(1)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta sin, de réir mar is iomchuí. Faoi Airteagal 16(4) de Rialachán (AE) Uimh. 1380/2013 ó Pharlaimint na hEorpa agus ón gComhairle (1), tá deiseanna iascaireachta le socrú i gcomhréir le cuspóirí an Chomhbheartais Iascaigh (CBI) de réir mar a leagtar amach in Airteagal 2(2) den Rialachán sin. Faoi Airteagal 16(1) de Rialachán (AE) Uimh. 1380/2013, tá deiseanna iascaireachta atá cionroinnte ar na Ballstát le háirithiú cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic éisc nó gach iascaigh.

(2)

Ba cheart na gabhálacha iomlána incheadaithe (TACanna) a bhunú, dá bhrí sin, i gcomhréir le hAirteagal 3 de Rialachán (AE) Uimh. 1380/2013, ar bhonn na comhairle eolaíche atá ar fáil, agus gnéithe bitheolaíocha agus socheacnamaíocha á gcur san áireamh, agus cóir chothrom idir earnálacha iascaireachta á háirithiú, agus i bhfianaise na dtuairimí a cuireadh in iúl le linn an chomhairliúcháin leis na páirtithe leasmhara.

(3)

Faoi Airteagal 15 de Rialachán (AE) Uimh. 1380/2013, tá na stoic uile a bhfuil teorainneacha gabhálacha ag gabháil leo faoi réir na hoibleagáide gabhálacha a thabhairt i dtír ó bhí an 1 Eanáir 2019 ann, ach tá feidhm ag díolúintí áirithe. Ar bhonn moltaí comhpháirteacha ó na Ballstáit agus i gcomhréir le hAirteagal 15 de Rialachán (AE) Uimh. 1380/2013, ghlac an Coimisiún gníomhartha tarmligthe lena leagtar síos na mionsonraí le haghaidh iascaigh áirithe maidir le cur chun feidhme na hoibleagáide gabhálacha a thabhairt i dtír.

(4)

Ba cheart a chur san áireamh sna deiseanna iascaireachta le haghaidh stoic speicis a chumhdaítear leis an oibleagáid gabhálacha a thabhairt i dtír, nach gceadaítear a thuilleadh i bprionsabal ábhar muirí a aischur. Dá bhrí sin, ba cheart na deiseanna iascaireachta a bheith bunaithe ar an bhfigiúr comhairle le haghaidh gabhálacha iomlána arna chur ar fáil ag an gComhairle Idirnáisiúnta um Thaiscéalaíocht na Mara (ICES). Na cainníochtaí a bhféadfar, mar eisceacht ón oibleagáid gabhálacha a thabhairt i dtír, leanúint dá n-aischur, ba cheart iad a asbhaint ón bhfigiúr sin a mholtar le haghaidh gabhálacha iomlána. Ina theannta sin, i gcás deiseanna iascaireachta le haghaidh stoic nach dtugann ICES ach comhairle maidir le gabhálacha a thabhairt i dtír ina leith, ba cheart iad a shocrú ar bhonn na comhairle sin.

(5)

Le Rialachán (AE) 2018/973 ó Pharlaimint na hEorpa agus ón gComhairle (2), bunaíodh plean ilbhliantúil don Mhuir Thuaidh (‘Plean Ilbhliantúil don Mhuir Thuaidh’) agus le Rialachán (AE) 2019/472 ó Pharlaimint na hEorpa agus ón gComhairle (3), bunaíodh plean ilbhliantúil d’Uiscí an Iarthair (‘Plean Ilbhliantúil d’Uiscí an Iarthair’). Sa Phlean Ilbhliantúil don Mhuir Thuaidh agus sa Phlean Ilbhliantúil d’Uiscí an Iarthair, leagtar amach spriocanna agus bearta chun bainistiú fadtéarmach a dhéanamh ar stoic a chumhdaítear leis na pleananna ilbhliantúla sin. Ba cheart deiseanna iascaireachta le haghaidh na stoc a liostaítear in Airteagal 1(1) de na Rialacháin sin (‘spriocstoic’) a shocrú i gcomhréir le raon luachanna na básmhaireachta iascaireachta as a n-eascraíonn an uastáirgeacht inbhuanaithe (‘raonta FMSY’), nó ar leibhéal níos ísle, agus i gcomhréir leis na coimircí dá bhforáiltear sna Rialacháin sin. Leagtar amach raonta FMSY sa chomhairle ábhartha ó ICES. I gcás nach mbeidh faisnéis eolaíoch leormhaith ar fáil, ba cheart deiseanna iascaireachta le haghaidh na spriocstoc nó na stoc dá dtagraítear in Airteagal 1(4) de na Rialacháin sin (stoic foghabhála) a shocrú i gcomhréir leis an gcur chuige réamhchúraim, mar a leagtar amach sna Rialacháin sin.

(6)

I gcomhréir le hAirteagal 4(6) den Phlean Ilbhliantúil don Mhuir Thuaidh agus Airteagal 4(7) den Phlean Ilbhliantúil d’Uiscí an Iarthair, ba cheart deiseanna iascaireachta le haghaidh spriocstoc a shocrú chun a áirithiú gur lú ná 5 % an dóchúlacht go dtitfidh an bhithmhais faoi bhun an phointe tagartha teorann i dtaca le bithmhais (Blim) (4).

(7)

I gcomhréir le hAirteagal 7 den Phlean Ilbhliantúil don Mhuir Thuaidh agus le hAirteagal 8 den Phlean Ilbhliantúil d’Uiscí an Iarthair, i gcás ina léirítear leis an gcomhairle eolaíoch go bhfuil bithmhais stoic sceite aon cheann de na spriocstoic faoi bhun an MSY Btrigger (5), tá bearta ceartaitheacha le déanamh, agus go háirithe ba cheart na deiseanna iascaireachta a shocrú ag leibhéal a chomhfhreagróidh don bhásmhaireacht iascaireachta a laghdaítear go comhréireach chun an laghdú ar an bithmhais a chur san áireamh. I gcás ina léirítear leis an gcomhairle eolaíoch go bhfuil bithmhais stoic sceite aon cheann de na spriocstoic faoi bhun Blim, tá bearta ceartaitheacha breise le déanamh chun a áirithiú go ndéanfar an stoc a athbhunú go tapa chuig leibhéil os cionn na leibhéal sin a bhfuiltear in ann an uastáirgeacht inbhuanaithe a tháirgeadh os a gcionn. Féadfar a áireamh ar na bearta ceartaitheacha sin go háirithe iascach spriocdhírithe ar an stoc atá i gceist a chur ar fionraí agus laghdú leordhóthanach deiseanna iascaireachta le haghaidh na stoc sin nó na stoc eile san iascach.

