European flag

Iris Oifigiúil
an Aontais Eorpaigh

GA

Sraith L


2025/2542

18.12.2025

CINNEADH CUR CHUN FEIDHME (AE) 2025/2542 ÓN gCOIMISIÚN

an 16 Nollaig 2025

maidir le hathnuachan an údaraithe chun táirgí a chur ar an margadh, ar táirgí iad ina bhfuil síol ráibe géinmhodhnaithe MON 88302, nó atá comhdhéanta de nó a tháirgtear as, de bhun Rialachán (CE) Uimh. 1829/2003 ó Pharlaimint na hEorpa agus ón gComhairle

(tugadh fógra faoi leis an doiciméad C(2025) 7875)

(Is é an téacs Ollainnise amháin atá barántúil)

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1829/2003 ó Pharlaimint na hEorpa agus ón gComhairle an 22 Meán Fómhair 2003 maidir le bia géinmhodhnaithe agus beatha ghéinmhodhnaithe (1), agus go háirithe d’Airteagal 11(3) agus Airteagal 23(3) de,

De bharr an mhéid seo a leanas:

(1)

Le Cinneadh Cur Chun Feidhme (AE) 2015/687 ón gCoimisiún (2) údaraíodh bia agus beatha a chur ar an margadh, ar bia agus beatha iad ina bhfuil síol ráibe géinmhodhnaithe MON 88302, nó atá comhdhéanta de nó a tháirgtear as. Cumhdaítear le raon feidhme an údaraithe sin freisin táirgí, seachas bia agus beatha, a chur ar an margadh, ar táirgí iad ina bhfuil síol ráibe géinmhodhnaithe MON 88302 nó atá comhdhéanta de le haghaidh na n-úsáidí céanna atá ag síol ráibe d’aon chineál eile, cé is moite de shaothrú.

(2)

An 28 Feabhra 2024, rinne Bayer Agriculture B.V., atá bunaithe sa Bheilg, thar ceann Bayer CropScience LP, atá bunaithe i Stáit Aontaithe Mheiriceá (an t-iarratasóir), iarratas a chur faoi bhráid an Choimisiúin, i gcomhréir le hAirteagail 11 agus 23 de Rialachán (CE) Uimh. 1829/2003, chun an t-údarú sin a athnuachan.

(3)

An 13 Bealtaine 2025, d’eisigh an tÚdarás Eorpach um Shábháilteacht Bia (‘an tÚdarás’) tuairim eolaíoch fhabhrach maidir le síol ráibe géinmhodhnaithe MON 88302 (3) i gcomhréir le hAirteagail 6 agus 18 de Rialachán (CE) Uimh. 1829/2003. Tháinig sé ar an gconclúid nach raibh fianaise san iarratas ar athnuachan ar aon ghuais nua, nochtach modhnaithe nó éiginnteacht eolaíoch nua a d’athródh conclúidí an mheasúnaithe riosca bunaidh ar shíol ráibe géinmhodhnaithe MON 88302, measúnú a d’eisigh an tÚdarás in 2014 (4).

(4)

Rinne an tÚdarás breithniú, sa tuairim eolaíoch uaidh, ar gach ceist agus ábhar imní a tharraing na Ballstáit anuas i gcomhthéacs an chomhairliúcháin leis na húdaráis inniúla náisiúnta dá bhforáiltear in Airteagal 6(4) agus Airteagal 18(4) de Rialachán (CE) Uimh. 1829/2003.

(5)

An plean faireacháin um éifeachtaí comhshaoil a chuir an t-iarratasóir isteach, arb é atá ann plean faireachais ginearálta, tháinig an tÚdarás ar an gconclúid freisin go bhfuil an plean sin i gcomhréir le húsáidí beartaithe na dtáirgí.

(6)

Agus na conclúidí sin á gcur san áireamh, maidir leis an údarú chun bia agus beatha a chur ar an margadh, ar bia agus beatha iad ina bhfuil síol ráibe géinmhodhnaithe MON 88302, nó atá comhdhéanta de nó a tháirgtear as, agus chun táirgí a chur ar an margadh, ar táirgí iad ina bhfuil síol ráibe géinmhodhnaithe MON 88302 nó atá comhdhéanta de le haghaidh úsáidí seachas bia agus beatha, cé is moite de shaothrú, ba cheart an t-údarú sin a athnuachan.

