(1)

Il-Ftehim Ewropew dwar il-ħidma ta’ ekwipaġġi ta’ vetturi involuti fit-trasport internazzjonali bit-triq (AETR) (1) daħal fis-seħħ fil-5 ta’ Jannar 1976. L-aħħar li dan ġie emendat kien fl-20 ta’ Settembru 2010.

(2)

Skont l-Artikolu 22bis tal-AETR, proposti għal emendi għall-Artikoli introduttorji tal-Appendiċi 1B tal-Anness tal-AETR jistgħu jiġu adottati mill-Grupp ta’ Ħidma dwar it-Trasport bit-Triq tal-Kummissjoni Ekonomika għall-Ewropa tan-Nazzjonijiet Uniti (NU/KEE) b’maġġoranza tal-Partijiet Kontraenti preżenti u li jivvutaw. Wara l-adozzjoni, l-emendi jiġu ppreżentati lis-Segretarju Ġenerali tan-Nazzjonijiet Uniti għal notifika lill-Partijiet Kontraenti kollha.

(3)

Il-Grupp ta’ Esperti dwar l-AETR u l-Grupp ta’ Ħidma dwar it-Trasport bit-Triq ġew stabbiliti min-NU/KEE fil-qafas tal-AETR. Il-Grupp ta’ Ħidma huwa korp li għandu s-setgħa li jiżviluppa u jadotta emendi għall-Artikoli introduttorji tal-Appendiċi 1B tal-Anness għall-AETR, filwaqt li l-Grupp ta’ Esperti huwa korp li għandu s-setgħa li jiżviluppa u jissottometti proposti għal emendi għall-Grupp ta’ Ħidma.

(4)

Il-Grupp ta’ Esperti dwar l-AETR u l-Grupp ta’ Ħidma dwar it-Trasport bit-Triq, matul is-sessjonijiet tagħhom li għandhom isiru rispettivament fit-28 ta’ Ottubru 2024 u mid-29 sal-31 ta’ Ottubru 2024, jew f’sessjonijiet sussegwenti, ser jiżviluppaw, rispettivament, il-proposta għal u l-adozzjoni tal-emenda tal-Appendiċi 1B tal-Anness għall-AETR relatata mal-implimentazzjoni futura ta’ ċerti attivitajiet ta’ ċertifikazzjoni fil-qafas għall-Anness għall-AETR. Dawk l-attivitajiet ta’ ċertifikazzjoni huma meħtieġa biex titħaddem l-iskema tat-takografu diġitali tal-AETR, li hija bbażata b’mod ġenerali fuq is-sistema tal-Unjoni.

(5)

Huwa xieraq li tiġi stabbilita l-pożizzjoni li għandha tiġi adottata f’isem l-Unjoni fi ħdan il-Grupp ta’ Esperti dwar l-AETR u fi ħdan il-Grupp ta’ Ħidma dwar it-Trasport bit-Triq, peress li l-emendi għall-Appendiċi 1B tal-Anness għall-AETR ser ikunu vinkolanti skont id-dritt internazzjonali f’konformità mal-Artikoli 21(6) u 22bis(2) tal-AETR, u huma kapaċi jinfluwenzaw b’mod deċiżiv il-kontenut tal-leġiżlazzjoni tal-Unjoni, jiġifieri r-Regolamenti (KE) Nru 561/2006 (2) u (UE) Nru 165/2014 (3) tal-Parlament Ewropew u tal-Kunsill.

(6)

L-emendi proposti għandhom l-għan li jsolvu sitwazzjoni diffiċli fl-implimentazzjoni tal-iskema tat-takografu diġitali tal-AETRrigward il-provvista ta’ ċerti attivitajiet ta’ ċertifikazzjoni mill-Kummissjoni għal ċerti Partijiet Kontraenti tal-AETR mhux tal-UE skont memorandum ta’ qbil iffirmat bejn n-NU/KEE u s-servizzi tal-Kummissjoni fl-2009. Dak il-memorandum ta’ qbil ġie imġedded diversi drabi permezz ta’ arranġamenti amministrattivi, u l-aktar reċenti ġie imġedded fit-28 ta’ Novembru 2023 għal perjodu sal-31 ta’ Mejju 2024.

(7)

Skont dawn l-arranġamenti amministrativi, il-Kummissjoni toħroġ ċertifikati ta’ interoperabbiltà lill-manifatturi tal-apparat, li huma meħtieġa għall-approvazzjoni tat-tip AETR ta’ tali apparat. Ir-Rekwiżit 278 tal-Appendiċi 1B tal-Anness tal-AETR bħalissa jipprevedi korp kompetenti wieħed li jkun responsabbli għaċ-ċertifikazzjoni tal-interoperabbiltà.

(8)

Il-Kummissjoni hija responsabbli wkoll għall-ħidmiet relatati mal-ġenerazzjoni, iż-żamma u l-ġestjoni tal-par kjavi Ewropej fi ħdan l-infrastruttura tal-kjavi pubblika tas-sistema tat-takografu diġitali tal-AETR. Dan il-par kjavi jintuża biex jiċċertifika l-kjavi pubbliċi nazzjonali tal-Partijiet Kontraenti, li huma stess jintużaw biex jiċċertifikaw il-kjavijiet imdaħħla f’kull biċċa apparat. Ir-rekwiżit CSM_007 tas-Sottoappendiċi XI tal-Appendiċi 1B tal-AETR bħalissa jipprevedi korp rikonoxxut f’livell internazzjonali li jkun responsabbli għall-attivitajiet ta’ ċertifikazzjoni tal-għerq.

(9)

Wara d-deċiżjoni mill-Kummissjoni li tissospendi dawk l-attivitajiet ta’ ċertifikazzjoni għar-Russja u għall-Belarussja bħala riżultat tal-gwerra ta’ agressjoni tar-Russja kontra l-Ukrajna bl-appoġġ militari kontinwu minn Belarus, ir-rwol tal-Kummissjoni fl-implimentazzjoni tal-AETR ġie ddubitat minn dawk il-pajjiżi. Għalhekk arranġament amministrattiv ġdid huwa improbabbli ħafna, li jipperikola l-attivitajiet ta’ ħruġ ta’ ċertifikazzjoni mill-Kummissjoni għal 14-il Parti Kontraenti oħra tal-AETR mhux tal-UE.

(10)

Għalhekk, jenħtieġ li l-Unjoni tappoġġa proposta biex jiġi emendat l-Appendiċi 1B tal-Anness tal-AETR biex ir-rwol tal-Kummissjoni jiġi rikonoxxut fl-AETER innifsu, biex tkompli tappoġġa l-implimentazzjoni tal-AETR u tipprovdi attivitajiet ta’ ċertifikazzjoni għal pajjiżi mhux tal-UE taħt ċerti kundizzjonijiet.

(11)

Il-pożizzjoni tal-Unjoni fi ħdan il-Grupp ta’ Esperti tal-AETR għandha tiġi espressa mill-Kummissjoni, u l-pożizzjoni tal-Unjoni fi ħdan il-Grupp ta’ Ħidma dwar it-Trasport bit-Triq għandha tiġi espressa mill-Istati Membri filwaqt li jaġixxu b’mod konġunt fl-interess tal-Unjoni,