L_2020387MT.01000301.xml

DEĊIŻJONI TA’ IMPLIMENTAZZJONI TAL-KUMMISSJONI (UE) 2020/1728

tas-17 ta’ Novembru 2020

li tawtorizza metodi għall-klassifikazzjoni tal-karkassi tal-majjali fil-Kroazja

(notifikata bid-dokument C(2020) 7880)

(It-test bil-Kroat biss huwa awtentiku)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b’mod partikolari l-Artikolu 20(p) tiegħu,

Billi:

(1)

Il-punt 1 tat-Taqsima B.IV tal-Anness IV tar-Regolament (UE) Nru 1308/2013 jistipula li, għall-klassifikazzjoni tal-karkassi tal-majjal, il-kontenut tal-laħam dgħif irid jiġi vvalutat permezz ta’ metodi ta’ klassifikazzjoni awtorizzati mill-Kummissjoni u jistgħu jiġu awtorizzati biss metodi ta’ valutazzjoni ppruvati statistikament ibbażati fuq il-kejl fiżiku ta’ parti anatomika waħda jew aktar tal-karkassa tal-majjal. Jenħtieġ li l-awtorizzazzjoni tal-metodi ta’ klassifikazzjoni tkun soġġetta għall-konformità ma’ tolleranza massima għall-iżball tal-istatistika fil-valutazzjoni. Dik it-tolleranza hija ddefinita fil-Parti A tal-Anness V tar-Regolament Delegat tal-Kummissjoni (UE) 2017/1182 (2).

(2)

Il-Kroazja talbet lill-Kummissjoni biex tawtorizza ħames metodi (“Hennessy Grading Probe 2 (HGP2)”, “Hennessy Grading Probe 7 (HGP7)”, “ OptiGrade-MCP”, “OptiScan-TP” u “ Manual method-ZP”). Għal dak il-fini, il-Kroazja ppreżentat deskrizzjoni dettaljata tal-prova tad-dissezzjoni li tindika l-prinċipji li huma bbażati fuqhom dawn il-metodi, ir-riżultati tal-prova tad-dissezzjoni tagħha u l-ekwazzjonijiet użati għall-valutazzjoni tal-perċentwal tal-laħam dgħif fil-protokoll previst fl-Artikolu 11(3) tar-Regolament Delegat (UE) Nru 2017/1182.

(3)	Eżami ta’ dik it-talba żvela li l-kundizzjonijiet għall-awtorizzazzjoni tal-metodi ta’ klassifikazzjoni huma ssodisfati. Għalhekk, jenħtieġ li dawn il-metodi u l-formuli ta’ klassifikazzjoni jiġu awtorizzati fil-Kroazja.

(4)	Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

ADOTTAT DIN ID-DEĊIŻJONI:

Artikolu 1

1. L-użu tal-metodi li ġejjin huwa awtorizzat għall-klassifikazzjoni tal-karkassi tal-majjali skont il-Punt 1 tat-Taqsima B.IV tal-Anness IV tar-Regolament (UE) Nru 1308/2013 fil-Kroazja:

(a)	l-apparat “Hennessy Grading Probe 2 (HGP2)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti I tal-Anness;

(b)	l-apparat “Hennessy Grading Probe 7 (HGP7)” u l-metodi ta’ valutazzjoni marbuta miegħu, li d-dettalji tagħhom jinsabu fil-Parti II tal-Anness;

(c)	l-apparat “OptiGrade-MCP” u l-metodi ta’ valutazzjoni marbuta miegħu, li d-dettalji tiegħu jinsabu fil-Parti III tal-Anness.

(d)	l-apparat “OptiScan-TP” u l-metodi ta’ valutazzjoni marbuta miegħu, li d-dettalji tiegħu jinsabu fil-Parti IV tal-Anness;

(e)	il-“metodu manwali (ZP)” b’riga u l-metodi ta’ valutazzjoni relatati miegħu, li d-dettalji tagħhom jinsabu fil-Parti V tal-Anness.

2. Il-metodu manwali ZP b’riga u l-metodi ta’ valutazzjoni relatati miegħu, imsemmija fil-punt (e) tal-paragrafu 1, għandhom jiġu awtorizzati biss għall-biċċeriji li fihom in-numru ta’ majjali maqtula kull ġimgħa ma jaqbiżx il-500, ikkalkulat bħala medja annwali.

