjiż rappreżentattiv ottimali peress li pprovdiet kundizzjonijiet ekonomiċi aktar stabbli u data affidabbli dwar il-kummerċ. Il-Kummissjoni analizzat ukoll l-importazzjonijiet tal-fatturi ewlenin ta’ produzzjoni fil-Kolombja. L-analiżi tad-data tal-importazzjoni wriet li l-importazzjonijiet f’dan il-pajjiż tal-fatturi ewlenin ta’ produzzjoni kienu affettwati mill-importazzjonijiet mir-RPĊ u, għalhekk ma setax jitqies bħala pajjiż rappreżentattiv adattat. Barra minn hekk, il-Kummissjoni sabet li l-kumpanija identifikata minn Winner: Ternium Colombia S.A.S., operat f’settur relatat iżda differenti (NACE 24) mill-prodott taħt investigazzjoni kif spjegat fil-premessa (129). Għalhekk, id-dikjarazzjonijiet kontra l-għażla tat-Turkija bħala l-pajjiż rappreżentattiv ġew miċħuda.

(145)

Fid-dawl tal-kunsiderazzjonijiet ta’ hawn fuq, kif imsemmi fil-premessa (150), il-Kummissjoni informat lill-partijiet interessati bit-tieni nota li kellha l-ħsieb li tuża lit-Turkija bħala pajjiż rappreżentattiv xieraq u l-bażi ta’ data ta’ TCMB għas-Settur 25.2 (il-manifattura ta’ tankijiet, reservoirs u kontenituri tal-metall) f’konformità mal-Artikolu 2(6a)(a), l-ewwel inċiż, tar-Regolament bażiku sabiex tikseb prezzijiet jew valuri ta’ riferiment mingħajr distorsjoni għall-kalkolu tal-valur normali.

(146)

Wara li ġie stabbilit li t-Turkija kienet l-uniku pajjiż rappreżentattiv xieraq disponibbli, abbażi tal-elementi kollha ta’ hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż, tar-Regolament bażiku.

(147)

Fid-dawl tal-analiżi ta’ hawn fuq, it-Turkija ssodisfat il-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku sabiex titqies bħala pajjiż rappreżentattiv xieraq.

(148)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota.

(149)

Sussegwentement, fit-Tieni Nota, il-Kummissjoni ddikjarat li, sabiex tibni l-valur normali f’konformità mal-Artikolu 2(6a)(a) tar-Regolament bażiku, hija tuża l-GTA biex tistabbilixxi l-kost mingħajr distorsjoni tal-biċċa l-kbira tal-fatturi ta’ produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża l-Istitut Tork tal-Istatistika (92) biex tistabbilixxi kostijiet lavorattivi mingħajr distorsjoni u t-tabelli tat-tariffi tal-elettriku bbażati fuq il-kontijiet tal-elettriku ppubblikati mill-Awtorità Regolatorja tas-Suq tal-Enerġija (EMRA, Energy Market Regulatory Authority) (93) kif ukoll il-prezz tal-gass għall-utenti industrijali fit-Turkija kif ippubblikat mill-Istitut Tork tal-Istatistika (94).

(150)

Fit-Tieni Nota, il-Kummissjoni informat ukoll lill-partijiet interessati li minħabba l-għadd kbir ta’ fatturi ta’ produzzjoni tal-produtturi esportaturi inklużi fil-kampjun li pprovdew informazzjoni sħiħa u l-piż negliġibbli ta’ xi materja prima fil-kost totali tal-produzzjoni, dawn l-oġġetti negliġibbli ġew raggruppati taħt “materjali konsumabbli”. Barra minn hekk, il-Kummissjoni informat li hija se tikkalkula l-persentaġġ tal-materjali konsumabbli fuq il-kost totali tal-materja prima u se tapplika dan il-persentaġġ għall-kost ikkalkolat mill-ġdid tal-materja prima meta tuża l-valuri ta’ riferiment mingħajr distorsjoni stabbiliti fil-pajjiż rappreżentattiv xieraq. Il-Kummissjoni kellha wkoll l-intenzjoni li tuża t-tariffa tal-ilma imposta mid-Direttorat Ġenerali tal-Muniċipalità Metropolitana ta’ Izmir (CMV tinsab f’din il-belt) li huwa responsabbli għall-provvista tal-ilma, għall-ġbir u t-trattament tad-drenaġġ fil-Muniċipalità Metropolitana ta’ Izmir.

(151)

Meta titqies l-informazzjoni kollha ppreżentata mill-partijiet interessati u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni ta’ ċilindri mingħajr weldjatura ta’ pressjoni għolja

(152)

Il-Kummissjoni kkalkolat proporzjon għall-ispejjeż ġenerali tal-manifattura abbażi tad-data speċifika għall-kumpanija u applikatu fuq il-kost “ikkalkolat mill-ġdid” tal-manifattura.

(153)

Sabiex jiġi stabbilit il-prezz mingħajr distorsjoni ta’ materja prima kif ikkonsenjata sax-xatba ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat tal-importazzjoni fil-pajjiż rappreżentattiv kif irrapportat fil-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li ma humiex membri tad-WTO, elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (95). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv kif ikkonkludiet fil-premessa (108) li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni.

(154)

Għal għadd ta’ fatturi ta’ produzzjoni, il-kostijiet effettivi mġarrba mill-produtturi esportaturi li kkooperaw kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni taħt rieżami. Billi l-valur użat għal dawn ma kellu l-ebda impatt apprezzabbli fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet f’materjali konsumabbli kif spjegat fil-premessa (150).

(155)

Fin-nuqqas ta’ statistika dwar il-volum tal-importazzjoni għal valvi, ċrieki tal-għonq u tappijiet rrapportati f’biċċiet, u meta titqies id-diversità ta’ tali fatturi ta’ produzzjoni għal elementi bħall-forma, id-daqs u l-piż unitarju, il-Kummissjoni ma kinitx f’pożizzjoni li tikkalkula valur ta’ riferiment sinifikanti għal dawn il-fatturi ta’ produzzjoni. Għalhekk, meta jitqies ukoll is-sehem limitat tagħhom fil-kost totali tal-manifattura, il-Kummissjoni ddeċidiet li tmexxi dawn il-fatturi ta’ produzzjoni taħt materjali konsumabbli.

(156)

Sabiex jiġi stabbilit il-prezz mingħajr distorsjoni tal-materja prima, kif previst mill-Artikolu 2(6a)(a), l-ewwel inċiż, tar-Regolament bażiku, il-Kummissjoni żiedet id-dazji tal-importazzjoni relevanti mal-valur tal-kost, assigurazzjoni u nol (il-valur CIF, cost, insurance, freight) irreġistrat fl-istatistika tal-importazzjoni tal-pajjiż rappreżentattiv, kif disponibbli fil-GTA.

(157)

Il-Kummissjoni esprimiet il-kost tat-trasport imġarrab mill-produttur esportatur li kkoopera għall-provvista ta’ materja prima bħala persentaġġ tal-kost reali ta’ tali materja prima u mbagħad applikat l-istess persentaġġ għall-kost mingħajr distorsjoni tal-istess materja prima sabiex jinkiseb il-kost tat-trasport mingħajr distorsjoni. Il-Kummissjoni kkunsidrat li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet tat-trasport mingħajr distorsjoni tal-materja prima meta tiġi kkonsenjata lill-fabbrika tal-kumpanija.

(158)

L-Uffiċċju tal-Investiment u l-Finanzi jippubblika informazzjoni dettaljata dwar il-kost tal-ilma għal użu industrijali għall-kumpaniji li jinsabu fiż-żona industrijali ta’ Izmir, fejn tinsab CMV, produttur tal-prodott taħt investigazzjoni fil-pajjiż rappreżentattiv. Il-Kummissjoni użat l-aħħar statistika disponibbli kif ippubblikata minn din l-organizzazzjoni. Il-valur ta’ riferiment huwa bbażat fuq il-kost tal-ilma u tal-ilma mormi fuq bażi għal kull m3 (96).

(159)

L-Istitut Tork tal-Istatistika jippubblika informazzjoni dettaljata dwar il-pagi f’setturi ekonomiċi differenti fit-Turkija. Il-Kummissjoni użat l-aħħar statistika disponibbli li tkopri l-2022 għall-kost lavorattiv medju fl-attività ekonomika “Manifattura ta’ metalli bażiċi”, il-klassifikazzjoni tal-KODIĊI NACE 2.0 Rev.2 (97).

(160)

Il-prezz tal-elettriku għall-kumpaniji (utenti industrijali) fit-Turkija huwa ppubblikat mill-Awtorità Regolatorja tas-Suq tal-Enerġija (EMRA) fit-Turkija. Il-Kummissjoni użat id-data dwar il-prezzijiet tal-elettriku industrijali fil-faxxa tal-konsum korrispondenti fil-munita/kWh kif ippubblikata mill-EMRA.

(161)

Il-prezz tal-gass naturali għall-kumpaniji fis-settur tal-azzar, bħall-utenti industrijali fit-Turkija huwa ppubblikat mill-uffiċċju Tork tal-Investiment u l-Finanzi (98). Il-Kummissjoni użat l-istatistika disponibbli abbażi tal-Prezz tal-Bejgħ bl-Ingrossa tal-Gass Naturali ta’ Marzu tal-2024 li jikkoinċidi mal-perjodu ta’ investigazzjoni.

(162)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(163)

L-ispejjeż ġenerali tal-manifattura mġarrba mill-produtturi esportaturi inklużi fil-kampjun ġew espressi bħala sehem mill-kostijiet tal-manifattura mġarrba effettivament mill-produtturi esportaturi. Dan il-persentaġġ ġie applikat għall-kostijiet tal-manifattura mingħajr distorsjoni.

(164)

Sabiex tistabbilixxi ammont mingħajr distorsjoni u raġonevoli għall-kostijiet SG&A u l-profitt, il-Kummissjoni bbażat fuq l-informazzjoni finanzjarja disponibbli għas-settur li jipproduċi l-prodott taħt investigazzjoni għas-sena 2023 (C-Manifattura > 25.2-Manifattura ta’ tankijiet, reservoirs u kontenituri tal-metall) (99), kif spjegat fil-premessa (122).

(165)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(166)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Il-Kummissjoni applikat il-kostijiet ta’ unità mingħajr distorsjoni għall-konsum effettiv tal-fatturi individwali ta’ produzzjoni tal-produttur esportatur li kkoopera. Dawn ir-rati ta’ konsum ġew ivverifikati matul il-verifika. Il-Kummissjoni mmultiplikat il-fatturi tal-użu bil-kostijiet mingħajr distorsjoni għal kull unità osservata fil-pajjiż rappreżentattiv, kif deskritt fit-Taqsima 3.6.1.1.

(167)

Ma’ dan il-kost, il-Kummissjoni żiedet l-ispejjeż ġenerali tal-manifattura kif spjegat fil-premessa (163).

(168)

Il-kostijiet SG&A u l-profitt ddeterminati fuq il-bażi tal-informazzjoni finanzjarja disponibbli għas-settur li jipproduċi l-prodott taħt investigazzjoni għas-sena 2023 (C-Manifattura > 25.2-Manifattura ta’ tankijiet, reservoirs u kontenituri tal-metall) kif spjegat fil-premessa (122) ġew applikati għas-somma tal-kost mingħajr distorsjoni tal-manifattura u għall-ispejjeż ġenerali tal-manifattura; jiġifieri l-kostijiet tal-produzzjoni.

(169)

Il-kostijiet SG&A espressi bħala persentaġġ tal-Kostijiet tal-Prodotti Mibjugħa (“COGS”, Costs of Goods Sold) u applikati għall-kostijiet tal-produzzjoni mingħajr distorsjoni, ammontaw għal 19,4 %. Il-profitt, espress bħala persentaġġ tal-Kostijiet tal-Prodotti Mibjugħa u applikat għall-kostijiet tal-produzzjoni mingħajr distorsjoni, ammonta għal 12,6 %.

(170)

Abbażi ta’ dan, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(171)

Il-produtturi esportaturi inklużi fil-kampjun esportaw lejn l-Unjoni jew b’mod dirett lil klijenti indipendenti jew permezz ta’ kumpaniji relatati domestiċi li jaġixxu bħala kummerċjanti.

(172)

Fiż-żewġ każijiet, il-prezz tal-esportazzjoni kien il-prezz effettivament imħallas jew dak pagabbli għall-prodott ikkonċernat meta jinbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(173)

L-Artikolu 2(10) tar-Regolament bażiku jirrikjedi li l-Kummissjoni tagħmel paragun xieraq bejn il-valur normali u l-prezz tal-esportazzjoni fl-istess livell ta’ kummerċ u tagħmel aġġustamenti għad-differenzi fil-fatturi li jaffettwaw il-prezzijiet u l-komparabbiltà tal-prezzijiet. Fil-każ preżenti, il-Kummissjoni għażlet li tqabbel il-valur normali u l-prezz tal-esportazzjoni tal-produtturi esportaturi inklużi fil-kampjun fil-livell tal-kummerċ ta’ kif joħroġ mill-fabbrika. Kif spjegat aktar hawn taħt, fejn xieraq, il-valur normali u l-prezz tal-esportazzjoni ġew aġġustati sabiex: (i) jiġu nnettjati lura għal-livell ta’ kif joħroġ mill-fabbrika; u (ii) jagħmlu konċessjonijiet għal differenzi fil-fatturi li ġew iddikjarati, u murija, li jaffettwaw il-prezzijiet u l-komparabbiltà tal-prezzijiet.

