European flag

Iris Oifigiúil
an Aontais Eorpaigh

GA

Sraith L


2026/2251

7.10.2026

CINNEADH (AE) 2026/2251 ÓN gCOMHAIRLE

an 1 Deireadh Fómhair 2026

maidir le síniú an Chomhaontaithe idir an tAontas Eorpach agus Poblacht na Cóiré maidir le haistriú sonraí as an Taifead Ainmneacha Paisinéirí (PNR) chun cionta sceimhlitheoireachta agus an choireacht thromchúiseach a chosc, a bhrath, a imscrúdú agus a ionchúiseamh

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 16(2) agus Airteagal 87(2), pointe (a), i gcomhar le hAirteagal 218(5) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)

An 16 Nollaig 2025, thug an Chomhairle údarú don Choimisiún tús a chur leis an gcaibidlíocht le Poblacht na Cóiré maidir le Comhaontú idir an tAontas Eorpach agus Poblacht na Cóiré maidir le sonraí as an Taifead Ainmneacha Paisinéirí (PNR) a aistriú chun cionta sceimhlitheoireachta agus coireacht thromchúiseach a chosc, a bhrath, a imscrúdú agus a ionchúiseamh (‘an Comhaontú’). An 4 Meitheamh 2026, tugadh an chaibidlíocht i gcrích go rathúil trí inisealacha a chur leis an gComhaontú.

(2)

Leis an gComhaontú, cuirtear ar a gcumas d’aeriompróirí sonraí PNR a aistriú ón Aontas chuig Poblacht na Cóiré agus lánurraim á tabhairt do na cearta dá bhforáiltear sa Chairt um Chearta Bunúsacha an Aontais Eorpaigh, go háirithe an ceart chun measa ar an saol príobháideach agus ar shaol an teaghlaigh a aithnítear in Airteagail 7 den Chairt agus an ceart go gcosnófaí sonraí pearsanta a aithnítear in Airteagail 8 den Chairt. Go háirithe, cuimsítear sa Chomhaontú coimircí iomchuí chun sonraí pearsanta arna n-aistriú faoin gComhaontú a chosaint.

(3)

Cothaítear leis an gComhaontú comhar póilíneachta agus breithiúnach idir údaráis inniúla Phoblacht na Cóiré agus údaráis inniúla na mBallstát chomh maith le Europol agus Eurojust chun rannchuidiú le comhrac na sceimhlitheoireachta agus na coireachta tromchúisí.

(4)

Leis an gComhaontú seo ba cheart aistriú sonraí PNR ón Aontas chuig Poblacht na Cóiré a chumasú mar aitheantas ar an ngá sonraí PNR a úsáid mar uirlis riachtanach i gcomhrac na sceimhlitheoireachta agus cineálacha eile coireachta tromchúisí.

(5)

Maidir le tabhairt i gcrích an Chomhaontaithe seo, is cuid d’iarracht níos leithne ón gCoimisiún é freisin cur chuige comhsheasmhach agus éifeachtach a shaothrú maidir le haistriú sonraí PNR chuig tríú tíortha, mar a fógraíodh sa Straitéis um an Aontas Slándála 2020-2025, rud atá ag cur le Caighdeáin agus Cleachtais Mholta maidir le PNR (SARPanna) de chuid na hEagraíochta Eitlíochta Sibhialta Idirnáisiúnta, agus atá i gcomhréir le dlí an Aontais agus le cásdlí. Sna conclúidí uaithi an 7 Meitheamh 2021, d’iarr an Chomhairle Eorpach ar an gCoimisiún freisin cur chuige den sórt sin a shaothrú.

(6)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal leis an gConradh ar an Aontas Eorpach (CAE) agus leis an gConradh ar Fheidhmiú an Aontais Eorpaigh (CFAE), tá fógra tugtha ag Éirinn, le litir dar dáta an 24 Meán Fómhair 2026, gur mian léi a bheith rannpháirteach i nglacadh agus i gcur i bhfeidhm an Chinnidh seo.

(7)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(8)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) 2018/1725 ó Pharlaimint na hEorpa agus ón gComhairle (1) agus thug an Maoirseoir Tuairim uaidh an 18 Meán Fómhair 2026 (2).

(9)

Dá bhrí sin, ba cheart an Comhaontú a shíniú,

TAR ÉIS AN CINNEADH SEO A GHLACADH:

Airteagal 1

Leis seo, údaraítear síniú an Chomhaontaithe idir an tAontas Eorpach agus Poblacht na Cóiré maidir le haistriú sonraí as an Taifead Ainmneacha Paisinéirí (PNR) chun cionta sceimhlitheoireachta agus an choireacht thromchúiseach a chosc, a bhrath, a imscrúdú agus a ionchúiseamh, faoi réir thabhairt i gcrích an Chomhaontaithe sin (3).

Airteagal 2

Tiocfaidh an Cinneadh seo i bhfeidhm ar dháta a ghlactha.

Arna dhéanamh i Lucsamburg, an 1 Deireadh Fómhair 2026.

Thar ceann na Comhairle

An tUachtarán

J. O’CALLAGHAN


(1)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).

(2)  Nár foilsíodh fós san Iris Oifigiúil.

(3)  Foilsítear téacs an Chomhaontaithe in éineacht leis an gcinneadh maidir lena thabhairt i gcrích.


ELI: http://data.europa.eu/eli/dec/2026/2251/oj

ISSN 1977-0839 (electronic edition)