Artikolu 2

Il-modifiki tal-apparat jew tal-metodi ta’ klassifikazzjoni awtorizzati ma għandhomx ikunu permessi sakemm ma jkunux awtorizzati espliċitament permezz ta’ Deċiżjoni ta’ Implimentazzjoni tal-Kummissjoni.

Artikolu 3

Din id-Deċiżjoni hija indirizzata lir-Repubblika tal-Kroazja.

Magħmul fi Brussell, is-17 ta’ Novembru 2020.

Għall-Kummissjoni

Janusz WOJCIECHOWSKI

Membru tal-Kummissjoni

(1) ĠU L 347, 20.12.2013, p. 671.

(2) Ir-Regolament Delegat tal-Kummissjoni (UE) 2017/1182 tal-20 ta’ April 2017 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-iskali tal-Unjoni għall-klassifikazzjoni ta’ karkassi taċ-ċanga, tal-majjal u tan-nagħaġ u dwar ir-rapportar tal-prezzijiet tas-suq ta’ ċerti kategoriji ta’ karkassi u annimali ħajjin (ĠU L 171, 4.7.2017, p. 74).

ANNESS

METODI GĦALL-KLASSIFIKAZZJONI TAL-KARKASSI TAL-MAJJALI FIL-KROAZJA

PARTI I

Hennessy Grading Probe 2 (HPG 2)

Ir-regoli stipulati f’din il-parti għandhom japplikaw meta l-klassifikazzjoni tal-karkassi tal-majjali ssir permezz tal-apparat magħruf bħala l-“Hennessy Grading Probe 2 (HGP 2)”.

L-apparat għandu jkun mgħammar bi probe b’dijametru ta’ 5,95 millimetri (u ta’ 6,3 millimetri fix-xafra li tinsab in-naħa ta’ fuq tal-probe), li jkun fiha fotodijodu (Siemens LED tat-tip LYU 260-EO u fotodetettur tat-tip 58 MR) u li jkollha distanza operattiva ta’ bejn 0 u 120 millimetru.

Il-kontenut tal-laħam dgħif ta’ karkassa għandu jiġi kkalkulat skont il-formula li ġejja:

LMPHGP 2 = 68,54165 – (0,7727577 × F) + (0,008924575 × M)

meta:

LMPHGP 2	=	il-perċentwal tal-laħam dgħif stmat f’karkassa;
F	=	il-ħxuna tax-xaħam tad-dahar (bil-ġilda ta’ barra) f’millimetri, imkejla 7 ċentimetri ’l bogħod mil-linja tal-qsim fuq barra u 4 ċentimetri ’l bogħod mil-linja tal-qsim fuq ġewwa bejn it-tieni u t-tielet kustilja tal-aħħar;
M	=	il-ħxuna tal-muskolu f’millimetri, imkejla fl-istess ħin u post bħal F.

Din il-formula għandha tkun valida għall-karkassi li jiżnu bejn 60 u 120 kilogramma (f’piż tal-karkassa sħuna).

PARTI II

Hennessy Grading Probe 7 (HPG 7)

Ir-regoli stipulati f’din il-parti għandhom japplikaw meta l-klassifikazzjoni tal-karkassi tal-majjali ssir permezz tal-apparat magħruf bħala l-“Hennessy Grading Probe 7 (HGP 7)”.

Il-kontenut tal-laħam dgħif ta’ karkassa għandu jiġi kkalkulat skont il-formula li ġejja:

LMPHGP 7 = 66,92177 – (0,7505144 × F) + (0,03170816 × M)

meta:

LMPHGP 7	=	il-perċentwal tal-laħam dgħif stmat f’karkassa;
F	=	il-ħxuna tax-xaħam tad-dahar (bil-ġilda ta’ barra) f’millimetri, imkejla 7 ċentimetri ’l bogħod mil-linja tal-qsim fuq barra u 4 ċentimetri ’l bogħod mil-linja tal-qsim fuq ġewwa bejn it-tieni u t-tielet kustilja tal-aħħar;
M	=	il-ħxuna tal-muskolu f’millimetri, imkejla fl-istess ħin u post bħal F.

Din il-formula għandha tkun valida għall-karkassi li jiżnu bejn 60 u 120 kilogramma (f’piż tal-karkassa sħuna).

PARTI III

OptiGrade-MCP

Ir-regoli stipulati f’din il-Parti għandhom japplikaw meta l-klassifikazzjoni tal-karkassi tal-majjali ssir permezz tal-apparat magħruf bħala “OptiGrade-MCP”.