(174)

Kif huwa spjegat fil-premessi (165) sa (170), il-valur normali ġie stabbilit fil-livell tal-kummerċ ta’ kif joħroġ mill-fabbrika bl-użu tal-kostijiet tal-produzzjoni flimkien mal-ammonti tal-kostijiet SG&A u tal-profitt, li tqiesu li huma raġonevoli għal dak il-livell ta’ kummerċ. Għalhekk, ma kien meħtieġ l-ebda aġġustament biex il-valur normali jinnettja lura għal-livell ta’ kif joħroġ mill-fabbrika.

(175)

Il-Kummissjoni ma sabet l-ebda raġuni biex tagħmel xi konċessjonijiet għall-valur normali, u dawn il-konċessjonijiet lanqas ma ntalbu minn xi wieħed mill-produtturi esportaturi inklużi fil-kampjun.

(176)

Sabiex isir netting tal-prezz tal-esportazzjoni lura għal-livell tal-kummerċ ta’ kif joħroġ mill-fabbrika, saru aġġustamenti fil-kont tad-dazju doganali, imposti oħra fuq l-importazzjoni, nol, assigurazzjoni, immaniġġjar tat-tagħbija u spejjeż anċillari.

(177)

Sar ukoll aġġustament għall-kummissjonijiet skont l-Artikolu 2(10)(i) tar-Regolament bażiku għall-kummerċjant relatat ta’ Winner u Tianjin Tianhai billi tnaqqsu l-kostijiet SG&A tan-negozjanti relatati u profitt nozzjonali ta’ 5 %. Tali aġġustament instab li kien iġġustifikat permezz ta’ kuntratt bejn il-produttur esportatur u l-kummerċjant relatat tiegħu li juri l-eżistenza ta’ klawsola ta’ arbitraġġ f’każ ta’ kunflitt bejniethom it-tnejn. Il-profitt nozzjonali ta’ 5 %, kien allinjat mal-profitt dedott f’każijiet tal-azzar reċenti oħrajn li jikkonċernaw prodotti li jintegraw l-inputs tal-azzar fin-nuqqas ta’ kooperazzjoni mill-importaturi mhux relatati.

(178)

Għall-produtturi esportaturi li kkooperaw inklużi fil-kampjun, il-Kummissjoni qabblet il-valur normali medju ponderat ta’ kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, f’konformità mal-Artikolu 2(11) u (12) tar-Regolament bażiku.

(179)

Abbażi ta’ dan, il-marġnijiet tad-dumping medji ponderati proviżorji espressi bħala persentaġġ tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(180)

Għall-produtturi esportaturi li kkooperaw li mhumiex inklużi fil-kampjun, il-Kummissjoni kkalkolat il-marġni tad-dumping medju ponderat, f’konformità mal-Artikolu 9(6) tar-Regolament bażiku. Għaldaqstant, dan il-marġni ġie stabbilit abbażi tal-marġnijiet medji ponderati tal-produtturi esportaturi inklużi fil-kampjun, filwaqt li ġew injorati l-marġnijiet tal-produtturi esportaturi b’marġnijiet tad-dumping żero u de minimis, kif ukoll il-marġnijiet stabbiliti skont iċ-ċirkostanzi msemmija fl-Artikolu 18 tar-Regolament bażiku.

(181)

Abbażi ta’ dan, il-marġni tad-dumping proviżorju tal-produtturi esportaturi li kkooperaw u li mhumiex inklużi fil-kampjun huwa ta’ 74,5 %.

(182)

Għall-produtturi esportaturi l-oħrajn kollha fir-RPĊ, il-Kummissjoni stabbiliet il-marġni tad-dumping abbażi tal-fatti disponibbli, f’konformità mal-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta’ kooperazzjoni tal-produtturi esportaturi. Il-livell ta’ kooperazzjoni huwa l-volum ta’ esportazzjonijiet tal-produtturi esportaturi li kkooperaw lejn l-Unjoni espress bħala proporzjon tal-importazzjonijiet totali mill-pajjiż ikkonċernat lejn l-Unjoni fil-PI, li ġew stabbiliti abbażi tal-istatistika tal-Eurostat kif spjegata fit-Taqsima 4.3.1.

(183)

Il-livell ta’ kooperazzjoni f’dan il-każ huwa baxx għaliex l-importazzjonijiet tal-produtturi esportaturi li kkooperaw kienu jikkostitwixxu madwar 54 % tal-importazzjonijiet totali lejn l-Unjoni matul il-PI.

(184)

Il-Kummissjoni fakkret li t-Taqsima 10 tan-Notifika tal-Bidu (100) kienet infurmat lill-partijiet li n-nuqqas ta’ kooperazzjoni, jew kooperazzjoni parzjali biss, jistgħu jwasslu għal sejbiet ibbażati fuq fatti disponibbli skont l-Artikolu 18 tar-Regolament bażiku, li potenzjalment jirriżultaw f’eżiti inqas favorevoli għal dawk il-partijiet. Minħabba li l-partijiet interessati ġew avżati b’mod ċar dwar il-konsegwenzi tan-nuqqas ta’ kooperazzjoni, u li l-livell ta’ kooperazzjoni f’dan il-każ kien partikolarment baxx, il-Kummissjoni qieset li huwa xieraq li jiġi ddeterminat id-dazju tad-dumping residwu bbażat fuq subsett rappreżentattiv ta’ bejgħ mill-BTIC Group li, huwa stess, jirrappreżenta aktar minn 50 % tal-volum totali tal-esportazzjoni tal-kumpaniji kollha inklużi fil-kampjun lejn l-Unjoni matul il-perjodu ta’ investigazzjoni. Dan il-bejgħ tqies bħala indikatur raġonevoli u rappreżentattiv għall-imġiba tad-dumping tal-esportaturi li ma kkooperawx.

(185)

Għalhekk, il-marġni tad-dumping residwu ġie stabbilit għal 119 %.

(186)

Il-marġnijiet tad-dumping proviżorji, espressi bħala persentaġġ tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(187)

Il-prodott simili ġie manifatturat minn tmien produtturi fl-Unjoni matul il-perjodu ta’ investigazzjoni. Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(188)

Il-produzzjoni totali tal-Unjoni matul il-perjodu ta’ investigazzjoni ġiet stabbiltà għal madwar 6 782 k unità/biċċa. Il-Kummissjoni stabbiliet iċ-ċifra abbażi tal-informazzjoni kollha disponibbli dwar l-industrija tal-Unjoni, bħat-tweġiba għall-kwestjonarju makro, l-informazzjoni miġbura matul iż-żjarat ta’ verifika lill-produtturi inklużi fil-kampjun, il-kwestjonarji ppreżentati minn produtturi oħrajn li kkooperaw u l-istatistika uffiċjali tal-Eurostat. Kif indikat fil-premessa (7), iż-żewġ produtturi tal-Unjoni inklużi fil-kampjun irrappreżentaw 47 % tal-produzzjoni totali stmata tal-Unjoni u 42 % tal-kwantità totali stmata ta’ bejgħ tal-Unjoni tal-prodott simili.

(189)

Il-Kummissjoni stabbiliet il-konsum tal-Unjoni abbażi tat-tweġiba għall-kwestjonarju makro li waslet mingħand l-ilmentatur, kontroverifikata, fejn possibbli, mat-tweġibiet vverifikati għall-kwestjonarju tal-produtturi tal-Unjoni inklużi fil-kampjun, u l-importazzjonijiet fl-Unjoni tal-prodott ikkonċernat minn pajjiżi terzi abbażi tal-istatistika tal-Eurostat.

(190)

Il-konsum tal-Unjoni żviluppa kif ġej:

Tabella 2

Konsum tal-Unjoni (unità/biċċiet)

(191)

Abbażi ta’ dan, wara tkabbir qawwi fl-2021 u tnaqqis sussegwenti li seta’ ġie kkawżat mill-kumulazzjoni ta’ riżervi minħabba l-biża’ ta’ nuqqas ta’ provvista fil-kuntest tal-COVID-19 jew imġiba mhux mistennija tal-konsumatur, il-konsum tal-Unjoni żdied bi 15 % matul il-perjodu kkunsidrat.

(192)

Il-Kummissjoni stabbiliet il-volum tal-importazzjonijiet abbażi tad-data tal-Eurostat.

(193)

Permezz tal-valutazzjoni tal-akkuratezza tal-istatistika dwar l-importazzjoni, ġie identifikat li reċipjenti żgħar tal-gass li ma jistgħux jerġgħu jimtlew—li jaqgħu barra mill-ambitu tal-prodott ikkonċernat—tipikament ikollhom piż unitarju ferm inqas minn 1 kg. B’kuntrast ma’ dan, il-prodott ikkonċernat għandu piż unitarju minimu ta’ 1 kg. Għar-referenza, l-iżgħar ċilindru prodott mill-industrija tal-Unjoni, b’volum ta’ 0,8 litru, jiżen madwar 1,5 kg. Għalhekk, intuża metodu ta’ filtrazzjoni li eskluda l-entrati kollha tal-importazzjoni b’piż unitarju ta’ inqas minn 1 kg biex tiġi evitata l-inklużjoni ta’ prodotti barra mill-ambitu.

(194)

Sabiex ittejjeb l-akkuratezza, il-Kummissjoni applikat il-metodu ta’ filtrazzjoni bbażat fuq il-piż għad-data tal-Eurostat dwar l-importazzjonijiet għall-kodiċijiet NM 7311 00 11 u 7311 00 30 , li għalihom kien disponibbli rappurtar ta’ kuljum. Għall-kodiċijiet NM 7311 00 13 u 7311 00 19 , hija qagħdet fuq id-data tal-Eurostat ta’ kull xahar u applikat l-istess limitu ta’ esklużjoni bbażat fuq il-piż unitarju.

(195)

Is-sett ta’ data li jirriżulta, iffiltrat fl-ogħla livell ta’ granularità possibbli bl-użu tal-limiti tal-piż, ipprovda l-aktar stima preċiża tal-importazzjonijiet tal-prodott ikkonċernat, li turi xejriet ċari u sinifikanti tal-importazzjoni, b’mod partikolari fir-rigward taċ-Ċina.

(196)

Għal apparati tat-tifi tan-nar vojta ikklassifikati taħt il-kodiċijiet TARIC 8424 10 00 11 u 8424 10 00 21, id-data dwar l-importazzjoni kienet disponibbli biss għal 3 xhur (minn Marzu sa Mejju 2025), barra mill-perjodu ta’ investigazzjoni, u ġiet espressa f’kilogrammi minflok f’biċċiet. Minħabba din id-data limitata u inkonsistenti, kif ukoll ir-rappreżentattività baxxa ħafna ta’ dan it-tip ta’ prodott, li jirrappreżenta biss madwar 2 % tal-volum totali taħt il-kodiċi NM rilevanti, dan it-tip ta’ prodott ma ġiex ikkunsidrat fl-istadju proviżorju, iżda se jiġi inkluż fl-istadju definittiv tal-investigazzjoni, ladarba tkun disponibbli informazzjoni aktar kompluta u affidabbli.

(197)

Is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum tas-suq tal-Unjoni:

Tabella 3

Kwantità tal-importazzjoni (unitajiet/biċċiet) u sehem mis-suq

(198)

L-importazzjonijiet mir-RPĊ bejn l-2021 u l-perjodu ta’ investigazzjoni wrew xejra ċara u sinifikanti ’l fuq kemm fil-volum kif ukoll fis-sehem mis-suq, speċjalment meta jitqiesu flimkien mal-konsum ġenerali tal-Unjoni. B’mod simili għall-konsum, l-importazzjonijiet Ċiniżi wrew tkabbir qawwi fl-2021 segwit minn tnaqqis, li seta’ kien ikkawżat minn kumulazzjoni ta’ riżerva minħabba l-biżgħat ta’ nuqqas ta’ provvista matul il-pandemija tal-COVID-19 jew bidliet mhux mistennija fl-imġiba tal-konsumatur. L-importazzjonijiet imbagħad irpiljaw matul il-perjodu ta’ investigazzjoni, u laħqu livell ta’ 33 % ogħla mill-2021.

(199)

Dan it-tkabbir qawwi ġie rifless fis-sehem mis-suq taċ-Ċina li qed jiżdied b’mod kostanti fl-Unjoni. Minn 60 % fl-2021, is-sehem mis-suq taċ-Ċina żdied għal 65 % fl-2022 u baqa’ stabbli sal-2023, qabel ma kompla jiżdied għal 70 % matul il-perjodu ta’ investigazzjoni. Anke meta l-volumi tal-importazzjonijiet Ċiniżi naqsu b’mod temporanju, iċ-Ċina żammet pożizzjoni dominanti fis-suq, filwaqt li ddominat is-suq għad-detriment, b’mod partikolari, tal-industrija tal-Unjoni.

