European flag

Iris Oifigiúil
an Aontais Eorpaigh

GA

Sraith C


C/2023/1617

21.12.2023

CINNEADH Ó BHIÚRÓ PHARLAIMINT NA HEORPA

an 11 Nollaig 2023

lena leasaítear na Bearta Cur Chun Feidhme do Reacht Fheisirí Pharlaimint na hEorpa

(C/2023/1617)

TÁ BIÚRÓ PHARLAIMINT NA hEORPA,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 223(2) de,

Ag féachaint do Reacht Fheisirí Pharlaimint na hEorpa (1),

Ag féachaint do Riail 25 de Rialacha Nós Imeachta Pharlaimint na hEorpa,

De bharr an mhéid seo a leanas:

(1)

I gcomhréir le hAirteagal 69(1) de na Bearta Cur Chun Feidhme do Reacht Fheisirí Pharlaimint na hEorpa (2) (‘na Bearta Cur Chun Feidhme’), féadfaidh an Biúró méideanna an liúntais caiteachais ghinearálta, na speansas taistil agus an liúntais cothaithe laethúil a innéacsnascadh go bliantúil, suas go dtí uasmhéadú arb ionann é agus an ráta boilscithe bliantúil san Aontas Eorpach i mí Dheireadh Fómhair den bhliain roimhe sin, arna fhoilsiú ag Eurostat.

(2)

Is é 3,6 % an ráta boilscithe san Aontas Eorpach don tréimhse ó mhí Dheireadh Fómhair 2022 go mí Dheireadh Fómhair 2023, arna fhógairt ag Eurostat an 17 Samhain 2023. Méideanna nua na liúntas agus na speansas taistil thuas a eascraíonn as an gcoigeartú is gá chun an ráta boilscithe sin a chur san áireamh, ba cheart feidhm a beith acu ón 1 Eanáir 2024 agus ba cheart na Bearta Cur Chun Feidhme a leasú dá réir.

(3)

De bhun Airteagal 69(2) de na Bearta Cur Chun Feidhme, tá uasmhéid na gcostas um chúnamh parlaiminteach is iníoctha i leith na foirne pearsanta dá dtagraítear in Airteagal 29(4) díobh le hinnéacsnascadh, i gcás inarb iomchuí, go bliantúil ag an mBiúró ar bhonn an Innéacs Chomhpháirtigh arna bhunú ag Eurostat chun an t-athrú ar an gcostas maireachtála d’oifigigh an Aontais a thomhas de bhun Airteagal 65 de Rialacháin Foirne Oifigigh an Aontais Eorpaigh agus Coinníollacha Fostaíochta Sheirbhísigh Eile an Aontais Eorpaigh, a leagtar síos i Rialachán (CEE, Euratom, CEGC) Uimh. 259/68 ón gComhairle (3) (‘Rialacháin Foirne’), agus i gcomhréir le hIarscríbhinn XI a ghabhann leo.

(4)

Is gnách gurb é an Biúró a chinneann an t-innéacsnascadh sin i mí na Nollag, agus go dtagann sé i bhfeidhm go haisghníomhach amhail ó mhí Iúil na bliana i dtrácht. Mar sin féin, ós rud é gur shocraigh Eurostat an tInnéacs Comhpháirteach ag 103,7 (+ 3,7 %) don tréimhse ón 1 Iúil 2022 go dtí an 1 Eanáir 2023, agus dá bhrí sin gur sháraigh sé an tairseach 3 % a bunaíodh leis na Rialacháin Foirne chun nuashonrú ar an luach saothair a spreagadh, bhí gá le hoiriúnú idirmheánach ar speansais um chúnamh parlaiminteach. Dá réir sin, ag an gcruinniú a bhí aige an 12 Meitheamh 2023, chinn an Biúró, i gcomhréir leis an ráta coigeartaithe 1,7 % arna shocrú ag an gCoimisiún don chéad leath de 2023, an t-uasmhéid míosúil is iníoctha i leith speansais um chúnamh parlaiminteach a mhéadú go EUR 28 412, le héifeacht ón 1 Eanáir 2023.