L-apparat għandu jkun mgħammar bi probe ottika b’dijametru ta’ 6 mm, fotodijodu infrared (Siemens) wieħed u foto transistor (Siemens). Id-distanza operattiva għandha tkun bejn 0 u 110 millimetri.

Il-kontenut tal-laħam dgħif ta’ karkassa għandu jiġi kkalkulat skont il-formula li ġejja:

LMPMCP = 66,863 – (0,6809437 × F) + (0,02633554 × M)

meta:

LMPMCP	=	il-perċentwal tal-laħam dgħif stmat f’karkassa;
F	=	il-ħxuna tax-xaħam tad-dahar (bil-ġilda ta’ barra) f’millimetri, imkejla 7 ċentimetri ’l bogħod mil-linja tal-qsim fuq barra u 4 ċentimetri ’l bogħod mil-linja tal-qsim fuq ġewwa bejn it-tieni u t-tielet kustilja tal-aħħar;
M	=	il-ħxuna tal-muskolu f’millimetri, imkejla fl-istess ħin u post bħal F.

Din il-formula għandha tkun valida għall-karkassi li jiżnu bejn 60 u 120 kilogramma (f’piż tal-karkassa sħuna).

PARTI IV

OptiScan-TP

Ir-regoli stipulati f’din il-parti għandhom japplikaw meta l-klassifikazzjoni tal-karkassi tal-majjali ssir permezz tal-apparat magħruf bħala “OptiScan TP”.

L-apparat Optiscan-TP għandu jkun mgħammar b’imager diġitali li tieħu ritratt illuminat taż-żewġ punti tal-kejl fuq il-karkassi. L-immaġnijiet għandhom ikunu l-bażi għall-kalkolu tal-ħxuna tax-xaħam u tal-muskolu. Ir-riżultati tal-kejl għandhom ikunu kkonvertiti f’kontenut ta’ laħam dgħif stmat permezz tal-apparat Optiscan-TP nnifsu. Ir-ritratti jinħażnu u mbagħad aktar tard jistgħu jiġu kkontrollati. L-interfaċċa Bluetooth® integrata tippermetti t-trasferiment faċli tad-data.

Il-kontenut tal-laħam dgħif ta’ karkassa għandu jiġi kkalkulat skont il-formula li ġejja:

LMPTP =66,52167 – (0,5215984 × F) + (0, 01604653 × M)

meta:

LMPTP	=	il-perċentwal tal-laħam dgħif stmat f’karkassa;
F	=	il-ħxuna minima tax-xaħam viżibbli (inkluża l-ġilda ta’ barra) f’millimetri, fuq il-linja tan-nofs tal-karkassa maqsuma, li tkopri l-muskolu gluteus medius;
M	=	l-iċken ħxuna tal-muskolu bejn l-estremità anterjuri tal-muskolu gluteus medius u l-parti dorsali tal-kanal tal-mudullun

Din il-formula għandha tkun valida għall-karkassi li jiżnu bejn 60 u 120 kilogramma (f’piż tal-karkassa sħuna).

PARTI V

Metodu manwali (ZP)

Ir-regoli stipulati f’din il-Parti għandhom japplikaw meta l-klassifikazzjoni tal-karkassi tal-majjali ssir permezz tal-“metodu manwali (ZP)” bil-kejl bir-riga.

Dan il-metodu jista’ jiġi implimentat permezz ta’ riga, meta l-klassifika tiġi ddeterminata abbażi ta’ ekwazzjoni ta’ tbassir. Huwa bbażat fuq il-kejl manwali tal-linja tan-nofs tal-karkassa maqsuma tal-ħxuna tax-xaħam u tal-ħxuna tal-muskolu.

Il-kontenut tal-laħam dgħif ta’ karkassa għandu jiġi kkalkulat skont il-formula li ġejja:

LMPZP = 66,18242 – (0, 5312573 × F) + (0,02048905 × M)

meta:

LMPZP	=	il-perċentwal tal-laħam dgħif stmat f’karkassa;
F	=	il-ħxuna minima tax-xaħam viżibbli (inkluża l-ġilda ta’ barra) f’millimetri, fuq il-linja tan-nofs tal-karkassa maqsuma, li tkopri l-muskolu gluteus medius;
M	=	l-iċken ħxuna tal-muskolu bejn l-estremità anterjuri tal-muskolu gluteus medius u l-parti dorsali tal-kanal tal-mudullun

Din il-formula għandha tkun valida għall-karkassi li jiżnu bejn 60 u 120 kilogramma (f’piż tal-karkassa sħuna).