(200)

L-importazzjonijiet miċ-Ċina żdiedu ħafna aktar malajr mill-konsum ġenerali tas-suq, u espandew b’aktar mid-doppju tar-rata matul il-perjodu kkunsidrat.

(201)

Il-Kummissjoni stabbiliet il-prezzijiet tal-importazzjonijiet abbażi tad-data tal-Eurostat. It-twaqqigħ tal-prezz tal-importazzjonijiet ġie stabbilit abbażi tal-prezzijiet CIF li nkisbu mill-produtturi esportaturi inklużi fil-kampjun.

(202)

Il-prezz medju ponderat tal-importazzjonijiet mill-pajjiż ikkonċernat lejn l-Unjoni żviluppa kif ġej:

Tabella 4

Prezzijiet tal-importazzjoni (EUR/biċċa)

(203)

Il-prezz medju baxx tal-importazzjonijiet għaċ-Ċina huwa primarjament xprunat mill-importazzjonijiet iddikjarati taħt il-kodiċi NM 7311001190, li rrappreżentaw aktar minn 80 % tal-volum totali tal-importazzjonijiet Ċiniżi, imkejla f’biċċiet, matul il-perjodu kkunsidrat. Dan il-kodiċi NM jikkorrispondi għal tipi ta’ prodotti iżgħar, eħfef, u għalhekk inqas għaljin. Barra minn hekk, il-prezz medju huwa influwenzat ukoll mit-taħlita tal-prodott, li hija ffurmata mix-xejriet tad-domanda u tista’ tvarja maż-żmien.

(204)

Matul il-perjodu kkunsidrat, il-prezzijiet tal-importazzjoni miċ-Ċina segwew xejra ċara ’l isfel, u b’mod ġenerali naqsu b’31 %. Il-prezzijiet tal-importazzjoni naqsu b’4 % fl-2022, b’6 % oħra fl-2023, u mbagħad, fil-perjodu ta’ investigazzjoni naqsu b’22 % meta mqabbla mas-sena ta’ qabel.

(205)

Dan it-tnaqqis stabbli u dejjem aktar mgħaġġel fil-prezzijiet ħoloq pressjoni dejjem akbar fuq il-prezzijiet mill-esportaturi Ċiniżi fuq l-industrija tal-Unjoni, li ġiegħlet lil din tal-aħħar biex tnaqqas il-prezzijiet tagħha b’mod sinifikanti. It-tnaqqis qawwi matul il-perjodu ta’ investigazzjoni indika strateġija ta’ pprezzar aggressiv li x’aktarx intensifikat il-pressjoni kompetittiva fuq il-produtturi tal-Unjoni. It-tnaqqis fil-prezzijiet ikkoinċida ma’ żieda qawwija fil-volum u fis-sehem mis-suq tal-importazzjonijiet Ċiniżi, li juri li importazzjonijiet orħos kellhom rwol ewlieni fis-sostituzzjoni tal-bejgħ tal-industrija tal-Unjoni.

(206)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(207)

It-tqabbil tal-prezzijiet sar fuq bażi ta’ tip b’tip għat-tranżazzjonijiet fl-istess livell ta’ kummerċ, bl-aġġustament dovut meta neċessarju, u wara tnaqqis tar-ribassi u tal-iskontijiet. Ir-riżultat tat-tqabbil kien espress bħala persentaġġ tal-fatturat teoretiku tal-produtturi tal-Unjoni inklużi fil-kampjun matul il-perjodu ta’ investigazzjoni. Dan wera marġni medju ponderat tat-twaqqigħ tal-prezz ta’ bejn 29 % u 76 % permezz tal-importazzjonijiet mill-pajjiż ikkonċernat fis-suq tal-Unjoni.

(208)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet oġġett ta’ dumping fuq l-industrija tal-Unjoni kien jinkludi valutazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(209)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data li tinsab fit-tweġiba għall-kwestjonarju ppreżentata mill-ilmentaturi, sussegwentement aġġornata biex tinkludi l-perjodu ta’ investigazzjoni, filwaqt li tkopri d-data relatata mal-produtturi kollha tal-Unjoni. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun. Id-data kienet relatata mal-produtturi tal-Unjoni inklużi fil-kampjun. Iż-żewġ settijiet ta’ data nstabu li jirrappreżentaw is-sitwazzjoni ekonomika tal-industrija tal-Unjoni.

(210)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(211)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(212)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, il-kapaċità tal-produzzjoni u l-użu tal-kapaċità

(213)

Matul il-perjodu kkunsidrat, il-produzzjoni tal-Unjoni naqset b’24 %, u l-użu tal-kapaċità naqas minn 65 % għal 48 %, minkejja li l-konsum tal-Unjoni żdied bi 15 %. Dan issuġġerixxa li t-tnaqqis fil-produzzjoni ma kienx dovut għat-tnaqqis fid-domanda, iżda pjuttost għal żieda fil-pressjoni kompetittiva mill-importazzjonijiet.

(214)

B’mod partikolari, l-importazzjonijiet mir-RPĊ żdiedu bi 33 % matul l-istess perjodu, bis-sehem mis-suq tagħhom kiber minn 60 % fl-2021 għal 70 % fil-perjodu ta’ investigazzjoni. Din iż-żieda sinifikanti kemm fil-volum kif ukoll fis-sehem mis-suq tal-importazzjonijiet Ċiniżi indikat li porzjon dejjem jikber tad-domanda tal-Unjoni kien qed jiġi ssodisfat minn prodotti importati aktar milli minn produzzjoni domestika.

(215)

Il-kwantità tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 6

Kwantità tal-bejgħ u sehem mis-suq

(216)

Matul il-perjodu kkunsidrat, il-bejgħ tal-produtturi tal-Unjoni fis-suq tal-Unjoni wera tnaqqis kostanti u kontinwu, kemm fil-kwantità assoluta kif ukoll fis-sehem mis-suq.

(217)

Fl-2022, il-volumi tal-bejgħ naqsu bi ftit meta mqabbla mal-2021, u dan jissuġġerixxi staġnar inizjali. Madankollu, is-sitwazzjoni marret għall-agħar b’mod sinifikanti fl-2023, meta l-bejgħ naqas drastikament b’20 %, livell li baqa’ l-istess fil-perjodu ta’ investigazzjoni. Dan indika li t-tnaqqis fil-bejgħ ma kienx fluttwazzjoni temporanja iżda parti minn xejra sostnuta ta’ tnaqqis.

(218)

Is-sehem mis-suq segwa trajettorja negattiva ugwalment persistenti. Dan naqas minn 32 % fl-2021 għal 27 % fl-2022, imbagħad kompla għal 25 % fl-2023, u fl-aħħar laħaq biss 22 % fil-PI. L-erożjoni sena wara sena fis-sehem mis-suq uriet it-telf progressiv tal-preżenza tal-produtturi tal-Unjoni fis-suq tagħhom stess.

(219)

Ta’ min jinnota li dan it-tnaqqis kontinwu seħħ fl-isfond taż-żieda fil-konsum tal-Unjoni, li żdied b’mod sinifikanti matul il-perjodu kkunsidrat. Fl-istess ħin, l-importazzjonijiet miċ-Ċina espandew b’mod sinifikanti fil-volum u fis-sehem mis-suq. Għaldaqstant, il-produtturi tal-Unjoni ma kinux qed jitilfu l-bejgħ minħabba suq li qed jiċkien, iżda minflok il-bejgħ tagħhom ġie sostitwit dejjem aktar mill-importazzjonijiet, b’mod partikolari mir-RPĊ.

(220)

Matul il-perjodu kkunsidrat, il-konsum tal-Unjoni żdied bi 15 %, u dan jirrifletti suq li qed jespandi b’domanda dejjem akbar. Madankollu, il-produtturi tal-Unjoni ma setgħux jibbenefikaw minn dan it-tkabbir. Il-volum tal-bejgħ tagħhom naqas b’20 %, is-sehem mis-suq naqas minn 32 % għal 22 %, filwaqt li l-produzzjoni naqset b’24 %. Minkejja żieda żgħira fil-kapaċità, l-użu tal-kapaċità naqas drastikament minn 65 % għal 48 %. Sadanittant, l-importazzjonijiet miċ-Ċina żdiedu bi 33 %, u kisbu 10 punti perċentwali tas-sehem mis-suq, u laħqu 70 % fil-PI. Din ix-xejra kontrastanti wriet li l-produtturi tal-Unjoni waqgħu lura mhux minħabba t-tnaqqis fid-domanda, iżda b’riżultat ta’ pressjoni dejjem akbar minn importazzjonijiet Ċiniżi li qed jiżdiedu malajr u possibbilment inġusti.

(221)

Il-kombinazzjoni ta’ tnaqqis persistenti fil-bejgħ, tnaqqis fis-sehem mis-suq, u produzzjoni staġnata minkejja żieda fid-domanda, tipprovdi evidenza ċara ta’ dannu, filwaqt li tirrifletti dgħufija strutturali tal-pożizzjoni tal-industrija tal-Unjoni fis-suq.

(222)

Din ix-xejra kontrastanti tindika li l-produtturi tal-Unjoni kienu dejjem aktar imbuttati ’l barra mis-suq, mhux minħabba t-tnaqqis fid-domanda, iżda minħabba pressjoni dejjem akbar mit-tkabbir rapidu tal-importazzjonijiet Ċiniżi.

(223)

L-impjiegi u l-produttività żviluppaw kif ġej matul il-perjodu kkunsidrat:

Tabella 7

Impjiegi u produttività

(224)

Matul il-perjodu kkunsidrat, l-impjiegi fl-industrija tal-Unjoni wrew tnaqqis gradwali iżda konsistenti, li jirrifletti d-deterjorament fil-prestazzjoni tas-settur. L-għadd ta’ impjegati ekwivalenti għall-full-time (FTE, full-time equivalent) naqas sena b’sena: naqas bi 3 % fl-2022, naqas bi ftit oħra fl-2023, u laħaq tnaqqis totali ta’ 6 % fil-PI meta mqabbel mal-2021. Dan it-tnaqqis kostanti jissuġġerixxi li l-produtturi kienu qed jadattaw b’mod inkrementali għall-attività tal-produzzjoni li kienet qed tiddgħajjef billi naqqsu l-input tax-xogħol.

(225)

Fl-istess ħin, il-produttività naqset drastikament, speċjalment bejn l-2022 u l-2023, u naqset b’19 % wara tnaqqis modest ta’ 2 % fl-2022 u baqgħet f’dak il-livell baxx matul il-perjodu ta’ investigazzjoni. Dan jirrifletti kapaċità mhux utilizzata biżżejjed u ineffiċjenzi operazzjonali, peress li l-produtturi tal-Unjoni ma setgħux jaġġustaw il-forza tax-xogħol tagħhom malajr jew b’mod proporzjonali għat-tnaqqis sostnut fil-produzzjoni kkawżat minn tnaqqis fil-bejgħ u żieda fil-pressjoni fuq l-importazzjoni.

(226)

Fil-qosor, ix-xejra fl-impjiegi tiżvela aġġustament kawt ’l isfel fil-forza tax-xogħol, filwaqt li t-tnaqqis qawwi fil-produttività jenfasizza l-pressjoni ekonomika usa’ fuq l-industrija peress li din ma wrietx l-aħjar effiċjenza fl-operat tagħha minħabba output li qed jonqos u l-kompetizzjoni intensifikata tas-suq.

(227)

Il-marġnijiet kollha tad-dumping kienu ogħla b’mod sinifikanti mil-livell de minimis. L-impatt tal-kobor tal-marġnijiet reali tad-dumping fuq l-industrija tal-Unjoni kien sostanzjali, meta jitqiesu l-kwantità u l-prezzijiet tal-importazzjonijiet mill-pajjiż ikkonċernat.

(228)

Din hija l-ewwel investigazzjoni anti-dumping dwar il-prodott ikkonċernat. Għaldaqstant, ma kienx hemm data disponibbli biex jiġu vvalutati l-effetti ta’ dumping possibbli fil-passat.

(229)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 8

Prezzijiet tal-bejgħ fl-Unjoni

(230)

Matul il-perjodu kkunsidrat, il-prezzijiet medji tal-bejgħ unitarju fis-suq tal-Unjoni inizjalment żdiedu b’mod sinifikanti, żieda ta’ 34 % fl-2022 meta mqabbla mal-2021. Din ix-xejra ’l fuq kompliet kemxejn fl-2023, bil-prezzijiet jilħqu l-ogħla livell b’żieda ta’ 37 % meta mqabbla mal-2021. Madankollu, fil-perjodu ta’ investigazzjoni, il-prezzijiet naqsu b’14 % meta mqabbla mal-2023, għalkemm baqgħu 18 % ogħla mil-livell tal-2021. Din ix-xejra ssuġġeriet li l-produtturi tal-Unjoni inizjalment għaddew parti miż-żieda fil-kostijiet lill-klijenti, iżda aktar tard kienu mġiegħla jnaqqsu l-prezzijiet, minħabba pressjoni kompetittiva dejjem akbar minn importazzjonijiet bi prezz baxx, speċjalment miċ-Ċina.