(7)

Tá aitheantóir uathúil sannta do shíol ráibe géinmhodhnaithe MON 88302, i gcomhréir le Rialachán (CE) Uimh. 65/2004 ón gCoimisiún (5), i gcomhthéacs a údaraithe tosaigh le Cinneadh Cur Chun Feidhme (AE) 2015/687. Ba cheart leanúint den aitheantóir uathúil sin a úsáid.

(8)

A mhéid a bhaineann leis na táirgí a chumhdaítear leis an gCinneadh seo, is cosúil nach bhfuil gá le haon cheanglas sonrach lipéadaithe, seachas na ceanglais dá bhforáiltear in Airteagal 13(1) agus Airteagal 25(2), pointí (a) agus (b), de Rialachán (CE) Uimh. 1829/2003 agus in Airteagal 4(6) de Rialachán (CE) Uimh. 1830/2003 ó Pharlaimint na hEorpa agus ón gComhairle (6). Mar sin féin, chun a áirithiú go bhfanfaidh úsáid na dtáirgí ina bhfuil síol ráibe géinmhodhnaithe MON 88302 nó atá comhdhéanta de laistigh de theorainneacha an údaraithe a dheonaítear leis an gCinneadh seo, ba cheart a shonrú go soiléir ar lipéadú na dtáirgí sin, cé is moite de bhia agus comhábhair bia, nach bhfuil siad ceaptha lena saothrú.

(9)

Ba cheart do shealbhóir an údaraithe tuarascálacha bliantúla a chur isteach maidir le cur chun feidhme agus torthaí na ngníomhaíochtaí a leagtar amach sa phlean faireacháin um éifeachtaí comhshaoil. Ba cheart na torthaí sin a chur i láthair i gcomhréir leis na ceanglais a leagtar síos i gCinneadh 2009/770/CE ón gCoimisiún (7).

(10)

Leis an tuairim ón Údarás ní thugtar údar le coinníollacha nó srianta sonracha a fhorchur maidir le cur ar an margadh, le haghaidh úsáide agus láimhseála, lena n-áirítear ceanglais faireacháin iarmhargaidh i ndáil le bia agus beatha a chaitheamh, ar bia agus beatha iad ina bhfuil síol ráibe géinmhodhnaithe MON 88302, nó atá comhdhéanta de nó a tháirgtear as, ná maidir le héiceachórais/comhshaol nó limistéir gheografacha áirithe a chosaint, dá bhforáiltear in Airteagal 6(5)(e), agus Airteagal 18(5)(e) de Rialachán (CE) Uimh. 1829/2003.

(11)

An fhaisnéis ábhartha uile maidir le húdarú na dtáirgí a chumhdaítear leis an gCinneadh seo, ba cheart í a iontráil sa chlár Comhphobail de bhia géinmhodhnaithe agus beatha ghéinmhodhnaithe dá dtagraítear in Airteagal 28(1) de Rialachán (CE) Uimh. 1829/2003.

(12)

Tá fógra le tabhairt faoin gCinneadh seo trí Theach Imréitigh na Bithshábháilteachta do Pháirtithe Phrótacal Cartagena ar an mBithshábháilteacht a ghabhann leis an gCoinbhinsiún maidir leis an Éagsúlacht Bhitheolaíoch de bhun Airteagal 9(1) agus Airteagal 15(2)(c) de Rialachán (CE) Uimh. 1946/2003 ó Pharlaimint na hEorpa agus ón gComhairle (8).

(13)

Níor thug an Buanchoiste um Plandaí, Ainmhithe, Bia agus Beatha tuairim uaidh laistigh den teorainn ama a leag Cathaoirleach an Choiste síos. Measadh an gníomh cur chun feidhme seo a bheith riachtanach agus chuir an Cathaoirleach faoi bhráid an choiste achomhairc é chun go ndéanfaí tuilleadh plé ina leith. Níor thug an coiste achomhairc tuairim uaidh,

TAR ÉIS AN CINNEADH SEO A GHLACADH:

Airteagal 1

Orgánach géinmhodhnaithe agus aitheantóir uathúil

Síol ráibe géinmhodhnaithe (Brassica napus L.) MON 88302, a shonraítear i bpointe (b) den Iarscríbhinn a ghabhann leis an gCinneadh seo, sanntar an t-aitheantóir uathúil MON-883Ø2-9 dó, i gcomhréir le Rialachán (CE) Uimh. 65/2004.