(8)

Tá stoic áirithe ann a molann ICES gabhálacha nialasacha nó gabhálacha ísle ina leith, nó tuarann ICES, maidir le dóchúlacht níos lú ná 5 % a bheith ann go dtitfidh an bhithmhais faoi bhun Blim nach bhféadfaí í a bhaint amach ach amháin le gabhálacha ísle, nach bhféadfaí í a bhaint amach ach amháin le gabhálacha nialasacha nó nach bhféadfaí í a bhaint amach fiú le gabhálacha nialasacha. Mar sin féin, má bunaíodh na TACanna le haghaidh na stoc sin ar na leibhéil a mhol ICES, thiocfadh feiniméan an ‘tachtspeicis’ chun cinn de thoradh na hoibleagáide na gabhálacha uile a thabhairt i dtír, lena n-áirítear foghabhálacha ó na stoic sin, in iascaigh mheasctha. Is speiceas é an ‘tachtspeiceas’ a bhfuil easpa cuóta air a d’fhéadfadh stop a chur le hiascaireacht soithigh iascaireachta amháin nó níos mó fiú má tá cuóta fós acu le haghaidh speicis eile. De bhun Airteagal 5(3) den Phlean Ilbhliantúil don Mhuir Thuaidh agus den Phlean Ilbhliantúil d’Uiscí an Iarthair agus Airteagal 16(4) de Rialachán (AE) Uimh. 1380/2013, i gcomhar le hAirteagal 2(1) agus (5), pointí (c) agus (f), den Rialachán sin agus chun cothromaíocht a bhaint amach idir an t-iascach a choinneáil ar bun, i bhfianaise na n-impleachtaí tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar na stoic uile in iascach measctha ag an uastáirgeacht inbhuanaithe, is iomchuí TACanna sonracha a bhunú le haghaidh fhoghabhálacha na stoc sin. Ba cheart na TACanna foghabhála sin a shocrú ar leibhéil lena n-áirithítear go laghdófar ráta básmhaireachta na stoc sin nó go mbeidh a mbithmhais cobhsaí go fóill, agus lena soláthraítear dreasachtaí chun feabhas a chur ar an roghnaíocht agus foghabhálacha na stoc sin a sheachaint. Chun gabhálacha na stoc a laghdú a bhfuil TACanna foghabhála socraithe ina leith, ba cheart na deiseanna iascaireachta le haghaidh na n-iascach ina ngabhtar na stoic sin a shocrú ar leibhéil a chuideoidh le bithmhais na stoc leochaileach a athbhunú go leibhéil inbhuanaithe.

(9)

Chun úsáid deiseanna iascaireachta in iascaigh mheasctha i gcomhréir le hAirteagal 16(2) de Rialachán (AE) Uimh. 1380/2013, a ráthú a mhéid is féidir, is iomchuí linn a bhunú le haghaidh malartuithe cuótaí le haghaidh na mBallstát nach bhfuil aon chuóta acu chun a bhfoghabhálacha dosheachanta a chumhdach.

(10)

I gcomhréir le hAirteagal 2(2) agus Airteagal 16(4) de Rialachán (AE) Uimh. 1380/2013, maidir le stoic nach gcumhdaítear leis an bPlean Ilbhliantúil don Mhuir Thuaidh ná leis an bPlean Ilbhliantúil d’Uiscí an Iarthair, i gcás ina bhfuil faisnéis eolaíoch leormhaith ar fáil, ba cheart deiseanna iascaireachta a shocrú i gcomhréir le básmhaireacht iascaireachta na huastáirgeachta inbhuanaithe agus i gcás nach bhfuil faisnéis den sórt sin ar fáil, ba cheart deiseanna iascaireachta a shocrú i gcomhréir leis an gcur chuige réamhchúraim i leith bainistiú iascaigh, mar a shainmhínítear in Airteagal 4(1), pointe (8), de Rialachán (AE) Uimh. 1380/2013.

(11)

I gcás stoic áirithe, tá comhairle ó ICES fós bailí ar feadh roinnt blianta agus is í an chomhairle sin an chomhairle eolaíoch is fearr dá bhfuil ar fáil le haghaidh tréimhse iomlán na comhairle. Sna cásanna sin, ba cheart TACanna bliantúla a shocrú lena gcumhdófar tréimhse iomlán na comhairle (‘TAC ilbhliantúil’). Mar sin féin, má bhíonn comhairle nua ó ICES ar fáil le linn na tréimhse sin, ba cheart a áirithiú go leanfaidh an TAC ilbhliantúil de bheith comhsheasmhach leis an gcomhairle nua. Thairis sin, ba cheart a áirithiú go mbeidh na hasbhaintí bliantúla ó chuótaí an Aontais, chun díolúintí ón oibleagáid gabhálacha a thabhairt i dtír a chur san áireamh comhsheasmhach leis na sonraí atá ar fáil.

(12)

De réir na comhairle ó ICES le haghaidh 2025, táthar ag tuar go dtiocfaidh laghdú breise ar bhithmhais an doingin mara Eorpaigh (Dicentrarchus labrax) i ranna 8a agus 8b ICES in 2024 agus go mbeidh sí fós faoi bhun MSY Btrigger ach os cionn Blim. Dá bhrí sin, i gcomhréir le hAirteagal 8(1) den Phlean Ilbhliantúil d’Uiscí an Iarthair, tá an Spáinn, an Fhrainc le háirithiú go comhpháirteach, agus a gcuótaí le haghaidh iascaigh thráchtála don stoc sin á gcinneadh acu, go mbeidh suim na ngabhálacha tráchtála, an ábhair mhuirí aischurtha thráchtála, na ngabhálacha áineasa agus an ábhair mhuirí aischurtha áineasa faoi bhun luach phointe FMSY (6) le haghaidh na n-aistrithe iomlána, arna laghdú go comhréireach chun an laghdú ar an mbithmhais a chur san áireamh. Chun go mbeidh an Coimisiún in ann faireachán a dhéanamh ar chur i bhfeidhm ceart na gcuspóirí agus na rialacha a leagtar amach i Rialachán (AE) Uimh. 1380/2013 agus sa Phlean Ilbhliantúil d’Uiscí an Iarthair, ba cheart do na Ballstáit faisnéis maidir leis na cuótaí sin a chur faoi bhráid an Choimisiúin.

(13)

Ba cheart bearta breise maidir le hiascach áineasa doingean mara Eorpach i ranna 8a agus 8b ICES a choinneáil ar bun, i bhfianaise an tionchair shuntasaigh atá ag iascach áineasa ar bhithmhais an stoic sin agus an bhithmhais laghdaithe á cur san áireamh.

(14)

Tá stoic áirithe ann a molann ICES gabhálacha os cionn leibhéal íseal ina leith. Mar sin féin, má bunaíodh TACanna le haghaidh na stoc sin ar na leibhéil sin, thiocfadh feiniméan an ‘tachtspeicis’ chun cinn agus dhúnfaí roimh am iascaigh áirithe de thoradh na hoibleagáide na gabhálacha uile a thabhairt i dtír, lena n-áirítear foghabhálacha na stoc sin in iascaigh mheasctha. De bhun Airteagal 5(3) den Phleananna Ilbhliantúil don Mhuir Thuaidh agus den Phlean Ilbhliantúil d’Uiscí an Iarthair agus Airteagal 16(4) de Rialachán (AE) Uimh. 1380/2013, i gcomhar le hAirteagal 2(1) agus (5), pointí (c) agus (f), den Rialachán sin agus chun cothromaíocht a bhaint amach idir an t-iascach a choinneáil ar bun, i bhfianaise na n-impleachtaí tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar na stoic uile in iascach measctha ag an uastáirgeacht inbhuanaithe, is iomchuí TACanna sonracha a bhunú le haghaidh fhoghabhálacha na stoc sin. Ba cheart na TACanna foghabhála sin a shocrú ar bhonn na fianaise lena léirítear go ndúnfaí iascach amháin nó níos mó roimh am dá ndéanfaí na TACanna a shocrú ar an leibhéal a mhol ICES agus go bhféadfadh tionchar socheacnamaíoch dian a bheith aige sin. Ina theannta sin, ba cheart na TACanna foghabhála sin a shocrú ar leibhéil a laghdódh feiniméan an ‘tachtspeicis’ agus dúnadh roimh am iascach áirithe, a laghdódh na tionchair shocheacnamaíocha ghaolmhara agus a laghdódh ráta básmhaireachta iascaigh le haghaidh na stoc sin nó a d’áiritheodh go bhfanfadh a mbithmhais cobhsaí, chomh maith le dreasachtaí a sholáthar chun feabhas a chur ar roghnaíocht agus foghabhálacha na stoc sin a sheachaint.