(231)

B’mod parallel, il-kostijiet unitarji tal-produzzjoni segwew xejra simili iżda saħansitra aktar evidenti. Il-kostijiet żdiedu b’35 % fl-2022 u laħqu l-ogħla livell fl-2023 b’żieda ta’ 50 % meta mqabbla mas-sena bażi. Għalkemm il-kostijiet naqsu xi ftit fil-PI, dawn baqgħu 28 % ogħla mil-livelli tal-2021. Iż-żieda inizjali x’aktarx irriflettiet il-pressjonijiet inflazzjonarji, iż-żieda fil-prezzijiet tal-input (pereż. l-enerġija, il-materjali), u t-tnaqqis fl-ekonomiji ta’ skala minħabba tnaqqis fil-volumi tal-produzzjoni.

(232)

B’mod partikolari, għall-biċċa l-kbira tal-perjodu kkunsidrat, il-kostijiet tal-produzzjoni żdiedu aktar malajr mill-prezzijiet tal-bejgħ, b’mod partikolari fl-2023, fejn id-diskrepanza bejn il-kost u l-prezz kienet l-akbar waħda, li ddeterjorat is-sitwazzjoni ekonomika tal-produtturi tal-Unjoni. Fil-PI, kemm il-prezzijiet kif ukoll il-kostijiet naqsu, iżda l-kostijiet xorta qabżu l-prezzijiet tal-bejgħ.

(233)

It-tnaqqis fil-prezzijiet tal-importazzjoni u s-sehem dejjem jikber tal-importazzjonijiet Ċiniżi għamluha aktar diffiċli għall-produtturi tal-Unjoni li jżommu l-prezzijiet tagħhom għoljin biżżejjed biex ikopru l-kostijiet li qed jiżdiedu. Iż-żieda fl-importazzjonijiet orħos, speċjalment matul il-perjodu ta’ investigazzjoni, naqqset b’mod qawwi l-prezzijiet tal-bejgħ tal-Unjoni.

(234)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 9

Kostijiet lavorattivi medji għal kull impjegat

(235)

Bejn l-2021 u l-PI, il-kostijiet lavorattivi medji għal kull impjegat tal-produtturi tal-Unjoni inklużi fil-kampjun żdiedu b’mod kostanti. L-aktar żieda sinifikanti seħħet fl-ewwel sena tal-perjodu, meta l-kostijiet lavorattivi żdiedu b’9 %. Din iż-żieda bikrija qawwija x’aktarx li rriżultat minn pressjonijiet inflazzjonarji li rriżultaw wara l-pandemija tal-COVID-19, li matulha l-produtturi ffaċċjaw żieda fid-domandi tal-pagi u, f’xi Stati Membri, taw mandat legali jew innegozjaw b’mod kollettiv l-aġġustamenti fil-pagi.

(236)

Fis-sena ta’ wara, il-kostijiet lavorattivi komplew jiżdiedu, għalkemm b’pass kemxejn aktar bil-mod ta’ madwar 5 %. Dan it-tkabbir indika effetti inflazzjonarji sostnuti iżda moderati, flimkien ma’ sforzi biex tinżamm forza tax-xogħol kwalifikata f’suq kompetittiv. Fil-PI, ir-rata taż-żieda kompliet tonqos għal madwar 2 %, u dan jindika tnaqqis potenzjali fil-pressjonijiet għal żieda fil-pagi jew l-impatt tal-miżuri ta’ konteniment tal-kostijiet u ta’ effiċjenza introdotti mill-produtturi.

(237)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Stokks

(238)

Matul il-perjodu kkunsidrat, l-inventarji segwew xejra li tvarja iżda fl-aħħar mill-aħħar ’l isfel, li tirrifletti l-livelli ta’ produzzjoni u l-kundizzjonijiet tas-suq li qed jinbidlu. Fl-2022, l-istokks baqgħu relattivament stabbli, bi tnaqqis żgħir biss ta’ 4 % meta mqabbel mal-2021. Madankollu, fl-2023, l-istokks tal-għeluq żdiedu bi 17 %, u laħqu l-ogħla punt tagħhom matul il-perjodu. Din iż-żieda x’aktarx kienet dovuta għal bejgħ aktar baxx u għal sehem mis-suq li qed jiċkien, li wasslu għall-ħżin ta’ aktar prodotti mhux mibjugħa.

(239)

Sal-PI, l-istokks naqsu drastikament, bi tnaqqis ta’ 44 punt perċentwali meta mqabbla mal-2023, u reġgħu lura għal livell ferm aktar baxx minn dak tas-sena tal-bidu. Meta wieħed iħares lejn l-istokks bħala sehem tal-produzzjoni, ġie osservat li l-inventarji baqgħu baxxi matul il-perjodu kkunsidrat, u dan jissuġġerixxi li l-produtturi kienu qed jimmaniġġjaw l-istokk b’kawtela.

(240)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Profittabbiltà, fluss ta’ flus, investimenti u redditu fuq l-investimenti

(241)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala persentaġġ tal-fatturat. Il-profittabbiltà naqset b’mod kostanti matul il-perjodu, b’bidu pożittiv iżda mbagħad naqset gradwalment kull sena. Din saret negattiva ħafna fit-tielet sena u baqgħet negattiva matul il-perjodu ta’ investigazzjoni. Din ix-xejra ’l isfel irriflettiet il-kostijiet li qed jiżdiedu, il-volumi tal-bejgħ aktar baxxi, u s-sehem mis-suq li qed jiċkien minħabba żieda fil-kompetizzjoni tal-importazzjoni, li għafset b’mod sinifikanti l-marġnijiet tal-profitt.

(242)

Il-fluss tal-flus nett, li jirrifletti l-kapaċità tal-produtturi tal-Unjoni li jiffinanzjaw lilhom infushom, naqas minn madwar EUR 14,8–15,2 miljun fl-ewwel sena għal madwar EUR 14,0–14,5 miljun fit-tieni sena, qabel ma niżel għal madwar EUR 2,3–2,6 miljun fit-tielet sena u kompla jonqos għal madwar EUR 1,7–1,85 miljun matul il-perjodu ta’ investigazzjoni, li jirrappreżenta tnaqqis ta’ madwar 88 % mill-ewwel sena. Dan it-tnaqqis qawwi enfasizza l-pressjoni finanzjarja kkawżata minn tnaqqis fil-profittabbiltà u finanzjament intern limitat.

(243)

Minkejja d-diffikultajiet finanzjarji, l-investimenti żdiedu minn madwar EUR 2,8–3,0 miljun fl-ewwel sena għal aktar minn EUR 4,9–5,1 miljun fit-tieni sena, u baqgħu qrib EUR 4,9–5,05 miljun matul il-perjodu ta’ investigazzjoni. Dan irrappreżenta żieda ġenerali ta’ kważi 72 % meta mqabbel mal-ewwel sena, li jissuġġerixxi sforzi biex tinżamm jew tiġi aġġornata l-kapaċità tal-produzzjoni minkejja kundizzjonijiet finanzjarji dejjem aktar stretti.

(244)

Ir-redditu fuq l-investimenti, definit bħala l-profitt f’persentaġġ tal-valur kontabilistiku nett tal-investimenti, naqas minn [15,5 % – 17,2 %] fl-ewwel sena għal [11,2 % – 12,4 %] fit-tieni sena, qabel ma sar negattiv għal [-17,3 % – -15,8 %] fit-tielet sena u baqa’ negattiv għal [-15,4 % – -14,6 %] matul il-perjodu ta’ investigazzjoni. Dawn ir-redditi negattivi indikaw li l-investimenti ma kinux għadhom qed jiġġeneraw profitt suffiċjenti, x’aktarx minħabba kundizzjonijiet operattivi li kienu qed jiddeterjoraw u żieda fil-pressjoni tas-suq.

(245)

Minħabba dawn ix-xejriet, il-profittabbiltà naqset minn [3,7 % – 4,2 %] għal [-4,4 % – -4,1 %], il-fluss tal-flus naqas b’aktar minn 85 %, u r-redditu fuq l-investimenti nbidel u baqa’ negattiv, il-kapaċità tal-produtturi tal-Unjoni li jgħollu l-kapital naqset b’mod sinifikanti. Il-profitti mnaqqsa u r-riżervi tal-flus imnaqqsa kienu jnaqqsu l-fiduċja tal-investituri u jillimitaw l-aċċess għall-finanzjament, u b’hekk kienu jillimitaw il-kapaċità tal-produtturi li jinvestu u jikkompetu b’mod effettiv.

(246)

Matul il-perjodu ta’ investigazzjoni, l-importazzjonijiet miċ-Ċina żdiedu b’mod sinifikanti, bil-volumi jiżdiedu b’madwar 33 % meta mqabbla mas-sena bażi, u s-sehem mis-suq żdied minn 60 % għal 70 %. Fl-istess ħin, il-prezzijiet tal-importazzjoni naqsu drastikament b’madwar 31 %. Din il-kombinazzjoni ta’ volumi li qed jiżdiedu u prezzijiet li qed jonqsu tpoġġi pressjoni qawwija ’l isfel fuq is-suq tal-Unjoni, filwaqt li tagħmilha diffiċli għall-produtturi tal-Unjoni li jikkompetu kemm fuq il-kwantità kif ukoll fuq il-prezz. Il-preżenza dejjem akbar ta’ importazzjonijiet bi prezz aktar baxx kienet fattur ewlieni li influwenza d-dinamika tas-suq.

(247)

Il-biċċa l-kbira tal-fatturi ta’ dannu wrew xejriet negattivi ċari. Il-produzzjoni naqset b’madwar 24 %, l-użu tal-kapaċità naqas minn 65 % għal 48 % (tnaqqis ta’ madwar 26 %), u l-volum tal-bejgħ naqas b’21 %. Il-profittabbiltà nbidlet minn marġni pożittiv ta’ [3,7 % – 4,2 %] għal telf ta’ madwar [-4,4 % – -4,1 %], filwaqt li l-fluss tal-flus nett naqas b’aktar minn 85 %, u dan illimita b’mod sever il-flessibbiltà finanzjarja. Dawn ix-xejriet negattivi sebqu kwalunkwe żvilupp pożittiv, u jirriflettu dannu profond u kontinwu għall-industrija tal-Unjoni. It-telf kontinwu tas-sehem mis-suq u l-pressjoni ’l isfel fuq il-prezzijiet, xprunati minn żieda fil-volumi tal-importazzjoni u prezzijiet tal-importazzjoni aktar baxxi, kienu fatturi dominanti li kkawżaw dan id-dannu.

(248)

Minbarra li l-prezzijiet tal-industrija tal-Unjoni żdiedu u dan ġie kkumpensat miż-żieda aktar qawwija fil-kost tal-produzzjoni, żewġ fatturi ta’ dannu biss urew xejriet pożittivi, jiġifieri l-kapaċità tal-produzzjoni, żieda ta’ 3 % matul il-perjodu kkunsidrat, u l-livell sostnut ta’ investimenti mill-produtturi tal-Unjoni, li żdiedu bi kważi 72 % matul dan il-perjodu. Dan jissuġġerixxi sforzi kontinwi biex tinżamm jew tiġi aġġornata l-kapaċità tal-produzzjoni minkejja kundizzjonijiet avversi. Madankollu, dawn ix-xejriet pożittivi ma kinux biżżejjed biex jikkumpensaw għall-impatti negattivi. Pereżempju, il-produzzjoni naqset b’madwar 24 %, minkejja li l-konsum tal-Unjoni żdied b’madwar 15 %. Barra minn hekk, il-produttività naqset sostanzjalment bi kważi 19 %, x’aktarx minħabba tnaqqis fil-forza tax-xogħol u ineffiċjenzi operazzjonali, li jindika li l-investiment pożittiv ma ssarrafx f’output imtejjeb.

(249)

B’mod ġenerali, filwaqt li l-konsum tal-Unjoni żdied bi 15 %, il-produzzjoni tal-Unjoni naqset b’24 %, il-bejgħ naqas b’21 %, u l-profittabbiltà tal-produtturi naqset drastikament minn [3,7 % – 4,2 %] għal [-4,4 % – -4,1 %]. Din l-istampa turi li minkejja suq li qed jikber, l-industrija tal-Unjoni rat il-pożizzjoni tagħha tiddgħajjef minħabba li l-importazzjonijiet, prinċipalment miċ-Ċina, ħadu sehem akbar mis-suq.

(250)

Fuq il-bażi ta’ dak li ntqal aktar ’il fuq, il-Kummissjoni f’dan l-istadju kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(251)

F’konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħra setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi għajr l-importazzjonijiet oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Dawn il-fatturi huma: l-importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni, iż-żieda fil-kostijiet tal-produzzjoni, id-domanda tal-Unjoni.

(252)

Sabiex jiġi vvalutat jekk hemmx rabta kawżali bejn l-importazzjonijiet oġġett ta’ dumping u d-dannu mġarrab mill-industrija tal-Unjoni, huwa meħtieġ li jiġi eżaminat jekk il-volum u l-livelli tal-prezzijiet tal-importazzjonijiet taħt investigazzjoni kkontribwewx b’mod sinifikanti għad-dannu materjali.

