(1)

Tháinig an Comhaontú Eorpach maidir le hObair Foirne Feithiclí ag gabháil d’Iompar Idirnáisiúnta de Bhóthar (AETR) (1) i bhfeidhm an 5 Eanáir 1976. Rinneadh é a leasú go deireanach an 20 Meán Fómhair 2010.

(2)

De bhun Airteagal 22bis de AETR, féadfaidh Meitheal um Iompar de Bhóthar Choimisiún Eacnamaíochta na Náisiún Aontaithe don Eoraip (UNECE) tograí le haghaidh leasuithe ar na hAirteagail tosaigh d’Fhoscríbhinn 1B a ghabhann leis an Iarscríbhinn a ghabhann le AETR a ghlacadh trí thromlach na bPáirtithe Conarthacha atá i láthair agus a vótálann. Tar éis a nglactha, cuirtear leasuithe faoi bhráid Ard-Rúnaí na Náisiún Aontaithe lena gcur in iúl do gach Páirtí Conarthach.

(3)

Bhunaigh UNECE an Grúpa Saineolaithe um Chomhaontú AETR agus an Mheitheal um Iompar de Bhóthar faoi chuimsiú Chomhaontú AETR. Is comhlacht í an Mheitheal a chumhachtaítear leasuithe ar na hAirteagail réamhráiteacha d’Fhoscríbhinn 1B a ghabhann leis an Iarscríbhinn a ghabhann le Comhaontú AETR a fhorbairt agus a ghlacadh, agus is comhlacht é an Grúpa Saineolaithe um Chomhaontú a chumhachtaítear tograí le haghaidh leasuithe a fhorbairt agus a chur faoi bhráid na Meithle.

(4)

Déanfaidh an Grúpa Saineolaithe um Chomhaontú AETR agus an Mheitheal um Iompar de Bhóthar, le linn a seisiún a thionólfar faoi seach an 28 Deireadh Fómhair 2024 agus an 29 go dtí an 31 Deireadh Fómhair 2024, nó ag seisiún ina ndiadh sin, an togra le haghaidh Fhoscríbhinn 1B a ghabhann leis an Iarscríbhinn a ghabhann le chomhaontú AETR a bhaineann le cur chun feidhme gníomhaíochtaí deimhniúcháin áirithe amach anseo faoi chuimsiú AETR a fhorbairt agus na leasuithe sin a ghlacadh faoi seach. Tá gá leis na gníomhaíochtaí deimhniúcháin sin chun scéim tacagraif dhigitigh an Chomhaontaithe a oibriú, atá bunaithe den chuid is mó ar chóras an Aontais.

(5)

Is iomchuí an seasamh atá le glacadh thar ceann an Aontais sa Ghrúpa Saineolaithe um Chomhaontú AETR agus sa Mheitheal um Iompar de Bhóthar a bhunú, ós rud é go bhfuil na leasuite a ghabhann leis an Iarscríbhinn a ghabhann le AETR ceangailteach faoin dlí idirnáisiúnta i gcomhréir le hAirteagal 21(6) agus Airteagal 22bis(2) de Chomhaontú AETR agus go bhféadfaidís tionchar cinntitheach a imirt ar ábhar reachtaíocht an Aontais, is é sin Rialachán (CE) Uimh. 561/2006 (2) agus Rialachán (AE) Uimh. 165/2014 (3) ó Pharlaimint na hEorpa agus ón gComhairle.

(6)

Tá sé d’aidhm ag na leasuithe atá beartaithe staid dheacair a réiteach i gcur chun feidhme scéim tacagraif dhigitigh Chomhaontú AETR, ina soláthraíonn maidir le gníomhaíochtaí deimhniúcháin áirithe an Coimisiún do Pháirtithe Conarthacha áirithe sa Chomhaontú AETR nach Ballstáit den Aontas iad faoi mheabhrán tuisceana arna shíniú ag UNECE agus ranna an Choimisiúin in 2009. Tá an meabhrán tuisceana arna athnuachan neart uaireanta trí shocruithe riaracháin, agus an uair is déanaí a rinneadh athnuachan ar ná an 28 Samhain 2023 go ceann tréimhse go dtí an 31 Bealtaine 2024.

(7)

Faoi na socruithe riaracháin sin, soláthraíonn an Coimisiún saincheisteanna idir-inoibritheachta do mhonaróirí trealaimh, deimhnithe a bhfuil gá leo le haghaidh chineálcheadú Chomhaontú AETR maidir leis an trealamh sin. Foráiltear le ceanglas 278 d’Fhoscríbhinn 1B a ghabhann leis an Iarscríbhinn a ghabhann le Comhaontú AETR faoi láthair do chomhlacht inniúil amháin a bheidh freagrach as deimhniúchán idir-inoibritheachta.

(8)

Tá an Coimisiún freagrach freisin as na cúraimí a bhaineann leis an eochairphéire Eorpach a ghiniúint, a shealbhú agus a bhainistiú laistigh de bhonneagar eochrach poiblí chóras tacagraif dhigitigh Chomhaontú AETR. Úsáidtear an eochairphéire sin chun eochracha poiblí náisiúnta na bPáirtithe Conarthacha a dheimhniú, ar eochracha iad féin a úsáidtear chun eochracha a chuirtear isteach i ngach píosa trealaimh a dheimhniú. Faoi láthair, foráiltear le ceanglas CSM_007 d’Fho-Ahoscríbhinn XI d’Fhoscríbhinn 1B a ghabhann le Comhaontú AETR go mbeidh comhlacht a aithnítear ar leibhéal idirnáisiúnta freagrach as gníomhaíochtaí fréamhdheimhniúcháin.

(9)

I ndiaidh an chinnidh ón gCoimisiún na gníomhaíochtaí deimhniúcháin sin a chur ar fionraí don Rúis agus don Bhealarúis, mar thoradh ar chogadh foghach na Rúise i gcoinne na hÚcráine agus tacaíocht mhíleata leanúnach á tabhairt ag an mBealarúis, tá amhras caite ag an Rúis agus ag an mBealarúis ar ról an Choimisiúin i gcur chun feidhme Chomhaontú AETR. Dá bhrí sin, is fíorbheag an seans go mbeidh Socrú Riaracháin nua ann, rud a chuireann gníomhaíochtaí deimhniúcháin an Choimisiúin i mbaol do 14 Pháirtí Chonarthacha sa Chomhaontú AETR nach Ballstáit den Aontas iad.

(10)

Dá bhrí sin, ba cheart don Aontas tacú le togra chun Foscríbhinn 1B a ghabhann leis an Iarscríbhinn a ghabhann le Comhaontú AETR a leasú chun go n-aithneofar ról an Choimisiúin sa AETR féin, ionas go leanfaidh sé de thacaíocht a thabhairt do chur chun feidhme Chomhaontú AETR agus na de na gníomhaíochtaí deimhniúcháin a sholáthar do thíortha nach Ballstáit den Aontas iad faoi choinníollacha áirithe.

(11)

Tá seasamh an Aontais sa Ghrúpa Saineolaithe um Chomhaontú AETR le cur in iúl ag an gCoimisiún, tá seasamh an Aontais sa Mheitheal um Iompar de Bhóthar le cur in iúl ag Ballstáit agus iad ag gníomhú go comhpháirteach chun leas an Aontais,