(15)

De réir na comhairle eolaíche, tá gabhálacha áineasa mangach (Pollachius pollachius) i bhfolimistéir 8, 9 agus 10 ICES agus in uiscí an Aontais in CECAF 34.1.1 neamhdhiomaibhseach. Is iomchuí, dá bhrí sin, teorainneacha ar iascach áineasa don mhangach a choinneáil ar bun sna limistéir sin. Chun na láithreacha sceite a chosaint agus chun teorainn a chur le gabhálacha iasc óg, ní fhéadfar aon eiseamal de mhangach a ghabháil agus a choinneáil in iascach áineasa idir an 1 Eanáir agus an 30 Aibreán, agus d’fhéadfaí uasmhéid dhá eiseamal a cheadú don chuid eile den bhliain.

(16)

I mí na Bealtaine 2022 chuir ICES in iúl nach ndearnadh aon dul chun cinn foriomlán, d’ainneoin iarrachtaí na mBallstát maidir le hathbhunú stoc na heascainne Eorpaí (Anguilla anguilla), maidir le baint amach an chuspóra ligean do 40 % de bhithmhais na n-eascann geal éalú ar fud an Aontais ina iomláine, mar a cheanglaítear le hAirteagal 2(4) de Rialachán (CE) Uimh. 1100/2007 ón gComhairle (7), agus nár breathnaíodh aon phatrún soiléir maidir le básmhaireacht. I mí na Samhna 2024 mhol ICES arís gur cheart gan aon ghabháil eascann Eorpach a bheith ann i ngach gnáthóg agus ag gach céim den saol, ar fud a raoin nádúrtha, lena gcuimsítear an tAtlantach Thoir Thuaidh agus an Mheánmhuir, nuair a chuirtear an cur chuige réamhchúraim i bhfeidhm. Bhain sé sin le gabhálacha áineasa agus tráchtála araon agus áiríodh leis gabhálacha eascann gloine le haghaidh athstocála agus dobharshaothrú.

(17)

Le Rialachán (AE) 2023/194 ón gComhairle (8), cuireadh síneadh 6 mhí leis an tréimhse choiscthe le haghaidh aon ghníomhaíocht iascaireachta eascann tráchtála in uiscí muirí agus uiscí goirte an Aontais san Atlantach Thoir Thuaidh. Cuireadh toirmeasc leis freisin ar gach iascach eascann áineasa sna huiscí sin. Measadh gurbh fhearr a chosnódh tréimhse choiscthe 6 mhí an stoc ná mar a chosnódh bearta an Aontais agus na bearta náisiúnta a cuireadh chun feidhme go dtí 2022. Measadh freisin leis an tréimhse choiscthe shínithe go gcuirfí le baint amach an chuspóra a leagtar amach in Airteagal 2(4) de Rialachán (CE) Uimh. 1100/2007 ligean do 40 % ar a laghad d’eascanna geala éalú. Le Rialachán (AE) 2024/257 ón gComhairle (9), coinníodh na bearta sin ar bun agus soiléiríodh na critéir maidir leis an tréimhse choiscthe agus an maolú a d’fhéadfadh a bheith ann a shocrú i gcás iascaigh eascann theoranta leanúnacha le linn thréimhse imirce na n-eascann. I bhfianaise staid chriticiúil leanúnach na heascainne Eorpaí, is iomchuí na bearta sin a choinneáil ar bun in 2025.

(18)

De bhun Rialachán (CE) Uimh. 1100/2007, is beart caomhnúcháin é eascanna gloine a athstocáil arna roghnú ag Ballstáit áirithe ina bpleananna bainistíochta eascann. D’fhonn é a chur ar a gcumas do na Ballstáit sin leanúint den bheart sin a chur chun feidhme, d’fhéadfadh sé go mbeadh gá le gabhálacha eascann gloine in uiscí muirí agus uiscí goirte an Aontais san Atlantach Thoir Thuaidh ag an am iomchuí den bhliain agus b’fhéidir le linn a bpríomhthréimhse imirce nó a bpríomhthréimhsí imirce. Dá bhrí sin, féadfaidh na Ballstáit iascaireacht leanúnach eascann gloine a cheadú go heisiach le haghaidh athstocála ar feadh 50 lá breise le linn phríomhthréimhse imirce nó phríomhthréimhsí imirce na n-eascann gloine.

(19)

Sa chomhairle ó ICES maidir le stoic áirithe ealásmabrainciach (sciataí, siorcanna, roic), molann sé gabhálacha nialasacha, mar gheall ar a ndrochstádas caomhantais, nó i gcás ina bhféadfadh fiú gníomhaíocht theoranta iascaireachta a bheith ina siocair le riosca tromchúiseach caomhnaithe. Ina theannta sin, bíonn rátaí arda marthanais ag na healásmabrainciaigh sin nuair a dhéantar iad a aischur. Dá bhrí sin, ba cheart gabhálacha na stoc sin a aischur seachas iad a thabhairt i dtír, ós rud é nach meastar go méadaíonn an t-aischur a mbásmhaireacht iascaireachta go suntasach agus go dtacódh sé fiú le caomhnú na stoc sin. Dá bhrí sin, ba cheart iascaireacht na speiceas sin a thoirmeasc, toisc nach bhfuil feidhm ag an oibleagáid gabhálacha a thabhairt i dtír maidir leis na speicis a bhfuil toirmeasc ar iascaireacht a dhéanamh orthu de bhun Airteagal 15(4), pointe (a), de Rialachán (AE) Uimh. 1380/2023. Nuair a ghabhtar de thaisme iad, níor cheart dochar a dhéanamh do na speicis sin agus ba cheart iad a scaoileadh saor go pras.

(20)

Chun an úsáid a bhaintear as deiseanna iascaireachta a uasmhéadú, is iomchuí foráil a dhéanamh maidir le socrú solúbtha a chur chun feidhme idir limistéir áirithe TAC inarb é an stoc bitheolaíoch céanna atá i gceist.