(253)

Matul il-perjodu kkunsidrat, il-volum tal-importazzjonijiet miċ-Ċina żdied b’mod sinifikanti, kemm f’termini assoluti kif ukoll fis-sehem mis-suq. B’mod speċifiku, l-importazzjonijiet Ċiniżi żdiedu bi 53 % u kisbu 10 punti perċentwali fis-sehem mis-suq. Fl-istess ħin, il-konsum tal-Unjoni kiber bi 15 %. Madankollu, il-volum tal-bejgħ tal-industrija tal-Unjoni naqas b’21 %, u s-sehem mis-suq tagħha naqas kif xieraq.

(254)

Dan l-iżvilupp kontrastanti — fejn l-importazzjonijiet oġġett ta’ dumping żdiedu drastikament filwaqt li l-produtturi tal-Unjoni tilfu kemm il-volum tal-bejgħ kif ukoll is-sehem mis-suq — issuġġerixxa b’mod qawwi rabta kawżali bejniethom it-tnejn. It-telf fil-volum tal-bejgħ għall-produtturi tal-Unjoni kien ir-riżultat ta’ żieda fil-kompetizzjoni minn importazzjonijiet oġġett ta’ dumping bi prezz aktar baxx. Dan l-effett tal-volum ikkontribwixxa b’mod ċar għad-dannu mġarrab mill-industrija tal-Unjoni.

(255)

Barra minn hekk, l-effett fuq il-prezz tal-importazzjonijiet oġġett ta’ dumping miċ-Ċina appoġġa l-eżistenza ta’ rabta kawżali għad-dannu mġarrab mill-industrija tal-Unjoni. Matul il-perjodu kkunsidrat, il-prezz unitarju medju tal-importazzjonijiet Ċiniżi naqas b’31 %, minn EUR 14,16 għal EUR 9,83 kull biċċa. B’kuntrast ma’ dan, il-prezzijiet tal-industrija tal-Unjoni żdiedu sal-2023 iżda mbagħad naqsu drastikament matul il-perjodu ta’ investigazzjoni, minħabba pressjoni minn importazzjonijiet bi prezz baxx.

(256)

Kien jidher ċar li dan it-twaqqigħ konsistenti u sinifikanti tal-prezz mill-importazzjonijiet Ċiniżi jista’ jnaqqas il-prezzijiet fis-suq tal-Unjoni. B’riżultat ta’ dan, il-produtturi tal-Unjoni ma setgħux iżommu l-livelli tal-prezzijiet tagħhom f’konformità maż-żieda fil-kostijiet tal-produzzjoni, u dan wassal għal deterjorament fis-sitwazzjoni finanzjarja tagħhom. Il-profittabbiltà naqset minn [3,7 % – 4,2 %] fl-2021, għal telf ta’ [-4,4 % – -4,1 %] matul il-PI. Il-pressjoni ’l isfel sostnuta fuq il-prezzijiet ikkawżata mill-importazzjonijiet oġġett ta’ dumping miċ-Ċina kkontribwiet direttament għad-dannu materjali mġarrab mill-industrija tal-Unjoni.

(257)

Fid-dawl ta’ dan ta’ hawn fuq, l-importazzjonijiet oġġett ta’ dumping miċ-Ċina kkontribwew b’mod sinifikanti għad-dannu materjali mġarrab mill-industrija tal-Unjoni.

(258)

L-importazzjonijiet oġġett ta’ dumping għamlu pressjoni sostanzjali fuq il-volum u l-prezzijiet fuq l-industrija tal-Unjoni. Dan irriżulta f’kapaċità mhux utilizzata biżżejjed, indikaturi finanzjarji li qed jiddeterjoraw, u nuqqas ta’ kapaċità biex il-prezzijiet jiżdiedu b’mod suffiċjenti ħalli jkopru l-kostijiet li qed jiżdiedu. Għalhekk, anke jekk din jaf ma hijiex l-unika kawża, jidher biċ-ċar li l-importazzjonijiet oġġett ta’ dumping kellhom rwol sinifikanti fl-ikkaġunar tad-dannu materjali osservat.

(259)

Il-kwantità tal-importazzjonijiet minn pajjiżi terzi oħrajn żviluppat kif ġej matul il-perjodu kkunsidrat:

Tabella 12

Importazzjonijiet minn pajjiżi terzi

(260)

Matul il-perjodu kkunsidrat, l-uniċi pajjiżi terzi oħrajn li minnhom ġew importati volumi sinifikanti ta’ HPSC fl-Unjoni kienu t-Turkija u r-Renju Unit.

(261)

B’mod ġenerali, il-pajjiżi terzi kollha ħlief il-pajjiż ikkonċernat irreġistraw żieda fil-volum ta’ 19 % bejn l-2021 u l-PI, filwaqt li s-sehem mis-suq tagħhom baqa’ stabbli, u varja bejn 8 % u 10 % matul il-perjodu. Filwaqt li l-volumi żdiedu, il-prezzijiet medji tal-importazzjoni naqsu b’mod kostanti b’20 % meta mqabbla mal-2021, u naqsu progressivament kull sena. Minkejja dan it-tnaqqis fil-prezz, ix-xejra tal-importazzjoni tissuġġerixxi li l-operaturi minn dawn il-pajjiżi ffukaw fuq il-preservazzjoni tas-sehem mis-suq eżistenti minflok fuq l-espansjoni aggressiva tiegħu. Dan huwa appoġġat minn tnaqqis ta’ 6 % fil-volum matul il-PI. Il-prezzijiet minn dawn il-pajjiżi terzi kienu allinjati b’mod ġenerali ma’ dawk tal-produtturi tal-Unjoni inklużi fil-kampjun fl-2022, iżda sal-PI, il-prezzijiet tal-importazzjoni kienu naqsu b’madwar 34 % meta mqabbla mal-livelli tal-2021, filwaqt li l-prezzijiet tal-produtturi tal-Unjoni naqsu b’madwar 28 % biss, li jindika żieda fil-pressjoni fuq il-prezzijiet fuq il-produtturi tal-Unjoni.

(262)

Il-produtturi esportaturi ewlenin minn pajjiżi oħrajn mhux soġġetti għal dazji tad-dumping, bħal pereżempju r-Renju Unit u t-Turkija, baqgħu stabbli jew naqsu f’termini ta’ volum u ta’ valur. Pereżempju, l-importazzjonijiet mir-Renju Unit naqsu minn 102 046 unità fl-2022 għal 72 615 unità fil-PI, filwaqt li l-importazzjonijiet tat-Turkija naqsu minn 164 343 unità fl-2023 għal 95 931 unità fil-PI. Bl-istess mod, il-valuri tal-importazzjoni minn dawn il-pajjiżi naqsu wkoll. Dan issuġġerixxa li l-importazzjonijiet mhux oġġett ta’ dumping ma żdidux b’mod sinifikanti b’mod li seta’ għamel ħsara materjali lill-industrija tal-Unjoni.

(263)

Fid-dawl ta’ dan ta’ hawn fuq, b’mod partikolari l-fatt li s-sehem mis-suq ta’ pajjiżi terzi baqa’ relattivament stabbli, il-Kummissjoni kkonkludiet b’mod proviżorju li dawn l-importazzjonijiet ma naqqsux ir-rabta kawżali bejn id-dannu mġarrab mill-industrija tal-Unjoni u l-importazzjonijiet oġġett ta’ dumping mill-pajjiżi kkonċernati.

(264)

Matul il-perjodu kkunsidrat il-volum tal-esportazzjonijiet tal-produtturi tal-Unjoni inklużi fil-kampjun żviluppa kif ġej:

Tabella 13

Prestazzjoni tal-esportazzjoni tal-produtturi tal-Unjoni inklużi fil-kampjun

(265)

Matul il-perjodu kkunsidrat, il-volum tal-esportazzjoni tal-produtturi tal-Unjoni inklużi fil-kampjun naqas b’25 % u l-prezzijiet medji żdiedu b’25 %. Dan it-tnaqqis simultanju fil-volum u ż-żieda fil-prezz issuġġerew li l-industrija tal-Unjoni aġġustat l-istrateġija tagħha tal-esportazzjoni, possibbilment billi ffukat fuq segmenti ta’ valur ogħla.

(266)

Iż-żieda fil-prezz għenet biex tikkumpensa parzjalment l-impatt negattiv tat-tnaqqis fil-volumi, filwaqt li indikat li l-prestazzjoni tal-esportazzjoni ma kkontribwietx għad-dannu materjali mġarrab mill-industrija tal-Unjoni.

(267)

Minkejja ż-żieda notevoli fl-importazzjonijiet oġġett ta’ dumping miċ-Ċina matul il-perjodu kkunsidrat li żdiedu minn madwar 3,6 miljun unità fl-2021 għal kważi 4,8 miljun unità fil-PI, ġew ivvalutati wkoll fatturi potenzjali oħrajn.

(268)

It-tibdil teknoloġiku, il-prattiki kummerċjali restrittivi, jew il-bidliet fix-xejriet tal-konsumatur ma ġewx irreġistrati bħala fatturi rilevanti matul il-perjodu. Ma hemm l-ebda evidenza li tissuġġerixxi li l-industrija tal-Unjoni ffaċċjat dgħufijiet strutturali interni minħabba dewmien teknoloġiku jew prestazzjoni insuffiċjenti fl-esportazzjoni li jispjegaw b’mod indipendenti t-tnaqqis fil-produzzjoni (-24 %), fil-bejgħ (-21 %), jew fil-profittabbiltà (minn [3,7 % – 4,2 %] għal [-4,4 % – -4,1 %]). Il-kost unitarju tal-produzzjoni żdied b’mod notevoli matul il-perjodu kkunsidrat. Għalkemm kien hemm tnaqqis sussegwenti fil-PI. Din ix-xejra ’l fuq fil-kostijiet tal-produzzjoni tindika li l-industrija tal-Unjoni esperjenzat pressjonijiet sostanzjali fuq il-kostijiet, x’aktarx minħabba prezzijiet ogħla tal-materja prima, kostijiet tal-enerġija, jew spejjeż ġenerali oħra, li naqqsu l-marġnijiet ta’ profitt u llimitaw il-kapaċità tal-industrija li tikkompeti b’mod effettiv. Barra minn hekk, l-industrija tal-Unjoni ma setgħetx tgħaddihom kompletament lill-klijenti minħabba l-pressjoni qawwija fuq il-prezzijiet eżerċitata mill-importazzjonijiet oġġett ta’ dumping. Il-prezzijiet inġustament baxxi ta’ dawn l-importazzjonijiet ġiegħlu lill-produtturi tal-Unjoni jassorbu ż-żieda fil-kostijiet, u b’hekk aggravaw id-diffikultajiet finanzjarji tagħhom. It-tnaqqis parzjali fil-kostijiet tal-produzzjoni fl-aħħar sena ma naqqasx biżżejjed din il-pressjoni. Dan in-nuqqas ta’ kapaċità li jiġu rkuprati kostijiet ogħla permezz tal-prezzijiet tal-bejgħ huwa wkoll fattur kritiku biex tintwera rabta kawżali bejn l-importazzjonijiet oġġett ta’ dumping u d-dannu mġarrab mill-industrija tal-Unjoni.

(269)

L-analiżi kkonfermat rabta kawżali ċara bejn l-importazzjonijiet oġġett ta’ dumping u d-dannu materjali mġarrab mill-industrija tal-Unjoni. Il-volum tal-importazzjonijiet Ċiniżi żdied bi 33 % bejn l-2021 u l-perjodu ta’ investigazzjoni, u dan żied is-sehem mis-suq tagħhom għad-detriment tal-produtturi tal-Unjoni. Din iż-żieda fl-importazzjonijiet bi prezzijiet baxxi kkoinċidiet ma’ tnaqqis ta’ 24 % fil-produzzjoni, tnaqqis ta’ 21 % fil-bejgħ, u tnaqqis qawwi fil-profittabbiltà, minn [3,7 % – 4,2 %] għal [-4,4 % – -4,1 %], fl-industrija tal-Unjoni. Dan iż-żmien parallel appoġġa bil-qawwa l-konklużjoni li l-importazzjonijiet oġġett ta’ dumping kellhom rwol sinifikanti fid-deterjorament tas-sitwazzjoni ekonomika tal-industrija tal-Unjoni.

(270)

Ġew eżaminati wkoll fatturi kontribwenti potenzjali oħrajn, bħall-prestazzjoni tal-esportazzjoni, il-bidliet fil-konsum, u l-importazzjonijiet minn pajjiżi oħrajn. L-esportazzjonijiet naqsu b’25 %, iżda dan ġie kkumpensat b’żieda ta’ 25 % fil-prezzijiet medji tal-esportazzjoni, li llimita l-impatt negattiv tiegħu. Is-suq tal-Unjoni nnifsu kiber bi 15 %, u għalhekk it-tnaqqis fid-domanda ma setax jispjega d-dannu. L-importazzjonijiet minn pajjiżi oħrajn baqgħu relattivament stabbli jew saħansitra naqsu, u ma ġiet osservata l-ebda bidla teknoloġika jew strutturali sinifikanti.

(271)

Konsegwentement, il-Kummissjoni kkonkludiet b’mod proviżorju li l-importazzjonijiet oġġett ta’ dumping miċ-Ċina kkawżaw dannu materjali lill-industrija tal-Unjoni, primarjament permezz taż-żieda fil-volum tagħhom, it-tnaqqis fil-prezzijiet, u l-kisbiet fis-sehem mis-suq, filwaqt li l-kontribut ta’ fatturi oħra ma naqqasx ir-rabta kawżali.

