(1)

Cuireadh acroiléin le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 12. Dá bhrí sin, de bhun Airteagal 86 de Rialachán (AE) Uimh. 528/2012, measadh an tsubstaint a bheith formheasta go dtí an 31 Lúnasa 2020 faoin Rialachán sin faoi réir na gceanglas a leagtar amach in Iarscríbhinn I a ghabhann le Treoir 98/8/CE.

(2)

An 28 Feabhra 2019, cuireadh isteach iarratas i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le hacroiléin a úsáid i dtáirgí bithicídeacha de chineál táirge 12 (“an t-iarratas”).

(3)

An 25 Feabhra 2020, chuir údarás inniúil meastóireachta na Seicia in iúl don Choimisiún gur chinn sé, de bhun Airteagal 14(1) de Rialachán (AE) Uimh. 528/2012, go raibh gá le meastóireacht iomlán ar an iarratas. De bhun Airteagal 8(1) den Rialachán sin, tá an t-údarás inniúil meastóireachta le meastóireacht iomlán a dhéanamh ar an iarratas laistigh de 365 lá tar éis a bhailíochtaithe.

(4)

Féadfaidh an t-údarás inniúil meastóireachta, de réir mar is iomchuí, é a chur de cheangal ar an iarratasóir sonraí leordhóthanacha a sholáthar chun an mheastóireacht a dhéanamh, i gcomhréir le hAirteagal 8(2) de Rialachán (AE) Uimh. 528/2012. Sa chás sin, cuirfear an tréimhse 365 lá ar fionraí ar feadh tréimhse nach faide ná 180 lá ar an iomlán ach amháin má tá údar maith le fionraí níos faide mar gheall ar chineál na sonraí a iarrtar nó mar gheall ar imthosca eisceachtúla.

(5)

Laistigh de 270 lá tar éis di moladh a fháil ón údarás inniúil meastóireachta, déanfaidh an Ghníomhaireacht Eorpach Ceimiceán (“an Ghníomhaireacht”) tuairim maidir le hathnuachan fhormheas na substainte gníomhaí a ullmhú agus a chur faoi bhráid an Choimisiúin i gcomhréir le hAirteagal 14(3) de Rialachán (AE) Uimh. 528/2012.

(6)

Le Cinneadh Cur Chun Feidhme (AE) 2020/1037 ón gCoimisiún (3), cuireadh ar atráth go dtí an 28 Feabhra 2023 dáta éaga an fhormheasa maidir le hacroiléin a úsáid i dtáirgí bithicídeacha de chineál táirge 12 chun go mbeidh go leor ama ann d’fhonn scrúdú a dhéanamh ar an iarratas.

(7)

An 12 Bealtaine 2022, chuir an t-údarás inniúil meastóireachta in iúl don Choimisiún go bhfuil moill ar an meastóireacht toisc gur gá measúnú a dhéanamh ar na sonraí breise a iarradh ar an iarratasóir. Tá coinne ag an údarás inniúil meastóireachta leis go gcuirfidh sé an tuarascáil ar an measúnú ar athnuachan faoi bhráid na Gníomhaireachta sa tríú ráithe de 2023.

(8)

Dá bhrí sin, ar chúiseanna nach bhfuil neart ag an iarratasóir orthu, is dóigh gur in éag a rachaidh an formheas sula nglacfar cinneadh maidir lena athnuachan. Dá bhrí sin, is iomchuí dáta éaga an fhormheasa a chur ar atráth go ceann tréimhse leordhóthanach chun gur féidir scrúdú a dhéanamh ar an iarratas. Agus na teorainneacha ama á gcur san áireamh leis an meastóireacht ag an údarás inniúil meastóireachta, le hullmhú agus cur isteach na tuairime uaithi ag an nGníomhaireacht, agus le haghaidh an Coimisiún a chinneadh an ndéanfar athnuachan ar an bhformheas maidir le hacroiléin lena húsáid i dtáirgí bithicídeacha de chineál táirge 12, ba cheart an dáta éaga a chur ar atráth go dtí an 28 Feabhra 2025.

(9)

Tar éis dáta éaga an fhormheasa a chur ar atráth, leanfaidh acroiléin de bheith formheasta lena úsáid i dtáirgí bithicídeacha de chineál táirge 12 faoi réir na gceanglas a leagtar amach in Iarscríbhinn I a ghabhann le Treoir 98/8/CE,