(21)

Le hAirteagail 3 agus 4 de Rialachán (CE) Uimh. 847/96 ón gComhairle (10), déantar foráil maidir le solúbthacht ó bhliain go bliain maidir le cuótaí le haghaidh stoic atá faoi réir TACanna réamhchúraim agus anailíseacha araon. Faoi Airteagal 2 den Rialachán sin, bíonn sé le cinneadh ag an gComhairle, agus TACanna á socrú aici, cé na stoic nach mbeidh feidhm ag Airteagail 3 agus 4 den Rialachán sin maidir leo, go háirithe ar bhonn a stádais bhitheolaíoch. Thairis sin, le hAirteagal 15(9) de Rialachán (AE) Uimh. 1380/2013 rinneadh foráil maidir le solúbthacht bhreise ó bhliain go bliain le haghaidh na stoc uile atá faoi réir na hoibleagáide gabhálacha a thabhairt i dtír. Chun solúbthacht iomarcach a sheachaint a bhainfeadh an bonn de ghnóthú chuspóirí CBI, níor cheart feidhm charnach a bheith ag solúbthacht ó bhliain go bliain le haghaidh cuótaí de bhun Airteagail 3 agus 4 de Rialachán (CE) Uimh. 847/96 agus Airteagal 15(9) de Rialachán (AE) Uimh. 1380/2013. Ar deireadh, ba cheart solúbthacht ó bhliain go bliain faoi Airteagal 15(9) de Rialachán (AE) Uimh 1380/2013 a eisiamh, i gcás inarb ábhartha, ar bhonn stádas bitheolaíoch na stoc.

(22)

I gcás nach gcionroinnfear TAC ach ar aon Bhallstát amháin, is iomchuí a thabhairt de chumhacht don Bhallstát sin an TAC sin a shocrú, i gcomhréir le hAirteagal 2(1) den Chonradh ar Fheidhmiú an Aontais Eorpaigh (CFAE). Is iomchuí an cumhachtú sin, ar choinníoll, agus an leibhéal TAC á chinneadh, go gcomhlíonfaidh an Ballstát na cuspóirí agus na rialacha a leagtar amach i Rialachán (AE) Uimh. 1380/2013, sa Phlean Ilbhliantúil don Mhuir Thuaidh agus sa Phlean Ilbhliantúil d’Uiscí an Iarthair. Chun go mbeidh an Coimisiún in ann faireachán a dhéanamh ar chur i bhfeidhm ceart na gcuspóirí agus na rialacha a leagtar amach i Rialachán (AE) Uimh. 1380/2013, sa Phlean Ilbhliantúil don Mhuir Thuaidh agus sa Phlean Ilbhliantúil d’Uiscí an Iarthair, ba cheart do na Ballstáit faisnéis maidir leis na TACanna sin a chur faoi bhráid an Choimisiúin. Ina theannta sin, féadfaidh an Coimisiún a iarraidh ar an gCoiste Eolaíoch, Teicniúil agus Eacnamaíoch um Iascach (STECF) measúnú a dhéanamh ar na TACanna sin, agus i gcás ina measfaidh STECF nach gcomhlíonann na TACanna sin na cuspóirí agus na rialacha a leagtar amach i Rialachán (AE) Uimh. 1380/2013, sa Phlean Ilbhliantúil don Mhuir Thuaidh agus sa Phlean Ilbhliantúil d’Uiscí an Iarthair, ba cheart do na Ballstáit athbhreithniú a dhéanamh ar na TACanna i gcomhréir leis an gcomhairle ó STECF.

(23)

Is gá teorainneacha na hiarrachta iascaireachta le haghaidh sól (Solea solea) a bhunú i Muir nIocht Thiar (roinn 7e ICES) i gcomhréir le hAirteagal 12 de Phlean Ilbhliantúil Uiscí an Iarthair.

(24)

Is gá uasteorainneacha na hiarrachta iascaireachta le haghaidh 2025 a bhunú i gcomhréir le hAirteagail 6, 11, 13 agus 16 de Rialachán (AE) 2023/2053 ó Pharlaimint na hEorpa agus ón gComhairle (11).

(25)

Tá úsáid na ndeiseanna iascaireachta atá ar fáil do shoithí iascaireachta de chuid an Aontais a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (12), agus go háirithe Airteagail 33 agus 34 den Rialachán sin, maidir le gabhálacha agus iarracht iascaireachta a thaifeadadh agus fógra a thabhairt faoi shonraí i ndáil le hídiú deiseanna iascaireachta. Is gá, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún maidir le stoic éisc a thabhairt i dtír atá faoi réir an Rialacháin seo.

(26)

Ag an gcruinniú bliantúil a bhí aige in 2024, ghlac an Coimisiún um Iascach an Atlantaigh Thoir Thuaidh (NEAFC) TAC do Pháirtithe Conarthacha NEAFC le haghaidh péirse mhara (Sebastes mentella) in uiscí idirnáisiúnta d’fholimistéir 1 agus 2 ICES le haghaidh 2025, a fhéadfar a iascach sa tréimhse ón 1 Iúil 2025 go dtí an 30 Samhain 2025. Ba cheart cuóta an Aontais le haghaidh péirse mhara sa limistéar sin le haghaidh 2025 a shocrú ar leibhéal an TAC sin. Ina theannta sin, a luaithe a bheidh an TAC úsáidte go hiomlán ag Páirtithe Conarthacha NEAFC agus a luaithe a bheidh an t-iascach dúnta, ba cheart do na Ballstáit toirmeasc a chur ar iascach spriocdhírithe ar phéirse mhara ag soithí a bhfuil a mbratach ar foluain acu.

(27)

Ghlac NEAFC na bearta caomhnaithe céanna le haghaidh 2025 agus a ghlac sé in 2024 le haghaidh an dá stoc péirse dhomhainmhara (peiligeach éadomhain agus peiligeach domhain) i Muir Irminger agus sna huiscí máguaird agus ghlac sé bearta breise le haghaidh soithí iascaireachta a rinne iascach spriocdhírithe ar na stoic sin. Ba cheart na bearta sin a chur chun feidhme i ndlí an Aontais.

(28)

Níor ghlac NEAFC moltaí maidir le haileabó Graonlannach (Reinhardtius hippoglossoides) i bhfolimistéir 1 agus 2 ICES le haghaidh 2025. Ba cheart cuóta an Aontais le haghaidh haileabónna Graonlannacha in uiscí idirnáisiúnta fholimistéir 1 agus 2 ICES le haghaidh 2025 a shocrú ag an leibhéal 1 711 tona. Comhfhreagraíonn leibhéal chuóta an Aontais do 9,25 % de leibhéal chomhairle ICES le haghaidh 2023 de 18 494 thona. Is í comhairle ICES an chomhairle eolaíoch is déanaí agus is fearr dá bhfuil ar fáil maidir leis an haileabó Graonlannach i bhfolimistéir 1 agus 2 ICES.