(272)

Sabiex tiddetermina l-livell tal-miżuri, il-Kummissjoni eżaminat jekk dazju aktar baxx mill-marġni tad-dumping ikunx biżżejjed sabiex jitneħħa d-dannu kkawżat mill-importazzjonijiet oġġett ta’ dumping lill-industrija tal-Unjoni.

(273)

Id-dannu jitneħħa jekk l-industrija tal-Unjoni tkun tista’ tikseb profitt fil-mira billi tbigħ bi prezz fil-mira fis-sens tal-Artikoli 7(2c) u 7(2d) tar-Regolament bażiku.

(274)

F’konformità mal-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabilità meħtieġ sabiex ikopri l-kostijiet u l-investimenti kollha, ir-riċerka u l-iżvilupp (R&Ż) u l-innovazzjoni, u l-livell ta’ profittabilità li wieħed għandu jistenna f’kundizzjonijiet normali ta’ kompetizzjoni. Jenħtieġ li tali marġni ta’ profitt ma jkunx anqas minn 6 %.

(275)

Bħala l-ewwel pass, il-Kummissjoni stabbiliet profitt bażiku li jkopri l-kostijiet sħaħ f’kundizzjonijiet normali ta’ kompetizzjoni abbażi tal-profitt medju storiku (ponderat fuq il-fatturat) ta’ ħames produtturi tal-Unjoni fis-snin mill-2013 sal-2019. Dan il-marġni ta’ profitt ġie stabbilit għal 9,6 %.

(276)

L-industrija tal-Unjoni pprovdiet evidenza fil-forma ta’ pjanijiet ta’ investiment u minuti mil-laqgħat tal-bord li juru l l-livell tagħha ta’ investimenti, riċerka u żvilupp (R&Ż) u ta’ innovazzjoni matul il-perjodu ta’ investigazzjoni kien ikun ogħla f’kundizzjonijiet ta’ kompetizzjoni normali. Il-Kummissjoni vverifikat din l-informazzjoni u sabet li d-dikjarazzjonijiet tal-industrija tal-Unjoni kienu ġġustifikati.

(277)

Sabiex tirrifletti dan fil-profitt fil-mira, il-Kummissjoni kkalkolat id-differenza bejn l-ispejjeż tal-investimenti, tar-R&Ż u tal-innovazzjoni (“RŻI”) f’kundizzjonijiet ta’ kompetizzjoni normali kif ipprovduti mill-industrija tal-Unjoni u vverifikati mill-Kummissjoni mal-ispejjeż reali tal-IRI matul il-perjodu kkunsidrat. Tali differenza, espressa bħala persentaġġ tal-fatturat, ġiet stabbilita f’livell ta’ bejn 1 u 5 % għall-produtturi tal-Unjoni inklużi fil-kampjun.

(278)

Tali persentaġġi żdiedu mal-profitt bażiku ta’ 9,6 % imsemmi hawn fuq, li wassal għal profitt fil-mira li jvarja bejn 11,12 % u 14,47 %, skont il-produttur tal-Unjoni inkluż fil-kampjun.

(279)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, u tal-Konvenzjonijiet tal-ILO elenkati fl-Anness Ia li l-industrija tal-Unjoni se ġġarrab matul il-perjodu ta’ applikazzjoni tal-miżura skont l-Artikolu 11(2). Abbażi tal-evidenza disponibbli fit-tweġiba għall-kwestjonarju, il-Kummissjoni stabbiliet kost addizzjonali ta’ EUR 0,90 għal kull biċċa, li ġie miżjud mal-prezz mhux dannuż.

(280)

Abbażi ta’ dan, il-Kummissjoni kkalkolat prezz mhux dannuż għall-prodott simili tal-industrija tal-Unjoni billi applikat il-marġni ta’ profitt fil-mira msemmi hawn fuq mal-kost tal-produzzjoni tal-produtturi tal-Unjoni inklużi fil-kampjun matul il-perjodu ta’ investigazzjoni u mbagħad żiedet l-aġġustamenti skont l-Artikolu 7(2d) fuq bażi ta’ tip b’tip.

(281)

Il-Kummissjoni mbagħad iddeterminat il-livell ta’ marġni tad-dannu abbażi ta’ tqabbil tal-prezz medju ponderat tal-importazzjoni tal-produtturi esportaturi li kkooperaw inklużi fil-kampjun fil-pajjiż ikkonċernat, kif stabbilit għall-kalkoli tat-twaqqigħ tal-prezz, mal-prezz medju ponderat mhux dannuż tal-prodott simili mibjugħ mill-produtturi tal-Unjoni inklużi fil-kampjun fis-suq tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala persentaġġ tal-valur CIF medju ponderat tal-importazzjoni.

(282)

Il-livell ta’ eliminazzjoni tad-dannu għal “kumpaniji oħra li kkooperaw” u għal “l-importazzjonijiet l-oħrajn kollha li joriġinaw mill-pajjiż ikkonċernat” huwa definit bl-istess mod bħall-marġni tad-dumping għal dawn il-kumpaniji u l-importazzjonijiet.

(283)

F’dan il-każ, l-ilmentaturi sostnew l-eżistenza ta’ distorsjonijiet fil-materja prima skont it-tifsira tal-Artikolu 7(2a) tar-Regolament bażiku. Għalhekk, sabiex titwettaq il-valutazzjoni fuq il-livell xieraq ta’ miżuri, il-Kummissjoni l-ewwel stabbiliet l-ammont ta’ dazju neċessarju biex jiġi eliminat id-dannu mġarrab mill-industrija tal-Unjoni fin-nuqqas ta’ distorsjonijiet skont l-Artikolu 7(2a) tar-Regolament bażiku. Imbagħad eżaminat jekk il-marġni tad-dumping tal-produtturi esportaturi inklużi fil-kampjun ikunx ogħla mill-marġni tad-dannu tagħhom (ara l-premessi (285) u (286) hawn taħt).

(284)

Kif spjegat fin-Notifika tal-Bidu, l-ilmentatur ipprovda biżżejjed evidenza lill-Kummissjoni li fil-pajjiż ikkonċernat hemm distorsjonijiet fil-materja prima rigward il-prodott taħt investigazzjoni. Għaldaqstant, f’konformità mal-Artikolu 7(2a) tar-Regolament bażiku, din l-investigazzjoni eżaminat id-distorsjonijiet allegati biex tivvaluta, jekk rilevanti, jekk dazju inferjuri għall-marġni tad-dumping ikunx biżżejjed biex jelimina d-dannu.

(285)

F’konformità mal-Artikolu 7(2) tar-Regolament bażiku, il-Kummissjoni l-ewwel eżaminat jekk il-marġni tad-dumping stabbilit b’mod proviżorju jkunx ogħla mill-marġni adegwat biex jitneħħa d-dannu lill-industrija tal-Unjoni. Għal dan l-għan, sar tqabbil bejn il-prezz medju ponderat tal-importazzjoni tal-produtturi esportaturi inklużi fil-kampjun, mal-prezz fil-mira tal-produtturi tal-Unjoni inklużi fil-kampjun kif spjegat fit-Taqsima 6.1 hawn fuq. Ir-riżultat ta’ dawn il-kalkoli huwa muri fit-tabella ta’ hawn fuq.

(286)

Billi l-marġni tal-bejgħ bil-prezz imwaqqa’ kkalkolat b’dan il-mod kien aktar baxx mill-marġni tad-dumping għal BTIC Group, il-Kummissjoni wettqet l-eżami meħtieġ skont l-Artikolu 7(2a) tar-Regolament bażiku.

(287)

Fl-ilment, l-ilmentatur ipprovda evidenza suffiċjenti li hemm distorsjonijiet fil-materja prima skont it-tifsira tal-Artikolu 7(2a) tar-Regolament bażiku fir-RPĊ fir-rigward tal-prodott ikkonċernat. Skont l-evidenza fl-ilment, it-tubi u l-pajpijiet tal-karbonju u tal-azzar illigat, li jirrappreżentaw 33 % tal-kost tal-produzzjoni tal-prodott ikkonċernat, huma soġġetti għal rifużjoni parzjali tal-VAT fuq l-esportazzjoni fir-RPĊ.

(288)

Għalhekk, kif imħabbar fin-Notifika tal-Bidu, f’konformità mal-Artikolu 7(2a) tar-Regolament bażiku, il-Kummissjoni eżaminat l-allegati distorsjonijiet u kwalunkwe distorsjoni oħra koperta mill-Artikolu 7(2a) tar-Regolament bażiku fil-pajjiż ikkonċernat.

(289)

Il-Kummissjoni l-ewwel identifikat il-materja prima prinċipali użata fil-produzzjoni tal-prodott ikkonċernat minn kull wieħed mill-produtturi esportaturi inklużi fil-kampjun. Bħala materja prima prinċipali ġiet ikkunsidrata dik il-materja prima li hija probabbli li tirrappreżenta mill-inqas 17 % tal-kost tal-produzzjoni tal-prodott ikkonċernat. Il-Kummissjoni stabbiliet li l-produtturi esportaturi inklużi fil-kampjun kienu qed jużaw tubi u pajpijiet tal-azzar illigat u tal-karbonju bħala l-fatturi ewlenin tal-produzzjoni għall-manifattura tal-prodott taħt investigazzjoni.

(290)

Il-Kummissjoni mbagħad eżaminat jekk xi materja prima ewlenija użata fil-produzzjoni tal-prodott ikkonċernat hijiex distorta minn waħda mill-miżuri elenkati fl-Artikolu 7(2a) tar-Regolament bażiku: skemi ta’ pprezzar doppju, taxxi fuq l-esportazzjoni, soprataxxa fuq l-esportazzjoni, kwoti fuq l-esportazzjoni, projbizzjoni tal-esportazzjoni, taxxa fiskali fuq l-esportazzjonijiet, rekwiżiti ta’ liċenzjar, prezz minimu tal-esportazzjoni, tnaqqis jew irtirar tar-rifużjoni tat-taxxa fuq il-valur miżjud (VAT), restrizzjoni fuq il-punt tal-iżdoganar għall-esportaturi, lista ta’ esportaturi kwalifikati, obbligu tas-suq domestiku, estrazzjoni ristretta. Għal dan il-għan, il-Kummissjoni kkonsultat is-sit web ta’ China Customs Solutions (101) u stabbiliet li l-VAT fuq l-esportazzjoni applikabbli fuq l-esportazzjonijiet ta’ tubi u pajpijiet tal-karbonju u tal-azzar illigat li jaqgħu taħt il-kodiċi SA 730439 u 730459 kien biss parzjalment rimborżat (10 % minn 13 %).

(291)

Il-Kummissjoni stabbiliet li kien hemm inċentiv biex dawn il-prodotti ma jiġux esportati sabiex il-mekkaniżmi tas-suq domestiku f’termini tal-iffissar tal-prezzijiet ikunu distorti.

(292)

Imbagħad, il-Kummissjoni qabblet il-prezz tat-tubi u tal-pajpijiet tal-karbonju u tal-azzar illigat imħallsa mill-produtturi esportaturi inklużi fil-kampjun mal-prezzijiet fis-suq internazzjonali rappreżentattiv. F’dan ir-rigward, il-Kummissjoni qabblet il-prezz imħallas mill-produtturi esportaturi inklużi fil-kampjun mal-valur ta’ riferiment ikkalkolat għal dawn l-inputs kif irrapportat fit-Tabella 1. Dan it-tqabbil żvela li l-prezzijiet fis-suq internazzjonali rappreżentattiv huma 180 sa 439 % ogħla milli fil-pajjiż ikkonċernat. Tali differenza ġiet ikkonfermata wkoll meta tqabbel il-prezz imħallas mill-produtturi esportaturi inklużi fil-kampjun mal-informazzjoni li tinsab fl-ilment (102) biex tiġi appoġġata d-dikjarazzjoni ta’ distorsjonijiet tal-materja prima skont it-tifsira tal-Artikolu 7(2a) tar-Regolament bażiku. Meta wieħed iqis il-firxa ta’ tali differenza, il-prezzijiet domestiċi tqiesu li huma ferm aktar baxxi mill-prezzijiet fis-swieq internazzjonali rappreżentattivi.

(293)

Fl-aħħar nett, il-Kummissjoni eżaminat jekk xi waħda mill-materja prima affettwata mill-miżuri kif deskritti fil-premessa (284) irrappreżentatx individwalment għal mill-inqas 17 % tal-kost tal-produzzjoni tal-prodott ikkonċernat. Għall-fini ta’ dan il-kalkolu, intuża prezz mingħajr distorsjoni tal-materja prima kif stabbilit fit-Tabella 1. Il-Kummissjoni stabbiliet li t-tubi u l-pajpijiet tal-karbonju u tal-azzar illigat kienu kull wieħed jirrappreżentaw mill-inqas 17 % tal-kost tal-produzzjoni tal-prodott taħt investigazzjoni.

(294)

Il-Kummissjoni kkonkludiet li t-tubi u l-pajpijiet tal-karbonju u tal-azzar illigat huma soġġetti għal distorsjoni skont it-tifsira tal-Artikolu 7(2a) tar-Regolament bażiku.