Airteagal 2

Athnuachan an údaraithe

An t-údarú chun na táirgí seo a leanas a chur ar an margadh, déantar é a athnuachan i gcomhréir leis na coinníollacha a leagtar amach sa Chinneadh seo:

(a)

bianna agus comhábhair bhia ina bhfuil síol ráibe (Brassica napus L.) MON-883Ø2-9, nó atá comhdhéanta de nó a tháirgtear as;

(b)

beatha ina bhfuil síol ráibe (Brassica napus L.) MON-883Ø2-9, nó atá comhdhéanta de nó a tháirgtear as;

(c)

táirgí ina bhfuil síol ráibe géinmhodhnaithe (Brassica napus L.) MON-883Ø2-9 nó atá comhdhéanta de le haghaidh úsáidí seachas na húsáidí dá bhforáiltear i bpointí (a) agus (b), cé is moite de shaothrú.

Airteagal 3

Lipéadú

1.   Chun críocha na gceanglas lipéadaithe a leagtar síos in Airteagal 13(1) agus Airteagal 25(2), pointí (a) agus (b), de Rialachán (CE) Uimh. 1829/2003 agus in Airteagal 4(6) de Rialachán (CE) Uimh. 1830/2003, is é ‘síol ráibe’‘ainm an orgánaigh’.

2.   Beidh na focail ‘níltear le saothrú’ ar lipéad na dtáirgí agus sna doiciméid a ghabhann leis na táirgí ina bhfuil síol ráibe géinmhodhnaithe MON-883Ø2-9 nó atá comhdhéanta de, dá dtagraítear in Airteagal 1, cé is moite de tháirgí dá dtagraítear in Airteagal 2, pointe (a).

Airteagal 4

Modh braite

Beidh feidhm ag an modh a leagtar amach i bpointe (d) den Iarscríbhinn maidir le síol ráibe géinmhodhnaithe MON-883Ø2-9 a bhrath.

Airteagal 5

Plean faireacháin um éifeachtaí comhshaoil

1.   Áiritheoidh sealbhóir an údaraithe go ndéanfar an plean faireacháin um éifeachtaí comhshaoil, mar a leagtar amach i bpointe (h) den Iarscríbhinn, a chur ar bun agus a chur chun feidhme.

2.   Cuirfidh sealbhóir an údaraithe tuarascálacha bliantúla faoi bhráid an Choimisiúin maidir le cur chun feidhme na ngníomhaíochtaí a leagtar amach sa phlean faireacháin agus maidir le torthaí na ngníomhaíochtaí sin i gcomhréir leis an bhformáid a leagtar amach i gCinneadh 2009/770/CE.

Airteagal 6

An clár Comhphobail

An fhaisnéis a leagtar amach san Iarscríbhinn, iontrálfar í sa chlár Comhphobail de bhia géinmhodhnaithe agus beatha ghéinmhodhnaithe, dá dtagraítear in Airteagal 28(1) de Rialachán (CE) Uimh. 1829/2003.

Airteagal 7

Sealbhóir an údaraithe

Is é Bayer CropScience LP, Stáit Aontaithe Mheiriceá, arna ionadú san Aontas ag Bayer Agriculture B.V., an Bheilg, a bheidh ina shealbhóir údaraithe.

Airteagal 8

Bailíocht

Beidh feidhm ag an gCinneadh seo ar feadh tréimhse 10 mbliana ón dáta a dtabharfar fógra faoi.

Airteagal 9

Seolaí

Is chuig Bayer CropScience LP, 800 N. Lindbergh Boulevard, St. Louis, Missouri 63167, Stáit Aontaithe Mheiriceá, arna ionadú san Aontas ag Bayer Agriculture B.V., Scheldelaan 460, 2040 Antuairp, an Bheilg, a dhírítear an Cinneadh seo.

Arna dhéanamh sa Bhruiséil, an 16 Nollaig 2025.

Thar ceann an Choimisiúin

Olivér VÁRHELYI

Comhalta den Choimisiún


(1)   IO L 268, 18.10.2003, lch. 1, ELI: http://data.europa.eu/eli/reg/2003/1829/oj.