(29)

Tá an ronnach (Scomber scombrus), an faoitín gorm (Micromesistius poutassou) agus scadán an Atlantaigh-Chríoch Lochlann (Clupea harengus) san Atlantach Thoir Thuaidh faoi réir comhairliúcháin leis na Stáit chósta maidir le bainistiú iascaigh i gcás na stoc sin, agus is stoic iad a bhainistíonn NEAFC freisin. Ghlac an tAontas páirt sna comhairliúcháin sin ar bhonn na seasamh a d’fhormhuinigh an Chomhairle an 10 Deireadh Fómhair 2024. Rinneadh toradh na gcomhairliúchán sin a dhoiciméadú i dTaifid Chomhaontaithe le haghaidh scadáin an Atlantaigh-Chríoch Lochlann san Atlantach Thoir Thuaidh le haghaidh 2025 a síníodh an 18 Deireadh Fómhair 2024, faoitíní gorma san Atlantach Thoir Thuaidh le haghaidh 2025 a síníodh an 16 Deireadh Fómhair 2024 agus ronnaigh san Atlantach Thoir Thuaidh le haghaidh 2025 a síníodh an 22 Deireadh Fómhair 2024. Ag an gcruinniú bliantúil a bhí ag NEAFC in 2024, ghlac sé moltaí maidir le bearta caomhnúcháin agus bainistíochta le haghaidh scadáin an Atlantaigh-Chríoch Lochlann, faoitíní gorma agus ronnaigh le haghaidh 2025. Is iomchuí, dá bhrí sin, na TACanna le haghaidh scadáin an Atlantaigh-Chríoch Lochlann, faoitíní gorma agus ronnaigh san Atlantach Thoir Thuaidh a shocrú ar leibhéal na ndeiseanna iascaireachta a comhaontaíodh i dTaifid Chomhaontaithe na Stát cósta agus i moltaí NEAFC.

(30)

Ag an gcruinniú bliantúil a bhí aige in 2024, choinnigh an Coimisiún Idirnáisiúnta um Chaomhnú na dTuinníní Atlantacha (CICTA) na bearta reatha ar bun le haghaidh stoic áirithe i limistéar Choinbhinsiún CICTA. Ina theannta sin, mhéadaigh CICTA na TACanna le haghaidh 2025 i gcomparáid le 2024 i gcás tuinníní mórshúileacha (Thunnus obesus) agus i gcás cholgáin an Atlantaigh Thuaidh (Xiphias gladius). Thairis sin, bhog CICTA an tréimhse choiscthe maidir le feistí comhthiomsaithe éisc (FADanna) a úsáid chun tuinníní trópaiceacha a iascach go tréimhse níos déanaí sa bhliain agus laghdaigh sé a fhad go 45 lá. Ba cheart na bearta sin a chur chun feidhme i ndlí an Aontais.

(31)

Rinneadh cuótaí an Aontais le haghaidh 2025 maidir leis na stoic i limistéar Choinbhinsiún CICTA a choigeartú le linn chruinniú bliantúil CICTA in 2024 i gcomhréir le roinnt moltaí ó CICTA faoina bhféadfaidh an tAontas, arna iarraidh sin, céatadán socraithe dá chuóta deiseanna iascaireachta nár úsáideadh a thabhairt ar aghaidh ó 2023 go dtí 2025. Go dtí go ndéanfar coigeartuithe féideartha den sórt sin ar chuótaí an Aontais faoi dhlí an Aontais, ba cheart cuótaí do Bhallstáit aonair a bhunú ar bhonn chuóta iomlán an Aontais le haghaidh 2025 mar a chomhaontaigh CICTA sula dtabharfar anonn aon tabhairt anonn den sórt sin.

(32)

Ag an gcruinniú bliantúil a bhí aige in 2024, ghlac an Coimisiún um Chaomhnú Beo-Acmhainní Muirí Antartacha (CCAMLR) teorainneacha gabhála le haghaidh na stoc i limistéar Choinbhinsiún CCAMLR le haghaidh na tréimhse ón 1 Nollaig 2024 go dtí an 30 Samhain 2025. Ba cheart na bearta sin a chur chun feidhme i ndlí an Aontais.

(33)

Ag an gcruinniú bliantúil a bhí ag an gCoimisiún um Thuinníní an Aigéin Indiaigh (IOTC) in 2024, choinnigh sé bearta ar bun a glacadh le haghaidh tuinníní buí (Thunnus albacares) agus tuinníní mórshúileacha i Limistéar Inniúlachta IOTC le haghaidh 2025: an teorainn ghabhála, an acmhainneacht iascaireachta a theorannú; agus FADannaagus soithí soláthair a theorannú. Ba cheart na bearta sin a chur chun feidhme i ndlí an Aontais.

(34)

Beidh cruinniú bliantúil na hEagraíochta Réigiúnaí um Bainistíocht Iascaigh san Aigéan Ciúin Theas (SPRFMO) ar siúl ón 17 Feabhra go dtí an 21 Feabhra 2025. Ba cheart, dá réir sin, na bearta atá ann faoi láthair i limistéar Choinbhinsiún SPRFMO atá nasctha go feidhmiúil leis na TACanna a choinneáil ar bun go sealadach go dtí go mbeidh an cruinniú bliantúil ar siúl agus go dtí go mbunófar na TACanna le haghaidh 2025.

(35)

Ag an gcruinniú bliantúil a bhí aige in 2024, choinnigh an Coimisiún Idir-Mheiriceánach um Thuinníní Teochreasacha (IATTC) na bearta reatha is infheidhme i limistéar Choinbhinsiún IATTC ar bun agus dheimhnigh sé an laghdú ar líon na sruthfheistí comhthiomsaithe éisc le haghaidh 2025. Ba cheart na bearta sin a chur chun feidhme i ndlí an Aontais.

(36)

Ag an gcruinniú bliantúil a bhí ag an gCoimisiún um Chaomhnú an Tuinnín Ghoirm Dheisceartaigh in 2023, ghlac sé an TAC don tuinnín gorm Deisceartach (Thunnus maccoyii) ar feadh tréimhse 3 bliana ó 2024 go 2026. Ba cheart an beart sin a chur chun feidhme i ndlí an Aontais le haghaidh 2025.

(37)

Ag an gcruinniú bliantúil a bhí ag Eagraíocht Iascaigh an Atlantaigh Thoir Theas (SEAFO) in 2024, choinnigh sí na TACanna i limistéar Choinbhinsiún SEAFO a leagtar amach le haghaidh 2024 ar bun le haghaidh na tréimhse 2025–2026. Mar sin féin, tháinig méadú 13 thona ar TAC na ndéadiasc Patagónach (Dissostichus eleginoides) i bhfolimistéar D SEAFO le haghaidh 2025 i gcomparáid le 2024. Ba cheart na bearta sin a chur chun feidhme i ndlí an Aontais.

(38)

Ag an gcruinniú bliantúil a bhí aige in 2024, choinnigh an Coimisiún Iascaigh don Aigéan Ciúin Iartharach agus don Aigéan Ciúin Láir (WCPFC) na bearta a glacadh le haghaidh 2024 ar bun le haghaidh 2025. Ba cheart na bearta sin a chur chun feidhme i ndlí an Aontais.

(39)

Ag an 46ú cruinniú bliantúil a bhí ag Eagraíocht Iascaigh an Atlantaigh Thiar Thuaidh (NAFO) in 2024, ghlac sí deiseanna iascaireachta i gcás stoic áirithe i limistéar Choinbhinsiún NAFO le haghaidh 2025. Choinnigh sé le haghaidh 2025 freisin bearta a bhfuil nasc feidhmiúil acu le deiseanna iascaireachta le haghaidh scuideanna gearreiteacha (Illex illecebrosus) i bhfolimistéir 3 agus 4 NAFO agus leitheanna earrbhuí (Limanda ferruginea) i ranna 3LNO NAFO, arb é is aidhm dóibh leibhéil fhoghabhálacha na speiceas sin nach spriocspeicis iad a íoslaghdú mar go gcaithfí, gan na bearta sin, na deiseanna iascaireachta le haghaidh na stoc sin a laghdú chun na speicis nach spriocspeicis iad a chosaint. Ba cheart na bearta sin a chur chun feidhme i ndlí an Aontais.