(5)

Don dara leath de 2023, tá an ráta coigeartaithe socraithe ag an gCoimisiún ag 1 %. Ba cheart, dá bhrí sin, an t-uasmhéid míosúil is iníoctha i leith speansais um chúnamh parlaiminteach a mhéadú go EUR 28 696 le héifeacht ón 1 Iúil 2023 agus ba cheart na Bearta Cur Chun Feidhme a leasú dá réir,

TAR ÉIS AN CINNEADH SEO A GHLACADH:

Airteagal 1

Leasaítear na Bearta Cur Chun Feidhme mar a leanas:

(1)

in Airteagal 15, cuirtear an méid seo a leanas in ionad phointe (c):

‘(c)

i gcás turas i gcarr, le huasteorainn aisíocaíochta 1 000 km in aghaidh an turais amach nó isteach: EUR 0,58/km, móide costas aon turais ar bhád farantóireachta nó modh iompair comhchosúil eile.’;

(2)

leasaítear Airteagal 20, mír 1, mar a leanas:

(a)

cuirtear an méid seo a leanas in ionad phointe (a):

‘(a)

don chuid den turas idir 0 agus 50 km: EUR 25,91;’;

(b)

cuirtear an méid seo a leanas in ionad phointe (b):

‘(b)

don chuid den turas idir 51 agus 250 km: EUR 0,15/km;’;

(3)

leasaítear Airteagal 22 mar a leanas:

(a)

cuirtear an méid seo a leanas in ionad mhír 1:

‘1.   Is é EUR 4 886 an t-uasmhéid bliantúil a fhéadfar a aisíoc i leith speansais taistil a thabhaítear sna cásanna dá dtagraitear in Airteagal 10(1), pointe (b).’

;

(b)

cuirtear an méid seo a leanas in ionad na chéad fhomhíre de mhír 3:

‘3.   Is é EUR 4 886 an t-uasmhéid bliantúil a fhéadfar a aisíoc i leith speansais taistil a thabhaíonn cathaoirligh choiste nó fochoiste go hiarbhír agus iad ag taisteal le freastal ar chomhdhálacha nó ar imeachtaí ag a bhfuil ábhar leasa Eorpaigh faoi chaibidil agus a thagann faoi raon freagrachta a gcoiste nó a bhfochoiste agus a bhfuil gné pharlaiminteach ag gabháil leo. Beidh gá le húdarú roimh ré ó Uachtarán na Parlaiminte i gcás rannpháirteachas den sórt sin, tar éis fíorú a dhéanamh go bhfuil leithreasuithe suas go dtí an t-uasmhéid thuasluaite le fáil.’

;

(4)

in Airteagal 24, cuirtear an méid seo a leanas in ionad mhír 2:

‘2.   Má tharlaíonn an ghníomhaíocht oifigiúil ar chríoch an Aontais, gheobhaidh an Feisire liúntas cnapshuime dar luach EUR 350.’

;

(5)

in Airteagal 29, cuirtear an méid seo a leanas in ionad mhír 4:

‘4.   Is é EUR 28 696 an t-uasmhéid míosúil is iníoctha i leith na foirne pearsanta uile dá dtagraítear in Airteagal 30 le héifeacht ón 1 Iúil 2023.’

.

(6)

in Airteagal 42, cuirtear an méid seo a leanas in ionad mhír 2:

‘2.   Is é EUR 4 950 méid míosúil an liúntais caiteachais ghinearálta.’

;

Airteagal 2

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag an gCinneadh seo ón 1 Eanáir 2024, cé is moite d’Airteagal 1, pointe 5, a mbeidh feidhm aige ón 1 Iúil 2023.


(1)  Cinneadh 2005/684/CE, Euratom ó Pharlaimint na hEorpa an 28 Meán Fómhair 2005 ag glacadh Reacht Fheisirí Pharlaimint na hEorpa (IO L 262, 7.10.2005, lch. 1).

(2)  Cinneadh ó Bhiúró Pharlaimint na hEorpa an 19 Bealtaine agus an 9 Iúil 2008 maidir le bearta cur chun feidhme do Reacht Fheisirí Pharlaimint na hEorpa (IO C 159, 13.7.2009, lch. 1).

(3)   IO L 56, 4.3.1968, lch. 1.


ELI: http://data.europa.eu/eli/C/2023/1617/oj

ISSN 1977-107X (electronic edition)