(2)  Cinneadh Cur Chun Feidhme (AE) 2015/687 ón gCoimisiún an 24 Aibreán 2015 lena n-údaraítear táirgí ina bhfuil síol ráibe géinmhodhnaithe MON 88302 (MON-883Ø2-9), nó atá comhdhéanta de nó a tháirgtear as, a chur ar an margadh, de bhun Rialachán (CE) Uimh. 1829/2003 ó Pharlaimint na hEorpa agus ón gComhairle (IO L 112, 30.4.2015, lch. 22, ELI: http://data.europa.eu/eli/dec_impl/2015/687/oj).

(3)  Painéal OGM EFSA (Painéal EFSA um Orgánaigh Ghéinmhodhnaithe), 2025. Measúnú ar shíol ráibe géinmhodhnaithe MON 88302 i ndáil lena údarú a athnuachan faoi Rialachán (CE) Uimh. 1829/2003 (sainchomhad GMFF-2023-21220). EFSA Journal [Iris EFSA] 2025; 23 (5):9378. https://doi.org/10.2903/j.efsa.2025.9378.

(4)  Painéal OGM EFSA (Painéal EFSA um Orgánaigh Ghéinmhodhnaithe). (2014). Tuairim Eolaíoch maidir le hiarratas (EFSA-GMO-BE-2011-101) ar shíol ráibe géinmhodhnaithe luibhicídfhulangach MON 88302 a chur ar an margadh, lena húsáid i mbia agus i mbeatha, lena hallmhairiú agus lena próiseáil faoi Rialachán (CE) Uimh. 1829/2003 ó Monsanto. EFSA Journal [Iris EFSA], 12(6), 3701. https://doi.org/10.2903/j.efsa.2014.3701.

(5)  Rialachán (CE) Uimh. 65/2004 ón gCoimisiún an 14 Eanáir 2004 lena mbunaítear córas chun aitheantóirí uathúla d’orgánaigh ghéinmhodhnaithe a fhorbairt agus a shannadh (IO L 10, 16.1.2004, lch. 5, ELI: http://data.europa.eu/eli/reg/2004/65/oj).

(6)  Rialachán (CE) Uimh. 1830/2003 ó Pharlaimint na hEorpa agus ón gComhairle an 22 Meán Fómhair 2003 maidir le hinrianaitheacht agus lipéadú orgánach géinmhodhnaithe agus inrianaitheacht táirgí bia agus beatha a tháirgtear ó orgánaigh ghéinmhodhnaithe agus lena leasaítear Treoir 2001/18/CE (IO L 268, 18.10.2003, lch. 24, ELI: http://data.europa.eu/eli/reg/2003/1830/oj).

(7)  Cinneadh 2009/770/CE ón gCoimisiún an 13 Deireadh Fómhair 2009 lena mbunaítear formáidí caighdeánacha tuairiscithe maidir le cur i láthair na dtorthaí faireacháin ar scaoileadh orgánach géinmhodhnaithe amach d’aon ghnó sa chomhshaol, i bhfoirm táirgí nó i dtáirgí, chun iad a chur ar an margadh, de bhun Threoir 2001/18/CE ó Pharlaimint na hEorpa agus ón gComhairle (IO L 275, 21.10.2009, lch. 9, ELI: http://data.europa.eu/eli/dec/2009/770/oj).

(8)  Rialachán (CE) Uimh. 1946/2003 ó Pharlaimint na hEorpa agus ón gComhairle an 15 Iúil 2003 maidir le gluaiseachtaí trasteorann orgánach géinmhodhnaithe (IO L 287, 5.11.2003, lch. 1, ELI: http://data.europa.eu/eli/reg/2003/1946/oj).


IARSCRÍBHINN

(a)

An t-iarratasóir agus sealbhóir an údaraithe:

Ainm

:

Bayer CropScience LP

Seoladh

:

8d00 N. Lindbergh Boulevard, St. Louis, MO, 63167, Stáit Aontaithe Mheiriceá

Arna ionadú san Aontas ag: Bayer Agriculture BV, Scheldelaan 460, 2040 Antuairp, an Bheilg.

(b)

Ainmniú agus sonraíocht na dtáirgí:

(1)

bianna agus comhábhair bhia ina bhfuil síol ráibe (Brassica napus L.) MON-883Ø2-9, nó atá comhdhéanta de nó a tháirgtear as;

(2)

beatha ina bhfuil síol ráibe (Brassica napus L.) MON-883Ø2-9, nó atá comhdhéanta de nó a tháirgtear as;

(3)

táirgí ina bhfuil síol ráibe géinmhodhnaithe (Brassica napus L.) MON-883Ø2-9 nó atá comhdhéanta de le haghaidh úsáidí seachas na húsáidí dá bhforáiltear i bpointí (1) agus (2), cé is moite de shaothrú.