(40)

Ag an gcruinniú bliantúil a bhí ag Comhaontú Iascaigh an Aigéin Indiaigh Theas (SIOFA) in 2024, rinne sé athbhreithniú ar na deiseanna iascaireachta le haghaidh déadéisc (Dissostichus spp.) i Limistéar Del Cano. Cé nár ghlac SIOFA an moladh ón gCoiste Eolaíoch limistéar bainistíochta nua a bhunú le haghaidh déadéisc i limistéar Iomaire na hIndia Theas agus teorainn ghabhála, ba cheart don Aontas na bearta sin a chur i bhfeidhm i gcomhréir leis an moladh sin agus lena sheasamh a cuireadh in iúl le linn chruinniú bliaintiúil Pháirtithe SIOFA. Rinne SIOFA an liosta de na siorcanna domhainfharraige a thabhairt cothrom le dáta freisin a bhfuil toirmeasc ar iascaireacht dhírithe a dhéanamh orthu i Limistéar Chomhaontú SIOFA. Ba cheart na bearta sin a chur chun feidhme i ndlí an Aontais.

(41)

Faoi Airteagal 498(2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (13) (an ‘Comhaontú Trádála agus Comhair’), déanfaidh an tAontas agus an Ríocht Aontaithe comhairliúcháin a reáchtáil go bliantúil, faoin 10 Nollaig gach bliain, chun na TACanna don bhliain dár gcionn a chomhaontú le haghaidh na stoc a liostaítear in Iarscríbhinn 35 a ghabhann leis an gComhaontú Trádála agus Comhair. Mura gcomhaontófar na TACanna sin faoin 10 Nollaig, tá na Páirtithe le dul i mbun comhairliúcháin arís láithreach agus é d’aidhm leanúnach acu teacht ar chomhaontú maidir leis na TACanna, mar a cheanglaítear le hAirteagal 499(1) den Chomhaontú Trádála agus Comhair.

(42)

In 2024 reáchtáil an tAontas agus an Ríocht Aontaithe comhairliúcháin dhéthaobhacha maidir le líon mór TACanna a shocrú le haghaidh 2025 le haghaidh na stoc a liostaítear in Iarscríbhinn 35 a ghabhann leis an gComhaontú Trádála agus Comhair. Rinneadh na comhairliúcháin sin de bhun Airteagal 498(2), (4) agus (6) den Chomhaontú Trádála agus Comhair. Ghlac an tAontas páirt sna comhairliúcháin sin ar bhonn an tseasaimh ón Aontais arna fhormhuiniú ag an gComhairle an 7 Deireadh Fómhair 2024, agus i gcomhréir leis na páipéir neamhoifigiúla ón gCoimisiún arna bhformhuiniú ag an gComhairle an 5, an 8 agus an 19 Samhain agus an 2 Nollaig 2024. Rinneadh toradh na gcomhairliúchán a dhoiciméadú i dtaifead i scríbhinn a síníodh an 6 Nollaig 2024. Ba cheart na deiseanna iascaireachta ábhartha a shocrú, dá bhrí sin, ar na leibhéil a leagtar amach sa taifead i scríbhinn sin, agus ba cheart na bearta eile atá nasctha go feidhmiúil leis na deiseanna iascaireachta a leagtar amach sa taifead i scríbhinn sin freisin a chur chun feidhme i ndlí an Aontais.

(43)

Tháinig an tAontas agus an Ríocht Aontaithe ar chomhaontú maidir le rochtain chómhalartach in 2024 chun 280 tona de thuinníní colgacha an Tuaiscirt a spriocdhíriú mar iomlán tosaigh (Thunnus alalunga) i limistéir eacnamaíocha eisiacha na mBallstát agus na Ríochta Aontaithe. Ní áirítear leis sin rochtain ar limistéir a chumhdaítear faoi Airteagal 5(3) de Rialachán (AE) Uimh. 1380/2013.

(44)

Áiríodh TACanna le haghaidh stoic dhomhainfharraige a liostaítear in Iarscríbhinn 35 a ghabhann leis an gComhaontú Trádála agus Comhair le haghaidh 2024 i Rialachán (AE) 2024/257 ach marcáladh iad ‘le bunú’. Ba cheart, dá bhrí sin, Rialachán (AE) 2024/257 a leasú agus na deiseanna iascaireachta le haghaidh na stoc sin a shocrú ar na leibhéil a leagtar amach sa taifead i scríbhinn.

(45)

Ba cheart bearta tionlacain do na stoic lena mbaineann a choinneáil ar bun, lena n-áirítear: (i) bearta ceartaitheacha le haghaidh trosc sa Mhuir Thuaidh (Gadus morhua) agus bearta feabhsúcháin le haghaidh deargán (Pagellus bogaraveo) i bhfolimistéir 6, 7 agus 8 ICES. Níor cheart feidhm a bheith ag na bearta teicniúla atá nasctha go feidhmiúil le haghaidh gadóideach agus deargán ach amháin go dtí go mbeidh na gníomhartha tarmligthe ábhartha infheidhme.

(46)

Chomhaontaigh an tAontas agus an Ríocht Aontaithe gurb é 100 cm an t-uasmhéid gabhála is ceart a urramú nuair a dhírítear ar fhíogaigh ghobacha (Squalus acanthias), chun iascaigh spriocdhírithe atá dírithe ar chomhbhailiúcháin de chinn bhaineanna aibí a dhíspreagadh chun cosaint a thabhairt do chomhpháirt den stoc sin atá an-leochaileach i leith básmhaireacht iascaireachta. Tá nasc feidhmiúil idir an beart sin agus TAC an stoic éisc, ós rud é, in éagmais an bhirt sin, nach n-áiritheodh leibhéal an TAC amháin cosaint leordhóthanach do bhaineannaigh bhreithe, ar cuid an-leochaileach den phobal iad. Níor cheart feidhm a bheith ag an uasmhéid sin ach amháin go dtí go mbeidh gníomh tarmligthe lena dtugtar bearta comhfhreagracha isteach infheidhme.

(47)

Ba cheart leanúint de thréimhsí coiscthe séasúracha le haghaidh iascaigh (Ammodytes spp.) corr gainimh le trealamh tarraingthe áirithe i ranna 2a, 3a agus folimistéar 4 ICES ionas go mbeifear in ann láithreacha sceite a chosaint agus gabhálacha iasc óg a theorannú.

