18.11.2022   

GA

Iris Oifigiúil an Aontais Eorpaigh

L 299/14


RIALACHÁN CUR CHUN FEIDHME (AE) 2022/2259 ÓN gCOIMISIÚN

an 14 Samhain 2022

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 14 Samhain 2022.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim


(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).


IARSCRÍBHINN

Tuairisc ar na hearraí

Aicmiú (Cód AC)

Cúiseanna

(1)

(2)

(3)

Fáinne plaisteach arb é tuairim agus 4 cm a thrastomhas seachtrach agus arb é tuairim agus 2 cm a thrastomhas inmheánach. Tá dhá oscailt bheaga air, ceann ar an taobh amuigh agus ceann ar an taobh istigh. Tá stiall d’fhabraic neamhfhite ann atá tuilithe le substaintí cumhra.

Cuirtear an táirge laistigh de bhéalóg buidéal óil ar leith chun dea-bholadh a chur ar aer comhthimpeallach a asúitear le linn uisce a ól ón mbéalóg. Is i gcúl na sróine a bhraitear an t-aer cumhraithe (is é sin, ó laistigh den bhéalchuas), rud a fhágann go mbraitheann an tomhaltóir gur deoch bhlaistithe atá á hól aige.

Tá an táirge ar fáil faoi chumhráin éagsúla agus tá sé pacáistithe i málaí scragaill alúmanaim ilchodaigh lena miondíol mar fhaighneoga cumhráin chun boladh a tháirgeadh.

3307 90 00

Is le rialacha ginearálta 1 agus 6 maidir le léirmhíniú na hAinmníochta Comhcheangailte, le nóta 4 a ghabhann le Caibidil 33 agus le foclaíocht na gcód AC 3307 agus 3307 90 00 a chinntear an t-aicmiú.

Ní de chineál a úsáidtear mar amhábhar i dtionscal é ná ní ullmhúchán é de chineál a úsáidtear i monarú deochanna. Ní táirge é táirge a dhéanann leacht dea-bholaidh den leacht agus, ar an gcaoi sin, ní dhéanann sé deoch chumhra den deoch féin. Dá bhrí sin, eisiatar é óna aicmiú faoin gceannteideal 3302 .

Tá an táirge deartha chun aer a chumhrú a asúitear ansin in éineacht leis an uisce ón mbuidéal óil. Tá stiall d’fhabraic neamhfhite inti atá tuilithe le hullmhóid chumhráin de réir bhrí nóta 4 a ghabhann le Caibidil 33 chun na críche sin (féach freisin na Nótaí Míniúcháin maidir leis an gCóras Comhchuibhithe a ghabhann leis an gceannteideal 3307 , pointe (V)(5)).

Dá bhrí sin, tá an táirge le haicmiú faoin gcód AC 3307 90 00 mar chumhrán eile nach sonraítear ná nach n-áirítear in aon áit eile.

(*)

Is le faisnéis a thabhairt, agus lena aghaidh sin amháin, atá an íomhá anseo.

Image 1