An síol ráibe géinmhodhnaithe MON-883Ø2-9, léiríonn sé an ghéin cp4 epsps, lena dtugtar fulangacht i leith luibhicídí atá bunaithe ar an ngliofosáit.

(c)

Lipéadú:

(1)

Chun críocha na gceanglas lipéadaithe a leagtar síos in Airteagal 13(1) agus Airteagal 25(2), pointí (a) agus (b), de Rialachán (CE) Uimh. 1829/2003 agus in Airteagal 4(6) de Rialachán (CE) Uimh. 1830/2003, is é ‘síol ráibe’‘ainm an orgánaigh’.

(2)

Beidh na focail ‘níltear le saothrú’ ar lipéad na dtáirgí agus sna doiciméid a ghabhann leis na táirgí ina bhfuil síol ráibe géinmhodhnaithe MON-883Ø2-9 nó atá comhdhéanta de, cé is moite de tháirgí dá dtagraítear i bpointe (b)(1).

(d)

Modh braite:

(1)

modhanna atá bunaithe ar imoibriú slabhrúil polaiméaráise cainníochtúil fíor-ama sainteagmhas arna mbailíochtú le haghaidh shíol ráibe géinmhodhnaithe MON-883Ø2-9;

(2)

arna mbailíochtú ag Saotharlann Tagartha an Aontais arna bunú faoi Rialachán (CE) Uimh. 1829/2003, arna bhfoilsiú ag https://gmo-crl.jrc.ec.europa.eu/method-validations;

(3)

ábhar tagartha: AOCS 1011-A (le haghaidh MON-883Ø2-9) agus AOCS 0304-A (le haghaidh a mhacasamhail nach bhfuil géinmhodhnaithe), tá rochtain orthu tríd an American Oil Chemists Society (AOCS) ag https://www.aocs.org/technical-products/certified-reference-materials-crms/.

(e)

Aitheantóir uathúil:

MON-883Ø2-9

(f)

Faisnéis a cheanglaítear de bhun Iarscríbhinn II a ghabhann le Prótacal Cartagena ar an mBithshábháilteacht a ghabhann leis an gCoinbhinsiún maidir leis an Éagsúlacht Bhitheolaíoch:

[Teach Imréitigh na Bithshábháilteachta, Uimhir aitheantais an chomhaid: arna foilsiú sa chlár Comhphobail de bhia géinmhodhnaithe agus beatha ghéinmhodhnaithe nuair a thugtar fógra faoi].

(g)

Coinníollacha nó srianta maidir leis na táirgí a chur ar an margadh, a úsáid nó a láimhseáil:

Ní gá.

(h)

Plean faireacháin um éifeachtaí comhshaoil:

Plean faireacháin um éifeachtaí comhshaoil i gcomhréir le hIarscríbhinn VII a ghabhann le Treoir 2001/18/CE ó Pharlaimint na hEorpa agus ón gComhairle (1).

[Nasc: plean arna fhoilsiú sa chlár Comhphobail de bhia géinmhodhnaithe agus beatha ghéinmhodhnaithe]

(i)

Ceanglais faireacháin iarmhargaidh maidir le húsáid an bhia lena chaitheamh ag an duine

Ní gá.

Tabhair faoi deara:

d’fhéadfadh sé gur ghá na naisc chuig doiciméid ábhartha a mhodhnú le himeacht ama. Cuirfear na modhnuithe sin ar fáil don phobal tríd an gclár Comhphobail de bhia géinmhodhnaithe agus beatha ghéinmhodhnaithe a thabhairt cothrom le dáta.

(1)  Treoir 2001/18/CE ó Pharlaimint na hEorpa agus ón gComhairle an 12 Márta 2001 maidir le scaoileadh orgánach géinmhodhnaithe amach d’aon ghnó sa chomhshaol agus lena n-aisghairtear Treoir 90/220/CEE ón gComhairle (IO L 106, 17.4.2001, lch. 1, ELI: http://data.europa.eu/eli/dir/2001/18/oj).


ELI: http://data.europa.eu/eli/dec_impl/2025/2542/oj

ISSN 1977-0839 (electronic edition)