(48)

In 2024, reáchtáil an tAontas, an Ríocht Aontaithe agus an Iorua comhairliúcháin thríthaobhacha maidir le sé stoc a chomhroinntear agus a bhainistítear go comhpháirteach laistigh de na limistéir atá faoina ndlínse, agus é d’aidhm acu teacht ar chomhaontú maidir leis na stoic sin a bhainistiú, lena n-áirítear na deiseanna iascaireachta le haghaidh 2025. Rinneadh na comhairliúcháin sin idir an 4 Samhain agus an 2 Nollaig 2024, ar bhonn an tseasaimh ón Aontas arna fhormhuiniú ag an gComhairle an 7 Deireadh Fómhair 2024, agus i gcomhréir leis an bpáipéar neamhoifigiúil ó sheirbhísí an Choimisiúin arna fhormhuiniú ag an gComhairle an 8 Samhain 2024. Rinneadh toradh na gcomhairliúchán a dhoiciméadú i dtaifead comhaontaithe a shínigh Cinn na dToscaireachta an 2 Nollaig 2024. Ba cheart na deiseanna ábhartha iascaireachta a shocrú ag an leibhéal arna chomhaontú leis an Ríocht Aontaithe agus leis an Iorua, agus ba cheart na forálacha eile sa taifead comhaontaithe sin a chur chun feidhme i dlí an Aontais.

(49)

Reáchtáil an tAontas comhairliúcháin dhéthaobhacha leis an Iorua maidir le seacht stoc a chomhroinntear agus a bhainistítear go comhpháirteach i limistéar Skagerrak (trosc (Gadus morhua), cadóg (Melanogrammus aeglefinus), scadán (Clupea harengus), séacla Artach (Pandalus borealis), leathóg (Pleuronectes platessa), salán (Sprattus sprattus) agus faoitín (Merlangius merlangus), agus é mar aidhm acu teacht ar chomhaontú maidir le bainistiú na stoc sin agus na ndeiseanna iascaireachta le haghaidh 2025, mar aon le malartú cuótaí agus socruithe rochtana. Tugadh na comhairliúcháin sin i gcrích an 5 Nollaig 2024 agus rinneadh an toradh a dhoiciméadú i dtrí thaifead chomhaontaithe arna síniú ag na Cinn Toscaireachta an 5 Nollaig 2024. Ba cheart na deiseanna ábhartha iascaireachta a shocrú ag an leibhéal arna chomhaontú leis an Iorua, agus ba cheart na forálacha eile sna taifid chomhaontaithe sin a chur chun feidhme i ndlí an Aontais.

(50)

I gcomhairliúcháin dhéthaobhacha, ní raibh an tAontas ná an Iorua in ann teacht ar chomhaontú maidir le rochtain ar a n-uiscí faoi seach le haghaidh dhá stoc pheiligeacha a ndéantar comhbhainistiú orthu san Atlantach Thoir Thuaidh: Scadán an Atlantaigh-Chríoch Lochlann (Clupea harengus) agus faoitín gorm (Micromesistius poutassou). Cuirfidh an tAontas agus an Iorua tús arís leis an bplé a luaithe is féidir d’fhonn teacht ar shocruithe oiriúnacha rochtana. Go dtí go dtabharfar na comhairliúcháin sin i gcrích maidir leis na leibhéil rochtana, ba cheart na leibhéil rochtana sin a mharcáil mar ‘le bunú’.

(51)

I gcomhréir leis an nós imeachta dá bhforáiltear sa Chomhaontú Comhpháirtíochta maidir le hIascaigh Inbhuanaithe idir an tAontas Eorpach, de pháirt, agus Rialtas na Graonlainne agus Rialtas na Danmhairge, den pháirt eile (14), agus sa Phrótacal cur chun feidhme a ghabhann leis, chomhaontaigh na Páirtithe leibhéal na ndeiseanna iascaireachta atá ar fáil don Aontas in uiscí na Graonlainne le haghaidh 2025 a bhunú ag an leibhéal a comhaontaíodh agus dá bhforáiltear sa Phrótacal cur chun feidhme sin ar cuireadh inisealacha leis, atá le deimhniú trí mhalartú litreacha, dá bhforáiltear in Airteagal 12(8) den Chomhaontú sin, tar éis do naPáirtithe an Prótacal cur chun feidhme a ghabhann leis a chur i bhfeidhm ar bhonn sealadach. Ba cheart, dá bhrí sin, na deiseanna iascaireachta ábhartha a shocrú ar an leibhéal a leagtar amach sa Phrótacal cur chun feidhme, agus na haistrithe chuig an Iorua a comhaontaíodh sna comhairliúcháin déthaobhacha iascaigh idir an tAontas agus an Iorua le haghaidh 2025 á gcur san áireamh.

(52)

Deonaítear faoi Chonradh an 9 Feabhra 1920 a bhaineann le Spitsbergen (Svalbard) (‘Conradh Pháras 1920’) rochtain chomhionann agus neamh-idirdhealaitheach ar acmhainní do gach Páirtí sa Chonradh sin, lena n-áirítear é sin a dheonú i ndáil le hiascaireacht. Leagadh amach an seasamh ón Aontas maidir leis an rochtain sin i roinnt notes verbales chuig an Iorua, arbh iad na cinn an 26 Feabhra 2021, an 28 Meitheamh 2021, an 1 Lúnasa 2022 agus an 26 Deireadh Fómhair 2023 na cinn is déanaí. A mhéid a bhaineann leis na deiseanna iascaireachta le haghaidh portáin sneachta (Chionoecetes spp.) timpeall ar Svalbard, is iomchuí teorainn a chur leis an líon soithí iascaireachta atá údaraithe leis na gníomhaíochtaí iascaireachta sin a dhéanamh rud a áiritheoidh go mbeidh saothrú portán sneachta timpeall ar Svalbard comhsheasmhach le rialacha bainistíochta neamh-idirdhealaitheacha a leag an Iorua amach, a bhfuil ceannasacht agus dlínse aici sa limistéar i gcomhréir le forálacha ábhartha Choinbhinsiún na Náisiún Aontaithe maidir le Dlí na Farraige agus Chonradh Pháras 1920. Tá cionroinnt na ndeiseanna iascaireachta sin i measc na mBallstát teoranta do 2025. San Aontas, is ar na Ballstáit bhrataí atá an phríomhfhreagracht comhlíonadh an dlí is infheidhme a áirithiú.

(53)

A mhéid a bhaineann leis na deiseanna iascaireachta trosc san Artach Thoir Thuaidh, is iomchuí cuóta trosc an Aontais in uiscí Svalbard agus in uiscí idirnáisiúnta fholimistéar 1 agus roinn 2b ICES le haghaidh 2025 a shocrú ar bhonn an TAC tagartha le haghaidh an stoic sin agus ar sciar iascaireachta stairiúil 2,8274 % an Aontais. Ba cheart cuóta sin an Aontais a chionroinnt ar na Ballstáit i gcomhréir le Cinneadh 87/277/CEE ón gComhairle (15), faoi réir na n-oiriúnuithe is gá de bharr tharraingt siar na Ríochta Aontaithe as an Aontas a bheith déanta mar a leagtar amach in Iarscríbhinn 36, tábla E, a ghabhann leis an gComhaontú Trádála agus Comhair.

(54)

I gcomhréir le Dearbhú an Aontais chuig Poblacht Bholavarach Veiniséala maidir le deiseanna iascaireachta in uiscí an Aontais a dheonú do shoithí iascaireachta a mbeidh bratach Veiniséala ar foluain acu sa limistéar eacnamaíoch eisiach amach ó chósta Ghuáin na Fraince, arna fhormheas thar ceann an Aontais le Cinneadh (AE) 2015/1565 ón gComhairle (16), ní mór an líon uasta údaruithe iascaireachta le haghaidh sclamhairí a bheidh ar fáil do Veiniséala in uiscí an Aontais a shocrú.