(295)

F’konformità mal-Artikolu 7(2b) tar-Regolament bażiku, il-Kummissjoni eżaminat jekk setgħetx tikkonkludi b’mod ċar li kien fl-interess tal-Unjoni li tiddetermina l-livell ta’ dazji proviżorji f’konformità mal-Artikolu 7(2a) tar-Regolament bażiku. Id-determinazzjoni tal-interess tal-Unjoni kienet ibbażata fuq apprezzament tal-informazzjoni pertinenti kollha għal din l-investigazzjoni, inklużi l-kapaċitajiet ta’ riżerva fil-pajjiż esportatur, il-kompetizzjoni għall-materja prima u l-effett fuq il-ktajjen ta’ provvista għall-kumpaniji tal-Unjoni.

(296)

L-ilment indika li ċ-Ċina għandha kapaċità ta’ riżerva sinifikanti fil-produzzjoni tal-HPSC, li tidher li hija strutturali u prinċipalment xprunata minn politiki industrijali mmexxija mill-Istat, minn investiment żejjed fl-industrija peżanti, u minn provvista żejda persistenti fis-settur tal-azzar, b’mod partikolari f’tubi tal-azzar mingħajr weldjatura, il-materja prima ewlenija użata fil-manifattura tal-HPSC. Il-produzzjoni tal-HPSC tinvolvi proċess speċjalizzat tal-azzar bi stadji bħall-iffurmar, it-tisħin, l-iwweldjar, l-immaxinjar u l-kisi. Il-produtturi Ċiniżi jibbenefikaw minn żoni industrijali kbar fejn il-partijiet kollha tal-produzzjoni jinsabu qrib xulxin u huma appoġġati mill-ippjanar u s-sussidji tal-gvern lokali.

(297)

L-informazzjoni pprovduta b’appoġġ għall-ilment issuġġeriet li l-kapaċità tal-produzzjoni totali tal-HPSC taċ-Ċina taqbeż it-30 miljun unità fis-sena, filwaqt li l-konsum domestiku għadu ferm aktar baxx, speċjalment minħabba t-tnaqqis riċenti f’setturi bħall-kostruzzjoni, il-manifattura tal-karozzi, u d-domanda industrijali ġenerali. B’riżultat ta’ dan, il-kapaċità ta’ riżerva stmata taqbeż l-10 miljun sa 15-il miljun ċilindru fis-sena, aktar mid-doppju tad-domanda totali fl-Unjoni, li hija madwar 6,88 miljun unità, u dan jenfasizza potenzjal qawwi biex il-volumi jiġu diretti mill-ġdid lejn swieq esterni. L-esportazzjonijiet Ċiniżi tal-HPSC kienu qed jiżdiedu b’mod kostanti, speċjalment lejn swieq mingħajr miżuri ta’ difiża tal-kummerċ. Din il-bidla hija intenzjonata u organizzata tajjeb. Hekk kif id-domanda domestika tonqos, il-produtturi Ċiniżi jiffokaw fuq is-swieq barranin biex jużaw il-kapaċità żejda. Is-suq tal-Unjoni huwa attraenti minħabba d-daqs tiegħu, id-domanda għal ċilindri ċċertifikati f’setturi bħal dawk mediċi, industrijali u tal-idroġenu, u n-nuqqas ta’ miżuri speċifiċi ta’ difiża tal-kummerċ fuq ħafna prodotti tal-HPSC.

(298)

Fid-dawl ta’ dawn il-fatturi, il-Kummissjoni qieset li l-kapaċità ta’ riżerva sinifikanti taċ-Ċina, flimkien mal-provvista żejda tal-azzar upstream u l-politiki industrijali appoġġati mill-Istat, hija xprun ewlieni wara ż-żieda fil-volumi tal-esportazzjoni lejn l-Unjoni. Din il-provvista żejda strutturali kkontribwiet għal pressjoni ’l isfel fuq il-prezzijiet fl-Unjoni, heddet il-vijabbiltà ekonomika tal-industrija tal-HPSC tal-Unjoni, u enfasizzat il-ħtieġa għall-applikazzjoni ta’ miżuri biex tinkiseb kompetizzjoni leali fis-suq.

(299)

Fiċ-Ċina, il-kompetizzjoni għall-materja prima użata fil-produzzjoni tal-HPSC hija influwenzata ħafna mill-politiki u l-interventi tal-gvern li jaffettwaw l-ipprezzar u d-disponibbiltà. Dawn il-miżuri jgħinu biex il-kostijiet tal-input jinżammu aktar baxxi għall-produtturi Ċiniżi tal-HPSC meta mqabbla mal-kompetituri internazzjonali tagħhom.

(300)

B’kuntrast ma’ dan, il-produtturi tal-Unjoni tal-HPSC jeħtiġilhom jixtru materja prima bħal tubi tal-azzar mingħajr weldjatura u ligi ewlenin fis-suq internazzjonali miftuħ, fejn il-prezzijiet huma ddeterminati mill-provvista u d-domanda globali, l-indiċijiet tas-suq tal-azzar, u l-kostijiet tal-enerġija. Il-manifatturi Ewropej jiffaċċjaw prezzijiet tal-materja prima relattivament ogħla u aktar volatili mingħajr aċċess għal sussidji jew prezzijiet preferenzjali. L-Unjoni tikseb materja prima minn firxa varjata ta’ fornituri globali, inkluż fornituri Ewropej, Asjatiċi u Amerikani, li jagħmlu s-suq tal-UE sensittiv għall-fluttwazzjonijiet fil-ktajjen tal-provvista globali, għall-avvenimenti ġeopolitiċi, u għad-disponibbiltà tal-materja prima.

(301)

Barra minn hekk, il-Kummissjoni imponiet dazji anti-dumping definittivi fuq l-importazzjonijiet ta’ ċerti pajpijiet u tubi mingħajr weldjatura miċ-Ċina, b’rati li jvarjaw minn madwar 29 % sa 55 %. Dawn id-dazji għandhom l-għan li jikkontrobattu l-ipprezzar inġust u d-distorsjonijiet tas-suq ikkawżati mill-prattiki tad-dumping, filwaqt li jipproteġu lill-produtturi tal-Unjoni mid-dannu. Madankollu, tali restrizzjonijiet u dazji fuq l-esportazzjoni jistgħu jnaqqsu d-disponibbiltà tal-materja prima fis-suq internazzjonali, li min-naħa tagħha tgħolli l-prezz tal-bejgħ tagħhom fl-Unjoni. Din iż-żieda fil-prezzijiet tal-materja prima fl-Unjoni tkompli twessa’ d-diskrepanza fil-kostijiet, u b’hekk toħloq vantaġġ saħansitra akbar għall-produtturi Ċiniżi tal-HPSC li jkomplu jibbenefikaw minn kostijiet domestiċi aktar baxxi tal-input.

(302)

L-impożizzjoni ta’ dazji anti-dumping fuq l-importazzjonijiet Ċiniżi tal-HPSC hija mistennija li jkollha impatt limitat u maniġġabbli fuq il-ktajjen tal-provvista tal-Unjoni. L-HPSC jaqdu setturi vitali inkluż il-kura tas-saħħa, il-gassijiet industrijali, is-soppressjoni tan-nar, it-tagħmir tas-sikurezza, u s-suq tal-idroġenu li qed jikber.

(303)

Bħalissa l-industrija tal-Unjoni topera b’kapaċità ta’ 48 % biss minħabba dumping dannuż, iżda għandha biżżejjed kapaċità ta’ riżerva u għarfien espert biex iżżid il-produzzjoni u tissodisfa aktar domanda jekk l-importazzjonijiet miċ-Ċina jonqsu. Fornituri alternattivi mit-Turkija, mir-Renju Unit, min-Norveġja u mill-Istati Uniti diġà jkopru aktar minn 9 % tas-suq, u flimkien ma’ żieda fil-produzzjoni tal-Unjoni, dawn jistgħu jissodisfaw sehem sinifikanti tal-ħtiġijiet tal-Unjoni.

(304)

L-HPSC jirrappreżentaw frazzjoni żgħira tal-kostijiet totali tal-utenti downstream u spiss jinkrew jew jiġu amortizzati maż-żmien, li jfisser li kwalunkwe żieda fil-kostijiet mid-dazji x’aktarx li ma taffettwax b’mod sinifikanti l-prezzijiet finali tal-prodott. Id-dazji ma jimblukkawx l-importazzjonijiet Ċiniżi, iżda jiżguraw li dawn jidħlu bi prezzijiet ġusti u mhux oġġett ta’ dumping.

(305)

Filwaqt li l-impatt tal-kost tal-miżuri AD iġorr miegħu prezz, huwa probabbli li dawn il-kostijiet se jinstebqu mill-effetti favorevoli usa’: il-miżuri se jgħinu biex tiġi żgurata provvista stabbli u affidabbli tal-Unjoni tal-HPSC, terġa’ tinkiseb kompetizzjoni leali fis-suq tal-Unjoni, u tissaħħaħ ir-reżiljenza industrijali tal-Unjoni. Għal setturi ewlenin bħall-gass, il-kura tas-saħħa u l-idroġenu, l-iżgurar ta’ aċċess sigur għal ċilindri ta’ kwalità huwa essenzjali biex tinżamm il-kontinwità operazzjonali, tiġi ssalvagwardjata s-sikurezza pubblika, u jiġu appoġġati l-għanijiet tal-Unjoni ta’ awtonomija strateġika u reżiljenza industrijali.

(306)

Wara li vvalutat l-informazzjoni pertinenti kollha għal din l-investigazzjoni, il-Kummissjoni kkonkludiet b’mod proviżorju li huwa fl-interess tal-Unjoni li tistabbilixxi l-ammont ta’ dazji proviżorji f’konformità mal-Artikolu 7(2a) tar-Regolament bażiku.

(307)

B’mod partikolari, l-industrija tal-HPSC taċ-Ċina għandha kapaċità ta’ riżerva sostanzjali, u l-impatt tal-impożizzjoni ta’ dazji anti-dumping fuq l-importazzjonijiet Ċiniżi huwa mistenni li jkun maniġġabbli għall-katina tal-provvista tal-Unjoni. Bħalissa l-industrija tal-Unjoni qed topera taħt il-kapaċità, iżda għandha l-għarfien espert tekniku u l-potenzjal ta’ produzzjoni ta’ riżerva biex iżżid l-output u tissodisfa d-domanda. Barra minn hekk, fornituri alternattivi minn pajjiżi oħrajn bħat-Turkija, ir-Renju Unit, in-Norveġja, u l-Istati Uniti jipprovdu aktar għażliet ta’ forniment.

(308)

Abbażi ta’ dan ta’ hawn fuq, il-Kummissjoni kkonkludiet b’mod proviżorju li dazju aktar baxx mill-marġni tad-dumping ma jkunx biżżejjed biex jitneħħa d-dannu lill-industrija tal-Unjoni. Il-produtturi tal-Unjoni ma humiex biss qed iġarrbu ħsara minħabba d-dumping, iżda qed ibatu wkoll minn distorsjonijiet addizzjonali tal-kummerċ meta mqabbla mal-produtturi esportaturi Ċiniżi. Għalhekk, sabiex il-kummerċ ikun protett b’mod adegwat, il-livell tal-miżuri jrid ikun ekwivalenti għall-marġni tad-dumping kif stabbilit b’mod proviżorju.

(309)

Wara l-valutazzjoni ta’ hawn fuq, jenħtieġ li d-dazji anti-dumping proviżorji jiġu stabbiliti bħal hawn taħt f’konformità mal-Artikolu 7(2a) tar-Regolament bażiku:

(310)

Wara li ddeċidiet li tapplika l-Artikolu 7(2) tar-Regolament bażiku, il-Kummissjoni eżaminat jekk setgħetx tikkonkludi b’mod ċar li ma kienx fl-interess tal-Unjoni li tadotta miżuri f’dan il-każ, minkejja d-determinazzjoni ta’ dumping dannuż, f’konformità mal-Artikolu 21 tar-Regolament bażiku. Id-determinazzjoni tal-interess tal-Unjoni kienet ibbażata fuq l-apprezzament tal-bosta interessi involuti, inklużi dawk tal-industrija tal-Unjoni, tal-importaturi, tal-bejjiegħa bl-ingrossa, tal-bejjiegħa bl-imnut, tal-utenti u tal-konsumaturi.

(311)

L-industrija tal-Unjoni wriet grad għoli ta’ parteċipazzjoni fl-investigazzjoni, bil-produtturi jirrappreżentaw sehem sostanzjali tal-produzzjoni totali tal-Unjoni li ppreżentaw ruħhom biex jikkooperaw. Il-produtturi tal-Unjoni li kkooperaw irrappreżentaw aktar minn 80 % tal-produzzjoni u l-bejgħ totali tal-Unjoni fil-PI, li jiżgura valutazzjoni rappreżentattiva tas-sitwazzjoni tal-industrija tal-Unjoni.