(55)

Ag an 46ú cruinniú bliantúil a bhí aige in 2024, chinn NAFO an t-iascach a athoscailt i gcás trosc (Gadus morhua) sa chuid sin de ranna 2J, 3K agus 3L NAFO (‘2J3KL’) a chumhdaítear le Limistéar Rialála NAFO, tar éis do Cheanada teorainn ghabhála 18 000 tona a ghlacadh dá shoithí iascaireachta i ranna 2J3KL NAFO le haghaidh na tréimhse ón 1 Iúil 2024 go dtí an 30 Meitheamh 2025. Go háirithe, ghlac NAFO TAC agus cuóta de chuid an Aontais don stoc sin le haghaidh na tréimhse ón 1 Iúil 2024 go dtí an 30 Meitheamh 2025 ar leibhéal 735 thona, bunaithe ar eochair leithdháilte athbhreithnithe in NAFO. Ina theannta sin, bhunaigh NAFO bearta téarnaimh don stoc sin le haghaidh na tréimhse sin. Tháinig TAC, cuóta an Aontais agus bearta téarnaimh i bhfeidhm an 11 Deireadh Fómhair 2024, gan cur i bhfeidhm cúlghabhálach. Ba cheart na bearta sin a chur chun feidhme i ndlí an Aontais.

(56)

Dá bhrí sin, ba cheart Rialachán (AE) 2024/257 ón gComhairle a leasú dá réir sin.

(57)

Chun a ráthú a mhéid is féidir go n-úsáidfear deiseanna iascaireachta trosc, scadán agus péirsí mara in uiscí na hIorua i limistéir 1 agus 2 ICES, féachfaidh an Ghearmáin agus an Fhrainc le 20 % de gach ceann dá gcuóta cadóg (HAD/1N2AB.), glasán (Pollachius virens) (POK/1N2AB.), haileabónna Graonlannacha (GHL/1N2AB.), agus speiceas eile (OTH/1N2AB.) a chur ar fáil le haghaidh malartuithe le Ballstáit nach bhfuil cuóta leordhóthanach acu le haghaidh na stoc sin. Tá an Spáinn, an Phortaingéil, agus na Ballstáit eile lena mbaineann le malartuithe a iarraidh faoin 31 Eanáir 2025. Ní rachaidh na hiarrataí thar riachtanais chun foghabhálacha dosheachanta in iascaigh trosc, scadán agus péirsí mara a chumhdach. Tabharfar aon chainníocht nár úsáideadh ar ais do na Ballstáit sin a rannchuidigh leis an malartú i dtosach. Mura gcomhaontófar a mhalairt, féachfaidh na Ballstáit nach bhfuil cuótaí leordhóthanacha acu le haghaidh na bhfoghabhálacha dosheachanta sin le cuótaí trosc a thabhairt ar ais (COD/1N2AB.). I gcás nach gceadaítear leis na cainníochtaí sin do na Ballstáit lena mbaineann a bhfoghabhálacha dosheachanta a chumhdach, féachfaidh an Ghearmáin agus an Fhrainc le teacht ar chomhaontú maidir le malartuithe breise de réir infhaighteacht an chuóta agus chothromaíocht dhomhanda an mhalartaithe.

(58)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun Ballstáit aonair a údarú le cionrannta iarrachta iascaireachta a bhainistiú i gcomhréir le córas cileavata-lae; chun laethanta breise ar muir a dheonú le haghaidh scor buan gníomhaíochtaí iascaireachta agus le haghaidh cumhdach feabhsaithe breathnóra eolaíoch; agus chun formáidí scarbhileoige a bhunú chun faisnéis a bhailiú agus a tharchur maidir le haistrithe laethanta ar muir idir soithí iascaireachta a bhfuil bratach Bhallstáit ar foluain acu. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (17).

(59)

Chun cur i bhfeidhm leanúnach a áirithiú agus éiginnteacht dhlíthiúil a sheachaint le linn na tréimhse idir deireadh na bliana agus dáta theacht i bhfeidhm an Rialacháin nua lena socraítear na deiseanna iascaireachta le haghaidh na bliana ina dhiaidh sin, ba cheart forálacha an Rialacháin seo maidir le toirmisc agus tréimhsí coiscthe a bheith fós infheidhme ag tús 2026, go dtí go dtiocfaidh an Rialachán lena socraítear na deiseanna iascaireachta le haghaidh 2026 i bhfeidhm. Ar na cúiseanna céanna, ba cheart na forálacha a mbeidh feidhm acu ón 1 Eanáir 2025 go dtí an 31 Nollaig 2026 leanúint d’fheidhm a bheith acu ag tús 2027, go dtí go dtiocfaidh an Rialachán lena socraítear na deiseanna iascaireachta le haghaidh 2027 i bhfeidhm.

(60)

Ionas nach gcuirfí isteach ar ghníomhaíochtaí iascaireachta agus chun slí bheatha na n-iascairí a chosaint, ba cheart feidhm a bheith ag an Rialachán seo le héifeacht ón 1 Eanáir 2025 ar aghaidh. Mar sin féin, ba cheart feidhm a bheith ag forálacha maidir le teorainneacha iarrachta iascaireachta le héifeacht ón 1 Feabhra 2025. Ar chúiseanna práinne agus chun deimhneacht dhlíthiúil a sholáthar a luaithe is féidir, ba cheart an Rialachán seo a theacht i bhfeidhm lá a fhoilsithe.

(61)

Ag deireadh 2024 ghlac na heagraíochtaí réigiúnacha bainistithe iascaigh ábhartha (ERBInna) bearta idirnáisiúnta áirithe lena gcruthófar nó lena gcuirfear srian le deiseanna iascaireachta le haghaidh an Aontais agus bhí feidhm ag na bearta sin sular tháinig an Rialachán seo i bhfeidhm. Ba cheart, dá bhrí sin, feidhm chúlghabhálach a bheith ag na forálacha den Rialacháin seo lena gcuirtear na bearta sin chun feidhme i ndlí an Aontais. Go sonrach, ós rud é go maireann an séasúr iascaireachta i limistéar Choinbhinsiún CCAMLR ón 1 Nollaig go dtí an 30 Samhain agus go leagtar síos deiseanna nó toirmisc áirithe iascaireachta i limistéar Choinbhinsiún CCAMLR le haghaidh tréimhse dar tús an 1 Nollaig 2024, ba cheart feidhm a bheith ag forálacha ábhartha an Rialacháin seo ón dáta sin. Ina theannta sin, maireann an séasúr iascaireachta le haghaidh déadiasc i limistéar Chomhaontú SIOFA ón 1 Nollaig go dtí an 30 Samhain, agus ós rud é go mbunaítear na TACanna don ghrúpa speiceas sin ar feadh tréimhse dar tús an 1 Nollaig 2024, ba cheart feidhm a bheith ag na TACanna ón dáta sin. Ní dhéanann cur i bhfeidhm cúlghabhálach mar sin dochar do phrionsabal an ionchais dhlisteanaigh toisc go bhfuil cosc ar shoithí iascaireachta a bhfuil bratach an Pháirtí Chonarthaigh ar foluain acu iascaireacht a dhéanamh i limistéar Choinbhinsiún CCAMLR agus i limistéar Chomhaontú SIOFA gan údarú,