(312)

L-investigazzjoni żvelat li l-industrija tal-Unjoni ġarrbet dannu materjali matul il-perjodu kkunsidrat. Indikaturi bħat-tnaqqis fil-profittabbiltà, it-tnaqqis fl-użu tal-kapaċità, it-telf tas-sehem mis-suq, u l-pressjoni ’l isfel fuq il-prezzijiet tal-bejgħ minħabba l-importazzjonijiet oġġett ta’ dumping juru b’mod ċar prestazzjoni ekonomika u finanzjarja li qed tiddeterjora. Dawn ix-xejriet negattivi dgħajfu l-kapaċità tal-industrija li żżomm operazzjonijiet sostenibbli u tinvesti fl-innovazzjoni u fl-effiċjenza.

(313)

L-impożizzjoni ta’ miżuri anti-dumping hija mistennija li tirrestawra kompetizzjoni leali fis-suq tal-Unjoni. Din x’aktarx tippermetti lill-industrija tal-Unjoni żżid il-volumi tal-bejgħ tagħha bi prezzijiet sostenibbli, tirkupra s-sehem mis-suq mitluf, u ttejjeb il-profittabbiltà tagħha. Kundizzjonijiet ekwi jippermettu wkoll lill-produtturi jottimizzaw l-użu tal-kapaċità u jinvestu f’aġġornamenti meħtieġa, filwaqt li jiżguraw il-vijabbiltà u l-kompetittività fit-tul. Mingħajr il-pressjoni inġusta fuq l-ipprezzar eżerċitata mill-importazzjonijiet oġġett ta’ dumping, l-industrija tkun f’pożizzjoni aktar b’saħħitha biex tirkupra u żżomm il-livelli tal-impjiegi.

(314)

Għall-kuntrarju, jekk il-miżuri ma jiġux imposti, l-industrija tal-Unjoni x’aktarx tkompli ssofri mill-effetti ta’ importazzjonijiet bi prezz inġust. Ix-xejra ’l isfel fil-prezzijiet u fil-profittabbiltà tkun mistennija li tippersisti, u b’hekk tkompli tnaqqas is-saħħa finanzjarja tal-produtturi. Din tista’ twassal għal tnaqqis fid-daqs, għeluq, u tnaqqis sinifikanti fl-impjiegi u fl-investiment fl-Unjoni. Id-dgħufija strutturali tal-industrija tkun diffiċli li titreġġa’ lura, b’xi produtturi potenzjalment joħorġu mis-suq.

(315)

Fid-dawl ta’ dan ta’ hawn fuq, l-impożizzjoni ta’ miżuri anti-dumping hija b’mod ċar fl-interess tal-industrija tal-Unjoni. Din tippermetti lis-settur jirkupra mid-dannu kkawżat mill-importazzjonijiet oġġett ta’ dumping, terġa’ tiġi stabbilita kompetizzjoni leali, u tiġi żgurata s-sostenibbiltà fit-tul tiegħu.

(316)

L-ebda importatur jew kummerċjant mhux relatat ma kkoopera fl-investigazzjoni. Għalhekk, ma ġiet ipprovduta l-ebda data dwar l-impatt tal-miżuri fuq dan il-grupp.

(317)

Fin-nuqqas ta’ kooperazzjoni u data speċifika, l-effetti probabbli tal-impożizzjoni ta’ miżuri fuq l-importaturi jridu jiġu vvalutati abbażi tal-fatti disponibbli. Wieħed jista’ jassumi b’mod raġonevoli li l-importaturi jistgħu jiffaċċjaw xi żidiet fil-kostijiet b’riżultat tal-impożizzjoni ta’ dazji anti-dumping. Madankollu, minħabba d-disponibbiltà ta’ sorsi alternattivi ta’ provvista, inkluż mill-produtturi tal-Unjoni, u l-possibbiltà ta’ importazzjonijiet kontinwi bi prezzijiet mhux oġġett ta’ dumping, kwalunkwe impatt negattiv huwa mistenni li jkun limitat.

(318)

Filwaqt li l-importaturi jistgħu jesperjenzaw tnaqqis fl-għażliet tal-provvista jew żieda fil-kostijiet fi żmien qasir, dawn l-effetti x’aktarx li jkunu moderati. Iż-żamma tal-istatus quo, min-naħa l-oħra, fl-aħħar mill-aħħar thedded il-vijabbiltà tal-provvista domestika u potenzjalment twassal għal dipendenza akbar fuq l-importazzjonijiet oġġett ta’ dumping fil-futur. Kollox ma’ kollox, il-benefiċċji għall-industrija tal-Unjoni jisbqu l-iżvantaġġi potenzjali limitati u mhux sostanzjati għall-importaturi.

(319)

Abbażi tal-informazzjoni disponibbli, huwa konkluż li l-impożizzjoni ta’ miżuri ma tagħmilx ħsara sinifikanti lill-interess ta’ importaturi mhux relatati, u għalhekk ma tmurx kontra l-interessi tagħhom.

(320)

L-ebda utent, konsumatur, jew fornitur ma ppreżenta ruħu biex jikkoopera fl-investigazzjoni. Bħala tali, ma ġiet ipprovduta l-ebda data dwar l-użu jew tħassib speċifiku li tista’ tissuġġerixxi effetti negattivi sinifikanti li jirriżultaw mill-impożizzjoni possibbli tal-miżuri.

(321)

Fin-nuqqas ta’ kooperazzjoni, l-effetti probabbli tal-miżuri fuq l-utenti jridu jiġu vvalutati abbażi ta’ suppożizzjonijiet raġonevoli. Iċ-ċilindri mingħajr weldjatura huma tipikament komponent żgħir tal-kost fi ħdan l-operazzjonijiet ġenerali tal-industriji downstream, inkluż fis-setturi tas-saħħa u tal-enerġija. Bħala tali, kwalunkwe żieda potenzjali fil-prezzijiet wara l-impożizzjoni tad-dazji ma hijiex mistennija li taffettwa b’mod sinifikanti l-operazzjonijiet tal-utenti jew il-ktajjen ta’ provvista ġenerali.

(322)

L-impożizzjoni ta’ miżuri tgħin biex tiġi żgurata l-vijabbiltà tal-industrija tal-Unjoni u jinżamm sors domestiku affidabbli ta’ prodott strateġiku użat f’setturi kritiċi bħall-kura tas-saħħa u l-enerġija nadifa. Filwaqt li l-utenti jistgħu jiffaċċjaw żidiet marġinali fil-prezzijiet fi żmien qasir, dawn jinstebqu mill-benefiċċji taż-żamma tas-sigurtà tal-provvista u l-iżgurar ta’ kompetizzjoni ġusta.

(323)

Fid-dawl ta’ dan ta’ hawn fuq, l-impożizzjoni ta’ miżuri ma hijiex mistennija li tagħmel ħsara sinifikanti lill-interessi tal-utenti, u tikkontribwixxi għas-salvagwardja ta’ aċċess stabbli u sigur għal prodotti strateġikament importanti. Għalhekk ġie konkluż li l-impożizzjoni ta’ miżuri anti-dumping ma tmurx kontra l-interess tal-utenti.

(324)

Abbażi ta’ dan ta’ hawn fuq, il-Kummissjoni kkonkludiet li f’dan l-istadju tal-investigazzjoni ma kien hemm l-ebda raġuni konvinċenti li ma kienx fl-interess tal-Unjoni li timponi miżuri fuq l-importazzjonijiet tal-prodott ikkonċernat li joriġina mill-pajjiż ikkonċernat.

(325)

Abbażi tal-konklużjonijiet li waslet għalihom il-Kummissjoni fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, jenħtieġ li jiġu imposti miżuri proviżorji sabiex jiġi evitat dannu ulterjuri lill-industrija tal-Unjoni mill-importazzjonijiet oġġett ta’ dumping.

(326)

Jenħtieġ li jiġu imposti miżuri anti-dumping proviżorji fuq l-importazzjonijiet taċ-ċilindri tal-azzar mingħajr weldjatura ta’ pressjoni għolja li joriġinaw mir-RPĊ, f’konformità mal-Artikolu 7(2a) tar-Regolament bażiku. Il-Kummissjoni kkonkludiet li l-livell xieraq biex jitneħħa d-dannu jenħtieġ li jkun il-marġni tad-dumping.

(327)

Abbażi ta’ dan ta’ hawn fuq, jenħtieġ li r-rati tad-dazju anti-dumping proviżorji, espressi fuq il-prezz CIF fil-fruntiera tal-Unjoni, bid-dazju doganali mhux imħallas, ikunu kif ġej:

(328)

Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għalhekk, huma rriflettew is-sitwazzjoni li nstabet matul din l-investigazzjoni fir-rigward ta’ dawn il-kumpaniji. Dawn ir-rati tad-dazju huma applikabbli esklużivament għall-importazzjonijiet tal-prodott ikkonċernat li joriġina mill-pajjiżi kkonċernati u magħmul mill-entitajiet legali msemmija. Jenħtieġ li l-importazzjonijiet tal-prodott ikkonċernat manifatturat minn kwalunkwe kumpanija oħra mhux speċifikament imsemmija fil-parti operattiva ta’ dan ir-Regolament, inklużi entitajiet relatati ma’ dawk imsemmija speċifikament, ikunu soġġetti għar-rata tad-dazju applikabbli għall-“kumpaniji l-oħra kollha”. Jenħtieġ li dawn ma jkunu soġġetti għall-ebda waħda mir-rati tad-dazju anti-dumping individwali.

(329)

Biex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-Regolament. Sakemm tiġi ppreżentata tali fattura, l-importazzjonijiet jenħtieġ li jkunu soġġetti għad-dazju anti-dumping applikabbli għall-“importazzjonijiet l-oħrajn kollha li joriġinaw mill-pajjiż ikkonċernat”.

(330)

Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, din mhijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jeħtiġilhom iwettqu l-verifiki tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-trasport, eċċ.) sabiex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata tad-dazju aktar baxxa tkun ġustifikata, f’konformità mal-liġi doganali.

(331)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’ċirkostanzi bħal dawn u dment li jiġu ssodisfati l-kundizzjonijiet, tista’ tinbeda investigazzjoni antiċirkomvenzjoni. Din l-investigazzjoni tista’, fost l-oħrajn, teżamina l-ħtieġa tat-tneħħija ta’ rata/i tad-dazju individwali u l-impożizzjoni konsegwenti ta’ dazju għall-pajjiż kollu.

(332)

L-istatistika tal-prodott ikkonċernat ta’ spiss tiġi espressa f’biċċiet. Madankollu, ma teżisti l-ebda unità supplimentari bħal din għall-prodott ikkonċernat speċifikat fin-Nomenklatura Magħquda stabbilita fl-Anness I tar-Regolament tal-Kunsill (KEE) Nru 2658/87 (103). Huwa għalhekk meħtieġ li jiġi previst li mhux biss il-piż f’kg jew tunnellati, iżda wkoll l-biċċiet għall-importazzjonijiet tal-prodott ikkonċernat iridu jiddaħħlu fid-dikjarazzjoni għar-rilaxx għaċ-ċirkolazzjoni libera. Il-prezzijiet jenħtieġ li jiġu indikati għall-kodiċijiet NM u/jew TARIC.

(333)

Kif imsemmi fit-Taqsima 1.2, il-Kummissjoni għamlet l-importazzjonijiet tal-prodott ikkonċernat soġġetti għal reġistrazzjoni. Ir-reġistrazzjoni saret bil-għan li possibbilment jinġabru d-dazji b’mod retroattiv f’konformità mal-Artikolu 10(4) tar-Regolament bażiku.

(334)

Fid-dawl tas-sejbiet fl-istadju proviżorju, jenħtieġ li r-reġistrazzjoni tal-importazzjonijiet tieqaf/ma titkompliex.

(335)

F’dan l-istadju tal-proċediment ma ttieħdet/tista’ tittieħed l-ebda deċiżjoni dwar l-applikazzjoni retroattiva possibbli ta’ miżuri anti-dumping.

(336)

F’konformità mal-Artikolu 19a tar-Regolament bażiku, il-Kummissjoni informat lill-partijiet interessati dwar l-impożizzjoni ppjanata ta’ dazji proviżorji. Din l-informazzjoni ġiet magħmula disponibbli wkoll għall-pubbliku ġenerali fuq is-sit web tad-DĠ TRADE. Il-partijiet interessati ngħataw 3 ijiem ta’ xogħol sabiex jipprovdu kummenti dwar l-akkuratezza tal-kalkoli ddivulgati b’mod speċifiku lilhom.

(337)

BTIC issottomettiet kummenti relatati mal-kalkolu tal-prezz tal-esportazzjoni u l-valuri CIF użati għall-kalkolu tal-marġni tad-dumping tagħha. Wara l-analiżi, dawn il-kummenti ġew aċċettati u l-marġni tad-dumping ġie kkoreġut kif xieraq. Il-marġni tad-dumping għall-kumpaniji li kkooperaw mhux inklużi fil-kampjun u kumpaniji oħra ġew aġġustati kif xieraq.

(338)

Fl-interessi ta’ amministrazzjoni tajba, il-Kummissjoni se tistieden lill-partijiet interessati jippreżentaw kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Smigħ fil-proċeduri kummerċjali fi żmien skadenza fissa.

(339)

Is-sejbiet li jikkonċernaw l-impożizzjoni ta’ dazji proviżorji huma proviżorji u jistgħu jiġu emendati fl-istadju definittiv tal-investigazzjoni,